Пекиндегі үш күн: базардан басталып, моншада аяқталған саяхат
Спойлер: тыйым салынған қалаға кіре алмадық.
Пекинге аяқ астынан жолым түсті: құрбыларыма қонақүйді тиімдірек брондау үшін алтыншы адам жетпей жатыр екен, ал менің саяхаттағым келіп, тап сол кезде бір жобадан ақша түсіп қалған. Сөйтіп кеттік дедім — 8 наурыз мерекесін Пекинде үш күн тойлап қайтатын болдық.
Жолға шықпас бұрын
China Southern Airlines-тан Алматы–Пекин–Алматы бағытына билеттерді 250 мың теңгеге алдық. Live Fortuna Hotel апарт-қонақүйін брондап, бос шабадандармен жолға шықтық (бұл лайфхакты инстаграмнан көргенбіз). Бір түн екі адамға шамамен 40 мың теңгеге шықты. Қонақүй өте қарапайым екен: біз оны жоғарғы қабаттағы қалаға қарап тұратын жабық бассейні үшін таңдап едік, бірақ одан түк көрінген жоқ — терезелері ашылғалы жуылмаған сияқты.
Құрбыларымның бәрі кәнігі саяхатшылар, сондықтан жолға тыңғылықты дайындалдық. Мына қосымшаларды жолға шықпай тұрып жүктеп алдық:
- Alipay — төлем жасауға, такси шақыруға, тамаққа тапсырыс беруге арналған негізгі қосымша.
- Baidu Translate — аударма үшін. Пекинде ағылшынша сөйлейтіндер аз, сондықтан кейде ишара тіліне көштік.
- Trip.com — экскурсияларға бронь жасау үшін.
- Airalo — E-sim сервисі.
- VPN — әрқайсымыз өзімізге бөлек жүктеп, ақысын төледік (мен VPN-Super таңдадым, бірақ ол кейде істемей қалып жатты).
Алғашқы әсерім
Пекинге жеткен бойда бір байқағаным — жергілікті халық сондай сабырлы екен. Ұстамды, мейірімді көрінді. «Mind your step. Mind your head» деген сияқты ізет пен ілтипатқа шақыратын жазулар жиі ұшырасады.
Қалада көпқабатты тұрғын үй өте-мөте көп, бірақ артық сән-салтанатсыз салынған. Пекин — сұп-сұр мегаполис: мұнда Бангкоктағы қызылды-жасылды жарқыраған көрініс жоқ не Дубайдай аста-төк байлық менмұндалап тұрмайды. Иә, жергілікті тұрғындар көлігінің терезесінен түкіре салуы мүмкін, бірақ көшелер тап-таза — қаптаған коммуналдық қызметкер қылтқысыз жұмыс істеп жүреді.
Қаладағы түтін мен тұмша Алматыдағыдай екен, сондықтан лас ауамен тыныстап жүрген қиын болса, маска ала барғаныңыз дұрыс.
Айтпақшы, такси бағасы Алматыдағыдай. Қауырт уақытта 3 шақырым жолға шамамен 2 400 теңге төледік.
Үш күнде не көріп үлгердік?
Тыйым салынған қалаға кіре алмадық: ол үшін алдын ала тіркелу керек екен, оның үстіне сол күндері партияның жыл сайынғы отырыстары өтіп жатты. Маршрутты анықтай алмай тұрғанда қасымызға полицейлер келді. Ешқандай негативсіз паспорттарымызды тексеріп, керісінше, жол сілтеп жіберді.
Сол маңдағы ескі сауда көшелерін араладық, бірақ ештеңе алмаймыз деп шештік — соңымыздан бір адам ілесіп, қалмай қойды. Сөйтіп такси шақырып, APM Mall-ға кетіп қалдық.
Қытайдағы шопинг — өзінше бір әлем: бүкіл зат жарқырап тұрады, тауарлар көздің жауын алады, ал бағасы басқа елдерге қарағанда төмен.
Жергілікті Uniqlo-да бағалар қалтаны қақпайды. Әрқайсымыз бірнеше пакет киім мен бүкіл отбасымызға арналған «бананка» сөмкелер алдық. Мысалы, дизайнермен коллаборациядағы джинсы шамамен 7 мың теңгеге түсті.
Ұлы Қытай қорғаны
Екінші күні алты адамға арналған такси жалдап, Қорғанға (Мутьяньюй учаскесі) аттандық. Жолға бір жарым сағат уақыт кетті. Барар жолда Қытайдың тұмса табиғатына тәнті болдым: ерекше үйлер, тақтайдай жол, қытай картиналарындағы мәуелі ағаштар.
Мынаны ескеріңіз: Билет алу тәртібін алдын ала зерттеп алыңыз. Кіру, фуникулер, қорғанның өзіне шығу сияқты әр кезеңге бөлек чек керек. Пекинде сервис кей жерлерде кенжелеп тұр — біз бұларды білмегендіктен, кассаға қайта барып, тағы билет сатып алуға мәжбүр болдық. Бірақ бұл машақат Қорғанды көргенде тез-ақ ұмытылады. Әлемнің жеті кереметінің бірі емес пе: онда уақыт тоқтап қалғандай, ал көріністен аузыңа сөз түспей, таңырқаумен боласың.
Таңдай қақтырар тұшпара
Қатты шаршап, 8 наурызды мейрамханада тойлауға шамамыз келмеді. Сондықтан блогер Зубаревтің ұсынысымен танымал Xi Jia De желілік тұшпараханасына бардық.
Порциялары үлкен әрі бәрі өте дәмді екен! Бір ескерту: егер қытай сырасын алсаңыз, оны жылы күйінде әкеледі. Алты адамға небәрі 16 мың теңге жұмсадық — бұл сапарымыздағы ең жағымды сәттердің бірі болды.
Қатты ұнаған жерлер
Моншаны соңғы күнге қалдырған едік. Күтпеген жерден бұл жер бүкіл сапарымыздың ең керемет сәтіне айналды. Менің жолдасым мен Қытайда оқыған достарым бұл жер туралы жиі айтатын. Мұндай демалысты жақсы көретін адам ретінде бұл жерге соқпай кете алмадым.
№ 9 монша немесе Hanjinbai No. 9 Hot Spring International Hotel (北京瀚金佰九号温泉国际酒店) — бұл бес қабатты алып кешен. Ішінде бәрі бар: ыстық бұлақтар, шексіз швед үстелі, бильярд, PlayStation аймағы, караоке, массаж бен ұйықтайтын бөлмелер.
Таңғы 10-да шықтық, алдын ала қонақүй қызметкерлерінен мән-жайды біліп алғанбыз. Брондаудың қажеті жоқ екен. Кассада паспорттарымызды сканерлеп, білезік пен тәпішке берді, ал шабадандарымызды қоймаға қабылдады.
Егер «Spirited Away» мультфильмін көрген болсаңыз, Юбабаның зәулім де әсем моншаларының елестете беріңіз.
Ішінде не бар екен?
- Киім ауыстыру және сервис: Әйелдер аймағында бірден жеміс принті бар киімдер береді. Мұнда косметика, кремдер, фендері бар үстелдер мен тегін сусындары бар шкафтар қойылған. Тіпті бір реттік іш киімдер де қарастырылған.
- Жуыну аймағы: Мұнда джакузилер бар, ереже бойынша оған тыр жалаңаш кіру керек. Атмосфера өте тыныш. Бөлек ақыға (шамамен 20 000 теңге) массаж не пилинг алуға болады.
- Фуд-зона: Мұнда керемет швед үстелі бар (бағасына кіреді), бірақ біз түскі асқа кешігіп, кешкі асты күтпедік. Есесіне жеміс-жидек барынан қалағанымызша дәм таттық: шырындар, йогурттар, жаңа піскен жемістер, жаңғақтар мен балмұздақ болды.
- Көңіл көтеру, лаунж: Жоғарғы қабаттарда караоке мен ойын аймақтары бар. Ашық аспан астындағы бассейндер өте сәнді жасалған. Кейбір жергілікті тұрғындардың таңырқап қарағанына қарамастан, демалыс өте жақсы өтті.
Ішінде ерекше спа-бөлмелер бар: бірі ыстық тастармен жабдықталған, екіншісі — тұзды блоктар мен жарық инсталляциялары бар арт-нысан сияқты. Сондай-ақ, фотосессия үшін ұлттық киімдері бар әдемі баспалдақты да таптық. Суретке түспей кете алмадық.
Рейске асыққандықтан моншада небәрі алты сағат болдық — бұл өте аз.
Шығарда 28 000 теңге төледім. Мұндай деңгейдегі жайлылық пен сервиске бұл баға әбден лайық. Сөзсіз баруыңыз керек жер!
Үйге толы шабаданмен ұшып келдім. Келесі жолы Қытайға тек тіс щеткасымен және бос сөмкемен барамын деп шештім, өйткені бәрін сол жерден сатып алған тиімдірек екен. Сапарым өте-мөте сәтті өтті!
