Ұшаққа пышақ алып кіруге бола ма?
Сіз айыппұл арқаламасын деп, ережені топтап шықтық.
Кәнігі саяхатшылар тескіш-кескіш заттарды ұшаққа алып кіруге болмайтынын жақсы біледі. Бірақ кеңсе пышағын, бәкіні не Қытайдан алған қанжар кәдесыйды тасымалдау қажет болса, не істемек керек? Қазақстан мен әлемдегі қауіпсіздік стандарттары ұқсас: қол жүгіне борттағы жолаушыларға қатер төндіруі мүмкін заттарды алып кіруге болмайды. Мақалада пышақ тасымалдаудың негізгі ережелерін түсіндіріп береміз.
Жалпы ережелер
Кез келген пышақ, тіпті ең жүзі өтпес, ұшы доғал болса да, қауіпті зат саналады. Сондықтан халықаралық және қазақстандық тасымалдау ережелері мұндай заттарды ұшақ бортына алып кіруге тыйым салады.
Қол жүгі
Қол жүгіне пышақ салуға қатаң тыйым салынған. Өзіңізбен бірге пышақ ала жүрсеңіз, тексеріс кезінде оны қалдырып кетіңіз деп талап етеді. Қол жүгіне ұшы доғал үстел пышақтарын ғана салуға болады (мысалы, Air Astana тамақпен бірге дәл сондай пышақ таратады).
Багаж
Пышақты багажға салуға тыйым салынбаған, бірақ әуе компанияның шарттарын қатаң сақтау керек. Әуе компанияларының ережесі әртүрлі. Мысалы, пышақ мейлінше қауіпсіз қаптамаға салынуы керек.
Қандай пышақтарды багажбен тасуға болады?
Барлық дерлік тұрмыстық пышақты жүкке салуға болады. Оларға ас үй, туристік, аңшылық, швейцариялық, кеңселік және керамикалық пышақтар жатады. Мынаған назар аударыңыз:
- Пышақ мықтап оралуы керек — пластикалық қорапқа салыңыз немесе қалың материалға ораңыз, жүзі толықтай жабық болуға тиіс. Өзіңіз не тексерушілер пышақ ұшынан кездейсоқ жарақат алып қалмауы қажет.
- Кейбір жағдайда пышағыңыз тұрмыста қолданылатынын немесе кәдесый екенін растау қажет болуы мүмкін. Дүкен түбіртегі не қолдану нұсқаулығы жарайды.
- Кейбір модельдер конструкциясы бойынша суық қару саналады. Мұндай заттарды арнайы рұқсатсыз тасымалдауға (және жалпы алып жүруге) болмайды. Төменде пышақ санатын анықтайтын бірнеше критерий берілген. Ескеретін жайт, әуежай қызметкерлері әр пышақты жеке қарастырады және түпкілікті шешімді тек суық қару жөніндегі сарапшы шығарады:
- Жүзінің ұзындығы. Ұзындығы тоғыз сантиметрден асатын жүздері бар пышақтар суық қару болып саналуы мүмкін. Ұзындығы алты сантиметрден аз пышақтарға тыйым жоқ.
- Конструкциясы мен пішіні. Әр пышақ жеке зерттеледі. Бірақ, мысалы, пышақта гарда (саусаққа арналған арнайы қорғаныс) болса, бұл суық қарудың белгісі.
- Жүзінің қалыңдығы мен қаттылығы.
Пышақты қол жүгіне салуға бола ма?
Кейбір елдер жүзі алты сантиметрден қысқа пышақтарды қол жүгіне cалып алып жүруге рұқсат етеді. Алайда халықаралық IATA стандарттарына және Қазақстанның тыйым салынған заттар тізімін негізге алған дұрыс: яғни пышақтың ұзындығына, құрылымына немесе мақсатына қарамастан, оның бәрін жүкке тапсырыңыз. Өте кішкентай пышақтың өзі бортта қатер төндіруі мүмкін.
Әлдекім пышақты қол жүгінде әуе бортына алып кірмек болса, тексеру кезінде ереже бұзылғаны бірден анықталады. Сөйтіп қауіпсіздік қызметкері пышақты тәркілеп алады.
Екінші рет ереже бұзған жолаушының, мәселен, Қазақстанда заты тәркіленіп, он айлық көрсеткіш көлемінде айыппұл (39 320 теңге) салынады немесе құқық қорғау органдарына хабар беріледі. Кей елдерде ереже бұзған адамды рейске жібермей қоюы мүмкін.
Қандай пышақты багажбен тасымалдауға болады?
Кейбір пышақ түрлерін барлық талапты сақтап, багажбен еш кедергісіз тасымалдауға болады.
Пышақ түрі | Багаж | Ескеріңіз |
|---|---|---|
Ас үй пышағы | Рұқсат етіледі | Зауыт қаптамасын не сатып алған чекті сұрауы мүмкін |
Аңшылық пышақ | Рұқсат етіледі | Аңшылық куәлігі қажет болуы мүмкін. Пышақтың суық қару санатына жатпайтынына көз жеткізіңіз |
Швейцариялық пышақ (мультитул) | Рұқсат етіледі | |
Кеңсе пышағы / канцелярлық ұстара | Рұқсат етіледі | |
Бәкі | Рұқсат етіледі | Әдетте суық қару саналмайды. Бірақ жүзі 9 см-ден қысқа екеніне көз жеткізген дұрыс |
Керамикалық пышақ | Рұқсат етіледі | Өте сынғыш, сондықтан мұқият және берік қаптама қажет |
Ас үй пышағы
Багаж
Рұқсат етіледі
Ескеріңіз
Зауыт қаптамасын не сатып алған чекті сұрауы мүмкін
Аңшылық пышақ
Багаж
Рұқсат етіледі
Ескеріңіз
Аңшылық куәлігі қажет болуы мүмкін. Пышақтың суық қару санатына жатпайтынына көз жеткізіңіз
Швейцариялық пышақ (мультитул)
Багаж
Рұқсат етіледі
Ескеріңіз
Кеңсе пышағы / канцелярлық ұстара
Багаж
Рұқсат етіледі
Ескеріңіз
Бәкі
Багаж
Рұқсат етіледі
Ескеріңіз
Әдетте суық қару саналмайды. Бірақ жүзі 9 см-ден қысқа екеніне көз жеткізген дұрыс
Керамикалық пышақ
Багаж
Рұқсат етіледі
Ескеріңіз
Өте сынғыш, сондықтан мұқият және берік қаптама қажет
Пышақты багажға саларда
- Пышақты багажда қауіпсіз әрі дұрыс тасымалдау үшін оны арнайы қаптамаға мықтап салу қажет. Пышақтың жүзі толық жабылып, қапталуы керек. Пышақ жүзінің еш бөлігі сыртқа шығып кетпес үшін қатты пластик қап, қалың мата, қорап не арнайы қорғаныс қапшығын қолданған жөн.
- Пышақ жүк ішінде қозғалып кетпейтіндей етіп салынуы керек. Мысалы, Жапониядан кәдесый ретінде алсаңыз, дүкеннен оны қорапқа салып, орап беруді сұраңыз. Сатушыдан түбіртек алып, сақтап қоюды ұмытпаңыз.
- Қаптама берік болмаса, тасымалдау кезінде жүк тиейтін қызметкерлер жарақат алуы мүмкін, сондықтан беріктігі жоғары материалдарды қолданыңыз. Сонымен қатар пышақты басқа заттармен бірге араластырып салмай, жүк ішінде қозғалып кетпейтіндей етіп орналастырған дұрыс. Пышақтың өткір ұшына резеңке не пластик кигізіп қойсаңыз, тіптен тамаша.
Суретті салған — Дада Кирей.
