Пекинде не көруге болады: Қытай астанасын аралап шығайық
Қытайда бәрі табылады деген рас-ау.
Сәлем, менің атым — Маша. Осы күзде мен Қытайды бір ай бойы аралап шықтым. Маршрутымның алғашқы нүктесі — Пекин болды. Мен онда бір апта жүрдім. Алып мегаполисте адасып қалмай, жоспар құруға көмектесетін бар мәліметті осы мақалаға жазып шықтым.
Пекинде қалай қатынаған дұрыс?
Қалада метромен жүрген — ең оңайы. Мұндағы метро желісі өте ауқымды болғанымен, бәрі түсінікті: кіреберісте соңғы станция мен билет санын таңдайтын автоматтар тұр. Жол ақысы қашықтыққа байланысты 220 теңгеден басталады, ал пойыздар таңғы бестен кешкі он бірге дейін қатынайды. Үлгермесеңіз таксиге отыруға тура келеді.
Автобустардың жайы қиын — аялдама атаулары ағылшын тілінде қайталанбайды, сондықтан белгісіз бағытқа кетіп қалуыңыз мүмкін. Жер астына түскіңіз келмесе, Meitan немесе Didi агрегаторлары арқылы такси шақырыңыз. Didi-ді тікелей Alipay қолданбасы арқылы пайдаланған ыңғайлы, сондықтан бөлек тіркеліп әуре болмайсыз.
Қытай астанасында не көруге болады?
Тыйым салынған қала мен Тяньаньмэнь
Тыйым салынған қала — бұрын императорлар тұрған, ал қазір әлемдегі ең сақ күзет бақылайтын жер. Жаппай тексеріске дайын болыңыз: кіреберісте бір сағаттық кезекте тұрасыз, бірнеше рет тексеруден өтесіз. Тіпті артық бірдеңе бар-жоғын тексеру үшін телефонымның қабын шешіп көрсетуді сұрады.
Билетті Trip.com сайтынан 4 580 теңгеге алдым, бұл — сатып алу қамын алдын ала ойластыру керек болатын жағдай. Іште туристер әдетте орталық ось бойымен құжынап жүреді. Күні бойы біреулердің желкесіне қарап жүргіңіз келмесе, бірден шеткі аулаларға бұрылып кетіңіз. Ол жақта да сол сәулет пен қызыл лак, бірақ әлдеқайда тыныш әрі емін-еркін суретке түсуге болады.
Сарай қабырғаларының дәл артында Тяньаньмэнь алаңы бар. Шыны керек, алаңның өзінде қызықтап қарайтын ештеңе жоқ — бұл кезінде Мао Цзэдун республиканы жариялаған жай ғана алып бетон плац. Мұнда жайдан-жай «қыдырып кіре» алмайсыз: жергілікті музейлердің біріне (мысалы, Мао кесенесіне немесе Ұлттық музейге) билет алу қажет. Ол жаққа кіру тегін, бірақ келу уақытын (слоттарды) WeChat немесе Trip.com арқылы алдын ала брондау керек. Олардың интерфейстері өте күрделі, сондықтан ең оңайы — қонақүй қызметкерлерінен көмек сұрау, олар сізді бірер минутта тіркеп береді.
Цзиншань паркі
Төбенің бес шыңы бар. Олардың әрқайсысында осындай павильон орналасқан
Тыйым салынған қаланы бөлек-бөлек емес, тұтастай көргіңіз келсе, Цзиншаньға барыңыз. Саябақ император резиденциясының дәл артындағы 45 метрлік жасанды төбеде орналасқан. Бұл — Пекинде күннің батқанын тамашалауға және сарайдың шексіз симметриялы шатырларын жоғарыдан қызықтауға ең тамаша жер. Соқпақтармен жоғары көтерілген қиын емес, ал шыңға шыққанда бүкіл қала алақандағыдай көрінеді. Билет құны 150 теңге (2 юань), оны бірдее кіреберістегі кассадан сатып алуға болады.
Аспан ғибадатханасы
Бұл жерде Мин әулетінің императорлары ғасырлар бойы егін бітік шығуын сұрап, құдайлармен тікелей келіссөз жүргізген. Бұрын мұнда өлім жазасына кесеміз деп қорқытып, қарапайым адамдарды кіргізбейтін. Қазір храмға кірген қиын емес — билет алсаңыз болды. Ғибадатхана іші — мінсіз геометрия: мұнда бәрі дөңгелек пішінді, себебі Қытайда шеңбер деген аспанды білдіреді.
Негізгі локацияларды — Аспан алтарі мен Мол өнім үшін мінәжат ету ғибадатханасын көру үшін міндетті түрде 2 500 теңгелік (34 юань) біріккен билет алыңыз. Арзан тариф алсаңыз, ғимараттардың ішіне кіре алмай, сырттағы саябақта серуендеп қана қайтасыз. Билеттер кассаларда немесе Trip.com сайтында онлайн сатылады.
Universal Beijing Resort паркі
Хәрри Поттер аймағында гиппогрифпен ұшқанды имитациялайтын аттракционға мінуге болады
Ең көрікті төбешіктердің бірі — Юра дәуірі саябағы аумағында орналасқан. Ол тура сарқыраманың астымен өтеді
Пекиндегі «Юниверсал» — Трансформерлерден бастап Кунг-фу Пандаға дейінгі жеті аумақтан тұратын алып киноәлем. Уақытыңыз тығыз болса, бірден «Хәрри Поттердің сиқырлы әлеміне» бет алыңыз. Хогсмидте серуендеңіз, «Үш сыпырғышта» түскі ас ішіңіз (кілегейлі сыраны алып көріңіз). Ал Хогвартс сарайы бұл әлемнен еш хабары жоқ адамды да таңдай қақтырады.
Билеттерді Trip.com сайтынан алған оңай — онда отбасылық пакеттер де, бірнеше күндік абонементтер де бар. Айтар ақылымыз: саяхатыңыз маусым кезіне сәйкес келсе, Fast Pass-қа ақшаны аямаңыз. Әйтпесе күніңізді аттракциондарда емес, ұзын-сонар кезекте тұрып өткізіп аласыз.
Ұлы Қытай қорғаны
Қорған мыңдаған шақырымға созылып жатыр, бірақ оның басым бөлігі — көрікті үйінді ғана. Бірнеше жаңартылған учаскеде ғана серуендеуге болады. Ең танымалы — Бадалин, бірақ жүздеген туриспен иін тіресіп жүргіңіз келмесе, Мутяньюйді таңдаңыз. Оған Пекиннен автобуспен не экскурсиямен жеткен оңай.
Мутяньюйге барар екі жол бар. Батыс бағыты (14-тен 20-мұнараға дейін) — бұл сіздің төзімділігіңізге сын, ол ұзақ әрі тіктеу. Шығыс бағыты (1-ден 6-мұнараға дейін) — жеңілірек әрі әдемі. Қорғанның өзіне күш сақтаймын десеңіз, екі бағыттың да бастапқы нүктесіне фуникулерге мініп көтерілуге болады. 15 мұнарадан өтіп, көріністерді тамашалап, суретке түскенге менің бес сағат уақытым кетті.
Тамақ пен шай ішетін жерлер
Қытай асханасы ауыз күйдірердей ащы деп шошуыңыз мүмкін, бірақ Пекинде бұл мәселе оңай шешіледі: мұнда біз үйренген тұшпара, күріш пен ет көп сататын дәмхана көп. Ол астан да тартынып тұрсаңыз, әбден таныс McDonald’s не KFC желілеріне барыңыз. Ал тез тамақтану үшін 7-eleven дүкеніне бас сұғыңыз. Онда онигири (күріштен жасалған үшбұрыштар) шамамен 540 теңгеден сатылады.
- Пекин үйрегі. Астананың негізгі гастрономиялық нүктесі. Шынайы дәм үшін бес рет Мишлен гидіне енген Yin San Dou Zhi дәмханасына барыңыз. Тұтас үйрек 14 600 теңге (198 юань) шығады. Бұл екі адамға артығымен жетеді, ал аспаз үйректі көзіңізше жіліктеп береді.
- Дамплингтер. Нағыз тұшпара жегіңіз келсе, Dumpling Xi желісіне барыңыз (логотипінде «жүгіріп бара жатқан тұшпара» бейнеленген). Таңдау өте көп: сиыр еті қосылған классикалық түрлерінен бастап асшаяннан жасалған түріне дейін бар.
- Шай. Қытайда бабл-ти мен салқын шай өте көп сатылады. HeyTea, ChaPanda, Naixue немесе Mixue Bingcheng сияқты тексерілген желілерден ішіп көрген дұрыс.
Ескеретін маңызды жайттар
Қытайда «Ұлы файруол» жүйесі орнатылған, сондықтан үйреншікті әлеуметтік желілер мен карталар онда істемейді. Байланыссыз қалмау үшін VPN (LetsVPN және Surfshark тұрақты жұмыс істейді) орнатыңыз немесе алдын ала eSIM қосып алыңыз.
- Виза. Қазақстан мен Қытай арасындағы келісім бойынша, қазақстандықтар елде 30 күнге дейін визасыз жүре алады. Бірақ шекарадан өтер кезде төлқұжатыңызды, кері қайту билеттеріңіз бен қонақүй бронын дайын ұстаңыз.
- Ақша. Қолма-қол ақшаны қабылдауға құлықсыз, ал жергілікті банктерде валюта айырбастаған қиын. Келе салысымен Alipay немесе WeChat Pay жүйелерін реттеп алыңыз. Оларға қазақстандық Visa және Mastercard карталарын оңай байланыстыруға болады. Маңызды кеңес: юаньді қолма-қол ақшаға әлі Қазақстанда жүргенде айырбастап алыңыз. Қытайда банктерде кезек көп, бюрократиясы тіптен қиын, ал картаңыз кенет жұмыс істемей қалса, «тірі» ақша керек болады.
- Навигация. Қытайда Google Maps-ты ұмытыңыз. Маршруттарды дәл көрсететін жергілікті Amap қолданбасын жүктеп алыңыз.
- Тіл. Ағылшынша сөйлейтіндер өте аз. Қолыңызда офлайн-аудармашы мен қонақүйдің қытай тіліндегі атауы жазылған скриншот болсын.
- Құжаттар. Төлқұжатты жиі тексереді, әсіресе орталықта, сондықтан тастамай алып жүріңіз. Ол саябақтарға билет ретінде де жүреді.
- Құрал-сайман. Таяқшалармен тамақтана алмасаңыз, сөмкеңізге кәдімгі шанышқы салып алыңыз. Дәмханалардың көбінде ол жоқ.
