Ұшаққа косметика алып кіруге бола ма?

Парфюм, крем, шампунь не макияж құралдары сапар кезінде өте-мөте қажет болуы мүмкін. Сондықтан оның қайсысын қандай мөлшерде ұшаққа алып кіруге рұқсат етілетінін алдын ала білген маңызды. Бұл мақалада ұшаққа косметиканы алып кіру ережесі, қол жүгіндегі сұйық және қатты косметикаға қойылатын талаптар туралы айтамыз.

Ұшақта қол жүгіне косметика салуға бола ма?

Иә, косметиканы ұшаққа, соның ішінде қол жүгіне салуға болады. Алайда қауіпсіздік талаптарына байланысты кейбір шектеулер бар. Бұл шектеулер негізінен сұйық косметикаға қатысты. Жалпы қол жүгіне салып алып жүруге болатын заттар туралы мына мақалада айтқанбыз.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Қандай косметикалық құралдар сұйықтық деп саналады?

Косметиканың көп түрін қол жүгіне салып тасымалдауға рұқсат етіледі. Оларды шартты түрде екі топқа бөлуге болады:

Сұйық косметикаға кремдер (бетке арналған крем, қол кремі, күннен қорғайтын крем), шампунь және кондиционер, тоналды крем және басқа сұйық тоналды негіздер, тушь (кірпік бояуы), гельдер (шашқа арналған гель, душ гелі, алоэ гелі), тіс пастасы, сарысулар мен эссенциялар (сыворотка, essence), сұйық хайлайтер немесе контуринг құралдары, парфюм мен денеге арналған спрейлер, сұйық сарысуға малынған патчтар (мысалы, көзге арналған патчтар).

Мұндай өнімдерді қол жүгінде алып жүру үшін олардың әрқайсысының көлемі 100 мл-ден аспауы керек әрі бәрі бірге 1 литрден аспайтын мөлдір пакетке салынуға тиіс. Әуежайдың қауіпсіздік ережелеріне сәйкес, қол жүгінде алып жүретін әрбір сұйық косметикалық өнімнің көлемі 100 мл-ден аспауы керек. Бұл ереже халықаралық рейстердің көпшілігіне ортақ. Косметикалық өнімнің көлемі 100 мл-ден көп болса, оны тіркелген багажға салу керек.

Қатты косметикаға опа, тушь, қатты дезодарант, косметикалық қарындаштар кіреді. Қатты косметикаға әдетте шектеу аз, сондықтан оларды қол жүгіне салып алып жүру оңай.

Қол жүгіне қандай косметиканы салуға болмайды?

Ұшаққа косметика алып кіруге көбіне рұқсат етіледі, бірақ кейбір өнімдерге қауіпсіздік талаптарына байланысты шектеу бар. Әсіресе қысымдағы баллондарға, аэрозольдер мен үлкен көлемдегі сұйықтыққа талап күшті.

Мына косметиканы қол жүгіне салмаңыз

Кейбір косметиканы қол жүгіне салып тасымалдауға болмайды, бірақ оларды тіркелген жүкке салуға болады:

• Аэрозольдер (мысалы, кейбір лактар, спрей-дезодоранттар, құрғақ шампунь);
• Қысымдағы баллондар (шашқа арналған лак, көлем беретін спрейлер);
• 100 мл-ден асатын сұйық косметика (шампунь, крем, гель, парфюм);
• Тырнақ қайшылары мен металл егеуіштер;
• Түпнұсқа қаптамасы жоқ сұйықтықтар.

Мұндай өнімдерді сапарға алып шыққыңыз келсе, оларды багажға салған дұрыс.

Ал мына заттарды ұшаққа мүлде алып кіруге болмайды

Қауіпсіздік талаптарына сай келмейтін кей косметиканы ұшаққа мүлде алып кіруге болмайды, мәселен:

• Өте үлкен көлемдегі аэрозольдер не қысымдағы баллондар;
• Жанғыш не құрамында қауіпті заттар бар спрейлер.

Сондықтан сапар алдында косметиканың көлемін, қаптамасы мен құрамын тексеріп алған дұрыс. Сонда әуежайдағы қауіпсіздік тексерісінен жылдам әрі еш қиындықсыз өтесіз.

Багажға қандай косметикалық заттарды салуға болады?

Тіркелген жүкте косметиканы тасымалдаған әлдеқайда жеңіл, өйткені қол жүгіне қойылатын <100 мл талабы сияқты шектеу жоқ. Сондықтан көлемі ірі косметикалық өнімдерді багажға салуға болады.

Багажға салуға болатын косметика:

• Үлкен көлемдегі шампунь, бальзам мен душ гелі;
• Кремдер мен лосьондар;
• Парфюм мен иіссулар;
• Тоналды кремдер мен басқа сұйық макияж құралдары;
• Шашқа арналған құралдар (лак, спрей, мусс);
• Косметикалық майлар мен сарысулар;
• Тырнақ қайшылары мен металл егеуіштер.

Алайда тіркелген жүкке саларда косметиканы дұрыс ораған маңызды. Мысалы, сұйық өнімдердің қақпағын мықтап жауып, оларды герметикалық пакетке не арнайы косметикалық қапқа салған дұрыс. Сонда шабадан ішіндегі заттар төгіліп кетпейді.

Саяхатта тағы не қажет болуы мүмкін?

Әтір

Дезодорант

Ұстара

Пышақ

Дәрі-дәрмек

Дьюти фриден алған косметиканы тасымалдау ережесі

Дьюти фри дүкендерінен сатып алынған косметика көлемі 100 мл-ден көп болса да, әдетте оларды ұшаққа алып кіруге рұқсат етіледі.

Алайда бірнеше маңызды шарт бар:

• Косметика дьюти фри дүкенінен ғана сатып алынуы керек;
• Тауар арнайы мөрленген пакетте болуға тиіс. Бұл пакетті дүкеннің өзі тауарыңызды алған кезде орап береді; 
• Сатып алу чегі пакет ішінде сақталуы керек;
• Пакетті ұшаққа отырғанға дейін ашпау керек.

Пакетті ашуға болмайды. Ондайда қауіпсіздік қызметі косметиканы қайта тексеруі мүмкін. Кей жағдайда тіпті оны қол жүгіне салып алып кіруге рұқсат бермеуі де мүмкін.

Косметикаңызды алып жүруге рұқсат етілмесе не істеу керек?

1. Косметикаңызды багажыңызға тапсырып көріңіз.

Уақытыңыз болса, косметикаңызды тіркелген багажға салу — ең оңай шешімдердің бірі. Кейде әуежайда қосымша пакет сатып алып, оны қосымша багаж ретінде рәсімдеуге болады.

2. Оны басқа жолаушыға беріңіз не сізді қарсы алатындарға қалдырыңыз.

Сізді әлдебіреу шығарып салса, косметиканы сол адамға беруге болады. Сондай-ақ бірге саяхаттап жүрген адамнан сұрап, оның шабаданына салып жіберу де бір ақыл.

3. Тауарды пошта арқылы жіберіңіз.

Кейбір әуежайларда пошта немесе курьер қызметі бар. Мұндай қызметті Қазақстанның барлық әуежайынан табуға болады. Бұл қызмет 5 кг-ға дейін  жүгіңізді қабылдайды, 5 күн ішінде Қазақстан мен Қырғызстанның барлық қаласына жеткізіп береді. Сол арқылы косметиканы өзіңізге немесе қажет мекенжайға жіберуге болады. 

Егер басқа мүмкіндік болмаса, әуежайдағы қауіпсіздік бақылауына қалдыруға тура келеді. Кейбір әуежайларда ұсынылған заттарды арнайы сақтау камерасында қалдырып, қайтар жолда қайта алып кету мүмкіндігі де болады. Бірақ көбіне затыңызды қоқыс жәшігіне тастауды сұрайды. 

Жиі қойылатын сұрақтар

Қол жүгіне тоналды крем салып алсам бола ма?

Иә, тоналды кремді ұшақтың қол жүгіне салып алып жүруге болады. Алайда ол сұйық косметикаға жатады, сондықтан көлемі 100 мл-ден аспауы керек. Сонымен қатар ол басқа сұйықтықтармен бірге мөлдір пакетке салынып, қауіпсіздік тексерісі кезінде бөлек көрсетілуі керек.

Ұшаққа қанша шампунь алып кіруге болады?

Қол жүгінде әрбір шампунь құтысының көлемі 100 мл-ден аспауға тиіс. Барлық сұйық өнімнің жалпы көлемі 1 литрден артық болмауы керек. Шампунь көлемі үлкен болса, оны тіркелген багажға салған дұрыс.

Қол жүгіне тушь салып алсам бола ма?

Иә, тушьты қол жүгімен алып жүруге болады. Кәдімгі косметикалық тушьтың 10 мл-ден үлкен қаптамада сатылуы сирек, сондықтан тасымалдау кезінде ешқандай қиындық тумауы керек.

Косметиканы ұшақта тасымалдау бойынша кеңестер

Ұшардан бұрын косметиканы дұрыс дайындасаңыз, біраз мәселенің алдын аласыз:

• Кіші форматтағы косметиканы таңдаңыз. Сапарға арналған шағын құтылар (travel size) қол жүгімен тасымалдағанға ыңғайлы. Немесе арнайы саяхат бөтелкелерін бір рет сатып алып, сүйікті өнімдеріңізді құйып, тасымалдауға болады.
• Сұйық өнімдерді мөлдір пакетке салыңыз. Бұл қауіпсіздік тексерісінен тез өтуге көмектеседі.
• Сұйық заттарыңыздың басын нықтап жабыңыз. Қажет болса, құтыны қосымша пакетке немесе пленкаға ораңыз.
• Опа-далапты косметика сөмкесіне не арнайы органайзерге салыңыз. Бұл шабадандағы басқа заттарды қорғауға көмектеседі.
• Маңызды косметиканы қол жүгіне салыңыз. Багаж кешігіп жатса да, ең қажет құралдар қасыңызда болады.

Суретті салған — СашаШура.