Үндістанға визаны қалай алу керек? Қазақстан азаматтарына нұсқау

Тәж-Махалға тамсанып, Мумбайдың бірегей атмосферасын көріп не Гоа жағалауында бой жазып қайтамын деп отырсаңыз, жолға шықпас бұрын реттеп қоятын бір шаруа бар. Ол — виза. 

Иә, Оңтүстік-Шығыс Азияға бет алған қазақстандықтар жиі жүгінетін транзиттік хаб — Үндістанға қазақтар виза алуы керек. Біз қолданыстағы талаптарын зерделеп, виза алу процесі сіз үшін барынша жеңіл әрі алаңсыз өтуі үшін егжей-тегжейлі нұсқау әзірледік.

Виза түрлері

Үндістан Қазақстан азаматтарына визаның бірнеше түрін ұсынады. Өзіңізге қайсысы керегін сапар сипатына қарай ажыратасыз. 

Электронды виза (e-Visa)

Бұл виза Үндістанға аз уақытқа бар жатқандарға ыңғайлы.  

• Ресми сайт арқылы рәсімделеді, елшілікке барудың қажеті жоқ;
• Туризм, іскерлік не медициналық мақсатта бара жатқандарға беріледі;
• Әдетте 30 күнге, 1 жылға не 5 жылға дейін жарамды болады (виза түріне байланысты); 
• Электронды виза арқылы елге тек өтініш берген кезде таңдаған әуежайлар мен теңіз порттары арқылы ғана кіруге болады. Қазақстан азаматтарына қолжетімді бекеттер елшілік сайтында көрсетілген. Құрлықтағы шекара арқылы кіруге рұқсат етілмейді.
• Визаңыз 1 айға не 5 жылға берілсе де, Қазақстан азаматтары Үндістанда 90 күннен артық жүре алмайды.Сондықтан елден шығып, қайта кіру рәсімін ойластырып қойған жөн. 
• Электронды e-Visa көп жағдайда транзиттік визаларға берілмейтінін ескеріңіз.

Туристік виза

Туристік виза Үндістанға демалуға, елді аралауға, мәдени іс-шараларға қатысуға бара жатқандарға беріледі. Бұл визаны ұзақ мерзімге бара жатқанда не арнайы жоспармен сапарлап бара жатқанда алған қолайлы.

• Елшілік не виза орталығы арқылы рәсімделеді;
• Елге бір не бірнеше мәрте кіруге рұқсат етілуі мүмкін;
• Жарамдылық мерзімі сапар мақсаты мен құжаттарға байланысты анықталады.

Транзиттік виза

Бұл виза Үндістан аумағы арқылы басқа елге бара жатқан жолаушыға қажет.

• Үндістанда қысқа уақыт (әдетте 72 сағатқа дейін) болуға рұқсат етіледі;
• Үшінші елге баратын билет пен (сол ел талап етсе) виза болуға тиіс;
• Бұл визаны туристік немесе жұмыс мақсатында пайдалануға болмайды.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Үндістан визасын өз бетіңізше қалай алуға болады?

Үндістанға визаны онлайн форматта өзіңіз рәсімдей аласыз. Әсіресе электронды виза (e-Visa) алған оңай әрі тез. 

1. Әуелі керек виза түрін таңдаңыз.

Сапарыңыздың мақсатын нақты анықтап алыңыз. Туризм, іскерлік кездесу, медициналық емделу не транзит — әр мақсаттың өзіне сәйкес виза түріне тапсыру керек. 

2. Сауалнаманы толтырыңыз.

Сауалнаманың бірінші беті осындай.

Үндістан үкіметінің ресми платформасында визаға тапсырарда толтыратын сауалнама бар. Сауалнамада жеке деректер, төлқұжат мәліметтері, сапар мақсаты және жоспарланған күндер көрсетіледі. Ақпаратты латын әріптерімен және тура төлқұжаттағыдай енгізген маңызды. 

3. Құжаттарды жүктеу.

Сауалнама толтырылғаннан кейін қажет құжаттардың электронды нұсқаларын жүктейсіз. Әдетте мынадай құжаттар керек болады:

• стандартқа сай шетелдік төлқұжаттың скан-нұсқасы;
• виза талаптарына сай фотосурет;
• виза түріне байланысты қосымша құжаттар.

4. Виза алымын төлеу.

Құжаттар жүктелген соң онлайн түрде виза жарнасын төлейсіз. Ол үшін халықаралық банк карталары керек. Алым көлемі виза түрі мен мерзіміне байланысты. Шамамен 25–80 АҚШ доллары (12 500–40 мың теңге). 

5. e-Visa алу.

Өтінім қаралғаннан кейін электронды виза сауалнамада көрсетілген электрондық поштаға жіберіледі. e-Visa әдетте бірнеше жұмыс күні ішінде дайын болады. Оны басып шығарып, Үндістанға сапар кезінде өзіңізбен бірге алып жүресіз.

Визаны алуға қажет құжаттар

Визаның құны қанша?

Үндістан визасының құны виза түріне, жарамдылық мерзіміне және өтінім берілетін форматқа (онлайн немесе елшілік арқылы) байланысты өзгереді.

Негізгі бағалар доллармен немесе рупиямен есептеледі (шамамен):

• Электронды туристік виза (e-Visa) — тегін
• 1 жылдық e-Visa — 80 АҚШ доллары (40 мың теңге)
• 5 жылдық e-Visa — 104–274 АҚШ доллары (40 000–60 мың теңге)
• Туристік виза (елшілік арқылы) — виза түріне сәйкес есептеледі
• Транзиттік виза — 20 АҚШ доллары (12 500 теңге шамасы)

Виза қанша уақытта дайын болады?

Визаны рәсімдеу мерзімі таңдалған виза түріне байланысты.

• Электронды виза (e-Visa) — әдетте 2–5 жұмыс күні;
• Туристік виза (елшілік арқылы) — 7–10 жұмыс күні немесе одан да ұзақ болуы мүмкін;
• Транзиттік виза — бірнеше жұмыс күні ішінде.

Ескерту: туристік маусымда не мереке күндері визаны қарастыру мерзімі ұзаруы мүмкін, сондықтан өтінімді ертерек берген дұрыс.

Визаның дайын екенін қалай тексеруге болады?

• e-Visa рәсімдеген кезде көрсетілген электрондық поштаға хабарлама келеді;
• Сондай-ақ өтінім нөмірі арқылы ресми онлайн жүйеде визаның қарастыру мәртебесін тексеруге болады;
• Елшілік арқылы тапсырылған визаның дайындығы визалық орталық арқылы хабарланады.

Визаның жарамдылық мерзімі

Үндістан визасының әрекет ету мерзімі виза түріне байланысты әртүрлі.

• 30 күндік e-Visa — берілген күннен бастап 30 күн;
• 1 жылдық e-Visa — 12 ай бойы жарамды, бірнеше мәрте кіруге рұқсат етіледі;
• 5 жылдық e-Visa — 5 жылға дейін, көп мәртелі кіру мүмкіндігі бар;
• Туристік виза (елшілік арқылы) — 3 айдан 1 жылға дейін (жеке жағдайға байланысты);
• Транзиттік виза — әдетте 72 сағатқа дейін.

Визаның жарамдылық мерзімі мен елде жүруге рұқсат етілген уақыт дегеннің бір ұғым емесін ескерген жөн. Виза жарамды болса да, әр кіруде елде болу мерзімі шектелген болуы мүмкін.

Үндістанға жетіп, басқа ұшаққа отырған кезде виза қажет пе?

Транзитпен (ұшақ ауыстыру арқылы) ұшу кезінде виза қажеттілігі жағдайға байланысты. Егер транзит уақытыңыз 24 сағаттан аз болса, транзиттік визаны алу міндетті емес. Одан бөлек, егер де сіз IndiGo тасымалдаушысымен саяхаттасаңыз, олар ылғи да транзиттік визанының болуын талап етеді.  

Виза қажет болмайды, егер:

• сіз халықаралық әуежайдың транзиттік аймағынан шықпасаңыз;
• келесі рейс бір билетпен рәсімделген болса;
• жүк соңғы бағытқа дейін тіркелген болса;
• транзит уақыты қысқа және иммиграциялық бақылаудан өтпесеңіз.

Тағы осы тақырыпта

Түйісетін және ауысып мінетін рейстерді ажырата аласыз ба?

Виза қажет болады, егер:

• әуежайдан шығып, қалада қыдырып қайтамын десеңіз;
• жүкті алып, қайта тіркеу керек болса;
• рейстер әртүрлі билеттермен алынған болса;
• транзит уақыты ұзаққа созылса.

Aviasales.kz сайтында ауысып міну кезінде виза керек пе, жоқ па — міндетті түрде ескертіп отырамыз.

Үндістан арқылы ұшатын транзиттік визаны қалай алуға болады?

Транзиттік визаны онлайн да, елшілік немесе консулдық арқылы да рәсімдеуге болады. Негізгі қадамдар:

1. Виза сауалнамасын толтыру (транзиттік виза түрін таңдау);
2. Қажетті құжаттарды дайындау:
   • шетелдік төлқұжат;
   • үшінші елге расталған билет;
   • үшінші ел визасы (қажет болса);
   • фотосурет.
3. Консулдық алымын төлеу;
4. Құжаттарды елшілікке тапсыру;
5. Виза шешімін күту.

Үндістан неге виза бермей қоюы мүмкін? 

Виза беру-бермеу шешімі консулдық құзыретінде және ол неге бермей қойғанын түсіндірмейді. Алайда жиі кездесетін себептер мыналар:

• сауалнама деректеріндегі қателер немесе сәйкессіздіктер;
• төлқұжаттың жарамдылық мерзімінің жеткіліксіз болуы (кемінде 6 ай);
• сапар мақсатының нақты көрсетілмеуі;
• кері билет немесе тұру орнын растаудың болмауы;
• бұрын визалық режимді бұзу;
• жалған немесе күмәнді ақпарат ұсыну;
• визаның мақсатына сәйкес келмейтін жоспарлар (мысалы, туристік визамен жұмыс істеу).

Тағы осы тақырыпта

Неліктен сізге виза бермеуі мүмкін және ондай жағдайда не істеуге болады

Жиі қойылатын сұрақтар

Үндістанға барарда балаға бөлек виза қажет пе?

Иә. Жас ерекшелігіне қарамастан, Үндістанға баратын әрбір Қазақстан азаматына жеке виза қажет. Бала ата-анасының төлқұжатына жазылған болса да, оған жеке виза рәсімделуі тиіс. Өтінімді ата-анасы немесе заңды өкілі толтырады.

Алынған виза уақытын ұзартуға бола ма?

Әдетте e-Visa уақытын ұзарту мүмкін емес. Виза мерзімі аяқталған соң елден кету керек. Ал елшілік арқылы алынған кейбір визалар (ерекше жағдайларда) Үндістан аумағында ұзартылуы мүмкін, бірақ бұл сирек кездеседі және қосымша рәсімдерді талап етеді.

e-Visa арқылы Гоаға баруға бола ма?

Иә, болады. Гоадағы халықаралық әуежайлар электронды визамен келетін жолаушыларды қабылдайды. 

e-Visa арқылы кез келген әуежайға кіруге бола ма?

Жоқ. e-Visa тек Үндістан үкіметі бекіткен әуежайлар мен теңіз порттары арқылы жарамды. Сапар алдында таңдалған әуежайдың e-Visa қабылдайтынын тексеру маңызды. Сауалнаманы толтыру кезінде өзіңіздің жоспарыңыз бойынша, қай қаладағы қай әуежайға келетініңізді көрсету маңызды. Елден шығу үшін бұндай ереже қолданылмайды, сондықтан елдің кез келген нүктесінен шыға аласыздар. 

Үндістан визасын қанша уақыт бұрын рәсімдеген дұрыс?

e-Visa алуға өтінімді сапарға кемінде 7–10 күн қалғанда берген дұрыс. 

Туристерге бірер ақыл-кеңес

• Виза анкетасын толтырғанда барлық деректі төлқұжаттағыдай дәл енгізіңіз;
• Төлқұжаттың жарамдылық мерзімін алдын ала тексеріңіз (кемінде 6 ай);
• e-Visa алғаннан кейін оны шығарып алып, сапар кезінде өзіңізбен бірге алып жүріңіз;
• Кері қайтатын билет пен қонақ үй бронін (немесе сапар жоспарын) қолжетімді жерде сақтаңыз;
• Елде болу мерзімінен асып кетпеңіз — бұл болашақта виза алуға қиындық туғызуы мүмкін;
• Туристік визамен жұмыс істеуге немесе коммерциялық қызметпен айналысуға болмайды;
• Үндістанға барғанда жергілікті заңдар мен мәдени ерекшеліктерге құрметпен қараңыз.

Суретті салған — СашаШура.