Дезодорантты ұшаққа ала кіруге бола ма?
Тексеру кезінде артық сұрақ тумас үшін дезодорантты қалай қаптаған дұрыс екенін айтамыз.
Сапар қарсаңындағы қарбаласта уайымнан су тер болатын, тершеңдігі тағы уайымға салатын күйгелек кісілерге дезодорант керек-ақ. Тексеру бекетінде күзетшілер бұйымыңыз талапқа сай емес деп алып қалып, қоқысқа тастамас үшін қауіпсіздік талаптарын білген жөн.
Дезодоранттың түрі көп. Бірі сұйықтық санатына жатады, енді бірі қысымы күшті қауіпті жүк деп қарастырылады, ал кейбіріне мүлде шектеу қойылмайды. Дезодорантты қол жүгініңізге қалай дұрыс салуға болады, қайсысын жүкке тапсырған жөн, duty free дүкенінен алынған тауарға қандай талап бар — бәрін рет-ретімен түсіндіреміз.
Ұшақта аэрозольдер мен спрейлерді тасымалдау ережелері
Дезодорантты ұшаққа алып кіруге болады, бірақ алдымен оның түрін ескерген жөн. Қазір антиперспиранттар роликті, қатты стик, гель және қысымдағы баллондағы спрей болып шығарылады. Соның ішінде тасымалдауға ең қолайсызы — аэрозоль түрі.
Ұшақ бортына тек жанғыш заттары жоқ әрі жеке гигиенаға арналған аэрозоль баллондарын ғана алып кіруге рұқсат. Жиналар алдында қаптамасын қарап шығыңыз: үстінде «жанғыш» деген белгі (қызыл ромб ішіндегі жалын таңбасы) болмауы керек. Сондай-ақ қорғаныш қақпағы бар екеніне көз жеткізген дұрыс. Ол сөмке ішінде спрейдің абайсызда басылып кетуінен сақтайды.
Дезодорантты қол жүгіне салуға бола ма?
Қауіпсіздік қызметі үшін қол жүгіндегі дезодорант — сұйықтық санатына жатады. Бұған роликті, гель түріндегі және аэрозоль дезодоранттар кіреді. Тек бір ғана ерекшелік бар: құрғақ стик түріндегі қатты дезодорант немесе минералды кристалл. Олар қатты зат ретінде қарастырылады және шектеуге ілінбейді.
Егер өзіңізбен сұйық не спрей түрін алсаңыз, халықаралық 100 миллилитр ережесі қолданылады. Яғни құтының көлемі 100 мл-ден аспауға тиіс. Мысалы, 150 мл-лік спрейіңізде аз ғана қалса да, оны бақылау бекетінде қалдыруға тура келеді. Себебі тек ішіндегі мөлшер емес, құтының жалпы көлемі есепке алынады.
Қол жүгіндегі барлық сұйық затты, соның ішінде дезодорантты да, түссіз, аузы берік жабылатын пластик пакетке салу керек. Бір жолаушыға рұқсат етілетін жалпы көлем — 1 литр. Бұл талап та құтылардың көлеміне қатысты екенін ұмытпаңыз.
Дезодорантты қол жүгіне салу ережесі
Дезодорант түрі | Ереже |
|---|---|
Роликті немесе гельді | 100 миллилитрге дейін |
Қатты | шектеу жоқ |
Спрей немесе аэрозоль | 100 миллилитрге дейін, ұшақ ішінде қолдануға болмайды |
Кристаллический | шектеу жоқ |
Дезодорант түрі | Ереже |
|---|---|
Роликті немесе гельді | 100 миллилитрге дейін |
Қатты | шектеу жоқ |
Спрей немесе аэрозоль | 100 миллилитрге дейін, ұшақ ішінде қолдануға болмайды |
Кристаллический | шектеу жоқ |
Дезодорантты багажға салуға бола ма?
Егер ұшақта дезодорант сеуіп аламын деп отырмасаңыз, оны багажға тапсыра салған дұрыс. Бұл жағдайда талап әлдеқайда жеңіл: көлемі 100 миллилитрден асатын құтыларды алып жүруге болады. Мысалы, 150 немесе 200 миллилитрлік стандартты аэрозоль баллоны жүк бөлімінде еш қиындықсыз жеткізіледі.
Дегенмен жүкке қатысты да ортақ шектеулер бар. Аэрозольдер қауіпті заттар санатына жататындықтан, бір құтының көлемі 500 миллилитрден аспауға тиіс. Ал бір жолаушыға рұқсат етілетін жалпы көлем — 2 литрден көп болмауы керек.
Жүкке салғанда негізгі қауіп — сұйықтықтың ағып кетуі. Қысымның өзгеруі немесе чемодандарды тиеу кезіндегі соққы салдарынан ішіндегі сұйықтық сыртқа шығуы мүмкін. Киім бүлінбеуі үшін қақпағының мықтап жабылғанына көз жеткізіңіз. Қосымша сақтық үшін құтыны тағамға арналған үлдірге орап немесе жеке пакетке салып қойған дұрыс.
Duty Free дүкенінен алынған дезодорантты қол жүгіне салып алуға бола ма?
Көпшілік косметиканы ұшар алдында duty free дүкенінен алғанды ұнатады. Бұл жерде талап басқа. Көлемі 200 миллилитрлік спрей не ролик дезодорантты сатып алып, оны ұшаққа алып кіруге болады.
Басты шарт — тауар дүкеннің арнайы фирмалық пакетіне салынып, түбіртегі ішінде болуы керек. Пакет ұшу аяқталғанша ашылмай, мөрленген күйде қалуға тиіс. Егер рейсіңізде ауысып міну болса, соңғы межеге жеткенше пакетті ашпаңыз. Әйтпесе транзиттік әуежайдағы қайта тексерісте артық миллилитрлер тәркіленуі мүмкін. Бұл ереже иіссуға да қатысты.
Дезодорантты неге тәркілеп алуы мүмкін?
Тіпті бәрін дұрыс жасағаныңызға сенімді болсаңыз да, тексеріс кезінде даулы жағдайлар туындауы мүмкін. Дезодоранттың бақылау бекетінде қоқысқа тасталуына жиі себеп болатын жағдайлар мынадай:
- Көлемнің артық болуы. Қол жүгінде 150 миллилитрлік құты болса — ол автоматты түрде өткізілмейді, ішінде аз ғана қалса да.
- Таңбаның болмауы. Қаптамадағы жазу өшіп, көлемін анықтау мүмкін болмаса, қызметкерлер затты өткізбей қоюға құқылы.
- Қаптаманың бүлінуі. Аэрозоль баллонындағы майысу немесе құтыдағы жарық күдік тудырады.
- Түссіз пакетке салынбауы. Кейбір қатаң әуежайларда (әсіресе ЕО елдерінде) барлық сұйықтық бір мөлдір, жабылатын пакетте болуын талап етеді.
- Қауіп төндіреді деген күдік. Аэрозольдің иісі тым өткір химиялық болса немесе сыртқы түрі күмән тудырса, оны тәркілеуі мүмкін.
Ұшақта дезодорантты тасымалдау бойынша кеңестер
Ұшуыңыз жайлы әрі жайбарақат өтуі үшін мына қарапайым кеңестерді ұстаныңыз:
- Қатты түрін таңдаңыз. Стик немесе минералды кристалл көлемге қатысты шектеуге ілінбейді, ақпайды және сөмкеде аз орын алады.
- Роликті жүкке салмас бұрын қақпағын мықтап бұрап жабыңыз, мойнын тағамдық үлдірмен орап, үстінен қақпағын кигізіңіз.
- Сұйық дезодорантты түссіз, аузы берік жабылатын пакетте ұстаңыз. Бұл — қауіпсіздік талабы ғана емес, заттарыңызды кездейсоқ дақтан қорғаудың да жолы.
- Қол жүгінде косметика сөмкесін ең үстіне қойыңыз. Тексеру кезінде барлық сұйық затты бөлек көрсетуді сұрауы мүмкін.
- Көп дүкенде косметика мен жеке гигиена құралдарының шағын форматтары сатылады. Сүйікті спрейді ұшақ салонына алып кірудің ең қолайлы тәсілі — осы.
Суретті салған — СашаШура.
