Шыңына көз жетпес Доломит: Италиядағы Альпіде бес күн не көрдім?
Көкпеңбек көлдері көз алдымнан кетер емес.
Доломит — Италияның солтүстігіндегі Альпінің бір бөлігі. Бұл жерге жұрт көз жетпес заңғар шыңдарын, жап-жасыл жазығы мен көкпеңбек көлдерін көруге келеді. Доломитте биіктігі 3000 метрден асатын 18 шың бар, ал оның тоғыз бөлігі ЮНЕСКО-ның дүниежүзілік мұралар тізіміне енген. Туристер қыста мұнда шаңғы тебеді, жазда көлдері мен асуларын аралап, тауға шығады.
Биыл жазда осы тауларды бес күн аралап шықтым. Кортина-д’Ампеццоны база етіп алып, Lago di Sorapis көліне жаяу бардым, Tre Cime di Lavaredo мен Passo Giau-ды көрдім, аспалы жолмен Faloria-ға көтерілдім. Негізінен автобуспен жүрдім. Бұл мақалада Доломитке қалай жеткенімді, қай жерлерге барғанымды, жолдың қаншалық қиын болғанын және сапарда қанша ақша кеткенін айтып беремін.
Қазақстаннан Доломитке қалай жетуге болады?
Қазақстаннан Доломитке бара жатсаңыз, Италияға кіру үшін Шенген визасы керек. Егер сапардағы негізгі ел Италия болса, визаны Қазақстандағы VFS Global визалық орталығы арқылы тапсырасыз. Ересектерге арналған қысқамерзімді Шенген визасының консулдық алымы — 90 EUR (шамамен 46 мың KZT), оған визалық орталықтың қызмет ақысы тағы қосылады.
Доломитке жетудің ыңғайлы жолдарының бірі — Венецияға ұшу. Астана мен Венеция арасында тікелей рейс жоқ, сондықтан Ыстанбұл, Прага, Варшава не басқа қалалар арқылы ауысып ұшуға тура келеді. Алматыдан да Венецияға көбіне ауысып ұшасыз. Билет іздегенде Венецияның Marco Polo (VCE) әуежайын көрсеткен дұрыс.
Венецияға жеткен соң Кортина-д’Ампеццоға автобуспен баруға болады. Cortina Express пен Dolomiti Bus автобустары Венецияның Marco Polo әуежайы мен Mestre теміржол станциясы жағынан Кортинаға қатынайды. Жол шамамен 2–3 сағат. Рейс саны мен кестесі маусымға қарай өзгеретіндіктен, сапар алдында қайта тексеріп, билетті ертерек алған дұрыс.
Доломитке қашан бардым, қалай жеттім?
Доломитте қыста тау шаңғысы маусымы болады. Көктемнің бір бөлігі, әсіресе наурыз-мамыр айлары — тыныш кезең: турист азайып, кей маусымдық автобустар тоқтауы мүмкін. Ал жазда тауда жаяу жүру — hiking маусымы басталады. Танымал көлдерге, асуларға және жаяу маршруттардың басталатын жерлеріне қоғамдық көлікпен жеткен де оңайырақ.
Мен шілденің ортасын таңдадым. Күн райы жаяу жүргенге жайлы болды, әрі барғым келген жерлердің бәріне дерлік автобус қатынады.
Өзімнің маршрутымды айтайын: мен әуелі Прагадан Венецияға жеттім. Ондағы Mestre станциясына барып, сол жерден автобуспен Кортина-д’Ампеццоға шықтым. Үш сағаттан асатын жолға автобус билеті — 17 EUR (шамамен 8 597 KZT).
Кортина-д’Ампеццо — Доломиттегі шағын курорт қала. Туристер де, италиялықтар да оны көбіне жай ғана «Кортина» деп атайды. Көлік жалдамай саяхаттайтын адамға бұл жер ыңғайлы: Доломиттің бірнеше танымал нүктесіне осы қаладан автобуспен жетуге болады.
Мен автобус кестесін алдын ала қарап жүрдім. Кортинаның орталығындағы туристік ақпарат орталығынан қағаз кестесін де алып алдым. Автобуспен көп жүретін болғандықтан, бірден үш күндік билет сатып алып, біраз ақша үнемдедім. Мен барған кезде ол 13 EUR (шамамен 6 574 KZT) тұрды. Ал билетті күн сайын бөлек алғанда күніне 5–6 EUR (шамамен 2 528–3 034 KZT) кетер еді.
Жете сала…
Бірінші күні Lago di Sorapis көліне бардым. Алдымен Кортинадан автобуспен Passo Tre Croci деген жерге жетіп алдым. Көлге жаяу жол осы жерден басталады.
Ресми маршруттың ұзындығы — шамамен 10,5 шақырым, оған төрт сағаттай уақыт беріледі. Бірақ мен демалыс пен көлдің басында өткізген уақытымды қосқанда, барып-қайтуға 5–6 сағат жұмсадым.
Жол жеңіл емес. Алғашқы бөлігі орман арасымен өтеді, кейін тар әрі биікте жатқан соқпақтар басталады. Кей тұста темір баспалдақпен көтеріліп, жартастың бойына тартылған арқаннан ұстап өту керек. Соған қарамастан Lago di Sorapis-ке баратын адам өте көп. Тар соқпақтардың кей жерінде өту үшін кезек күттім.
Ал діттеген жерге жеткенде алдыңыздан көкпеңбек көл мен оны айнала қоршаған таулар шығады. Көлдің басында екі сағаттай демалып, фото-видео түсіріп, кейін кері қайттым. Қонақүйге кешкі жетіден аса қатты шаршап оралдым. Тамақ ішіп, душқа түсіп, ерте ұйықтап қалдым.
Көлге жаяу жол осы сапардағы ең ауыр маршруттардың бірі болды. Сондықтан ұзақ жүруге шыдасаңыз әрі биіктегі тар соқпақтардан қорықпасаңыз барған дұрыс. Кішкентай баламен баруға мен кеңес бермес едім.
Өзіңіз барсаңыз, таймайтын тау аяқкиімін киіп, күннен қорғайтын крем жағып алыңыз. Су мен жолға нан, жеміс, тәтті сияқты жеңіл тамақ алып шыққан дұрыс.
Tre Cime di Lavaredo тауын айналу
Екінші күні инстаграмда хит болған, жазда туристерге лық толатын Tre Cime di Lavaredo-ға бардым. Атауын қазақша «Үш шың» деп аударуға болады.
Кортинадан автобуспен Misurina-ға жетіп алдым. Сол жерден Tre Cime di Lavaredo-ға баратын арнайы автобусқа отырдым. Misurina-дан шығатын автобусқа кезек көп болды. Мен барған кезде автобус шамамен 20 минут сайын жүрсе де, бір сағаттай кезекте тұрдым.
Tre Cime-ге жеткен соң тауды толық жаяу айналып шықтым. Оған үш-төрт сағаттай уақыт кетті. Мұнда да адам өте көп. Бірақ айнала әдемі болғандықтан, жолдың ұзақтығы аса білінбейді. Tre Cime мен оның айналасын сөзбен сипаттағаннан гөрі, фотоларын көрсете салған дұрыс.
15:00-ден кейін автобус аялдамасына келіп, тағы біраз кезекте тұрып, кері қайттым. Tre Cime-ге барсаңыз, автобустың кестесіне мұқият болыңыз. Мен барған кезде Misurina-дан Кортинаға соңғы автобустар кешкі алты шамасында жүретін. Мұндай кесте маусым сайын өзгеруі мүмкін, сондықтан тауға шықпай тұрып қайтар автобустың уақытын нақтылап алған дұрыс.
Passo Giau-ға саяхат
Үшінші күні Кортинадан автобуспен Passo Giau-ға бардым. Автобус тура асудағы көлік тұрағына жеткізеді. Айналаны жаяу аралау осы жерден басталады. Алдыңыздан қалпаққа ұқсайтын алып жартас шығады, айналасын ұзыннан созылған үшкір таулар қоршап жатыр. Аяғым жеткен жерге дейін асықпай жаяу жүріп, фото-видео түсіріп, түстен кейін Кортинаға қайттым.
Мен барған кезде Кортинадан автобус таңғы 10-дар шамасында шықты. Қайтар автобустардың арасы алшақ еді: маған ыңғайлы рейстер 15:00 және 17:00 шамасында болды. 11:00-ден 15:00-ге дейінгі уақыт Passo Giau маңын асықпай аралауға толық жетті. Бұл — маусымдық бағыт. Сондықтан менің сапарымдағы уақытқа сүйенбей, өзіңіз баратын күннің автобус кестесін алдын ала тексерген дұрыс.
Кортинаны аралап, Faloria-ға аспалы жолмен көтерілдім
Төртінші күні Кортинадан аспалы жолмен Faloria-ға көтерілдім. Мен барған кезде көтеріліп-түсу билеті 26 EUR (шамамен 13 мың KZT) болды.
Осыған дейін Доломиттің сілемдерін Кортинаның етегінен көріп жүрсем, енді жоғарыдан тамашаладым. Faloria-дан Кортина орналасқан аңғар мен айналадағы тау сілемдері анық көрінеді. Мұнда да жаяу жүретін соқпақтар бар. Солардың бірімен бір-екі сағат жүріп, айналаны араладым. Фотоға түсетін жер өте көп.
Ал бесінші күні Кортина қаласының өзін асықпай аралап, маңайындағы тауларды тамашаладым. Кешке автобуспен Венецияға қайттым. Қайтар билет те 17 EUR (шамамен 8 597 KZT).
Кортинадан Венецияға автобус күнде бірдей жиілікпен жүрмеуі мүмкін. Мен барған кезде күніне бірнеше рейс болды. Жолаушы көп болғандықтан, қайтар билетті бірнеше күн бұрын алып қойған едім.
Доломитке барарда ескеріңіз
Кортинада бес түнге үш-төрт жұлдызды қонақүй таңғы асымен 1 200 EUR (шамамен 607 мың KZT). Бұл — менің броньдаған қонақүйімнің сол сапардағы бағасы, сондықтан оны Кортинадағы барлық қонақүйдің орташа бағасы деп қабылдамаған дұрыс.
Түсте көбіне тауда жүргендіктен, супермаркеттен су, нан, тоқаш, жеміс пен тәтті алып шығатынмын. Ал кешке кафе-мейрамханалардан тамақтандым. Тамаққа күніне шамамен 20–25 EUR (шамамен 10–13 мың KZT). Көбіне мәзірден пицца, паста не бургер алдым. Жалпы Кортина мен Доломитке сапар Италияның басқа қалаларымен салыстырғанда сәл қымбат көрінді. Мысалы, Венецияда 10–15 EUR (шамамен 5 057–7 585 KZT) тамақтануға болатын.
Менің негізгі шығыным қонақүйге кетті. Оған қоса тамақ, Венеция мен Кортина арасындағы автобус, Доломит ішіндегі қоғамдық көлік және аспалы жол билеттеріне ақша жұмсадым. Ұшақ билеті бұл есепке кірмейді. Доломитте күн райы тез өзгеруі мүмкін. Тауда жауын жауып, жел көтеріліп, күн күрт салқындап кететін кездер болады. Сондықтан жолға шығар алдында сол күнгі болжамды тексеріп алған дұрыс.
Мен өзіммен жаңбырдан қорғайтын киім алып жүрдім. Тауда жел болғандықтан, жеңі ұзын жеңіл күрте де керек болды. Тауға шыққанда таймайтын аяқкиім міндетті. SPF 50 күннен қорғайтын крем, SPF бар ерінге арналған бальзам мен күннен қорғайтын көзілдірікті де ұмытпаған жөн.
Тағы қайда баруға болады?
Доломитті көлік жалдап та аралауға болады. Доломиттегі жолдардың кейбірі тар әрі ирелең. Сондықтан таулы жолда жүргізуге тәжірибеңіз болмаса, көлік жалдарда осыны ескерген дұрыс.
Дегенмен көлік болса, бір күнде көбірек жер көруге мүмкіндік бар. Доломит Альпілері өте үлкен, ал мен бес күнде оның Кортина маңындағы төрт-бес танымал жерін ғана араладым.
Туристер арасында Seceda мен Alpe di Siusi таулары да өте танымал. Олар Доломиттің басқа бөлігінде орналасқан, сондықтан Кортинадағы маршрутқа қоса салу оңай емес. Seceda мен Alpe di Siusi бағытын мен келесі сапарға қалдырдым.
