Кореядағы BTS концертіне барып-қайттым. Билетті қалай алдым, жолға қанша кетті?
Жүйелі жоспар құрсаң, қол жетпес арман жоғына көзім жетті.
Он жыл бұрын BTS концертіне бару маған қол жетпес арман көрінетін. Бірақ биыл топтың Оңтүстік Кореяда өткен концертіне бір емес, екі рет бардым. Билеттерді де өзім алдым. Әлі сатылымы басталмаған, жанкүйерлер сарыла күткен талай ел мен қала бар. Осы орайда өзім билет таласында қалай олжалы болғанымды, жолыма қанша кеткенін, концерт қалай өткенін жазып шықтым.
Билет алардан бұрын
Биыл қаңтардың басында BIGHIT MUSIC «BTS бесінші альбомын шығарған соң әлемдік турға аттанады» деген ақпарат таратты. Сол күннен бастап құрбым екеуіміз концертке дайындықты бастап кеттік. BTS туралы осындай ресми ақпараттың бәрі Weverse қосымшасында шығады. Сондықтан оны жүктеп, Gmail поштаңызбен тіркеліп алыңыз.
Ең алдымен ARMY Membership-ті жаңартып алдық. Бұл — Weverse-тегі BTS-тің ресми фан-клубы. Оның бағасы — 20 USD (шамамен 9 280 KZT) тұрады. BTS-ке сұраныс жоғары, билеттері лезде таусылып қалады. Membership болса, концерт билеттерінің алдын ала сатылымына (presale) қатыса аласыз. Бұдан бөлек, эксклюзив контент көріп, фан-ивенттерге баруға болады. Membership алмасаңыз, билетті жаппай сатылымнан (general) алуға тура келеді, бірақ онда мүмкіндік аз.
Концертке билетті қалай алдық?
BTS-тің ARIRANG әлемдік туры 2027 жылға дейін созылады. 23 елдегі 34 қалада 85-тен астам концерт береді. 13 қаңтарда тур кестесі шыға салысымен, сол елдер тізімін қарап, қай жаққа барған тиімді екенін таңдадық. Бұл жерде елге кіру талаптары, виза мәселесі өте маңызды. Бізде K-ETA (Korea Electronic Travel Authorization — виза емес, электронды рұқсат) болғандықтан, бірден Оңтүстік Кореяға барамыз деп шештік. Әрі BTS-ті көретін күнді ұзақ күткіміз келмей, бірінші концертті көздедік.
Дәл сол күні Гоян қаласында өтетін концерттің ресми хабарландыруы да шықты. Онда билет бағалары, стадиондағы орындар сызбасы (Seating Map), билеттер қай уақытта, қай сайт арқылы сатылатыны нақты көрсетіледі. Уақыт жоғалтпай, стратегиямызды бастадық.
Гояндағы үш күндік концерттің қай күніне баратынымызды таңдадық. Басқа фанаттардың бұған дейін түсірген фото-видеоларын қарап, сахнаның қалай көрінетінін зерттедік.
Билет түрлері қандай?
- SOUND CHECK: 264 мың KRW (шамамен 83 мың KZT). Концерт алдындағы дайындықты көре аласыз, FLOOR (партер) аймағында орналасқан орындар, сахнаға жақын.
- GENERAL R: 220 мың KRW (шамамен 69 мың KZT). Саундчекке кіру мүмкіндігі жоқ, төменгі трибуналардағы стандарт орындар.
- GENERAL S: 198 мың KRW (шамамен 63 мың KZT). Стадионның жоғарғы трибуналардағы стандарт орындар.
Бастапқыда құрбым екеуіміз саундчек билетін алғымыз келген, бірақ оған таласатындар көп болғандықтан, басқа орындарды таңдауды жөн көрдік. Негізі, BTS концертінде нашар орын деген болмайды. Бәсеке жоғары жерде ойланып отыруға уақыт та жоқ, ең бастысы — билет алып үлгеру. Дегенмен дайындық болса, екі адамға бір күнге бір сектордан орын тапқан оңайырақ. Себебі Гояндағы концертке бір адамға бір күнге бір билеттен ғана алуға рұқсат берілді. Мұндай ережелер әр елде әртүрлі болады, олармен алдын ала мұқият танысып шыққан маңызды.
Алдын ала сатылымға тіркелу
Presale-ге дейін билет сатылатын сайтқа тіркеліп қою керек. Таныс болыңыз — NOL World (Interpark Global). Бұл — Оңтүстік Кореядағы концерттерге билет сататын ресми халықаралық платформа. Шетелдік жанкүйерлер билетті осы жақтан сатып алады.
Сайтта аккаунт ашып, жеке басыңызды төлқұжат арқылы растау қажет. Аты-жөніңіз паспортта қалай жазылып тұр, солай толтырыңыз. Өйткені концертке кіретін кезде соны тексереді. Солай NOL World-та Presale-ге тіркеліп, ARMY Membership-ті растап, верификациядан өттім.
Жоспарды өзгерткен Play&Stay
Presale-ге санаулы күн қалғанда Гояндағы концертке Play&Stay пакеті сатылатыны туралы жаңалық шықты. Бұл хабар жоспарымызды күрт өзгертті. Оның ішіне General R санатындағы билет пен қонақүйде 2 түн тұру кіреді. Бұған қоса, бірден екі адамға билет алуға болады. Бұл — өте-мөте күшті мүмкіндік, себебі көптен күткен концертте құрбыммен бірге отырғымыз келді. Біз бірден қонақүйлер тізімін қарап, олардың бағасы мен орналасқан жерін зерттедік.
Мысалы, екі адамдық пакеттердің ең арзаны — 1 млн KRW (шамамен 423 мың KZT), ең қымбаты — 2 млн KRW (шамамен 597 мың KZT) тұрды. Біздің таңдау — Сеулдегі GLAD Yeouido қонақүйі, бағасы — 1 млн KRW (шамамен 461 мың KZT). Метро тиіп тұр, Инчхон әуежайынан да оңай жеттік. Танымал Хан өзенінің жағалауы өте жақын, сауда орталықтары да алыс емес.
Екі адам болып баратындар, билетсіз қалып қойғысы келмейтіндер мұндай мүмкіндік үшін артық төлеуге дайын. Ескерту: Play&Stay пакеті қымбат болса да, тез таусылып қалады.
- Play&Stay пакетіндегі қонақүй мен билет
Айтпақшы, Play&Stay-де орындар кездейсоқ (random) беріледі, оны концерт күні ғана білесіз. Орындарды ауыстыра алмайсыз. Бұған қоса, қонақүйдегі таңғы ас кірмейді, кейбіреуінде концерт өтетін жерге дейін шаттл қызметі қарастырылды. Солай тездетіп NOL World-та мұның да алдын ала сатылымына тіркеліп алдық.
Ticket War: билет сатып алған күн
Билет алар кезде төлем жасайтын карта деректерін енгізу қажет, сондықтан ол жаныңызда болсын. Аты-жөніңіз, электронды пошта сияқты мәліметтерді мұқият толтыру керек. Орын таңдауға, төлем жасауға әдетте он минут беріледі. Мен бұл жолы билетті ноутбуктан сатып алдым. Бұл кезде тұрақты интернет — ең маңызды нәрселердің бірі.
Кәдімгі билет пен Play&Stay пакеттері 22 қаңтарда бір уақытта сатылымға шықты. Екеуінің сілтемесі бөлек болғандықтан, сатылым басталған сәтте бірден «билет сатып алу» батырмасын басып, екі түрлі кезекке қатар тұрдық.
Концерттің бірінші күніне екі адамға арналған Play&Stay пакетін екі минутта алып үлгердім. Ал кәдімгі билет бойынша кезегім әлдеқайда ұзақ жүрді, оны шамамен бір жарым сағатта алдым. Оған дейін саундчек пен төменгі трибунадағы орындар сатылып кеткен еді. Сол себепті біз концерттің үшінші күніне алдын ала зерттеген сектордан орын іздедік.
Құрбыммен бірдей интернетті қолдансақ та, оның құрылғысында сайт бастапқыда қатып қалды. Мұндай жағдай жиі кездеседі. Соған қарамастан, үшінші күнге бір сектордан, бірақ әртүрлі қатардан орын алып үлгердік. Билет алған сәттегі эмоцияны сөзбен айтып жеткізу қиын, қуаныштан секіріп, айқайлап жібердім.
Жолға дайындық
Билет қолда, концерт жолда деп құрбыммен сапарымызды бір аптаға жоспарлауға кірістік. Ең бірінші ұшақ билетін алдық, Asiana Airlines билеті 247 мың теңге тұрды. Сосын қонақүйден кейін тұратын жерімізді таңдадық. Кореяға барғанда пәтерді әдетте Airbnb немесе Booking арқылы таңдап жүрміз. Бұл жолы да метро және автобус бекетіне жақын жерді таңдауға тырыстық. Пәтер Олимпиада саябағы (Olympic Park) мен Lotte World Mall-ға жақын болды. Бұл пәтерді таныстармен бірге жалдадық (барлығы 8 адам болдық), сондықтан пәтер ақысына небәрі 50 мың теңге төледім.
Кореяға барар алдын міндетті түрде Kakao Map немесе Naver Map қосымшасын жүктеп, қыдыратын және тамақтанатын жерлеріңізді белгілеп алыңыз. Қосымшада бағыттар нақты көрсетіледі, пайдалану ыңғайлы.
Әуежайға қонғаннан кейін сол жердегі CU дүкеніне кіріп, T-Money картасын сатып алыңыз. Бұл карта метро мен автобусқа төлем жасау үшін керек. Одан бөлек, 7/11, CU, GS25 сияқты дүкендерден сатып алған затыңызды осы картамен төлей аласыз. Апта бойы емін-еркін жүріп-тұру үшін картаға 50 мың KRW (шамамен 16 мың KZT) салып қойдым.
Кореяда базар, көше тағамдары сатылатын жерде, T-Money-ді толтыруға қолма-қол ақша қажет. Мен аз ғана соманы әуежайда ауыстырып алдым, қалғанын картамен төледім. Ең жақсы курс қаласаңыз, Мёндон ауданына барыңыз, онда айырбастау пунктері өте көп.
Тамақ жағына келсек, кейде 5-6 мың, кейде 10 мың теңге беріп тұрдым. Орташа есеппен тамақтың өзіне 70-80 мың теңге кетті.
Концерт қалай өтті?
Бірінші концерт
Бізде Play&Stay пакеті болғандықтан, билет пен арнайы білезігімізді қонақүйден алдық. Сол күні таңнан кешке дейін жаңбыр жауды. Су өткізбейтін сырт киім киіп, қолшатыр алып алдық.
Стадионға жете сала Army Bomb-тың жаңа нұсқасын алуға асықтым. Кезек көп болатын шығар деп алаңдаған едім, бірақ express booth-дан жаңа лайтстикті жылдам алдым. Бағасы — 49 мың KRW (шамамен 15 мың KZT). Концерт басталғанға дейін құрбыммен өзге жанкүйерлерге арнап дайындаған шағын сыйлықтарымызды таратып, әлденіп алдық. Стадионға кіреберісте билетімізді тексерді.
BTS-ті алғаш рет бірге көріп, төбем көкке жеткендей болды. Жаңа, ескі әндерін тыңдап, бірге орындап, күлгін мұхит (purple ocean) қатарында болғаныма қатты қуандым. Концерт кезінде ARMY-дің қолындағы жарық таяқшалары (lightstick) күлгін түске боялып, бәрі бірге толқын жасады. Бұл көріністі purple ocean дейді. Жаңбыр астындағы концерт мәңгі есімде қалды.
Екінші концерт
Күн керемет болып тұрды. Стадионға ертерек барып, ARMY ZONE-нан естелік ретінде арнайы фотокарталарды алдық. Бұл жолы концертке кіретін кезде Face Pass жүйесін пайдаландық. Алдын ала NOL World-та бет-әлпетімізді тіркеп, растаудан өткіздік. Стадионға кірерде камераға қарап, жылдам өтіп кеттік. Екінші күн де ерекше болды, жігіттерді қайта көрдім, шексіз бақыт сыйлады, қимай-қимай қоштастым.
Қалай қатынадық?
Гоян — Сеул шетіндегі қала. Стадионға дейін метро барса да, қайту жағын алдын ала ескердік. Себебі концерт аяқталған соң қауіпсіздік үшін көрермен кезекпен шығарылады, кейде біраз күтуге тура келеді, метро немесе автобус уақытына үлгермей қалуыңыз да мүмкін. Сондықтан біз концерттің бірінші күніне Хондэ метро бекетінен жүретін шаттл қызметін алдық. Бағасы — 24 USD (шамамен 11 мың KZT). Мұны да NOL World сайтында алуға болады. Автобус бізді түскі сағат бірде алып кетіп, концерт аяқталған соң тура сол бекетке қайта әкелді.
Екінші концертке метромен баруды шештік. Стадионға шамамен бір сағатта жеттік. Концерт аяқталған соң қауіпсіздік қызметкерлері жол көрсетіп, жұртқа бағыт беріп тұрды. Концерттен қайтатын адам көп, метрода орын болмайды, біраз түрегеп тұрдық. Көңіл-күйіміз керемет болғандықтан, жолдың қалай өткенін байқамай, тез жеттік. Есесіне жол шығыны арзан болды.
Концерттен бөлек не көрдік?
BTS-тің ARIRANG альбомы шыққан соң Сеулдің әр жерінде түрлі форматтағы шаралар өтті. Солардың бірі — ARMY MADANG. Бұл шараға кіру тегін болғанымен, алдын ала тіркелу керек. Dongdaemun Design Plaza-да өткен ивентте интерактив аймақтар болды. Онда ARMY Bomb-ты безендіру үшін арнайы ленталар мен стикерлер таңдадық, жаңа әндердің сөздері жазылған әдемі посткардтар алдық, естелік ретінде photo booth-да суретке түстік.
Біз барған уақытта Сеулде BTS-тің POP-UP дүкендері жұмыс істеді. Онда топтың жаңа альбомына арналған эксклюзив мерчтер (киімдер, аксессуарлар және т.б.) сатылады. Дүкенге кіру үшін ARMY Membership арқылы алдын ала брондау қажет болды.
Бұдан бөлек, Artisée кафелер желісі BTS-тің жаңа альбомына орай мәзір шығарған. Десерт пен сусынын алып, дәмін көрдік.
Концерт өтетін қалаға баратын кезде қандай іс-шаралар өтетінін алдын ала бақылап, хабардар болып жүріңіз.
Жалпы шығын мен концертке бара жатқандарға бірер кеңес
Бюджетті жоспарлағанда ыңғайлы болсын деп, бір адамға арналған негізгі шығындарды тізіп шықтым (Play&Stay пакеті арқылы қонақүй ақысын екі адамға бөліп төлегенімізді ескердім).
Шығын түрі | Кеткен ақша |
|---|---|
Ұшақ билеттері | 247 000 |
Play&Stay пакеті | 255 000 |
Екінші концертке билет | 70 000 |
ARMY Membership | 20 USD (шамамен 9 280 KZT) |
Тұрған жеріміз (Airbnb) | 50 000 |
Тамақ | 80 000 |
Көлік (T-Money) | 50 мың KRW (шамамен 16 мың KZT) |
Стадионға дейінгі шаттл | 24 USD (шамамен 11 мың KZT) |
Army Bomb | 49 мың KRW (шамамен 15 мың KZT) |
Мерч (Pop-up) | 69 USD (шамамен 32 мың KZT) |
Artisée кафесі | 14 мың KRW (шамамен 4 515 KZT) |
Жалпы шығын: | Шамамен 790 000 |
Шығын түрі | Кеткен ақша |
|---|---|
Ұшақ билеттері | 247 000 |
Play&Stay пакеті | 255 000 |
Екінші концертке билет | 70 000 |
ARMY Membership | |
Тұрған жеріміз (Airbnb) | 50 000 |
Тамақ | 80 000 |
Көлік (T-Money) | |
Стадионға дейінгі шаттл | |
Army Bomb | |
Мерч (Pop-up) | |
Artisée кафесі | |
Жалпы шығын: | Шамамен 790 000 |
Концерттен кейін әлеуметтік желілерден саундчек немесе төменгі трибуналардағы орындарды делдалдардан қымбат бағаға сатып алған адамдардың жазбасын байқадым. Пусандағы концертке де аспандағы бағаны сұрап жатқандар бар екен. Бұл — өте үлкен тәуекел. Ешкім сізге ол билетпен концертке кіріп кетесіз деп 100 пайыз кепілдік бере алмайды, алданып қалуыңыз әбден мүмкін.
Артық шығынсыз билетті ресми сайттардан өзіңіз алуға тырысыңыз. Делдалдарсыз-ақ билет алуға болады, оған дайындық керек. Сіздің де қолыңыздан келеді, іске сәт!
