Үтік, фен, ұстара: ұшаққа қандай техниканы алып кіруге болады?
Ұшақпен сапарға шығарда фен, шаш түзеткіш, электр ұстара сияқты техниканы қалай тасымалдауға болатынын алдын ала білген дұрыс. Кейбір құрылғыларды қол жүгіне салуға болады, ал кейбірін багажға тапсырған жөн. Бұл мақалада осындай техниканы тасымалдау ережелері, аккумуляторға қойылатын талаптар мен құрылғыларды қалай дұрыс қаптау керегін айтамыз.
- Тұрмыстық техниканы қол жүгіне алуға бола ма?
- Қандай тұрмыстық техниканы жүк бөліміне тапсырған дұрыс?
- Аккумуляторы бар құрылғыларға қандай шектеулер қолданылады?
- Ұшаққа алар алдында техниканы қалай дұрыс қаптау керек?
- Қандай құрылғылар қауіпсіздік тексеруі кезінде сұрақ тудыруы мүмкін?
- Жиі қойылатын сұрақтар
Тұрмыстық техниканы қол жүгіне алуға бола ма?
Иә, көп жағдайда шағын тұрмыстық техниканы қол жүгімен бірге ұшақ салонына алып кіруге болады. Олардың қатарына фен, шаш түзеткіш, электр ұстара, эпилятор және жеке пайдалануға арналған басқа да құрылғылар жатады.
Бірақ өткір жүзі немесе пышағы бар құрылғыларды ұшақ салонына алып кіруге болмайды. Қауіпсіздік талаптарына байланысты олар қауіпті зат ретінде қарастырылуы мүмкін. Мысалы, алынбалы пышағы бар блендер сияқты құрылғыларды тіркелетін багажға тапсырған дұрыс.
Әр әуе компаниясының қол жүгінің салмағы мен өлшеміне қатысты өз талабы бар. Әдетте қол жүгінің рұқсат етілген салмағы әуе компаниясына қарай 5–10 кг аралығында болады. Литий аккумуляторы бар құрылғыларды тасымалдауға да бөлек талаптар қойылуы мүмкін.
Фен
Фенді қол жүгімен де, тіркелетін багажбен де тасымалдауға болады. Оған арнайы шектеу қойылмайды.
Құрылғы зақымданбас үшін оны жұмсақ матаға немесе қорғаныш қапқа орап қойған дұрыс. Егер феннің алынбалы бөлшектері болса, оларды бөлек қаптап қойған жөн.
Шаш түзеткіш пен бұйралағыш
Шаш түзеткіш пен бұйралағышты қол жүгіне салуға болады. Электр желісінен жұмыс істейтін модельдерге әдетте қосымша талап қойылмайды.
Ал құрылғы газ картриджімен немесе аккумулятормен жұмыс істесе, оны тасымалдау ережесін алдын ала нақтылап алған жөн. Кейбір әуе компаниялары мұндай құрылғыларға шектеу қояды.
Үтік пен бу үтік
Шағын үтікті не бу үтігін ұшақпен тасымалдауға болады. Егер құрылғының ішінде су болса, сапар алдында оны төгіп тастаған дұрыс. Ал үтік көлемді не ауыр болса, оны багажға тапсырған ыңғайлы.
Миксер, блендер мен асүй техникасы
Қол миксері мен ықшам блендерді қол жүгіне салмай, тіркелетін багажбен тасымалдаған дұрыс. Себебі қауіпсіздік талаптарына сай ұшақ салонына өткір заттар алып кіруге болмайды.
Эпилятор, электр ұстара мен электр тіс щеткасы
Эпиляторды, электр ұстараны және электр тіс щеткасын қол жүгімен алып жүруге болады. Бұл құрылғылар күнделікті жеке пайдалануға арналған техника санатына жатады.
Дегенмен электр ұстараның кейбір түрлеріне шектеу қойылуы мүмкін. Егер құрылғы бөлшектенетін болса және ішінде ұзындығы 60 мм-ден асатын ашық жүзі болса, оны ұшақ салонына алып кіруге рұқсат етілмейді.
Егер құрылғы литий аккумуляторымен жұмыс істесе, оны қол жүгімен тасымалдаған дұрыс. Көптеген әуе компаниясы қосалқы литий аккумуляторларын тек ұшақ салонында алып жүруге рұқсат береді.
Қандай тұрмыстық техниканы жүк бөліміне тапсырған дұрыс?
- Ірі және ауыр құрылғылар. Көлемі үлкен немесе салмағы ауыр техниканы тіркелетін багажға тапсырған дұрыс. Бұл қол жүгіндегі орынды үнемдейді әрі әуежайдағы тексеруден өтуді жеңілдетеді.
- Алынбалы пышақтары бар құрылғылар. Блендер, тағам процессоры және басқа да өткір алынбалы бөлшектері бар техниканы тіркелетін багажға салған жөн. Бұл авиациялық қауіпсіздік талаптарына сай келеді.
- Ұшу кезінде қажет болмайтын техника. Егер құрылғыны рейс кезінде пайдаланамын деп отырмасаңыз, оны багажға тапсырған ыңғайлы.
- Толық өлшемді үтіктер мен бу үтіктері. Үлкен тұрмыстық үтіктер мен қуатты бу үтіктері көлеміне байланысты қол жүгіне қойылатын талаптарға сай келмеуі мүмкін. Сондықтан оларды багажға тапсырған жөн.
- Қол жүгіне қойылатын талаптарға сәйкес келмейтін құрылғылар. Егер техниканың салмағы не өлшемі әуе компаниясы белгілеген нормадан асып кетсе, оны тіркелетін багажбен тасымалдау қажет.
Аккумуляторы бар құрылғыларға қандай шектеулер қолданылады?
Литий аккумуляторы бар құрылғыларды тасымалдағанда қосымша қауіпсіздік талаптарын сақтау керек. Сыйымдылығы 100 Вт·сағ-қа дейінгі батареяларды қол жүгімен тасымалдауға рұқсат етіледі. Сыйымдылығы 100-ден 160 Вт·сағ-қа дейінгі батареяларды тек әуе компаниясының рұқсатымен алып жүруге болады. Ал 160 Вт·сағ-тан асатын батареяларды тасымалдауға тыйым салынады.
- Кіріктірілген литий аккумуляторлары. Көп жағдайда мұндай құрылғыларды қол жүгімен тасымалдауға болады. Бірақ аккумулятордың сыйымдылығын алдын ала тексерген дұрыс.
- Алынбалы аккумуляторлар. Егер аккумуляторды құрылғыдан ажыратуға болса, оны көбіне қол жүгімен алып жүру талап етіледі.
- Қосалқы батареялар. Қосымша литий аккумуляторлары мен пауэрбанктерді әдетте тек қол жүгімен тасымалдауға болады. Оларды тіркелетін багажға салуға болмайды.
- Аккумулятор сыйымдылығының таңбалануы. Аккумуляторда оның сыйымдылығы немесе энергия мөлшері анық көрсетілуі керек. Таңбаланбаған батареяларды тасымалдауға шектеу қойылуы мүмкін.
- Контактілерді қорғау. Қысқа тұйықталмас үшін аккумулятордың контактілерін арнайы қақпақпен немесе таспамен жауып қойған жөн.
- Кездейсоқ қосылып кетуден қорғау. Құрылғы сапар кезінде өздігінен қосылып кетпеуі керек. Қажет болса, оны толық сөндіріп, қорғаныш қапқа салып қойған дұрыс.
Ұшаққа алар алдында техниканы қалай дұрыс қаптау керек?
- Сымдар мен қосымша бөлшектер. Қуат сымдарын ұқыптап орап, резеңке таспамен немесе арнайы бекіткішпен бекітіңіз. Саптамалар мен алынбалы бөлшектерді бөлек қапқа салған дұрыс.
- Құрылғы корпусын қорғау. Техниканы жұмсақ қапқа салып, киімнің арасына немесе көпіршікті қорғаныш материалға орап қойған жөн. Бұл тасымалдау кезінде сызат түсуден және соққыдан қорғайды.
- Аккумуляторлар. Егер аккумулятор алынатын болса, оны бөлек сақтап, контактілерін қысқа тұйықталудан қорғаған дұрыс. Сондай-ақ құрылғының кездейсоқ қосылып кетпеуін қадағалау қажет.
- Зауыттық қаптама. Мүмкіндік болса, техниканы өзінің түпнұсқа қорабында тасымалдаған дұрыс. Мұндай қаптама құрылғыны жақсы қорғайды әрі оның сипаттамасын оңай анықтауға мүмкіндік береді.
Қандай құрылғылар қауіпсіздік тексеруі кезінде сұрақ тудыруы мүмкін?
- Алынбалы жүздері бар құрылғылар. Блендер, тағам процессоры және өткір пышақтары бар басқа техниканың алынбалы бөлшектері қосымша тексерілуі мүмкін.
- Қуатты аккумуляторлар. Сыйымдылығы жоғары литий аккумуляторлары халықаралық авиациялық қауіпсіздік талаптарына бағынады. Кей жағдайда оларды тасымалдауға шектеу қойылады. Егер аккумулятордың сыйымдылығы 100-ден 160 Вт·сағ-қа дейін болса, оны тасымалдау үшін әуе компаниясының рұқсаты қажет. Ал сыйымдылығы 160 Вт·сағ-тан асатын батареяларды мүлдем тасымалдауға болмайды.
- Стандартты емес құрылғылар. Сирек кездесетін немесе не үшін пайдаланылатыны бірден түсініксіз электр құрылғылары қауіпсіздік қызметінің қосымша тексеруіне жіберілуі мүмкін. Қажет болса, құрылғының не үшін қолданылатынын түсіндіруге дайын болған жөн.
- Әуе компаниясының талаптары. Қол жүгіне қатысты ережелер әр әуе компаниясында әртүрлі болуы мүмкін. Сондықтан ұшу алдында тасымалдаушының ресми талаптарын тексеріп, құрылғының өлшемі, салмағы және аккумуляторына қатысты шектеулерді қарап шыққан дұрыс.
Жиі қойылатын сұрақтар
Бортқа қандай құрылғылар алып кіруге болатыны туралы ең қажетті ережелер.
Ұшақпен қанша электр құрылғысын алып жүруге болады?
Электр құрылғыларының нақты санына шектеу жоқ. Ең бастысы — олардың барлығы қол жүгінің салмағы мен өлшеміне қойылатын талаптарға сай болуы және жеке пайдалануға арналған болуы керек.
Фенді қол жүгімен алып жүрген дұрыс па, әлде багажға тапсырған жөн бе?
Фенді қол жүгімен де, тіркелетін багажбен де тасымалдауға болады. Егер оны ұшу алдында не қонғаннан кейін бірден пайдалану қажет болса, қол жүгіне салған ыңғайлы. Ал фенді тіркелетін багажға тапсырсаңыз, сынбауы және зақымданбауы үшін оны жұмсақ қапқа салып немесе киімнің арасына орап қойған дұрыс. Сымын ұқыпты жинап, алынбалы бөлшектерін бөлек қаптаған жөн.
Блендердің алынбалы пышақтарын қалай тасымалдаған дұрыс?
Өткір алынбалы пышақтарды қол жүгіне салмаған жөн. Оларды қауіпсіз етіп орап, тіркелетін багажға орналастыру ұсынылады.
Егер қауіпсіздік бақылауында құрылғыны алып қалмақ болса не істеу керек?
Әуежай қызметкерлерінің талабын орындап, құрылғыны тексеруге беріңіз. Егер затты қол жүгімен алып өтуге болмайтын болса, кейбір әуежайларда оны багажға қайта тапсыруға немесе арнайы сақтау қызметін пайдалануға мүмкіндік бар.
Кіріктірілген аккумуляторы бар құрылғыларды алып жүруге бола ма?
Иә, көп жағдайда болады. Бірақ литий аккумуляторының сыйымдылығы әуе компаниясы белгілеген талаптарға сәйкес келуі керек. Сондықтан ұшу алдында тасымалдаушының ережелерін тексерген дұрыс.
Қауіпсіздік тексеруі кезінде тұрмыстық техниканы сөмкеден шығару қажет пе?
Бұл әуежайдың қауіпсіздік талаптарына байланысты. Кей жағдайда ноутбук сияқты ірі электрондық құрылғыларды сөмкеден шығарып, бөлек көрсету сұралады. Егер қызметкерлер тұрмыстық техниканы да шығаруды талап етсе, олардың нұсқауын орындау керек.
Суреттерді салған — СашаШура.
