Электронды темекіні басқа елге алып кіруге бола ма?

Ең әуелі, темекінің кез келген түрі денсаулығыңызға зиян екенін ескертеміз. Бұл мақаланы саяхат кезінде темекіні қалай алып жүремін деп алаңдаған адамдарға нұсқаулық деп қабылдаған дұрыс.

Темекіні ұшаққа алып кіруге бола ма? Шегуге ше? Саяхаттағанда шылымды қалай алып жүру керек? Осы және өзге сұрақтарға жауап береміз.

Электронды темекіні ұшақта тасымалдау ережесі

Электронды темекілер мен вейптердің тасымалдауға рұқсат етілген мөлшері әр елде әртүрлі және ереже жиі өзгеріп отырады. Мысалы, Түркия аумағына адам басына 10 данадан аспайтын электрондық темекі алып кіруге болады. Сингапур мен Гонконгқа HQD маркалы құрылғыларды әкелуге тыйым салынған. HQD — бұл электронды темекі (вейп) маркасы. Олар көбіне бір рет қолдануға арналған және түрлі дәммен шығарылады (мысалы, жеміс, ментол, т.б.).

Ең дұрысы, саяхат алдында елшіліктің ресми сайтынан вейптер мен электронды темекілер жайлы кейінгі ақпаратты тексеріп алған жөн. Әуе компанияларының электронды шылымды ұшақпен тасымалдау бойынша ішкі ережесі көбіне бір-біріне ұқсас.

Электронды темекіні қол жүгінде тасымалдау ережесі

Электронды темекіні көбіне тек қол жүгінде тасымалдауға рұқсат етеді. Оны аккумуляторы өшірілген не ажыратылған күйі түссіз пакетке салып алуыңыз керек. Ал құрылғы сұйықтығын 100 мл ыдысқа құйып аласыз.

Ескерту: ұшақ бортында бір литрден көп сұйықтық тасымалдауға болмайды.

Тағы осы тақырыпта

Қол жүгімен саяхаттау: ең қажетті заттарды қалай сыйдырамыз?

Электронды темекіні багажда тасымалдау ережелері

Әдетте электронды темекіні жүк ретінде тапсыруға болмайды. Бірақ вейпке арналған сұйықтықтар мен стиктерді багажда тасымалдауға рұқсат етіледі.

Ұшақта кәдімгі темекіні тасымалдау ережесі

Халықаралық рейстер кезінде темекі өнімдерін баж салығынсыз қанша мөлшерде әкелуге болатынын негізгі екі құжат реттейді:

1. Баратын елдің кеден заңнамасы;
2. Әуе компаниясының ережесі.

Сіз ел ішінде ұшқалы жатсаңыз, әуе компанияның ішкі ережесіне бағынасыз. Мысалы, Еуроодақ елдерінде темекі мен темекі өнімдерін алып кіру бойынша жоғарғы және төменгі лимиттер бекітілген. Әр ел өзі қандай лимитті ұстанатынын таңдайды. Бұл ереже тек темекі, сигара, сигарилл мен темекіге қатысты. Вейпке бұл тәртіп жүрмейді.

• Жоғарғы лимит — 200 қорап темекі немесе 250 грамм табак
• Төменгі лимит — 40 қорап темекі немесе 50 грамм табак

Көп елде 200 темекіден (яғни, 10 қорап немесе 1 блок) артық әкелуге болмайды. Бұл лимитті мынадай елдер ұстанады:

• Түркия, Таиланд, АҚШ, Канада, Ұлыбритания, Жапония мен Ресей

Кей елдерде темекі тасымалдау ережесі елдің белгілі бір өңіріне не сол елде қанша уақыт жүретініңізге қарай өзгеруі мүмкін.

• Гонконг пен Макаода бір тәуліктен көп жүремін десеңіз, 200 қорап темекі алып кіруге болады. 24 сағаттан аз жүрмек болсаңыз, 40 қорап темекіге рұқсат етіледі.
• Қытайдың басқа өңірлеріне баж салығынсыз 400 қорап темекіге дейін алып өтуге рұқсат бар.

Шекарашылар сонша темекі сізге неге керек деп сұрамайды, әрине, бірақ багаж ақысын төлеуіңіз керек болады. 

Темекіні қол жүгінде тасымалдау

Бұл тасымал ереже бойынша рұқсат етілген. Әдетте бір блок темекі ауыр емес, сондықтан салмақ шектеулеріне сай келеді.

Темекіні багажда тасымалдау

Бұған да рұқсат етілген.

Ережені бұзғандарға салынатын айыппұл мен түрлі шара

Басты ереже — ұшақ ішінде ешқашан темекі шекпеңіз. Біттім, төзімім таусылды, шекпесем болмайды десеңіз де, шыдаңыз — басқа амал жоқ. Әйтпесе салдары ауыр болады.

Есте сақтаңыз:

• Ұшақта түтін детекторлары бар, сондықтан сіздің темекі тартқаныңыз бірден әшкере болады.
• Жолаушы темекі тартқан болса, экипаж ұшақты шұғыл қондыруға құқылы.

Әуе бортында темекі тартсаңыз, сізге мемлекет заңнамасына сай айыппұл салынуы мүмкін, әуе компаниялары сізге бұдан былай ұшуға билет сатпауы мүмкін, тіпті қамауға алынуыңыз да ықтимал. Негізінен шара қолданумен әуе компаниясы емес, кеден қызметі айналысады. Бортқа мінгеннен бастап сізге бортта темекі шекпеңіз деген ережені қайталайды. Ережені бұзбаңыз.

Электронды темекіге тыйым салған елдер

Мүлдем тыйым салынған (алып өтуге де, шегуге де болмайды):

• Аустралия (медициналық мақсатта ғана шегуге рұқсат етілген, дәрігердің рецепті қажет)
• Ватикан
• Гамбия
• Гонконг
• Үндістан
• Қатар
• Камбоджа
• Лаос
• Ливан
• Никарагуа
• Таиланд 
• Тайвань
• Солтүстік Корея
• Сингапур
• Сирия

Алып кіруге және шегуге рұқсат ететін, бірақ электронды шылымды не оның бөлшектерін сатуға тыйым салған елдер де бар. Яғни, өз вейпіңізді ел аумағына алып кіруге болады, бірақ ел аумағынан (заңды түрде) оған қажет нәрселерді сатып ала алмайсыз: 

• Антигуа және Барбуда
• Аргентина
• Бахрейн
• Бразилия
• Бруней
• Бутан
• Венесуэла
• Шығыс Тимор
• Египет
• Иордания
• Иран
• Ирак
• Колумбия
• Кувейт
• Маврикий
• Малайзия
• Макао
• Мексика
• Непал
• Оман
• Панама
• Сейшел аралдары
• Суринам
• Түрікменстан
• Түркия
• Уганда
• Уругвай
• Чили
• Шри-Ланка
• Эфиопия
• Ямайка
• Жапония

Жапонияға никотинсіз сұйықтықтарды алып кіруге болады. Ямайка мен Чилиде электронды темекіні медициналық мақсатта ғана шегуге рұқсат етілген.

Ұшақта темекі шегуге бола ма

Жоқ, мүлдем болмайды. Ұшақта темекі тарту халықаралық қауіпсіздік ережесін өрескел бұзу болып саналады.

Ұшақта темекі тартқыңыз келсе, не істеу керек

Саяхатқа жолға шығып, ұшаққа жайғасып, жол үстінде аяқ астынан темекі тарта бастасаңыз, «қызықтың» көкесін көресіз. Ұзақ жолда қатты қиналамын дейтіндерге мынадай ақыл-кеңесіміз бар:

• Никотинді сағыз шайнаңыз не никотинді пластырь жапсырып алыңыз. Оларды тасымалдауға болады.
• Ұшардан бұрын сағыздың не пластырдің бірнеше түрін қолданып көріп, өзіңізге сай келетінін таңдап алыңыз. 

Уайым не мазасыздық қинап, дегбіріңіз қашса, тыныс алу жаттығуын жасап көріңіз:

• 4 секунд — терең тыныс алыңыз,
• 4 секунд — демді ұстаңыз,
• 4 секунд — тыныс шығарыңыз,
• 4 секунд — тынысты ұстап тұрыңыз.

Осылай бірнеше рет қайталаңыз.

Жол ұзақ болса, ұшақ салонында серуендеп көріңіз. Бұл да тынышталуға көмектеседі. Әуе бортында тамақ таратып жүргенде жағаласып, тар жерге тамаша болмаңыз бірақ.

Электронды темекі мен вейпті тасымалдау туралы  қысқаша жаднама:

Не істеуге болады:

1. Темекі құралдарын қол жүгіне салыңыз. Электронды темекіні тек қол жүгіне салуға болады (багажға салуға болмайды — жарылып кету қаупі бар).
2. Сұйықтықты алып жүру шегіне сай дайындаңыз. Вейп сұйықтығы 100 мл аспауы керек және түссіз пакетке салынып, кеденде тексерілуі қажет.
3. Құрылғыны сөндіріп қойыңыз. Қауіпсіздік үшін вейп құрылғысын өшіріп, аккумуляторын алып тастаңыз. 
4. Әуе компания мен әр елдің ережесін шолып шығыңыз. Әр елде, әр әуе компаниясында ереже әртүрлі болуы мүмкін (кейбір елде, мәселен, Таиландта, вейпті алып кіруге толықтай тыйым салынған).
5. Қосымша аккумулятор болса, оны да қол жүгіне салыңыз. Қосалқы батареяларды жекелей қорғау керек (мысалы, арнайы қап немесе қорапқа салып қойыңыз).

Не істеуге болмайды:

1. Бортта вейп тартуға болмайды. Ұшақ ішінде вейп шегуге қатаң тыйым салынған.
2. Тексерілетін жүкке салуға болмайды. Батареясы бар құрылғыларды тексерілетін багажға салуға болмайды — өрт қаупі жоғары.
3. Сұйықтықтарды мөлшерден тыс алып жүруге болмайды. 100 мл көп вейп сұйықтығын алып өтуге болмайды (қол жүгінде).
4. Қолдану кезінде қоғамдық жерде тәртіп бұзбаңыз. Кейбір әуежай мен елде қоғамдық орында вейп тартуға тыйым салынған.
5. Құжатсыз не рұқсат етілмеген елге алып баруға болмайды. Мысалы, Сингапур мен Үндістанда вейпке толық тыйым салынған — айыппұл арқалап, түрме жазасына кесілуіңіз мүмкін.

Қорытынды

Темекі бойынша ереже әр елде жыл сайын өзгеріп отырады. Саяхат алдында бұл мәселеге мұқият қарап, талаптарды ескергеніңіз жөн. Тағы да ескертеміз, темекі шегу денсаулығыңызға өте зиян.