Cеулдегі серуен: он күнде қалада не көрдім?
Оңтүстік Корея астанасы лайфстайл-инфлюенсер Алуа Ақпанның көзімен.
Сәлем, менің атым — Алуа. Биыл тамызда күйеуім және қызыммен бірге Оңтүстік Кореяға барып қайттық. Дорамалардың арқасында өзім жақсы білетін елге бара жатқандай болдым. Ал көргенім өзім күткеннен қызығырақ болып шықты: Сеул — жай ғана әдемі декорация емес, технология, сән мен дәмді ас қадам сайын ұшырасатын мың бояулы қала екен.
Біз бастапқыда Жапонияға барамыз деп жоспарлағанбыз, бірақ виза ала алмадық. Сөйтіп Оңтүстік Кореяны көрудің орайы келіп тұрған шығар дедік. Мұнда саяхаттауға ең қолайлы уақыт — күз бен көктем, өйткені жазда тым ыстық әрі ауа ылғалды болады. Дегенмен ауа райы сапарымыздан көп әсер алуға кедергі болған жоқ.
Тамақ: стридфут пен мейрамхана кеспесі
Сеулде тамақ ішетін жақсы жер іздесеңіз, жергілікті жұрт ұзын-сонар кезекте тұрған орындарға барыңыз. Әдетте адам қарасы көп болғаны ол жердің шынымен дәмді әрі танымал екенін білдіреді. Түнгі базарларда біз бәрінен аз-аздан дәм татып көрдік: майға қуырылған кішкентай асшаян, вафли балықтар (пуноппан), ащы күріш кеспелері (ттокпокки) мен қантпен көмкерілген жемістер (танхулу).
Ерекше әсер қалдырғаны — Netflix-тің «Asian Street Food» шоуының кейіпкері Чанганг базарында лапша әзірлейтін Чо Ёнсунды тапқанымыз болды. Мәзірде сегіз түрлі лапша бар, ал порциясы өте үлкен екен. Біз екі порцияға 12 000 вон (шамамен 5000 теңге) төледік.
Қайта барсам дейтін орындар
Nirou Mian Guan. Michelin гидінде қатарынан бес жыл аталып жүрген қытай кеспесін әзірлейтін мейрамхана. Мәзірде бар болғаны екі түрлі кеспе мен дамплигілер ғана бар. Бәрі өте дәмді. Үш адамға кешкі асқа 51 000 вон (шамамен 20 000 теңге) жұмсадық.
Kyochon Chicken. Мұнда корейлердің әйгілі қуырылған тауық етін дайындалады. Екі рет қуыру әдісінің арқасында терісі ерекше қытырлақ, ал еті шырынды болып піседі. Қанатшалардың бір порциясы 20 000 воннан (шамамен 7800 теңге) басталады, ал онымен бірге тіскебасарлар тегін беріледі.
Баланы ала барған болсаңыз, Мёндондағы Hello Kitty Café-ге кіріп шығуға болады. Біздің қызымызға қатты ұнады.
Кофе: біз ұнатқан төрт жер
Anthracite Coffee Roasters
Artist Bakery
Artist Bakery
Сеулде кофеге айрықша мән береді. Бұл — жолшыбай іше салатын сусын емес, көруге тұратын көп орын бар тұтас мәдениет.
Artist Bakery. Мұнда суретке түсіруге сүйкімді таңғы ас пен дәмді пісірме іздеп келеді. Өте танымал орын болғандықтан, ұзақ күтпес үшін қосымша арқылы онлайн кезекке тұрған жөн. Plain Salt Butter Bread-інің дәмін татып көруге кеңес беремін.
Бағалар: бір пісірме бағасы 3800–7000 вон (шамамен 1500–2700 теңге).
Anthracite Coffee Roasters. Жақсы кофе ішсем дейтін адамдарға арналған. Мұнда дәнді өздері қуырып, фильтр мен хэнд-дрип әдісімен дайындайды. Интерьері көрнекті, атмосферасы тыныш.
Бағалар: кофе мен десерт бағасы 5000–6000 вон (шамамен 2000–2500 теңге).
33Apartment. Эстетикасы минималистік кофейня. Олар кофенің сапасына баса назар аударады. Аустралиялық Dukes Coffee дәнін пайдаланады. Күнді бастауға таптырмас орын.
Бағалар: бір шыныаяқ кофе 5000–7000 вон (шамамен 2000–2700 теңге).
Onion. Қаладағы ең танымал кофеханаларының бірі. Әсіресе Ангук ауданындағы филиалға баруды ұсынамын — ол 1920 жылы салынған, корейдің дәстүрлі ханок үйінде орналасқан. Мұнда жерде отырып, кофе мен пандоро десертінен дәм татып, ерекше атмосфераға бөленуге болады.
Бағалар: 5000 воннан басталады (шамамен 2000 теңге).
Шопинг: жергілікті брендтер мен туристік емес аудандар
Алдымен өзім не байқағанымды айтайын: танымал Мёндон көшесі ұнамай қалуы мүмкін: адам құжынап жүреді, ал ондағы дүкендер басқа жайлырақ аудандарда да бар.
Ыңғайлы шопинг пен ерекше жергілікті брендтер керек десеңіз, Seongsu, Hongdae немесе Gangnam аудандарына барғаныңыз дұрыс. Өзім әдетте сатып алатын заттардың тізімін алдын ала жасап, бағаларын сайттардан қарап шығамын. Бұл бюджетімді оңай жоспарлауға көмектеседі.
Ерекше корей брендтері:
- Musinsa — Uniqlo-ға ұқсайтын, сапалы әрі қарапайым киімдер;
- Mardi Mercredi — французша вайбы бар, бірақ корейше көзқарастағы сән бренді;
- Matin Kim — күнделікті өмірге арналған ыңғайлы әрі сәнді киімдер;
- Tamburins — әдемі дизайнымен ерекшеленетін косметика мен парфюмерия;
- Marge Sherwood — талғампаз әйелдерге арналған сөмкелер;
- Aland — әйгілі маркалармен қатар жас дизайнерлердің жұмысын да табуға болатын мультибренд дүкен.
Пайдалы кеңестер: ақша, K-ETA және маңызды ұсақ-түйек
- Көлік. Сеулдегі метро өте қолайлы, жылдам әрі жол тапқан оңай.
- Қауіпсіздік. Кореяда төтенше жағдайларға қатысты жедел ескерту жүйесі жұмыс істейді. Сіздің ауданыңызда біреу жоғалып кетсе, телефоныңызға суретімен бірге хабарлама келеді.
- Қаржы. Біз төлемнің 80 пайызын картамен жасадық. Қазақстандық карталардан қолма-қол ақша шешу мүмкін емес, сондықтан өзіңізбен бірге айырбастау үшін доллар алған дұрыс. Тамақ пен ұсақ сауда-саттыққа бір адамға күніне шамамен 30–50 мың теңге кетеді.
- K-ETA. Электронды рұқсат алғаныңыз шекарадан кедергісіз өте бересіз деген сөз емес. Шекарашылар қосымша сұрақтар қоюы мүмкін, сондықтан қонақүй брондарыңызды, қайтар билеттеріңізді және сапар жоспарыңызды қағазға шығарып алған жөн.
- Бюджет. Үш адамнан тұратын отбасының 10 күндік сапарына (әуе билеттерін есептемегенде) 1,5–2 млн теңге алған дұрыс. Біздің ақшамыздың көп бөлігі шопингіге кетті (бір шабадан ала барып, үш шабадан алып қайттық).
Оңтүстік Корея — жалғыз саяхаттауға өте қолайлы ел. Бізге оның стилі, тамағы мен жалпы атмосферасы қатты ұнады және біз онда міндетті түрде тағы барамыз.
