K-ETA өтінішін қалай толтырамыз?
Визаны өзі алып үйренгендерге көмекші құрал.
K-ETA — Оңтүстік Кореяға кіруге арналған электронды рұқсат қағазы. Бұл — виза емес, бірақ Қазақстан сияқты Оңтүстік Кореямен визасыз келісім орнатқан ел азаматтарынан осы қағаз сұралады. Онсыз сізді рейске кіргізбейді.
Маусым айында өз бетімше K-ETA алып, Оңтүстік Кореяға саяхаттап қайттым. Корей дорамаларын сүйіп көретін тағы бір құрбымның атынан өтініш толтырып, оған да армандаған еліне кіруге рұқсат алып бердім. Сөйтіп К-ETA толтырарда міндетті түрде визалық агенттік көмегіне жүгінудің қажеті жоғын түсіндім. Төменде саяхатқа қажет барлық құжатты мен сияқты өзі жинап үйренгендерге K-ETA өтінішін толтыру бойынша егжей-тегжейлі нұсқаулық жазып шықтым.
K-ETA кімге керек және қандай мерзімге беріледі?
K-ETA 17-65 жас аралығындағы азаматтарға керек. Үш жылға жарайды. Бір рет алсаңыз, үш жыл ішінде Оңтүстік Кореяға кез келген уақытта еркін саяхаттай бересіз. Бірақ үш жыл толмай жатып, төлқұжатыңыз жоғалса немесе мерзімі бітіп қалса, жаңа құжат алған соң, K-ETA-ға қайта тапсырасыз.
Қазақстандықтар Оңтүстік Кореяда 30 күнге дейін бола алады, бірақ 180 күн ішінде (6 ай) 60 күннен артық қалмауы тиіс.
K-ETA-ны қайдан аламыз және қанша тұрады?
K-ETA өтінішін www.k-eta.go.kr ресми сайтында немесе k-eta қосымшасында толтырасыз.
Ресми сайт сілтемесін сақтап алыңыз, өйткені іздестіру жүйесіне K-ETA деп жазса, әдетте визалық агенттіктердің сайты шығады. Олар қызметіне қосымша ақы алады, сондықтан бірден ресми сайтқа өтіңіз. Өтінішті телефон арқылы толтырған ыңғайлы болса, смартфоныңызға k-eta қосымшасын жүктеп алыңыз.
K-ETA құны: 10 мың вон немесе 7-8 доллар (шамамен 5 мың теңге). Кореяға кіруге рұқсат берілмесе, бұл ақша қайтарылмайды.
K-ETA-ға өз бетімізше қалай тапсырамыз?
Ресми сайтқа кіргенде, бірден Apply for K-ETA деген жазуды көресіз.
Apply from beginning — басынан өтініш беру деген батырманы басыңыз. Төбесінде member және non-member деп тұрады. Member — сайтқа тіркелгендер, non-member — сайтқа тіркелмегендер.
Member дегенді таңдасаңыз, sign up (тіркелу) батырмасы арқылы логин/құпия сөз ойлап тауып, сайтқа тіркелу керек. Бұл кейін өтініш формасын өзгертуге, нәтижені сайттағы жеке кабинетіңізден көруге мүмкіндік береді. Бас қатырғыңыз келмесе, non-member дегенді таңдаңыз.
Мен non-member деп тапсырдым. Өйткені сайтқа тіркелгендер мен тіркелмегендер өтініші бірдей қаралады, виза алымын да теңдей төлейді, cондықтан екеуінің арасында үлкен бір айырмашылық жоқ.
Бірінші қадам: ережелер мен шарттар
Apply from beginning деген батырманы басқан соң, сізге Terms and Conditions — Ережелер мен шарттар деген бөлім ашылады.
Әр мәтіннің астында мынадай сұрақтар бар:
I have read the contents of the Terms and Conditions and agree to them. Ережелер мен шарттарды оқып шықтым, бәріне келісемін.
Do you agree to the collection and use of required personal information as above? Жеке деректеріңізді жоғарыда көрсетілгендей жинап, қолдануға келісесіз бе?
Do you agree to the collection and use of the above optional items of personal information? Жеке деректеріңіздің жоғарыда көрсетілген міндетті емес бөліктерін жинап, қолдануға келісесіз бе?
Do you agree to the collection and use of the required information as stated above? Міндетті деректерді жоғарыда көрсетілгендей жинап, қолдануға келісесіз бе?
Are you 14 years of age or older? Жасыңыз 14-те немесе одан жоғары ма?
Жоғарыда көрсетілген сұрақтың бәріне agree (келісемін) деп жауап береміз. Next батырмасын басып, келесі қадамға өтіңіз.
Екінші қадам: почтаны растау
Ол үшін e-mail деген жерге почтаңызды көрсетіп, send verification code дегенді таңдаңыз. Почтаңызға 6 цифрлы код келеді. Соны verification number деген жерге жазып, verify дегенді басамыз.
Verification succeeded деген жазу шыққан соң, келесі параққа өту үшін: Confirm — Next.
Үшінші қадам: төлқұжат пен сурет жүктеу
Add photo деген жерге төлқұжатыңыздың бірінші бетінің суретін жүктейсіз. Жарығы жақсы жерде қолыңыздағы телефонмен суретке түсірсеңіз де болады. Тек жазулары анық көрінуі тиіс. Сурет жүктелген соң, астындағы add деген батырманы басамыз.
Өтінішті K-ETA қосымшасы арқылы толтырсаңыз, төлқұжатыңызды сол жерде бірден сканерлеп, жүктеуге болады. Қосымшада add photo-ның орнына scan your passport деген функция бар. Өзіме өтінішті қосымша арқылы толтырған әлдеқайда ыңғайлы көрінді.
Осыдан кейін жүйе төлқұжатыңызды оқып, бар ақпаратты кесте түрінде шығарады.
Осы тұста ескеретін жайт: төлқұжатыңызды сканерлеген соң, жеке деректеріңізді мұқият қарап, тексеріп алыңыз. Мысалы, менде төлқұжатымның мерзімі бітетін уақыт қате болып шықты. Өзім түзеттім. Дәл солай жүйе суретте анық көрінбей қалған деректеріңізді қате оқуы мүмкін. Дерегіңіз төлқұжатпен сәйкес келмесе, K-ETA берілмейді. Сондықтан ерінбей, барлық ақпарат төлқұжатқа сай келетініне көз жеткізгеннен кейін ғана Confirm деген батырманы басыңыз.
Осыдан кейін анкетадағы адам суреті тұрған жерге add photo деп, жеке суретіңізді жүктейсіз. Суреттің артқы фоны ақ, иықтан төмен, бас киімсіз, мойныңыз ашық болуы керек. Мен жүктеген суреттің көлемі үлкен болып, біраз әурелендім. Сол үшін сізге пайдалы кеңес: файл көлемі 20 mb-дан аспағанына, суреттің jpeg форматында тұрғанына назар аударыңыз.
Суреттің жоғарғы жағында Select relations деген батырма бар. Соны басып, өтініш берушімен қарым-қатынасыңызды көрсетесіз. Өз атыңыздан өтініш беріп жатсаңыз, Myself/ representative дегенді таңдайсыз.
Бұл батырма өте кішкентай, анкетаның жоғарғы бөлігінде елеусіз тұрады. Өз басым оны бірден байқаған жоқпын. Келесі параққа өтерде, «анкетаңыз толық емес» деген ескерту шыққаннан кейін ғана назар аудардым. Менің қателігімді қайталамас үшін суреттің жоғарғы жағын бір шолып, маңызды батырманы ұмытпаңыз.
Басқалар үшін family (отбасы), relative (туыс), friend (дос), acquaintance (таныс), colleague (әріптес), group tour (топтық тур), other (басқа) деген нұсқалар бар.
Төртінші қадам: саяхат жоспары
Purpose of entry — саяхат мақсаты.
Көрсетілген нұсқалардан өзіңізге сай келетінін таңдайсыз, жеке саяхат үшін — tour (individual travel), топпен болса — group tour болады.
Intended place of stay — тұратын жер.
Оңтүстік Кореядан броньдаған қонақүйіңіздің ақпараты керек. Қайда тұратыныңызды әлі нақты білмесеңіз, booking-тен free cancellation (тегін бас тарту) функциясы бар қонақ үйлердің біріне бронь жасаңыз.
Мен Сеулде баратын хостелімді көрсеттім. Яғни, мүмкіндік болса, Кореяда шынымен тұратын мекенжайыңызды жазған дұрыс. Тексеру кезінде K-ETA-да бір мекенжай, қолыңыздағы броньда мүлде басқа қонақ үй болса, сізді заңсыз жұмыс істеуге келген мигрант деп ойлауы мүмкін.
Ескеретін тағы бір жәйт: мен Сеул әуежайына 24 маусым түнде қондым. Бірақ хостелді 23-інен бастап броньдадым. Өйткені 24-інен бастап алсам, хостелге ертеңіне түскі 14:00-ден кейін ғана кіре алар едім. Ал түнгі 2:00-ден түскі 14:00-ге дейін 12 сағат уақыт бар. Сондықтан түнгі рейске билет алсаңыз, тұратын жеріңізді бір күн бұрынғы датадан бастап броньдаңыз. Бұл шекарашылардың «Ал бүгін түнде қайда барасыз?» деген артық сұрағынан құтқарады.
ENG деген жерге қонақ үй мекенжайын жазамыз. Booking-те бұл ақпарат қонақүй жайлы деректер бөлімінде тұрады. Ретімен бірінші пошта индексін (Booking-те бар, мекенжай жазылған жердегі 5 нөмірлі сан), көше атауын, ғимарат нөмірін жазып, іздеу деген символды басамыз. Іздестіру жүйесінен мекенжайыңыз шығады, соны таңдайсыз. Сайт өзі мекенжайды автоматты түрде корей тіліне аударады.
Астындағы бос кеңістікке қонақүй атауын жазу керек.
Contact number in Korea — қонақүйдің телефон нөмірі.
Date of entry — Оңтүстік Кореяға баратын күніңіз.
Date of departure — Оңтүстік Кореядан қайтатын күніңіз.
Departure flight number — Кореядан қайтатын рейс нөмірі. Әлі қайтарға билет алмаған болсаңыз, бұл жерді бос қалдыруға болады.
Бесінші қадам: жұмыс орны, денсаулық пен жалақы жайлы ақпарат
Occupation — қызметіңізді жазу керек:
Unemployed — жұмыссыз
Self-employed — өзін-өзі жұмыспен қамтушы
Agricultural and livestock industries — ауыл шаруашылығы және мал өсіру
Office worker — кеңсе қызметкері
Public officer — мемлекеттік қызметкер
Student — студент
Housewife — үй шаруасындағы әйел
Etc — басқа
Phone number of current residential country — өз телефон нөміріңізді жазасыз
Have you visited the Republic of Korea before? Бұрын Кореяда болғансыз ба?
Are you currently suffering from any of the following diseases? Қазір сізде төменде көрсетілген ауру белгілері бар ма?
Аурулар тізімі: тырысқақ, оба, сары безгек, ауыр респираторлық синдром, жануарлардан жұққан тұмау, тұмаудың жаңа түрі, Таяу Шығыс респираторлық синдромы, Эбола вирусы, туберкулез, Марбург қызбасы, Ласса қызбасы, Конго-Қырым геморрагиялық қызбасы, шешек, дифтерия, жаңа инфекциялық синдром.
Have you ever been charged with or convicted of a crime that caused significant harm to the live or property of others? Бұрын басқалардың өміріне немесе мүлкіне зарар келтірген қылмыс үшін айыпталып не жазаға кесілгенсіз бе?
Have you ever been arrested, charged, or convicted of crimes related to possession, use, or distributionof illegal substances such as drugs? Бұрын есірткі сияқты тыйым салынған заттарды пайдаланып, сақтап немесе таратқаныңыз үшін айыпталып немесе жазаға кесілгенсіз бе?
Have you ever been arrested, charged, or convicted of a criminal offense that does not fall under items 1) or 2) in your country or abroad? Өз еліңізде немесе шетелде 1, 2 бөлімде көрсетілмеген басқа да қылмыстар бойынша айыпталып немесе жазаға тартылғансыз ба?
Өз жағдайыңызға қарай, жоғарыда көрсетілген сұрақтардың бәріне иә (yes) немесе жоқ (no) деп жауап бересіз. Бұл сұрақтарға шынайы жауап беру керек, жалған ақпарат берген адам Корея заңдары бойынша жауапқа тартылуы мүмкін.
Country of birth — Қай мемлекетте тудыңыз?
Place of birth — Туған жеріңіз.
Екеуіне де Қазақстан деп жазуға болады.
The country and the city (region) of residence — Қазір қай елде, қалада тұрасыз? Мәселен, Kazakhstan, Almaty
Have you ever changed your name? Бұрын-соңды аты-жөніңізді өзгерткенсіз бе?
Do you have any acquaintances in the Republic of Korea? Кореяда таныстарыңыз бар ма?
Do you have any accompanying persons? Жаныңызда Кореяға бірге баратын адамдар бар ма?
Біреумен саяхаттайтын болсаңыз, олардың аты-жөнін көрсету керек. Бірақ анкетаңызда көрсетілген адамдар K-ETA-ға бөлек өтініш береді. Сіздің K-ETA алуыңыз, олардың да өтініші міндетті түрде мақұлданады дегенді білдірмейді.
Are you engaged in profitable activities in the country you reside? Өз еліңізде тұрақты табыс әкелетін жұмысыңыз бар ма?
Company name — жұмыс істейтін компанияңыздың аты.
Contact number of company — жұмыс орныңыздың телефон нөмірі.
Past illegal records in the Republic of Korea (including illegal stay) — Бұрын Кореяда заңсыз әрекеттер (елде заңсыз қалуды қосқанда) жасағансыз ба?
Monthly income — айлық табысыңыз.
Сайтта бірнеше нұсқа бар, бірақ кемі 1300-2100 доллар деп көрсеткен дұрыс.
Have you visited overseas? Бұрын шетелде болғансыз ба?
None — ешқашан
1-2 times — 1-2 рет
3-4 times — 3-4 рет
More than 5 times — 5 реттен көп
Name of a country recently visited — Соңғы рет қай елде болдыңыз?
Period of stay — ол елде қанша уақыт болдыңыз?
Астында кейінгі барған еліңізге кірген және шыққан күніңізді көрсетесіз.
SNS account (optional) — әлеуметтік желідегі парақшаңыз, ештеңе жазбауға болады.
Make payment (төлем жасау) — Сonfirm (растау).
Құттықтаймын, осымен K-ETA-ға өтінішіңізді сәтті толтырып шықтыңыз! Енді Оңтүстік Кореяның шешім қабылдайтын құзырлы органдарынан жауап күтесіз.
Қолыңызда K-ETA болса да, сізді Кореяға кіргізбей қоюы мүмкін. Мұндай жағдайдың алдын алу үшін не істеу керек?
K-ETA-ның болуы Кореяға кедергісіз кіруге кепілдік бермейді. Кейде қолында елге кіруге рұқсат қағазы бар адамдардың өзін шекарадан өткізбей, кері қайтаруы мүмкін. Неге?
Өкінішке қарай, Оңтүстік Кореяда Қазақстаннан келген заңсыз мигрант көп. Осы себептен кедендік бақылау офицері сіздің жай турист немесе заңсыз жұмыс істеуге келген мигрант екеніңізді анықтау үшін құжаттарыңызды мұқият тексереді. Күмән туғызбау үшін саяхат жоспарыңызды тиянақтап дайындап барыңыз.
Туристерді елге кіргізу туралы шешімді кедендік бақылау қызметі қабылдайды. Олар Кореяға келу мақсатыңыз, тұратын жеріңіз жайлы қосымша сұрақтар қойып, қайтар билетіңізді және қонақүй бронын сұрауы мүмкін. Сұраған құжаттарын көрсете алмасаңыз, сұрақтарға сенімсіз жауап берсеңіз, күмән туғызасыз. Бұл өз кезегінде Кореяға кіру ықтималдығыңызды төмендетеді.
Қайтарға билет сатып алмаған күннің өзінде тегін бронь жасайтын сайттар арқылы билет броньдап қойыңыз. Қонақүй де солай: қай қалада қанша күн тұратыныңызды нақты білмесеңіз, free cancellation жасауға болатын қонақүйлерден бронь керек.
Шекарадан кері қайтарудың тағы бір себебі: K-ETA-да көрсеткен деректеріңіздің шындыққа сәйкес келмеуі. Саяхат деректері (Кореяға бару мақсатыңыз, тұратын жеріңіз, елге кіру және шығу уақытыңыз, байланыс нөмірі, жаныңыздағы адамдар жайлы ақпарат кіреді) өзгерсе, keta ресми сайтында Application results — Update travel information деген бөлімге кіріп, түзету керек. Өтініште көрсетілген деректер мен қолдағы броньдар әртүрлі болса, шекара қызметі сізді елге кіргізбеуге құқылы.
Кейде шекарашылар туристерден қанша қаржысы барын сұрауы мүмкін. Яғни, Оңтүстік Кореяда саяхаттауға жететін ақшаңыз барын дәлелдей алуыңыз керек.
Ең бастысы, K-ETA өтінішін толтырарда, Оңтүстік Кореяға сапарыңызды бүге-шүгесіне дейін жоспарлап, нақты тұратын хостел/қонақүйіңізді, сапар ұзақтығын дұрыс көрсетіңіз. Бәрін ретімен әрі заңды жасасаңыз, шекарада еш мәселе болмайды.
Жиі қойылатын сұрақтар (FAQ)
K-ETA-ға тапсыруға қандай құжаттар керек?
Төлқұжаттың бірінші беті мен жеке суретіңіз ғана керек. Құжаттарға қойылатын талап пен дұрыс жүктеу жолын Үшінші қадам: төлқұжат пен сурет жүктеу бөлімінен қараңыз.
Өтініш қанша уақыт қаралады?
Өтініш 72 cағатқа (3 тәулік) дейін қаралады, әдетте 24-48 сағат ішінде почтаңызға жауап келеді. Өтініш берушілер саны көп болса немесе басқа да себептерге байланысты K-ETA жауабы кейде 72 сағаттан кеш келуі мүмкін.
K-ETA берілсе, «Your K-ETA application has been approved» деген хат аласыз. Берілмесе, «Your K-ETA application has been denied» деп келеді.
K-ETA бермесе не істеу керек?
Өтінішіңіз мақұлданбаса, K-ETA-ға үш ретке дейін қайта тапсыруға болады. Үш рет қатарынан рұқсат ала алмасаңыз, елшілік арқылы туристік визаға тапсырасыз немесе K-ETA-ға қайта өтініш беру үшін алты ай күтесіз.
K-ETA-ны қағаз түрінде шығарып алу керек пе?
Міндетті емес. K-ETA нәтижесін электронды нұсқада сақтап немесе скрин жасап алып, телефоннан көрсетуге болады.
Балаға да K-ETA алу қажет пе?
17 жасқа дейінгі балаларға K-ETA қажет емес. 65 жастан асқан қарт адамдар да Оңтүстік Кореяға ешқандай рұқсат қағазын алмай-ақ саяхаттай алады.
Суретін салған: СашаШура
