Астанада ауызашарға баратын ТОП-10 кафе мен мейрамхана
ҚМДБ сертификаты бар орындарды іріктеп алдық.
Астанада ауызашар өткізетін мейрамхана көп, бірақ бағасы, атмосферасы не мәзірі жағынан ыңғайлысын тапқан оңай емес. Уақытыңызды үнемдеу үшін біз қаладағы ауызашар сеттері бар ТОП-10 мейрамхана мен кафені тізіп шықтық. Бәрінің Қазақстан мұсылмандары Діни басқармасы берген халал деген ресми сертификаты бар.
Afsona
Мекенжайы: Abu Dabi Plaza.
Бағасы: адам басына 8 990 теңге
Намазхана: жоқ, бірақ Abu Dabi Plaza-ның өзінде бар
Жұмыс тәртібі: күнде 10:00-дан 22:00-ге дейін істейді.
Байланыс: @afsona_kz.
Шығыс тағамдарын іздеген жан Afsona-ға тартуы керек. Палау, лағман, мәнті, сорпа дегеннің түр-түрі бар. Іші кең, интерьері шығыс мақамына сай: түрлі түсті өрнектер мен аспалы шамға толы. Балаларға ойын алаңы жасақталған. Аптаның әр күніне әртүрлі ауызашар сеті ұсынылады. Мәзірі өзбекше сорпа, палау, люля-кәуап пен картоп орамасы сияқты нағыз шығыс дәмін жиған.
Capitol
Мекенжайы: Сығанақ көшесі, 62/3.
Бағасы: адам басына 14 990–15 490 теңге
Жұмыс тәртібі: тәулік бойы.
Байланыс: @capitolcafe.
Capitol мейрамханасында тек ауызашарға емес, сәресіне де баруға болады. Бұл мейрамхана ет тағамының 15 шақты түрін ұсынады. Соның ішінде кәуаптың бірнеше түрі, кофте, дурум, сарма, донер бар. Ұнағанын таңдап аласыз. Сорпа, салат, сусын, десерт пен жемістер ифтар-сетке кіреді. Capitol Астананың орталығында орналасқан. Әр жұма мен сенбі кешінде жанды әуен ойнайды. Қазақша, түрікше әндерді скрипка мен флейта үні әуелетеді.
Saf
Мекенжайы: Қ. Аманжолов көшесі, 24
Бағасы: адам басына 9 500 теңге
Намазхана: бар
Жұмыс тәртібі: күнде 12:00-дан 00:00-ге дейін істейді.
Байланыс: @saf.astana.
Есілдің оң жағалауында орналасқан бұл мейрамхана үлкендігімен ерекше. Ішінде 45 орындық банкет зал да, VIP бөлмелер де, ортақ зал да бар. Биыл мәзіріне жылқы етінен қуырдақ, жілік сорпасы, балық филесі сияқты тағамдар енген. Он адамдық ифтар-мәзір бар, басты тағамы — бешбармақ. Бағасы адам басына 12 000 теңге. Атмосферасы жылы, отбасылық мейрамхана іздесеңіз, Saf-ты бірінші қарастырған жөн.
Master coffee желісі
Мекенжайы: ауызашар сеттері мына филиалдарында бар: Қонаев көшесі, 35; Қабанбай батыр, 60/18; Республика даңғылы, 10; Қалдаяқов көшесі, 3; Сығанақ, 15.
Бағасы: адам басына 4 990 теңге
Намазхана: бар.
Жұмыс тәртібі: күнде 07:15-тен 00:00-ге дейін істейді.
Байланыс: @mastercoffee.kz.
Астанада Master Coffee желісі жиырмадан асады, бірақ ауызашар сеттерін тек жоғарыда көрсетілген ас бөлмесі бар бесеуі дайындайды. Ифтар-сеттерге алдын ала тапсырыс беру керек, соны да ескерген жөн. Биыл бұл кафе желісі ауызашар сетіне ақсерке стейгі, пармезан қосылған тауық шницелі, саңырауқұлақты крем-сорпа сияқты тағамдарды енгізген. Дәмі ерекше сусындарды сүйетіндерге Рамадан specials ұсынылады: жүзім лимонадын, құрма латтесін, набиз не изюм қосылған батч брюдің дәмін көре аласыз.
«Самарқанд»
Мекенжайы: Тәуелсіздік даңғылы, 40.
Бағасы: адам басына 6 790-6 990 теңге.
Намазхана: жоқ.
Жұмыс тәртібі: күнде 11:00-дан 23:00-ге дейін істейді.
Байланыс: +77017771697, @samarkand.astana.
Өзбек тағамдарын әзірлейтін «Самарқанд» мейрамханасы биыл ашылды. Өзі екі қабаттан тұрады, балалар ойнайтын алаңы бар. Интерьері шығыс стилінде. Өзбекстаннан келген аспаздары ауызашар сетіне палау, мәнті, манпар, шорпа, тауық еті мен саңырауқұлақ тағамдарын қосқан. Жұма-сенбі күндері кешкісін жанды дауыспен ән шырқап, ұлттық аспаптарда ойнайтын музыканттар келіп думандатады. Алдын ала брондап қойған жөн, ауызашар уақытында бос орын таппай қалуыңыз әбден мүмкін.
Oneshott Coffee
Мекенжайы: тоғыз филиалы бар.
Бағасы: адам басына 6 990 теңге.
Намазхана: кейбірінде ғана бар.
Жұмыс тәртібі: күнде 08:00-дан 22:00-ге дейін істейді.
Байланыс: @oneshott_coffee.
Сеттерінің бірінде тауық пен күріш қосылған фрикассе, екіншісінде картоп езбесі мен бифштекс бар. Қасында сорпа, салат, самса, шай жүреді. Астанада бұл желінің 40-тан астам кофеханасы бар. Бірақ ауызашар сетін тек тоғыз филиалы ұсынады. Сондықтан қайсына баратыныңызды мұқият нақтылап алғаныңыз жөн. Дәл ауызашар уақытына тамақ дайын болуы үшін ауызашар мәзіріне алдын ала тапсырыс берген абзал.
Coffee Оriginal
Мекенжайы: Республика даңғылы, 27.
Бағасы: адам басына 4 500-6 500 теңге.
Намазхана: бар.
Жұмыс тәртібі: тәулік бойы.
Байланыс: @coffee.original.astana.
Астана саябағына жақын маңайда орналасқан Coffee Original еуропалық тағамдардан тұратын үш түрлі ауызашар сетін ұсынады. Бірінде митбол, бірінде бефстроганов, енді бірінде қытырлақ балапан еті сияқты ыстық тамақ пен сорпа бар. Одан бөлек, ифтар-мәзірге нан, су мен құрма кіреді.
Korizza
Мекенжайы: Сарайшық, 34/4.
Бағасы: адам басына 5 970 теңге.
Намазхана: бар.
Жұмыс тәртібі: күнде 08:00-дан 23:00-ге дейін істейді.
Байланыс: @korizza_ast.
Екіқабатты Korizza кофеханасының іші заманауи стильде. Атмосферасы жылы, орындары жайлы. Балалардың іші пыспайды: ойын бөлмесі мен кітап сөресі бар. Ауызашар сеттеріне динамит тұздығындағы қытырлақ тауық еті мен қуырылған күріш, картоп езбесімен берілетін бифштекс, үй кеспесі мен жасымық сорпасы сияқты ыстық тамақтар кірген. Сонымен қоса чиабатта наны, салат, құрма, су беріледі.
Sen Sulu
Мекенжайы: Әл-Фараби даңғылы, 1.
Бағасы: адам басына 6 000-8 000 теңге.
Намазхана: бар.
Жұмыс тәртібі: күнде 09:00-дан 23:00-ге дейін істейді.
Байланыс: @sensuluastana.
Sen Sulu — заманауи стиль мен ұлттық нақышты үйлестірген орындардың бірі. Төбеден еденге дейінгі үлкен терезелері кофехананың сәнін келтіріп тұр. Мәзірінде де қазақтың ұлттық тағамдары мен шетелдік ас қатар ұсынылған. Биыл ауызашар сеттерінде қуырдақ, ет, котлет, сорпа сияқты тағамдар бар.
Meat point
Мекенжайы: Ұлы Дала, 45.
Бағасы: адам басына 14 990 теңге.
Жұмыс тәртібі: тәулік бойы.
Байланыс: @meatpoint.astana.
24 сағат жұмыс істейді. Ауызашар сетіне сорпа, салат, ыстық тамақ, десерт, жемістер, бауырсақ, құрма, сусын мен зәмзәм суы кіреді. Сорпа мен ыстық тамақтың онға жуық түрі бар, ұнағанын таңдап аласыз. Түрік асханасының айтулы кәуаптары мен кофте-сармаларын сүйетіндерге арналған жер. Жұма мен сенбіде жанды музыка құлақтың құрышын қандырады.
