Жаздағыдан да жақсы: күзде теңізге түсуге болатын жерлер
Адам аз, баға да төмен ғажап кез.
Жазғы демалыс өтіп кетсе де, теңіз жағасында демалғыңыз келсе, күзде қайда баруға болады? Барқыт маусым — саяхаттауға ең қолайлы кезеңдердің бірі. Аптап ыстық басылады, жағажайдағы адам азаяды, ал қонақүйлер мен әуе компаниялары тамыздағы қарбаластан кейін бағаны түсіреді. Жүзім жинау кезінде жас шараптың дәмін татып, маржан рифтері маңында жүзіп, күн суытқанға дейін теңізге шомылып қайтуға болатын тоғыз бағытты назарыңызға ұсынамыз.
Батуми, Грузия
Виза: бір жылға дейін қажет емес.
Қалай жетуге болады: Алматы, Астана, Шымкент, Ақтау мен Атыраудан тікелей рейстер бар.
Күн райы: күндіз +22–25 °C.
Судың температурасы: Қара теңізде +23–24 °C.
Тамыз — Батуми мен бүкіл Грузия жағалауындағы ең қызу маусым. Сондықтан отбасымен арзан демаламыз деген сапар жағажайдан орын іздеу мен лифт алдында кезек күтумен өтуі мүмкін. Ал қыркүйек пен қазанда жаздағы қапырық ылғал азайып, туристер тарайды, баға да түседі. Мысалы, Hotel Green Glass қонақүйіндегі бір бөлме тамызда бір түнге 110 USD (шамамен 51 мың KZT) тұрса, қыркүйектің соңында 73 USD (шамамен 34 мың KZT) түседі. Қара теңіздің суы қазанның ортасына дейін жылы болады. Одан кейін күн салқындап, жаңбыр жиілеуі мүмкін.
Күзгі Грузияның басты ерекшеліктерінің бірі — Ртвели, яғни дәстүрлі жүзім жинау мерекесі. Батумиден Мачахела этноауылындағы шарап зауыттарына баруға немесе жүзім сығуға қатысу үшін Кахетияға аттануға болады. Ал жағалауда Батуми ботаника бағының аллеяларымен серуендеп, жағажайда күнге қыздырынып, аджар хачапуриін шыққан жерінде жеп көруге болады.
Анталья, Түркия
Виза: 90 күнге дейін қажет емес.
Қалай жетуге болады: Қазақстанның көп қаласынан тұрақты тікелей рейстер мен чартерлер бар.
Күн райы: күндіз +25–28 °C.
Судың температурасы: +24–25 °C.
Анталья — үй ішімен демалатын туристер көп баратын қала. Сондықтан жазда мұнда адам өте көп. Ал қыркүйектің ортасына қарай жағалау көлікпен саяхаттағанға қолайлы болады. Коньяалты жағажайында күн қатты күйдірмейді, ал теңіз суы қарашаға дейін жаздағыдай жылы болып тұрады.
Көлік жалдап, көрікті D400 тасжолымен батысқа қарай, Грекияны еске түсіретін Каш қаласына баруға болады. Жазда шағын қала туристерге толып кетеді, ал күзде жағалаудағы мейрамханалардан бос үстел тауып, тасбақалармен бірге жүзуге немесе Капуташ жағажайының шағын шығанағында шомылуға болады. Тарих қызықтырса, Сидеге барыңыз. Мұнда күн батарда Аполлон ғибадатханасының бағандарын тамашалауға болады.
Дубай, БАӘ
Виза: 30 күнге дейін қажет емес.
Қалай жетуге болады: Алматы, Астана, Шымкент және Ақтөбеден тікелей рейстер бар.
Күн райы: күндіз +31–34 °C.
Судың температурасы: +28–29 °C.
Қазанда Дубайдағы +45 °C-тан асатын жазғы аптап басылады. Сөйтіп, бір кондиционерден екіншісіне тығылып жүрудің қажеті болмайды. Қонақүйлер бағасы қысқы маусымдағы ең жоғары деңгейге әлі жетпейді, ал Парсы шығанағының суы өте жылы болады.
Күзде Дубайда далада ұзақ серуендеп, алғашқы он минутта күн өтіп кетеді деп қорықпай жағажайда жатуға болады. Дегенмен SPF жағуды ұмытпаған жөн. Kite Beach жағажайында сапборд жалдап көріңіз: күзде мұнда жергілікті серферлер жиналады, бірақ адам жаздағыдай көп емес. Күнді екіге бөліп жоспарлауға болады: таңертең суға түсіп, күнге қыздырынасыз, ал кешке қарай Alserkal Avenue шығармашылық ауданындағы көрмелер мен кофеханаларға барасыз, Даунтаун Дубайда серуендейсіз.
Будва мен Котор, Черногория
Виза: 1 мамырдан 1 қазанға дейін 30 күнге дейін визасыз кіруге болады.
Қалай жетуге болады: қазанға дейін Алматы мен Астанадан Подгорицаға тікелей чартерлер бар.
Күн райы: күндіз +23–26 °C.
Судың температурасы: +22–24 °C.
Қыркүйек пен қазанда Будвадағы туристер саны азайып, баспана бағасы түседі. Адриатика теңізі жаз бойы жиналған жылуын сақтайды, ал аптап ыстықтың беті қайтады.
Күзде көлік жалдаған да едәуір арзан. Сондықтан көне Которға барып, күн өтіп кетеді деп қорықпай әрі круиз кемелерінен түскен туристерге соқтықпай, Әулие Иоанн қамалына көтерілуге болады. Теңіз жағасында демалу үшін малтатасты Яз жағажайына немесе тыныш Пераст елді мекеніне барған жөн. Отбасылық конобада грильде піскен теңіз өнімдерінен кешкі ас шамамен 30 EUR (шамамен 16 мың KZT) тұрады.
Бірақ бір маңызды жайт бар: 1 қазанда визасыз режим аяқталады. Сондықтан елге осы күнге дейін кіріп үлгеру керек не виза рәсімдеу қажет. Ал елден 1 қазаннан кейін шығуға болады. Ең бастысы — Черногорияда 30 күннен артық қалмау.
Ксамиль мен Влёра, Албания
Виза: 90 күнге дейін қажет емес.
Қалай жетуге болады: Ыстанбұл немесе Подгорица арқылы ауысып мінетін рейстер бар.
Күн райы: күндіз +24–27 °C.
Судың температурасы: +22–24 °C.
Ксамиль курортын ақшыл құмы мен мөлдір көгілдір суына байланысты «Еуропаның Мальдив аралдары» деп атайды. Бірақ ел шағын болғандықтан, жаздың қызған шағында мұнда адам тым көп болады. Қыркүйекте туристер азайып, Влёра мен Ксамильдегі пәтер иелері тұру бағасын түсіреді.
Ксамиль жағажайының дәл жанында Бутринти археологиялық паркі орналасқан. Антикалық дәуірдің қирандылары мен ғасырлық ағаштардың арасында жазғы аптапсыз серуендеген әлдеқайда жайлы. Ал Влёра жағалауындағы мейрамханаларда пеште піскен мидия не сегізаяққа тапсырыс беруге болады.
Шарм-эш-Шейх, Египет
Виза: Шарм-эш-Шейхке барсаңыз, 15 күнге тегін Синай мөрі қойылады. Елдің басқа аймақтарына бару үшін виза қажет.
Қалай жетуге болады: Алматы, Астана, Шымкент пен басқа қалалардан тікелей чартерлер бар.
Күн райы: күндіз +28–31 °C.
Судың температурасы: +26–27 °C.
Қазан — Шарм-эш-Шейхте демалуға ең қолайлы кезеңдердің бірі. Шөлдің аптап ыстығы басылады, ал қыстағы жел әлі басталмайды. Теңіз суы жып-жылы, шыққыңыз келмей жүресіз.
Бағаның төмендеуінен бөлек, Шарм-эш-Шейх суасты әлемін жақсы көретіндер үшін де қолайлы. Ал күз — сноркелинг пен дайвингке жақсы уақыт. Су мөлдір әрі жылы, дауыл сирек болады, сондықтан су астындағы көрініс те анық. Маскаңызды алып, катермен Рас-Мохаммед теңіз қорығына барыңыз не Набк қорығындағы тыныш рифтерді зерттеңіз.
Ларнака мен Пафос, Кипр
Виза: Кипрдің ұлттық визасы немесе жарамды Шенген визасы қажет.
Қалай жетуге болады: Алматы мен Астанадан Ларнакаға тікелей рейстер бар.
Күн райы: күндіз +27–29 °C.
Судың температурасы: Жерорта теңізінде +24–25 °C.
Еуропадағы ең ұзақ барқыт маусымның бірі Кипрде болады. Ларнакада қарашаның алғашқы күндеріне дейін теңізге түсуге болады.
Жағажайдан бөлек, қала сыртына да шығып көрген жөн. Таңды Макрониссос жағажайында өткізуге немесе Пафос маңындағы әйгілі Афродита жартасында күннің батуын қарсы алуға болады. Ал күндіз көлікпен Троодос тауларына барып, Омодос шарап ауылына соғыңыз. Мұнда үйде дайындалған халуми ірімшігін жеп, күзде өтетін жергілікті жүзім жинау фестивальдеріне қатысуға болады.
Крит пен Родос, Грекия
Виза: Шенген визасы қажет.
Қалай жетуге болады: Афина не Ыстанбұл арқылы ауысып мінетін рейстер бар.
Күн райы: күндіз +25–27 °C.
Судың температурасы: +24–25 °C.
Қыркүйектің соңына қарай аптаптың орнына жайлы жылы күндер келеді, паромдарға кезек сиреп, қонақүйлер бағаны түсіреді. Криттегі Perla Beach Hotel қонақүйінде екі адамға арналған бөлме жаздың қызған шағында бір түнге 155 еуродан басталса, қазанның басында дәл сол бөлмені 85 еуроға брондауға болады.
Күзде таңды қызғылт реңкті құмымен танымал Элафониси жағажайында өткізуге немесе Родостың ортағасырлық ескі қаласының көшелерін аралауға болады. Бұл — зәйтүн мен жас шарап маусымы. Ретимно маңындағы отбасылық таверналарға кіріп, жаңа дайындалған мусака, дзадзики мен жергілікті теңіз өнімдерінен дәм татыңыз.
Акаба, Иордания
Виза: электронды визаны алдын ала рәсімдеу немесе әуежайға келген соң алу қажет.
Қалай жетуге болады: Ыстанбұл немесе Дубай арқылы Акабаға не Амманға ауысып мінетін рейстер бар.
Күн райы: күндіз +28–31 °C.
Судың температурасы: +25–26 °C.
Акаба — күзде күн демалысқа өте жайлы болатын тағы бір бағыт. Аптап ыстықтың орнына жайлы жылы күндер келеді, ал Қызыл теңіз мұнда Египеттегідей әдемі.
Сноркелинг үшін қайық жалдаудың да қажеті жоқ. Aqaba Marine Park қорығында маржандар мен түрлі түсті балықтарды жағадан бірнеше метр жерде-ақ көруге болады. Ал күзгі Иорданияның негізгі артықшылығы — Вади-Рам шөліне сапар шегу не жартастар арасына салынған Петра қаласын жаяу аралау мүмкіндігі. Жазда мұнда ауа температурасы көбіне +40 °C-тан асып кетеді.
Суретті салған — Кира Кустова.
