2025 жылы баруға болатын Қазақстанның үздік жағажайлары
Каспий, Балқаш, Қапшағай, Алакөл, Бурабай — Қазақстанның ең танымал жағажайларына шолу жасаймыз.
Жазғы демалысыңызды жағажайда күнге қызып, толқында тербеліп өткізгіңіз келсе, демалуға болатын жағажайлар тізімін ұсынамыз.
Каспий теңізі
Каспий — суы тұзды болғанымен, географиялық тұрғыдан Қазақстанның батысында орналасқан ең ірі тұйық көл. Ірілігі сонша, оның жағалауы Қазақстан, Түрікменстан, Әзірбайжан және Ресейге ортақ — сондықтан тарихи әрі саяси тұрғыдан Каспий «теңіз» аталып кеткен. Қазір оның жағасында еліміздің Маңғыстау, Атырау облыстары орналасқан.
Бүгінде таңғажайып шатқалдары мен толқындатқан теңізі бар Маңғыстау еліміздегі танымал демалыс аймағына айналды. Мысалы, былтыр Маңғыстауда 462 мыңнан астам адам демалған. Бұл көрсеткіш 2023 жылмен салыстырғанда 19%-ға өскен. Облыс әкімінің айтуынша, қазір Маңғыстауда «Жылы жағажай» мен «Кендірлі халықаралық әуежайы» салынып жатыр.
Каспийге жету үшін Астанадан не Алматыдан Ақтауға ұшаққа отыруға болады. Күнде рейс бар — 3 сағатта жетесіз. Асықпай барғанды жөн көрсеңіз, күнара жүретін пойыз бар, бірақ жолға 2–3 күн кетеді.
Каспийдегі жағажайлар
Ақтаудың өзінде «Манила», «Марракеш», «Солдатский», «НұрПлаза» қалалық жағажайлары орналасқан. Кіру тегін, бірақ шезлонг, дәретхана, душ сияқты қосымша қойлайлыққа ақша төлеу керек.
«Достар» — Ақтауға жақын орналасқан ақылы жағажайлардың бірі. Аумағында демалыс базасы бар: қонақүй, бассейн, футбол алаңы, сауна, мейрамхана мен кафе жұмыс істейді. Көп адам қонақүйге тоқтамай-ақ тек суға түсуге келеді. Үлкен немесе шағын самалжайларды жалдауға болады, жалдау құны сағат бойынша төленеді. Өз азық-түлігіңізді алып келіп, мангал аймағында тамақ пісіруге болады. Душ, дәретхана және киім ауыстыратын орындар бар.
«Голубая бухта» — Ақтаудан Форт-Шевченкоға барар жолда орналасқан суы көгілдір, жағасында құзы көп жағажай. Тегін, айналасы жабдықталмаған. Жұрт көбіне әсерлі көріністері мен әдемі фотосуреттер үшін барады.
Голубая бухта» маңында «Қарғыс атқан саусақ» атты жартас бар. Биіктігі 15–20 қабаттық үймен шамалас. Төбесінен теңізді өзге қырынан тамашалауға болады. Барар жолы алыстау демесеңіз, «Голубая бухтаның» суы таза, жартастары мен құздарының көрінісі көркем. Көктемде бұл жақтан итбалықтарды кездестіруге болады.
Құрық жағажайы Ақтаудан 70 шақырым жерде орналасқан. Арнайы жабдықталған жағажай жоқ, бірақ Құрық ауылының маңындағы теңіз жағасына демалушылар көп келеді.
Каспий маңындағы ұмытылмас естеліктердің бірі — Құрық жағажайы. Достарымызбен бұл жағалауда түнедік. Таптырмас таңдау болды: Сахара шөліндей құмды төбелер, мөлдір теңіз, көңіліңді тыныштыққа толтырған толқындар, ең бастысы — түндегі жұлдызды аспан. Күндіз суға түсіп, волейбол, футбол ойнасақ, кешке үстел ойындарын алып, уақытты қызықты өткіздік.
Кендірлі Ақтаудан 207 шақырым жерде орналасқан. Кендірлі шығанақта тұрғандықтан суы таяз, тез жылиды. Сондықтан бұл Маңғыстаудағы ең жылы жағажай. Оған жету үшін бірінші Ақтаудан Жаңаөзенге 150 шақырым, әрі қарай 60 шақырымдай Кендірліге жол жүресіз. Бұл жақта жабдықталған арнайы жағажай болмағанымен, жұрт өз заттарын әкеліп, демалып жатады. Жағада «Кендірлі» демалыс базасы жұмыс істейді. Аумағында қонақүй, коттедж, мейрамхана, бассейн, балалар ойын аймағы, фото-алаң бар.
Tree of Life — Ақтау маңындағы ең үлкен әрі жабдықталған жағажайлардың бірі. Ішінде бәрі бар: аквапарк, бассейн, қонақүй, монша, спорттық алаң, шатыр, тапшан, мангал алаңы. Мұнда да қонақүйді жалдамай-ақ, суға түсіп, жағажайда демалуға болады. Ересектер жағажай мен аквапаркке демалыс күндері 8 000 теңге, жұмыс күндері 6 000 теңге төлеп кіре алады. 6–12 жас аралығындағы балаларға — 4 000 теңге.
Caspiy Life — Ақтаудан бір сағаттық жерде тұрған отбасылық демалыс базасы. Кіру құны ересектерге 3 000 теңге болса, балаларға — 1 000 теңге. Бағасына шатыр, шезлоң, мангал, қазан, батут, балалар ойын алаңы, автотұрақ, душ пен әжетхана сияқты дүниелер кіреді. Одан бөлек квадроцикл, гидроцикл, «банан» сияқты қызықтарды жалдауға болады.
O’Mir Glamping — модерн-киіз үйлер мен этно стильді ұнататындарға арналған Ақтаудан 40 шақырым жерде орналасқан демалыс орны. Аумағында дәстүрлі тағамдарды ұсынатын мейрамханалар, спа, киіз үй іспеттес үйшіктер, балалар ойын алаңы бар. Жағажайға үй-жайын жалдамай да кіруге болады. Кіру құнына шезлоңдар, сүлгі, душ пен әжетхананы қолдану мүмкіндігі кіреді. Биыл бұл аймаққа ақылды капсулалар әкелінген.
Қапшағай су қоймасы
Алматы маңындағы Қонаев қаласында орналасқан көл. Ұзақ жол жүрмей-ақ жағажайда демалғыңыз келсе, таптырмас жер. Алматыдан такси не автобуспен 1 сағат 20 минутта жетуге болады. Қапшағай — Қазақстанның ең үлкен су қоймаларының бірі. Былтыр мұнда 1,5 миллион турист демалған. Жағасында ақылы да, тегін де жағажайлар бар. Жалпы Қапшағайда 140-тан астам демалыс орны қызмет көрсетеді.
Сондай жағажайлардың бірі — Dune Konaev Beach. Кіру құны адам басына 2 000 теңге, машинамен кіру 5 000 теңге тұрады. Аумағында кафе, шатырлар, мангал алаңы, шезлоңдар бар. Жағажай сары құммен көмкерілген.
Жағасы таза, бірақ таяз, жүзу үшін суды біраз кешіп жүру керек. Жағажай аумағында дәретхана, киім ауыстыратын жер бар. Тазалығы ұнады. Түнде суға түсуге болмайды. Арнайы бақылаушылар келіп ескертіп жүреді. Биыл біз газ-плитамызды апарып тамақ істеп, шатыр құрып, осы Dune Konaev Beach-те демалдық. Жағажайда катер, баллон, «бананмен» сырғанауға болады. Бәрі көңілімізден шықты. Былтыр тегін жағажайда болып едік, мүлде ұнамады. Ол жақта адам тым көп, айнала да лас. Кештеу барғандықтан масаға жем болдық.
«Золотые пески» — Қапшағай жағасында бірінші шепте тұрған демалыс базасы. Ішінде жазғы терассасы бар мейрамхана, үш түрлі бассейн, футбол алаңы, тапшан, самалжай мен қонақүй де бар. Айналасы көгалдандырылған, аспашамдар жағып, романтикалық кеш ұйымдастыруға болатын мүмкіндігі бар. Мейрам күндері әрі демалыста ересек адамға кіру құны 10 мың теңге болса, балаларға — 5 000 теңге.
«Ямайка» — үйшіктері, моншасы, караокесі, эконом-класс нөмірлері, үрмелі аквапаркі бар база. Жағажайдың бірінші шебінде тұр. Демалыс күндері аниматорлар келіп, балаларға ойын бағдарламасын өткізеді. Одан бөлек, катер, каяк, гидроцикл сияқты суда сырғанауға арналған қызықтар бар. Ересектер демалыс не мейрам күндері 9 000 теңге төлеп кіреді, балаларға — 4 000 теңге.
Балқаш көлі
Шығысы ащы, батысы тұщы Балқаш көлі еліміздің оңтүстік-шығысында орналасқан. Ем іздеген жұрт ондағы шипалы суы мен балшығын іздеп барады. Былтыр Балқашта 135 мыңнан астам адам демалған. Сондықтан ол — Қазақстандағы ірі демалыс орындарының бірі.
Алматыдан Балқаш шамамен 600 шақырым, Астанадан шамамен 700 шақырым, Қарағандыдан 380 шақырым жерде жатыр. Көлік те, пойыз да жүреді. Алматыдан тіке Балқашқа тақ күндері пойыз жүреді, жолға 15 сағат шамасында уақыт кетеді. Астана — Балқаш бағытында күнде жүретін пойыз да 15 сағатта жеткізеді.
Балқаш қаласында Қала жағажайы, «Барковское» жағажайы сияқты тегін жерлер бар, ақылы жағажайлар мен демалыс базалары да жұмыс істейді. Қаладан 18 шақырымдай жерде Тораңғылық ауылын көресі — ол жерде де суға түсуге ыңғайлы жағажай бар. Одан әрі Шұбартүбек ауылының жағажайында да суға түсе аласыз. Балқаш жағасының басым бөлігі қиыршық тасқа қолы, сондықтын ақылы жағажайлар мен демалыс базаларында жағаға құм төселген.
Тораңғылықтың сол жақ бетіндегі тегін жағажайға отбасыммен жиі барып тұрамыз. Төсенішіміз бен тамағымызды алып демаламыз. Бұл жақтың топырағы таза, суы мөлдір. Жергілікті халық көбіне осында жүреді.
Балқаштағы «Жемчужина» демалыс орны көл жағасының бірінші шебінде тұрған жоқ, бірақ алыс емес — 5–10 минуттық жерде. Ішінде сырғанақтары бар бассейн, әртүрлі нөмірлері бар қонақүй, мейрамхана, караоке жұмыс істейді. Ауласында газон төселген балалар ойын алаңы да орнатылған. Арасында аниматорлар келіп, балаларға сергіту бағдарламасын ұсынады.
Green Village — Балқаштағы жағаға тиіп тұрған демалыс базасы, бірінші шепте тұр. Аумағында түрлі-түрлі он үйшік бар. Одан бөлек мангал аймағы, балалар ойын алаңы, фото-алаң, гриль ошағы жасақталған.
Бурабай көлдері
Еліміздің солтүстігінде орналасқан, «Қазақстандағы Швейцария» деп аталып кеткен ерекше аймақ. Бал қарағайлы, биік таулы, мол сулы Бурабайға жұрт таза ауамен дем алып серуендеуге, велосипед теуіп көңіл көтеруге, табиғат аясында серігуге барады. Суға шомылып, құмда қыздырынатын турист те аз емес.
Бурабай қаласының өзінде Бурабай көлінің жағасында бірнеше жағажай тізіліп тұр. Әрқайсысында шезлоңдар, дәретхана, киім ауыстыратын жер бар. Қалаға өте жақын әрі жағажай бойымен серуендеуге ыңғайлы жол салынған. Бірнеше минуттық жерде хайуанаттар бағы мен аттракциондар бар. Кемпиңті жақсы көретіндер Family жағажайын қарастырса болады. Түрлі шатырлар мен самалжайлар, су жағасындағы әткеншек, гамактар мен пуффиктерді де осы жерден табасыз.
Бурабай маңында Айнакөл (Үлкен Шабақты), Шабақкөл (Кіші Шабақты), Бурабай, Щучье көлдері бар. Жұрт көбіне Айнакөлдің айналасындағы жағажайларда шомылады.
Жұмбақтасқа жақын жерде «Тещин язык» түбегі бар. Оның бойында ақылы да, тегін де жағажай жабдықталған. Ақылы жағажай шезлоңдарымен, шатырларымен ерекшеленеді. Түбекке барар жолда ақылы автотұрақ бар. Автотұрақтан түбекке қарай 500–700 метрдей жүру керек. Ақылы жағажай қызметкерлері заттарыңызды екі ортада мопедпен тасып береді. Ал түбектегі жағажайдың тегін бөлігінде екі үлкен самалжай мен мангал аймағы ғана қойылған.
Айнакөлдің жағасында орналасқан ауқымды демалыс орны — Aq Bura Park. Аумағында жалға берілетін киіз үйлер, самалжайлар, шатырлар мен трейлерлер бар. Одан бөлек автотұрақ, мейрамхана, барбекю алаңы да қарастырылған. Қарағайлы жерде орналасқандықтан серуендеуге де ыңғайлы. Территориясында ағаштан, тастан жасалған мүсіндер көп. Сонымен қатар бұл демалыс орнында лабиринт пен он жеті метрлік мұнара бар. Қонақтар оны аралап, Айнакөлді биіктен бақылай алады.
Биыл маусымда біз Бурабайдағы осы түбектің тегін жағажайында демалдық. Өзіміз шатыр мен төсеніштерімізді әкеліп жайғасқанбыз. Балалармен шомылуға керемет жер: суы тап-таза әрі басқа жерлерге қарағанда әлдеқайда жылы, жағасы құмды. Көлдің ар жағынан көрінетін Бурабай таулары мен нулары көздің жауын алады. Бір өкініштісі, тегін жағажайда дәретхана мен киім ауыстыратын жер жоқ екен.
Алакөл
Ауа райына қарай түсін өзгертіп, құбылып тұратын Алакөлдің оңтүстік бөлігі Жетісу облысына, ал шығыс бөлігі Абай облысына қарайды. Оның суы шипалы, балшығы емге жақсы деседі. Сондықтан болар, бұл жақ суға түсіп демалғысы келетін туристер арасында танымал.
Алакөлдің жағасында неше түрлі демалыс базалары мен қонақүйлер бар. Кейбірі жағаны жасақтап, қоршап қойған. Бірақ көбінің алдында жағажай ашық. Кез келген жағажайына барып, орналасып, демалуға болады. Бірнеше күнге қалатындар арнайы қонақүй не база таңдап, демалысын жоспарлайды.
Былтыр Алакөлде 2 миллионға жуық адам демалған. Биыл онда апарар жол салынды, жаңа демалыс орындары ашылды. Енді Алматыдан да, Астанадан да ұшақпен, пойызбен және көлікпен жетуге болады. Билік 2025 жылы Алакөлде демалатын туристер саны артады деп болжап отыр.
Жағажайда демалуға қалай дайындаламыз?
Алдымен қайда баратыныңызды, ол жерге қалай жететініңізді жоспарлап алыңыз. Бюджетіңізге қарай демалыс базасы не кемпиң аймағын алдын ала брондап қойыңыз. Одан кейін маршрутыңызды ойластырған дұрыс. Жеңіл көлікпен шықсаңыз, жол жағдайын біліп алған жөн. Демалатын аймағыңызға ең жақын медициналық бөлімшені белгілеп алыңыз.
Мына заттарды өзіңізбен бірге ала жүруге кеңес береміз:
- Күннен қорғану үшін SPF-крем, баскиім, көзілдірік керек болады.
- Тазалық үшін антисептик, ылғал майлықтар, қоқыс пакетін салып жүрген жөн.
- Шомылуға арналған киімнен бөлек бірнеше жеңіл киім мен қалыңдау күртеше, шалбар алған жөн — су жағасында ауа райы бұзылса не жел күшейсе қажет болады.
- Балаларға құммен ойнайтын ойыншықтарды ұмытпаңыз.
- Пауэрбанк ала жүрген дұрыс, бірақ оған күн сәулесі түспеуін қадағалау керек.
- Дәрі-дәрмек: йод, жаратаңғыш, қызу түсіретін дәрі, іш өтуді тоқтататын дәрі, аллергияға қарсы дәрі салып жүрген дұрыс.
- Төсеніш, шатыр, қолшатыр: жағада орналасуға керек-жарақтың бәрін салғаныңызға көз жеткізіп алыңыз.
