Оңтүстік Кореяға виза мен K-ETA өтінішін қалай толтырамыз? Толымды нұсқау

Мёндонда шопинг жасап, блогерлер мақтаған бетке арналған сарысуды тауып, Кёнбоккун сарайындағы қарауылдың ауысқан сәтін өз көзіңізбен көргіңіз келсе, Оңтүстік Корея бір сапармен-ақ барлық арманыңызды орындай алады. Бірақ шабаданыңызды буып-түймес бұрын, құжат жағын реттеп алған жөн. Біз K-ETA-ны қалай алу керек екенін, виза кімге қажет және бұл мәселені агенттіктер көмегінсіз-ақ қалай шешуге болатынын айтып береміз. 

Қазақстандықтарға Оңтүстік Кореяға виза керек пе?

Қазақстан мен Корея Республикасы арасында визасыз режим орнатылған. Демек, қысқа мерзімді туристік сапарлар үшін виза алудың қажеті жоқ. Бірақ бір барғанда 30 күннен артық қалмау керек және жарты жыл (180 күн) ішінде жалпы мерзім 60 күннен аспауға тиіс. Сонымен қатар виза керек болмаса да, ұшуға кемінде 72 сағат қалғанда K-ETA (Korea Electronic Travel Authorization) — электронды рұқсатын алуыңыз шарт. Онсыз елге кіргізбейді.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

K-ETA деген не және ол кімге керек?

Бұл — шетелдіктердің деректерін ұшуға дейін тексеретін автоматтандырылған жүйе. K-ETA арқылы елге тек турист ретінде келуге, туыстарға баруға, емделуге немесе түрлі шараларға (мысалы, концерт) қатысуға болады. Ал арнайы визасыз жұмыс істеген заңға қайшы.

K-ETA алу қанша тұрады?

Төлем құны бекітілген — 10 000 KRW (шамамен 3 137 KZT). Оны кез келген Visa немесе Mastercard картасымен онлайн төлеуге болады. Картадан ақша ұстаған кезде банк конвертация үшін қосымша комиссия алуы мүмкін екенін ескеріңіз. Егер сізге рұқсат берілмесе, ақша қайтарылмайды, өйткені төлем өтінішіңізді қарастырғаны үшін алынады.

Кореяға K-ETA-ны қалай рәсімдейміз?

Тек ресми сайтты — k-eta.go.kr немесе мобильді қосымшаны пайдалануға кеңес береміз. Қосымша тіпті ыңғайлырақ: ол паспорт деректерін автоматты түрде сканерлеп, суретті қажетті өлшемге өзі қиып береді.

Қандай құжаттар керек?

Анкентаны толтырарда мына құжаттарды дайындап қойыңыз:

1. Жарамды шетелдік паспорт.
2. Ақ фондағы цифрлық сурет (көлемі 20 МБ дейін, 700х700 пиксель).
3. Кореяда тұратын мекенжайыңыз (қонақүй броны немесе шақырушы тараптың деректері).
4. Төлем жасау үшін Visa немесе Mastercard картасы.

Анкетаны қалай толтыру керек?

Сайтқа немесе қосымшаға кіріп, «Apply for K-ETA» батырмасын басыңыз. Одан әрі «member» (тіркелгендер үшін) және «non-member» деген таңдау шығады. Басыңызды қатырмай, бірден «non-member» нұсқасын таңдаңыз. Одан ештеңе өзгермейді, есесіне логин мен пароль ойлап тауып әуре болмайсыз.

1-қадам: Ресми келісім

Алдымен «Terms and Conditions» (талаптар мен шарттар) шығады. Оқып шығып, бәріне келіссеңіз, «Agree» және «Next» батырмаларын басыңыз.

2-қадам: Поштаны тексеру

Электронды поштаңызды (e-mail) жазып, «send verification code» батырмасын басыңыз. Поштаңызға келген 6 таңбалы кодты енгізіп, растаңыз. Егер «Verification succeeded» деген жазу шықса, бәрі дұрыс. Рұқсат қағазы осы поштаға келеді.

3-қадам: Құжаттар

• Паспорт суреті: Алдымен бірінші бетін жүктеңіз. Қосымша арқылы сканерлеген оңай. 

• Жеке сурет: Талаптар стандартты: ақ фон, бас киімсіз. Сурет JPEG форматында және 20 МБ-тан аспауы керек.

Суреттің үстінде кішкене жазу болады. Егер өзіңіз үшін тапсырып жатсаңыз, «Myself/representative» дегенді таңдаңыз.

4-қадам: Сапар жоспары

• Purpose of entry (Келу мақсаты): Әдеттегі туризм үшін «Tour (individual travel)» таңдаңыз.
• Intended place of stay (Тұратын жер): Қонақүйдің мекенжайы керек. Егер нақты әлі шешпесеңіз, Booking арқылы тегін бас тарту мүмкіндігі бар қонақүйді белгілеп, соның деректерін жазыңыз. Егер рұқсат алған соң қонақүйіңіз өзгерсе, сайттағы «Update travel information» бөлімінде деректерді жаңартуды ұмытпаңыз.

• Contact number in Korea (Кореядағы байланыс нөмірі) — мұнда өзіңіз тоқтайтын қонақүйдің телефон нөмірін жазыңыз.
• Date of entry / Date of departure (Келу және кету күндері) — сапарыңыздың шамамен жоспарланған күндерін көрсетіңіз.
• Departure flight number (Қайтар рейстің нөмірі) — егер билетіңіз әлі дайын болмаса, бұл жолақты бос қалдыруға болады.

5-қадам: Жұмыс және табыс

• Occupation (Қызмет түрі) — өз нұсқаңызды немесе осы сұраққа жауап бергенде тізімнен шығатын ең сәйкес келетін нұсқаны таңдаңыз.
• Бұдан кейін денсаулық жағдайы мен соттылық туралы стандартты сұрақтар блогы келеді. Егер денсаулығыңыз жақсы болса және заңмен проблемаларыңыз болмаса, бәріне батыл түрде «жоқ» (no) деп жауап беріңіз.
• Жеке мәліметтер — туған және тұратын еліңіз бен қалаңыз туралы жолақтарды толтырыңыз. Аты-жөніңізді өзгерткен-өзгертпегеніңізді көрсетіңіз.
• Do you have any acquaintances/accompanying persons? (Таныстарыңыз/бірге саяхаттайтын адамдар бар ма?) — «иә» немесе «жоқ» деп жауап беріңіз. Егер жалғыз саяхаттамасаңыз, серіктестеріңізді көрсету керек. Бірақ есіңізде болсын: әркім K-ETA-ға өтінімді жеке тапсырады және сізге рұқсат берілуі басқаларға да берілетініне кепілдік болмайды.
• Are you engaged in profitable activities...? — бұл жерде табысы бар жұмысыңыздың бар-жоғы сұралады. Егер бар болса, «иә» деп жауап беріп, компанияның атауы мен телефон нөмірін жазыңыз.
• Monthly income (Айлық табыс) — мақұлдау мүмкіндігін жоғарылату үшін сауалнамада айына кемінде 1 500 USD (шамамен 696 908 KZT) табыс нұсқасын таңдауға кеңес беремін.
• Have you visited overseas? (Саяхат тәжірибесі) — шетелде неше рет болғаныңызды көрсетіңіз, сондай-ақ соңғы барған еліңіз бен күндерін жазыңыз.
• SNS account (Әлеуметтік желідегі парақша) — бұл жолақты бос қалдыруға болады.

Соңғы қадам: Төлем

10 000 KRW (шамамен 3 137 KZT) төлеп, өтінімді жіберіңіз. Енді тек жауапты күту қалды.

Қанша уақытта жауап береді?

72 сағатқа дейін жауап беруі керек. Бірақ жауап көбіне 24 сағат ішінде жауабы келіп жатады. Оң не теріс жауап поштаңызға түседі.

K-ETA қанша уақытқа жарамды? 

Мақұлданған K-ETA алынған сәттен бастап үш жыл бойы күшінде болады. Осы кезеңде сапарлар санына шектеу қойылмайды. Алайда паспортыңыздың мерзімі бітсе, аты-жөніңізді, тегіңізді, жынысыңызды немесе азаматтығыңызды өзгертсеңіз, сондай-ақ паспортыңызға айтарлықтай өзгерістер енсе (мысалы, жаңа беттер жапсырылса), рұқсат мерзімінен бұрын жойылады. Егер сіз жаңа паспорт алсаңыз, ескі рұқсаттың мерзімі әлі бітпесе де, K-ETA-ны қайта алуыңыз керек.

K-ETA бойынша Кореяда неше күн болуға болады?

Қазақстандықтар үшін бір рет кіргенде үздіксіз болу мерзімі ең көбі 30 күн деп белгіленген. Егер сіз «визаран» жасауды (елден шығып, бірден қайта кіруді) жоспарласаңыз, 60/180 ережесін ұмытпаңыз. Көші-қон қызметі туристердің визасыз режимді заңсыз жұмыс істеу үшін пайдаланбауын жіті қадағалайды. Егер жарты жыл ішінде елде болудың жалпы мерзімі 60 күннен асса, келесі жолы кіруге тыйым салынуы мүмкін.

Осы тақырыпта басқа не бар?

Баламыз және әжемізбен 10 күн Кореяда болдық: не түйдік және қандай әсер алдық?

Оңтүстік Кореяға виза қандай жағдайда қажет және оны қалай алуға болады?

Кореяға туристік виза егер сіз бір сапарда 30 күннен артық болғыңыз келсе немесе K-ETA беруден үш рет бас тартқан жағдайда қажет. Мұндай кезде виза орталығына немесе елшілікке жүгінуге тура келеді. Қазақстандықтар үшін визаның мынадай түрлері бар:

• C-3-9 (туристік): егер K-ETA мақұлданбаса, қағаз визаға құжат тапсырып көруге болады. Ол үш аптаға дейін дайындалады.
• C-3-3 (медициналық): Корея клиникаларына емге баратындарға.

Визаға тапсыру үшін сізге жұмыс орнынан анықтама, соңғы алты айдағы банк үзіндісі және тұратын жайыңыздың броны қажет. Бір реттік виза үшін консулдық алым 50 USD (шамамен 23 230 KZT) басталады.

K-ETA болса да, елге кіргізбей қоюы мүмкін

Мақұлданған K-ETA — елге кірудің 100% кепілі емес. Заңсыз көші-қонмен күрес себебінен шекарашылар саяхатшыларды мұқият тексереді. Заң бұзушы емес, нағыз турист екеніңізді дәлелдеу үшін құжаттарыңыз бен сапар жоспарыңыз мінсіз болуы керек. Сондай-ақ сізден мыналарды растауды сұрауы мүмкін:

• Кері қайту билеті (тегін броньды көрсетуге болады).
• Барлық күнге арналған қонақүй броны.
• Ақшаның бар-жоғы (банк қосымшасынан үзінді, кейде жай ғана скриншот жеткілікті).

K-ETA алғаннан кейін жоспарларыңыз (қонақүй, күндер, серіктестер) өзгерсе, сайттағы «Application results — Update travel information» бөлімінде ақпаратты жаңартып қойған жөн. Мәліметтердің сәйкес келмеуі — елге кіргізбеудің негізгі себептерінің бірі.

Жиі қойылатын сұрақтар

K-ETA бермесе қайтемін? 

Сіз жарты жыл ішінде қайтадан үш ретке дейін өтінім бере аласыз. Егер үшінші рет те бас тартса, жүйе алты айға өтінім беру мүмкіндігін бұғаттайды. Бұл жағдайда жалғыз жол — елшілік арқылы виза алуға жүгіну.

Рұқсатты басып шығарып алуым керек пе? 

Қағаз нұсқасы міндетті емес — мәліметтер паспорт нөміріне тіркелген және шекарашыларға паспорттық бақылау кезінде көрініп тұрады. Бірақ жаным тыныш болсын десеңіз, смартфонда PDF нұсқасы болғаны дұрыс. Ол тіпті Кореяға үшінші ел арқылы ауысып ұшқанда да қажет болуы мүмкін: кейде шекарашылар рұқсатты көрсетіңіз деп сұрайды.

Оңтүстік Корея арқылы транзитпен өткенде K-ETA керек пе? 

Әуежайдың транзиттік аймағынан шықпасаңыз, рұқсат қажет емес. Ал қалаға шығуды жоспарлап отырсаңыз (мысалы, Сеулдегі ұзақ ауысым кезінде), иә, тіркелуіңіз керек.

Балалар мен қарт адамдарға K-ETA керек пе? 

17 жасқа дейінгі балалар мен 65 жастан асқан ересектер бұл талаптан босатылған. Олар Кореяға паспортпен-ақ кіре алады.

Суретін салған: СашаШура