Ұшақтағы ең жайлы орын қайсы және оны қалай алуға болады?

Бірден айтайық, ұшақтағы ең жақсы орын мынау деп ешкім кесіп айта алмайды. Біреуге тыныш отырған маңызды болса, енді біреуге аяғын еркін созатын кеңістік керек. Кей жолаушы терезенің алдында отырсам дейді, ал кейбірі ұшақ қонғанда тезірек шыққысы келеді. Баламен саяхаттайтындар дәретханаға жақын отырсам деуі мүмкін. Ал енді біреу ұшақтың шайқалғаны азырақ сезілсе дейді. Арзан орын іздейтіндер де бар. Сондықтан орын таңдарда өзіңізге не маңызды екенін анықтап алыңыз. Бұл мақалада қай жолаушыға қай орын жайлы боларын егжей-тегжейлі түсіндіреміз. 

Ұшақтағы орындар қалай орналасады?

Ұшақ салонын шартты түрде алдыңғы, ортаңғы және артқы деп үш бөлікке бөліп алайық. Салоны тар ұшақтарда орындар көбіне 3+3 болып орналасады. Ал салоны кең ұшақтарда 2+4+2 не 3+4+3 болуы мүмкін. Қатардағы орындар да терезе түбінде, ортада және дәліз жағында деп үшке бөлінеді.

Орындар A, B, C, D, E, F және басқа әріптермен белгіленеді. Әдетте A мен F — терезе түбіндегі, C мен D — жолдың бойындағы, B мен E — ортадағы орындар. Бірақ бұл ұшақтың моделіне қарай өзгеруі мүмкін.

Апаттық шығу есігінің жанындағы қатарларда аяққа арналған орын көбірек. Ал алғашқы және соңғы қатарлардың да артық-кем тұсы бар. Сондықтан билет сатып аларда немесе онлайн тіркелгенде нақты рейстегі орындардың сызбасын қарап алған дұрыс. Интернеттен рейске шығатын ұшақтың борт нөмірін іздесеңіз, көбіне оның моделін және орындардың қалай орналасқанын көруге болады.

Ұшақтың қай бөлігінде отырған дұрыс?

Дәретхана мен борт асүйі көбіне ұшақтың алдыңғы және артқы жағында орналасады. Оларға жақын отырсаңыз, қажет кезде тұрып барған оңай. Бірақ бұл жерлерде адам көп жүретіндіктен, шу да көбірек болуы мүмкін.

Алдыңғы қатарлар

Ұшақтың алдыңғы жағындағы орындар жайлы саналады. Мұнда қозғалтқыштың дауысы азырақ естіледі, жолаушыларға қызмет көрсету ертерек басталады. Ұшақ қонғаннан кейін де сыртқа тезірек шығасыз. Бірақ мұндай орындар үшін әуе компаниялары жиі қосымша ақы алады.

Ортаңғы бөлік

Қанат орналасқан ортаңғы бөлікте ұшақтың шайқалғаны азырақ сезіледі. Сондықтан турбуленттік қатты сезбесем екен дейтін жолаушыларға бұл орындар қолайлы болады.

Артқы қатарлар

Ұшақтың артқы жағындағы орындар көбіне арзанырақ болады. Кей рейстерде мұнда бос орын қалу мүмкіндігі де жоғары. Бірақ қозғалтқыштың дауысы қаттырақ естілуі мүмкін, турбуленттік те көбірек сезіледі. Ұшақ қонғаннан кейін сыртқа соңғылардың бірі болып шығасыз.

Егер борттағы тамақ пен сусынның таңдауы шектеулі болса, қызмет көрсету артқы қатарларға жеткенше сіз қалаған тағам мен сусын таусылып қалуы мүмкін.

Қатардағы қай орынды таңдаған дұрыс?

Ұшақта жайлы отыру салонның қай бөлігін таңдағаныңызға ғана емес, қатардың қай жерінде отырғаныңызға да байланысты. Терезе түбіндегі, дәліз жағындағы және ортадағы орындардың артық-кемін тұсын жазып шығайық.

Терезе түбіндегі орын

Артық тұсы:

• Ұшу кезінде терезеден әдемі көріністі тамашалауға болады.
• Ұйықтағанға ыңғайлы, қабырғаға сүйеніп отыра аласыз.
• Басқа жолаушылар өтіп кетейінші деп мазаламайды.

Кем тұсы:

• Дәретханаға не дәлізге шығу үшін көршілеріңізді тұрғызуға тура келеді.
• Ұзақ рейсте орныңыздан тұрып, қозғалу қиындау болуы мүмкін.

Дәліз жағындағы орын

Артық тұсы:

• Кез келген уақытта оңай тұрып, жүріп келе аласыз.
• Дәретханаға бару үшін ешкімді тұрғызудың қажеті жоқ.
• Қол-аяғыңызды жиі созып отырғанға ыңғайлы.

Кем тұсы:

• Өтіп бара жатқан жолаушылар не арбамен қызмет көрсететін бортсеріктер мазаңызды алуы мүмкін.
• Ұйықтап отырғанда біреу қағып өтуі мүмкін.
• Қасыңыздағы жолаушылар өтіп кетейінші деп мазаны алады.

Ортадағы орын

Артық тұсы:

• Басқа орын қалмаса, қысқа рейсте отыруға болады.
• Үй ішімен не достарыңызбен бірге ұшсаңыз, ыңғайлы болуы мүмкін.

Кем тұсы:

• Екі жағыңызда да адам отыратындықтан, ең қолайсыз орындардың бірі саналады.
• Терезеден еркін қарай алмайсыз, дәлізге де еркін шыға алмайсыз.
• Қол тірейтін жерді еркін пайдала алмауыңыз мүмкін.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Ұшақта қай жерде турбуленттік азырақ сезіледі?

Турбуленттікті мүлде сезбей отыру мүмкін емес. Бірақ азырақ шайқалатын жерді таңдауға болады. Әдетте қанат орналасқан ұшақтың ортаңғы бөлігінде көп дірілдемейді. Себебі бұл жер ұшақтың ауырлық орталығына жақын орналасқан.

Ал ұшақтың алдыңғы және әсіресе артқы жағында турбуленттік қаттырақ сезілуі мүмкін. Сондықтан ұшқаннан қорықсаңыз не шайқалуды мүмкіндігінше аз сезінгіңіз келсе, қанат маңындағы орындарды таңдаған дұрыс.

Ұшақтағы ең қауіпсіз орын қайсы?

Ұшақтағы қай орынның ең қауіпсіз екеніне нақты жауап жоқ. Дегенмен кейбір зерттеуде апаттан ұшақтың артқы жағында отырған жолаушылардың аман қалу мүмкіндігі сәл жоғары болуы мүмкін екені айтылады. Себебі кей апат кезінде негізгі соққы ұшақтың алдыңғы бөлігіне түсуі мүмкін. Бірақ мұны барлық жағдайға ортақ ереже деуге болмайды. Сондықтан ең маңыздысы — қауіпсіздік белдігін тағу, экипаждың айтқанын орындау және ұшу алдында қауіпсіздік ережелеріне назар аудару.

Осы тақырыпта басқа не бар?

Ұшудан қорқатын едім, бірақ үрейді жеңдім. Жолын айтайын

Апаттық шығу есігінің жанындағы орындар

Апаттық шығу есігінің жанындағы орындардың үлкен артықшылығы — аяққа арналған кеңістіктің көбірек болатыны. Аяғыңызды созып отыра аласыз. Сондықтан бойы ұзын жолаушылар осы орындарды таңдайды.

Артық тұсы:

• Аяққа арналған орын кең.
• Ұзақ рейсте отырған ыңғайлырақ.

Кем тұсы:

• Мұндай орындар көбіне қосымша ақыға сатылады.
• Бұл қатарларға балаларға, жүкті әйелдерге, қарттар мен мүгедектігі бар адамдарға отыруға рұқсат етілмейді.
• Төтенше жағдай болса, мұнда отырған жолаушы экипажға апаттық шығу есігін ашуға көмектесуге дайын болуы керек.
• Кейбір ұшақтарда бұл қатардағы орындықтың арқасы толық шалқаймайды.
• Қолжүкті аяқтың астына қоюға болмайды. Оны жоғарғы сөреге салу керек.
• Бұл қатарларда жиналмалы үстел көбіне қол тіреуіштің ішіне орнатылады. Сондықтан орын сәл тар болуы мүмкін.

Баламен саяхаттағанда қай жерде отырған дұрыс?

Әуе компанияларының көбінде бесік (bassinet) орнатуға болатын арнайы орындар бар. Олар әдетте салонның алдыңғы жағындағы қабырғадан кейінгі бірінші қатарда (bulkhead) орналасады.

Баламен саяхаттағанда отырғанға жайлы орындар:

• Алдыңғы қатарлар — кей рейстерде мұнда бесік орнатуға болады.
• Дәліз жағындағы орын — қажет кезде баламен тұрып, жүргенге ыңғайлы.
• Дәретханаға жақын қатарлар — жөргек ауыстыру не басқа қажеттілік туғанда қолайлы.

Ескеретін жайттар:

• Дәретхана мен асүйге тым жақын отырсаңыз, шу көп болып, адамдар жиі өтіп жүруі мүмкін.
• Апаттық шығу есігінің жанындағы қатарларға балаларды отырғызуға рұқсат етілмейді.

Осы тақырыпта басқа не бар?

Балаға ұшақ билетін қалай сатып аламыз?

Баланы жеке саяхатқа қалай жіберуге болады?

Қысқа-нұсқа кесте

Ұшақтағы орынды қашан таңдауға болады?

• Билет сатып аларда. Көптеген әуе компаниясы билет рәсімдеген кезде орынды бірден таңдауға мүмкіндік береді. Кей жағдайда бұл қызмет ақылы. Әсіресе алдыңғы қатар немесе апаттық шығу есігінің жанындағы жайлы орындар үшін қосымша ақы алынуы мүмкін. Бірақ кейбір әуе компаниялары, мысалы Air Astana, онлайн тіркелу басталғаннан кейін бос орындарды тегін таңдауға мүмкіндік береді.
• Билет сатып алғаннан кейін. Әуе компаниясының сайтына не мобильді қосымшасына кіріп, броньды басқару бөлімі арқылы орынды өзгертуге болады.
• Онлайн тіркелу кезінде. Онлайн тіркелу (check-in) ашылғаннан кейін қалған бос орындардың бірін таңдауға болады. Көп жағдайда бұл — қосымша ақша төлемей орын таңдаудың ең қолайлы кезі.
• Тіркеу үстелінде. Әуежайда тіркелген кезде қызметкерден қандай бос орындар бар екенін сұрап, орныңызды ауыстыруға болады.
• Отырғызу қақпасында. Ұшақта бос орын қалса, отырғызу алдында орынды ауыстырып алуға болады.

Жиі қойылатын сұрақтар

Ұшақтағы ең жайлы орын қайсы?

Бұл сізге не маңызды екеніне байланысты. Ұйықтағыңыз келсе — терезе түбіндегі орынды, жиі тұрып жүрсеңіз — дәліз жағындағы орынды таңдаған дұрыс. Ал аяққа көбірек кеңістік керек болса, апаттық шығу есігінің жанындағы қатар ыңғайлы.

Турбуленттік қай жерде азырақ сезіледі?

Турбуленттік әдетте ұшақтың қанаты орналасқан ортаңғы бөлігінде азырақ сезіледі.

Бойы ұзын жолаушыға қай орын ыңғайлы?

Ең ыңғайлысы — апаттық шығу есігінің жанындағы қатарлар немесе бірінші қатардағы орындар. Бұл жерлерде аяққа арналған кеңістік көбірек.

Терезе түбіндегі орын жақсы ма, әлде дәліз жағы ма?

Терезе түбіндегі орын көріністі тамашалағысы немесе тыныш ұйықтағысы келетін адамға ыңғайлы. Ал дәліз жағында отырсаңыз, орныңыздан оңай тұрып, дәретханаға еркін бара аласыз.

Қонғаннан кейін ұшақтан тез шығу үшін қай жерде отырған дұрыс?

Алдыңғы қатарлар мен дәліз жағындағы орындардан ұшақтан тезірек шығуға болады. Бұл әсіресе келесі рейске ауысуға уақыт аз болғанда маңызды.

Соңғы қатардағы орынды таңдаған дұрыс па?

Соңғы қатардағы орындар кейде арзанырақ болуы мүмкін. Бірақ мұнда қозғалтқыштың дауысы қаттырақ естіледі, турбуленттік көбірек сезілуі мүмкін. Кей ұшақта соңғы қатардағы орындықтың арқасы толық шалқаймайды.

Ұшақтағы орынды тегін таңдауға бола ма?

Иә, бірақ бұл әуе компаниясы мен билет тарифіне байланысты. Кейбір әуе компаниялары билет сатып алғанда орынды тегін таңдауға мүмкіндік береді. Басқаларында орынды онлайн тіркелу кезінде тегін таңдауға болады немесе жүйе орынды өзі автоматты түрде береді.

Суретті салған —  маша пипетка.