Саяхатта қалай қырынамыз: ұстараны тасымалдау ережесі
Тексеріс кезінде сұрақ тумайтындай етіп ұстараны қалай дұрыс қаптаған жөн?
Қол жүгіңізді жинап, сусабынды шағын құтыларға құйып, қосымша аккумуляторды сөмкеге салып, тас-түйін дайын отырсыз. Тек ұстара қалды. Оны қайда саламыз? Ұстараны ұшаққа алып кіруге бола ма? Бұл сұраққа нақты жауап жоқ. Бәрі ұстараның түріне байланысты. Бұл мақалада осы бір сұраққа жауап береміз.
Ұстараның қай түрін қол жүгіне салуға болады?
Ұстараны қол жүгіне саларда бір ғана ережені есте ұстаңыз — оның жүзі толық жабық әрі қауіпсіз бекітілген болуға тиіс. Мына түрлері сол талапқа сай келеді:
Бір реттік ұстара
Бір реттік ұстара — ең қауіпсіз түрі. Олардың көбінде жүзіне орнатылған қорғаныш қаптамасы болады. Әуе компаниялары әдетте осындай ұстараларды қол жүгіне салып жүруге рұқсат етеді.
Көп реттік қауіпсіз ұстара
Саяхатшылар арасында ең танымал нұсқалардың бірі — классикалық Venus немесе Gillette сияқты көп рет қолданылатын ұстаралар. Мұндай құралдар тексеруден еш кедергісіз өтеді. Бірақ бастысы жүзі пластмасса қақпақпен жабық болуға тиіс.
Қосымша жүздерін де алғыңыз келсе, қол жүгінде оларды ашылмаған күйінде, зауыттық қаптамасымен салған дұрыс. Ашылған кассеталарды багажға тапсырыңыз.
Электр ұстара мен триммерлер
Электр ұстара — қол жүгіне салып жүргенге ең қауіпсіз құрал. Әуе компанияларының біразы оларды ұшаққа алып кіргенге рұқсат етеді, кейбірі олармен тіпті бортта қырынсаңыз да, ештеңе демейді.
Ұстара литий-ион батареясымен жұмыс істесе, құралды қол жүгіне салыңыз. Әуе компанияларының көбі мұндай батареяларды жолаушының өзі алып жүргенін талап етеді.
Ұшаққа алып кіруге болмайтын ұстаралар
Ұшаққа жүзі ашық не оңай шығарылатын ұстараны алып кіруге болмайды, оны тексеріс кезінде алып қоюы мүмкін. Жүзі оңай шығарылатын ұстара жолаушыларға қатер төндіреді.
Қауіпті ұстара
Жүзі пышақ сияқты қауіпті ұстарамен қырынғанды ұнатсаңыз, жолға шыққанда мұны ұмыта тұрыңыз. Мұндай ұстараларды қол жүгіне салуға болмайды, өйткені корпусынан оңай алынатын ашық жүзі басқа жолаушыларға қауіп төндіреді. Тіпті ұстара бөлек салынып, жүзі ұқыпты оралса да, оны салонға алып кіруге рұқсат етпейді.
Ашық жүзді ұстаралар мен шаветтер
Бұл қырыну құралдарының да жүзі мықтап бекітілмейді. Сондықтан оны бортқа алып кіруге тыйым салынған. Әуежайдың қауіпсіздік қызметі мұндай ұстараларды қол жүгінен әдетте алып қояды.
Ұстараны багажға өткізуге бола ма?
Иә, болады. Бірақ нақты талап бар: ұстара мен өзге де өткір заттарды тексерушілерге жарақат келтірмейтіндей әрі шабадандағы басқа заттарды зақымдамайтындай етіп мұқият орау керек. Ал электр ұстараны, керісінше, тасымалдау кезінде сынып қалмас үшін қол жүгіне салған дұрыс.
Әуе компанияларының ережесі
Жалпы ереже біреу-ақ — ұстара жүзі ашық болса не оны оңай шешіп алуға мүмкіндік болса, мұндай ұстараны багажға салған дұрыс. Бірақ кейбір әуе компанияларының қосымша талаптары бар.
Мысалы, Air Astana-мен ұшқанда жүзі бар кез келген ұстараны багажға тапсырған жөн. Қол жүгіне электр ұстарасын немесе бір реттік түрін ғана салуға болады.
FlyArystan қару ретінде қолданылуы мүмкін медициналық құралдарды қол жүгіне салуға тыйым салады. Ұстаралар жайлы нақты айтылмайды.
VietJet Qazaqstan (бұрынғы Qazaq Air) және SCAT компанияларында ұстараға қатысты нақты нұсқау жоқ, бірақ олар да қауіпті заттардың жалпы тізіміне сүйенеді. Онда ұшақ салонына тек қауіпті ұстараларды алып кіруге болмайтыны көрсетілген.
FAQ: ұстараны ұшаққа алып кіруге бола ма?
Жүзі жоқ ұстараны алып өтуге бола ма?
Кассетасыз ұстараны қол жүгіне де, багажға да салып жүруге болады. Ал ашылған жүздерді тек багажға мықтап орап салу керек.
Электр ұстараны багажға салуға бола ма?
Иә, болады, бірақ аккумуляторын шығарып, қол жүгіне салып алған жөн.
Duty-free-де сатып алған ұстараны алып жүруге бола ма?
Duty-free-де сатып алынған ұстараларға авиакомпанияның өткір заттар бойынша ережесі қолданылады. Жүзі жабық және мықтап оралған болса, ұстараны ұшаққа алып кіруге болады.
Қауіпті ұстараны багажға қалай салған жөн?
Ұстараның өткір бөлігін басқа заттардан оқшаулау үшін тысқап не қыны қолданыңыз. Оларды өз қаптамасында қалдырған дұрыс. Сол кезде тексерушілер кедергісіз өткізеді.
Суретті салған — СашаШура.
