Alipay, Amap пен DiDi: Қытайда қажет болатын қосымшалар
Тамаққа да, көлікке де сол қосымшалар арқылы төлейсіз.
Алғаш барған адам былай тұрсын, талай елді аралаған саяхатшының өзі Қытайда абдырап қалуы мүмкін: тілі бөлек, төлем жүйелері, карталары мен әлеуметтік желілері де бізге таңсық. Сондықтан тамаққа, жолақыға қиналмай төлеп, такси шақырып, жақындарыңызбен байланысып жүру үшін алдын ала дайындалып қойған дұрыс. Бұл мақалада Қазақстаннан Қытайға баратын туристерге қажет болатын қосымшаларды топтап шықтық. Олардың арасында карта, аудармашы, метроға төлеу мен тамақ жеткізу сервистері бар.
- Қытайда қандай карта қолданған дұрыс?
- Қытайда таксиді қалай шақыруға болады?
- Қытайға барарда қандай VPN орнатқан дұрыс?
- Қытайда қандай аудармашы жұмыс істейді?
- Қытайда төлем жасауға және сөйлесуге қандай қосымшалар керек?
- Қытайда тамаққа қандай қосымша арқылы тапсырыс беруге болады?
- Қытайда мейрамхана мен қызық жерлерді қалай табуға болады?
- Қытайға барар алдында қандай қосымшаларды жүктеп алу керек?
- Жиі қойылатын сұрақтар
Қытайда қандай карта қолданған дұрыс?
Алдымен картадан бастайық. Қытайда 2GIS жұмыс істемейді, ал Google Maps дұрыс ашылмауы мүмкін. Сондықтан жергілікті қосымшаларды пайдаланған жөн. Олар Қытайдағы координат жүйесіне бейімделген, метроның қай жағынан шығу керегін, қай жерде басқа пойызға ауысатыныңызды көрсетеді. Кейбірінің картасын алдын ала жүктеп алсаңыз, интернетсіз де қолдана аласыз.
Төменде негізгі карта, қосымша балама және интернетсіз серуендеуге арналған бірнеше сервис бар.
Amap
Жүктеп алыңыз: App Store, Google Play.
Amap — Қытайдағы танымал карта қосымшаларының бірі. Ағылшынша интерфейсі бар, сондықтан туристерге ыңғайлы.
Қосымша жаяу, қоғамдық көлікпен не машинамен баратын жолды көрсетеді. Кептелісті, метро станцияларының есігін көруге, тіпті такси шақыруға болады.
Картаны пайдалану үшін тіркелу міндетті емес. Ал такси шақырғыңыз келсе, телефон нөмірімен не басқа аккаунт арқылы кіру қажет болуы мүмкін. Ағылшынша нұсқасында жергілікті тұрғындардың пікірлері үнемі көрсетіле бермейді. Оларды төменде айтылатын Baidu Maps қосымшасынан қараған ыңғайлы.
Baidu Maps
Жүктеп алыңыз: App Store, Google Play.
Baidu Maps — Amap-тың бәсекелесі. Қытайдың шағын қалаларында кейде тіпті толығырақ ақпарат көрсетеді.
Бірақ бір кемшілігі бар: қосымша түгелдей дерлік қытайша. Ағылшын тілі жоқтың қасы. Есесіне жергілікті тұрғындардың бағалары мен тағам суреттері бар. Сондықтан дәмхана таңдағанда, пікір оқығанда пайдалы.
Картадан жол қарау үшін тіркелу қажет емес. Ал такси шақыру үшін аккаунт ашуға тура келеді.
Maps.me
Жүктеп алыңыз: App Store, Google Play.
Maps.me — Қытай шығармаған, халықаралық қосымша. Оның басты артықшылығы — интернетсіз жұмыс істейді.
Ол үшін баратын қалаңыздың картасын телефонға алдын ала жүктеп алыңыз. Содан кейін интернет болмаса да, жаяу жүретін бағытты құрып береді. Интерфейсі ағылшынша және орысша.
Дегенмен қоғамдық көлік пен мекемелердің жұмыс уақыты Amap-тағыдай толық көрсетілмеуі мүмкін. Сондықтан Maps.me-ні қосымша карта ретінде сақтап қойған дұрыс. Тіркелудің қажеті жоқ.
MetroMan
Жүктеп алыңыз: App Store, Google Play.
Қытайда қоғамдық көлікке де QR-код арқылы төлеуге болады. Оны Aliay не WeChat қосымшасынан ашып, метроға кіргенде және шыққанда сканерлейсіз. Әр қала үшін төлем кодын бөлек қосу қажет болуы мүмкін. Кодты көрсетуге интернет керек, ал жолды MetroMan арқылы жоспарлай аласыз.
MetroMan — Пекин, Шанхай, Гуанчжоу, Чэнду, Сиань мен басқа да ірі қалалардың метро картасы бар қосымша. Қытайда оны Ditie Tong деп те атайды.
Қосымша жолға қанша уақыт кететінін, билет бағасын, қай станцияда ауысу керегін және қай есіктен шыққан дұрыс екенін көрсетеді. Интерфейсі ағылшынша, тіркелу қажет емес. Метро карталарын алдын ала жүктеп алсаңыз, интернетсіз де пайдалана аласыз. Қосымшаны жүктеп алыңыз, қолдануға VPN керек емес. Тек жолға шығар алдында карталарды жаңартып алыңыз.
Автобуста QR-кодты мінгенде сканерлейсіз. Кей қалаларда түскенде де сканерлеу керек, өйткені жолақы жүрген қашықтыққа қарай есептеледі. Бір код бір адамға ғана арналған. Сондықтан бірге жүрген әр адамның өз телефоны болғаны дұрыс.
Қытайда таксиді қалай шақыруға болады?
Қытайдағы негізгі такси сервисі — DiDi. Жұмыс істеу тәсілі «Яндекс Go» не inDrive сияқты: қай жерден қай жаққа баратыныңызды көрсетесіз, бағасын көресіз де, машинаны күтесіз.
Көшеден такси тоқтатқаннан гөрі қосымша арқылы шақырған ыңғайлы әрі қауіпсіз. Жүретін жолыңыз бен бағасы алдын ала көрінеді. Мекенжайды ағылшынша жазуға не картадан көшіріп қоюға болады.
DiDi
Жүктеп алыңыз: App Store және Google Play.
DiDi — Қытайдағы ең кең тараған такси сервистерінің бірі. Тіркелу үшін телефон нөмірі керек. Қазақстандық нөміріңізді де қолдана аласыз. Баптаулардан ағылшын тілін таңдаңыз. Төлемді Visa, Mastercard картасымен немесе Alipay, WeChat арқылы жасауға болады.
Қосымшаны Қазақстанда жүргенде жүктеп алған дұрыс. Қытайға барған соң Android телефонына қажет нұсқасын орнату қиындауы мүмкін.
Такси жүргізушісі ағылшынша білмеуі ықтимал. Сондықтан қонақүй мен баратын жерлеріңіздің мекенжайын қытайша сақтап қойыңыз. Қажет болса, телефон экранынан көрсете саласыз.
Әуежай мен вокзалдарда ride-hailing немесе e-hailing деген жазуды іздеңіз. Қосымша арқылы шақырылған таксилер жолаушыларды арнайы белгіленген жерден алады.
Кейде жүргізушілер дұрыс адамды алып бара жатқанына көз жеткізу үшін телефон нөміріміздің соңғы төрт санын сұрайды екен. Алғашында не айтып жатқанын түсінбедік. Кейін аудармашының көмегімен білдік. Содан соң дұрыс таксиге отырғанымызды тексеру үшін телефонның калькуляторына сандарды теріп көрсететін болдық.
Alipay не WeChat арқылы такси шақыруға бола ма?
Иә, болад. Қытайға алғаш барған адамға бөлек қосымша орнатқаннан гөрі осы тәсіл ыңғайлы болуы мүмкін. DiDi сервисі Alipay мен WeChat ішінде де жұмыс істейді. Оны мини-қосымша деп атайды. Бөлек тіркелудің қажеті жоқ, жолақы тіркелген картаңыздан алынады.
Alipay-дан «Көлік» бөлімін ашып, такси таңдаңыз. Ал WeChat-тан іздеу арқылы DiDi мини-қосымшасын табыңыз.
DiDi-дің жеке қосымшасында төлем өтпесе, мини-қосымша арқылы байқап көріңіз. Amap арқылы да такси шақыруға болады, бірақ ол үшін тіркелу қажет.
Қытайға барарда қандай VPN орнатқан дұрыс?
Қытайдың құрлықтағы бөлігінде Google, YouTube, Instagram, Facebook, X, WhatsApp пен Telegram сияқты сервистерге кіру шектелген. Сондықтан әдеттегі мессенджерлерді, поштаңызды және бұлтта сақталған суреттерді пайдаланғыңыз келсе, алдын ала дайындалған дұрыс.
Оның бір жолы — VPN орнату. Ең бастысы, қосымшаны Қазақстанда жүргенде жүктеп, аккаунтыңызға кіріп қойыңыз.
Бір ғана VPN-ге сеніп қалмаңыз. Қытайда VPN-дердің жұмысы жиі шектеледі. Өткен айда істеген сервис бүгін қосылмауы мүмкін.
Мүмкіндік болса, екі түрлі компанияның VPN қызметін дайындап, қосылмай қалған жағдайда қолмен баптау нұсқаулығын сақтап қойыңыз. Кей қосымшаларда интернет трафигін жасыруға арналған Stealth, Obfuscation не NoBorders режимдері бар.
Тегін VPN-ді жалғыз байланыс құралы ретінде таңдамаған жөн. Олар тұрақсыз жұмыс істеуі мүмкін.
VPN-ге балама — eSIM немесе роуминг. Кей халықаралық eSIM мен роуминг қызметінде интернет шетелдік оператор арқылы өтетіндіктен, Google, Instagram және мессенджерлер қосымша баптаусыз ашылуы мүмкін. Бірақ қонақүйдің Wi-Fi желісіне қосылсаңыз, шектеулер қайта кездеседі. Байланыссыз қалудан қорықсаңыз, екеуін де дайындап қойған дұрыс.
Surfshark
Жүктеп алыңыз: App Store, Google Play.
Бағасы: ақылы, айына 4 USD (шамамен 1 808 KZT) басталады.
Surfshark — туристерге ыңғайлы VPN нұсқаларының бірі. Қытайдағы шектеулерді айналып өтетін NoBorders режимі бар. Оны барған соң баптаулардан қосып көруге болады. Кейде WireGuard арқылы қосылу көмектеседі. Оның баптауларын алдын ала сақтап алған дұрыс.
Қосымша iOS пен Android-та жұмыс істейді. Бір жазылымды шектеусіз құрылғыда қолдануға болады. Сондықтан бүкіл отбасы пайдаланса да жарайды.
ExpressVPN
Жүктеп алыңыз: App Store, Google Play.
Бағасы: ақылы, айына 5 доллардан басталады.
ExpressVPN баптауларға көп уақыт жұмсағысы келмейтін адамдарға ыңғайлы. Қосымша қажет қосылу тәсілін өзі таңдайды, интерфейсі де түсінікті. Бірақ Қытайда оның жұмысы әртүрлі. Кей саяхатшылар еш қиындықсыз пайдаланса, басқаларында бірден қосыла бермейді.
Жазылымыңыз бұрыннан болса, қосымша VPN ретінде сақтап қоюға болады. Ал тек Қытайға бару үшін жаңадан алғыңыз келсе, басқа нұсқалармен салыстырып көріңіз.
Proton VPN
Жүктеп алыңыз: App Store, Google Play.
Бағасы: тегін нұсқасы бар, ақылы тарифі айына 4 USD (шамамен 1 808 KZT) басталады.
Proton VPN — Швейцарияның сервисі. Онда интернет шектеулерін айналып өтуге арналған Stealth режимі бар. Қытай үшін оны Astrill мен Surfshark-қа қарағанда сирек ұсынады. Дегенмен қосымша VPN ретінде орнатып қоюға болады.
Тегін тарифінде интернет трафигіне шектеу жоқ, бірақ сервер таңдауы аз, жылдамдығы да төменірек болуы мүмкін.
Astrill VPN
Жүктеп алыңыз: App Store, Google Play.
Бағасы: айына 30 USD (шамамен 14 мың KZT).
Astrill — Қытайға барған саяхатшылар жиі ұсынатын ақылы VPN сервистерінің бірі. Онда шектеулерді айналып өтуге арналған StealthVPN режимі бар.
Бірақ жазылымы қымбат. Сондықтан қысқа сапарға тек сақтық үшін сатып алу тиімсіз болуы мүмкін. Қытайда ұзақ уақыт болғыңыз келсе не қашықтан жұмыс істеп, тұрақты интернет қажет болса, қарастыруға болады.
Қытайда қандай аудармашы жұмыс істейді?
Қытайда жергілікті тұрғындардың көбі ағылшынша сөйлемейді. Сондықтан мәзірді, көшедегі жазуларды түсіну немесе біреумен сөйлесу үшін аудармашы қажет болады. Суреттен мәтін оқитын, дауысты аударатын және интернетсіз жұмыс істейтін қосымшаларды дайындап алыңыз. Екі-үш түрлі аудармашы орнатқан дұрыс. Бірі қолжазбаны жақсы таныса, екіншісі сөйлемнің мағынасын дұрысырақ жеткізуі мүмкін.
Google Translate Қытайда ашылмауы мүмкін, сондықтан оған ғана сеніп қалмаңыз.
DeepSeek
Жүктеп алыңыз: App Store, Google Play.
Кәдімгі аудармашылар кейде сөзбе-сөз аударады. Ал жасанды интеллект мәтінді аударып қана қоймай, мағынасын түсіндіріп бере алады. Мысалы, мәзірдегі тағамның қандай екенін, екі түрлі кеспенің айырмашылығын немесе маңдайшадағы жазудың мағынасын сұрауға болады.
DeepSeek — Қытайда жасалған жасанды интеллект көмекшісі. Сондықтан оны жергілікті интернет арқылы VPN-сіз пайдалануға болады. Қосымша орысша және ағылшынша жұмыс істейді. Сурет пен файл да жүктей аласыз. Мысалы, мәзірді суретке түсіріп, «Мұнда қандай арзан әрі ащы емес тағам бар?» деп сұраңыз.
Бірақ төлқұжаттың суретін не басқа жеке құжаттарды чатқа жібермеген дұрыс.
Qwen
Жүктеп алыңыз: App Store, Google Play.
Qwen — Қытай компаниясы жасаған жасанды интеллект көмекшісі. Ол чат ішінде жүзден астам тіл мен диалектіден аударма жасай алады. Суреттегі жазуды таниды, ал теруге ыңғайсыз болса, сұрақты дауыстап қоюға болады.
Интерфейсі орысша және ағылшынша. Google Play-де қосымша Qwen Studio деп аталуы мүмкін.
ChatGPT, Gemini мен Claude
Қытайдың құрлықтағы бөлігінде батыстық жасанды интеллект сервистеріне кіру шектелген. Google қызметтерімен бірге Gemini де бұғатталған.
Егер осы қосымшалар қажет болса, оларды Қазақстанда жүргенде жүктеп, аккаунттарыңызға кіріп қойыңыз. Жолға шығар алдында VPN немесе интернеті басқа ел арқылы өтетін eSIM дайындаңыз.
Ал Қытайда жергілікті интернет арқылы жұмыс істейтін DeepSeek не Qwen қолдану оңайырақ болуы мүмкін. WeChat пен Alipay-дың өзінде де аударма мүмкіндігі бар. Чаттар мен мини-қосымшаларда аударманы қосып, мәзірді ағылшынша оқуға болады.
Microsoft Translator
Жүктеп алыңыз: App Store, Google Play.
Microsoft Translator қытай, орыс және қазақ тілдерін түсінеді. Суреттегі мәтінді де аудара алады. Интерфейсі орысша, ағылшынша. Негізгі қызметтерін пайдалану үшін тіркелу қажет емес. Бұл нұсқада интернетсіз аудару мүмкіндігі жоқ деп көрсетілген. Сондықтан оны тұрақты интернет болғанда қолданған дұрыс.
Baidu Translate
Жүктеп алыңыз: App Store. Android қолдансаңыз, осы тізімдегі басқа аудармашыны таңдаған оңайырақ.
Baidu Translate — Қытайдың Baidu компаниясы жасаған аудармашы. Жергілікті тұрғындарға арналғандықтан, қытайша сөйлесулер мен жазуларды жақсы таниды.
Сурет арқылы және дауыспен аудару мүмкіндігі бар. Қытайша-ағылшынша аудармаға арналған ақылы офлайн пакеттері де кездеседі. Басқа аудармашылар түсіндіре алмаған мәтінді осы қосымшадан тексеріп көруге болады.
Apple Translate
Жүктеп алыңыз: App Store. Тек iPhone мен iPad-та жұмыс істейді.
iPhone қолдансаңыз, телефонның өзінде аудармашы бар. Қажет тілдерді алдын ала жүктеп алуға болады. Камера арқылы маңдайшадағы жазуды оқиды, сөйлесу режимінде дауысты аударады.
Тіркелу қажет емес. Интерфейсінде орыс және қазақ тілдері қолжетімді болуы мүмкін, бірақ нақты аударма тілдерінің тізімін тексеріңіз. Күрделі тіркестер мен ұзақ сөйлемдерді кейде дұрыс аудармауы мүмкін. Сондықтан тағы бір аудармашыны дайындап қойған жөн.
«Яндекс Аудармашы»
Жүктеп алыңыз: App Store, Google Play.
«Яндекс Аудармашы» қазақ, орыс тілдерін біледі. Дауысты және суреттегі мәтінді аударады. Қытай тіліне арналған пакетті алдын ала жүктеп алсаңыз, интернетсіз де пайдалана аласыз. Мәзірді немесе көшедегі жазуды түсінуге көмектеседі. Тіркелу қажет емес.
Қытайда қосымшаның жұмысы интернетке байланысты тұрақсыз болуы мүмкін. Сондықтан сапар алдында тексеріп, офлайн пакетті жүктеп қойыңыз. Жасанды интеллект арқылы аудару режимі де бар, бірақ ол қазақ тілін түсінбейді.
Қытайда төлем жасауға және сөйлесуге қандай қосымшалар керек?
Қытайда жұрт көбіне QR-код арқылы төлем жасайды. Банк картасын тікелей қабылдайтын жерлер де бар, бірақ мобильді төлем әлдеқайда кең тараған.
Негізгі екі қосымша — Alipay мен WeChat. Екеуін де Қазақстанда жүргенде дайындап алыңыз. Тіркеліп, қажет болса төлқұжат арқылы жеке басыңызды растаңыз, банк картаңызды қосыңыз. Сонда әуежайға түскен бойда төлем жасай аласыз. Тіркелгенде SMS-код келуі мүмкін. Сондықтан қазақстандық нөміріңізге хабарлама қабылдай алатыныңызды тексеріңіз. Қажет болса, роуминг қосыңыз.
Alipay мен WeChat-қа тіркелген шетелдік картамен 200 юаньға дейін төлегенде әдетте қосымша комиссия алынбайды. Ал 200 юаньнан асқан төлемге бүкіл соманың 3%-ы көлемінде комиссия есептелуі мүмкін. UnionPay карталарына шарт басқаша болуы мүмкін.
Alipay
Жүктеп алыңыз: App Store, Google Play.
Alipay — Қытайдағы ең кең тараған төлем қосымшаларының бірі. Сауда орталықтарында, дәмханаларда, тіпті көшедегі сатушыларға да QR-код арқылы ақша төлей аласыз. Екі тәсілі бар: сатушының QR-кодын сканерлейсіз не өз кодыңызды көрсетесіз. Көбіне екінші тәсіл қолданылады.
Қосымшаның ағылшынша және орысша интерфейсі бар. Ішінде аудармашы, қалалар туралы ақпарат және мини-қосымшалар жұмыс істейді. Солар арқылы DiDi таксиін шақырып, тамаққа тапсырыс беруге, қоғамдық көлік қызметтерін пайдалануға болады.
Шетелдік банк картасын тікелей тіркеуге болады. Телефон нөмірімен тіркеліп, төлқұжат арқылы жеке басыңызды растаңыз. Содан кейін Visa не Mastercard картаңызды қосыңыз. Юаньмен жасалған төлемді банк өз бағамымен теңгеге айналдырады.
Жергілікті тұрғындардың көмегімен Alipay шотына юань аударту мүмкіндігі де болуы мүмкін. Бірақ мұндай аударымдарда аккаунтқа қойылған шектеулерді ескеру керек.
Жүктеп алыңыз: App Store, Google Play.
WeChat — мессенджер, әлеуметтік желі және төлем жүйесі бір қосымшаға біріктірілген сервис.
Қытайда оны жергілікті тұрғындармен, қонақүй қызметкерлерімен және гидтермен сөйлесу үшін қолданады. Мұражайлардағы, дәмханалар мен мейрамханалардағы QR-кодтар да WeChat ішіндегі мини-қосымшаларға апаруы мүмкін.
Интерфейсі орысша, ағылшынша. Қазақстанда жүргенде-ақ өз телефон нөміріңізбен тіркеле аласыз. Visa мен Mastercard карталарын «Әмиян» бөліміндегі «Карта қосу» арқылы тіркейді. 200 CNY (шамамен 14 мың KZT) асатын төлемдерге 3% комиссия алынуы мүмкін.
Кейде WeChat жаңа аккаунтты растау үшін бұрыннан тіркелген басқа пайдаланушының көмегін сұрайды. Мұндай жағдайда танысыңыздан көмек сұрап не қосымшаның қолдау қызметіне жазып көріңіз.
Қытайда тамаққа қандай қосымша арқылы тапсырыс беруге болады?
Қытайда тамақ жеткізу қызметі жақсы дамыған. Саяхатшылардың айтуынша, тапсырыс кейде жарты сағат шамасында келеді. Қосымшалар арқылы мейрамханадан тамақ, бабл-ти не азық-түлік алдыруға болады. Ең танымал сервистердің екеуі — Meituan Waimai мен Ele.me. Бөлек тіркелгіңіз келмесе, оларды Alipay не WeChat ішіндегі мини-қосымшалар арқылы пайдаланып көріңіз.
Meituan Waimai
Жүктеп алыңыз: App Store. Android-та жеткізу қызметі Meituan қосымшасының ішінде бар.
Meituan Waimai — Қытайдағы ірі тамақ жеткізу сервистерінің бірі. Онда акциялар мен купондар көп. Кейде тамақты дәмханада жегеннен гөрі тапсырыспен алдыру арзанырақ болуы мүмкін. Төлемді WeChat Pay не Alipay арқылы жасайды. Басты кемшілігі — жеке қосымшасында ағылшын тілі жоқ. Тіркелу үшін қытайлық телефон нөмірі де қажет болуы мүмкін.
Ал WeChat не Alipay ішіндегі Meituan мини-қосымшасында мәтінді автоматты түрде аударуға болады. Әдетте жергілікті нөмірсіз де қолдануға мүмкіндік бар. Автоматты аударма кейде түсініксіз болып кетеді. Сондықтан тағамды суретімен салыстырып таңдаңыз.
Ele.me
Ele.me — Meituan-ның басты бәсекелестерінің бірі. Ол Alibaba компаниясына тиесілі. 2026 жылы сервис Taobao Instant деген атаумен де жұмыс істейді. Сондықтан Alipay ішінен іздегенде eleme немесе «淘宝闪购» деп жазып көріңіз.
Мини-қосымша Alipay ішінде ашылады, төлем тіркелген карта арқылы жасалады. Әдетте бөлек тіркелу қажет емес. Интерфейстің кей бөліктерін ағылшыншаға аударуға болады.
Қытайда мейрамхана мен қызық жерлерді қалай табуға болады?
Төмендегі сервистер қайда тамақтануға, не көруге болатынын және билет сатып алудың жолдарын көрсетеді. Бәрін бірдей жүктеп алған міндетті емес. Бірақ кейбірінен жергілікті тұрғындардың пікірлерін оқып, жеңілдік купондарын табуға болады.
Dianping
Жүктеп алыңыз: App Store және Google Play.
Dianping — Қытайдағы мейрамханалар мен басқа да орындар туралы пікір оқуға арналған сервис. Ол Meituan-мен байланысты.
Қосымшада рейтингтер, келушілер түсірген суреттер және туаньгоу деп аталатын купондар бар. Мұндай купон арқылы дайын тағам жиынтығын мәзірдегі бағадан арзан алуға болады. Телефон нөмірімен не WeChat арқылы кіресіз. Төлемді Alipay не WeChat Pay арқылы жасауға болады.
Жергілікті тұрғындардың пікірлері автоматты түрде аударылмауы мүмкін. Бірақ интерфейсті ағылшыншаға ауыстырып көріңіз: «Мен» бөліміне кіріп, баптауларды ашыңыз. Ондай мүмкіндік болмаса, телефон тілін ағылшыншаға ауыстырыңыз немесе Dianping-ті WeChat ішіндегі мини-қосымша арқылы ашып көріңіз.
Xiaohongshu
Жүктеп алыңыз: App Store, Google Play.
Xiaohongshu, яғни RedNote — Қытайдың әлеуметтік желісі. Онда жергілікті тұрғындар дәмханалар, саяхат бағыттары және көрікті жерлер туралы жазып, суреттерін жариялайды.
Кәдімгі туристік нұсқаулықтарда жоқ қызық орындарды осы жерден табуға болады. Шетелдік телефон нөмірімен, Apple не Google аккаунты арқылы тіркелуге болады.
Жазбалардың көбі қытайша. Бірақ аудару батырмасы және ағылшынша интерфейс бар. Орындарды ағылшынша хэштегтер арқылы да іздеуге болады. Мысалы, қала атауына Expat немесе International сөздерін қосып көріңіз.
Қосымша қытайлық компанияға тиесілі, ал пайдалану шарттары қытайша жазылған. Қандай деректеріңізді жинайтынын білгіңіз келсе, шарттарын аудармашы арқылы оқып шығыңыз.
Trip.com
Жүктеп алыңыз: App Store, Google Play.
Trip.com — Қытайдың Ctrip сервисінің халықаралық нұсқасы. Ол арқылы қонақүй, жүрдек пойыз билеттерін, мұражайлар мен саябақтарға кіру билеттерін және ағылшынша сөйлейтін гидтердің экскурсияларын брондауға болады.
Интерфейсі ағылшынша. Электрондық поштаңызбен не шетелдік телефон нөмірімен тіркеле аласыз. Қытайлық нөмір қажет емес. Visa мен Mastercard карталары қабылданады.
Меніңше, Қытайда карта мен төлем қосымшаларынан кейін ең керектісі — Trip.com. Сиань қаласына барғанда Терракота армиясы мұражайына және басқа көрікті жерлерге билетті осы жерден сатып алдық. Қосымшада “Шабыт” деген бөлім бар екен. Онда пайдаланушылар қызық жерлердің тізімін жариялайды. Бір жер ұнаса, сол жерден іздеп тауып, билетін бірден сатып аласың.
Қытайға барар алдында қандай қосымшаларды жүктеп алу керек?
Сапарға қажет ең негізгі қосымшаларды бір жерге жинадық.
- Alipay — төлем жасау, такси шақыру және мини-қосымшаларды пайдалану.
- WeChat — хабарласу, төлем жасау және мұражайлар мен дәмханалардағы QR-кодтарды ашу.
- Amap — ағылшынша карта мен навигация.
- DiDi — такси шақыру. Мини-қосымша пайдаланғыңыз келмесе, бөлек орнатыңыз.
- Аудармашы — қытай тілін түсінетін, интернетсіз жұмыс істейтін қосымша. Мысалы, DeepSeek, «Яндекс Аудармашы» не Apple Translate. Жасанды интеллект қосымшаларына интернет қажет болуы мүмкін.
- MetroMan — метро карталары мен интернетсіз бағыт қарау.
- Maps.me — байланыс жоғалғанда пайдаланатын офлайн карта.
- Trip.com — пойызға, мұражайға және басқа көрікті жерлерге билет алу.
- VPN және eSIM — Қытайда шектелген сервистерге кіру және байланыста болу.
Мұның бәрін Қазақстанда жүргенде, интернетіңіз тұрақты істеп тұрған кезде жүктеп алыңыз. Ұшаққа отырар алдында Alipay-ға банк картаңызды қосып, eSIM-ді баптап қойыңыз. Қытайға түскенде интернет те, такси де бірден қажет болуы мүмкін. Қонақүй мен барғыңыз келетін негізгі орындардың мекенжайын қытайша сақтаңыз. Брондау құжатының скриншотын да түсіріп алыңыз.
Жиі қойылатын сұрақтар
Қытайда Google Maps қолдануға бола ма?
Қолдануға тырысып көруге болады, бірақ Қытайдың құрлықтағы бөлігінде Google қызметтеріне кіру шектелген. Оның үстіне Google Maps пен Қытайдың жергілікті карталары әртүрлі координат жүйесін қолданады. Соның салдарынан картадағы белгі нақты орыннан бірнеше жүз метрге жылжып көрінуі мүмкін. Сондықтан Қытайда Amap, Baidu Maps не iPhone-дағы Apple Maps қолданған дұрыс. Ал Гонконг пен Макаода Google Maps әдеттегідей жұмыс істейді.
Қытай тілін білмей-ақ жергілікті қосымшаларды қолдануға бола ма?
Иә. Amap, Alipay, WeChat және DiDi қосымшаларында ағылшынша интерфейс бар. Meituan мен Dianping сияқты сервистерді аударма мүмкіндігі бар мини-қосымшалар арқылы қолдануға болады. Суреттен аударатын қосымша мен қытайша сақталған мекенжайлар да көмектеседі. Жүргізушіге немесе курьерге көрсететін мәліметтерді алдын ала қытайша сақтап қойыңыз.
Қытай қосымшаларына қазақстандық нөмірмен тіркелуге бола ма?
Иә. WeChat, Alipay, Trip.com және Xiaohongshu сияқты сервистер шетелдік нөмірмен тіркелуге мүмкіндік береді. Ең бастысы — SMS арқылы келетін растау кодын алу. Сондықтан қосымшаларды Қазақстанда жүргенде орнатып, тіркеліп алыңыз.
Ал Қытайда тіркелу қажет болса, қазақстандық нөміріңізге роуминг қосылғанын тексеріңіз. Meituan сияқты кей қосымшалар жергілікті нөмір сұрауы мүмкін. Ондайда Alipay немесе WeChat ішіндегі мини-қосымшаларын пайдаланып көріңіз.
Қытайда қандай шетелдік мессенджерлер жұмыс істемеуі мүмкін?
Қытайдың құрлықтағы бөлігінде Telegram, WhatsApp, Instagram, Facebook, X, Signal, Viber, YouTube және Google қызметтеріне кіру шектелген. Сондықтан сапар алдында VPN орнатып немесе шетелдік желі арқылы интернет беретін eSIM дайындап алған дұрыс.
Ал жергілікті тұрғындармен, қонақүй қызметкерлерімен және гидтермен сөйлесу үшін WeChat қолдануға болады.
Суретті салған — маша пипетка.
