Ұшаққа әтір ала кірсем бола ма?
Дьюти-фриде шопинг жасаймын деп отырғандарға лайфхактар да айтамыз.
Саяхатқа шыққан адам киім-кешегін, құжаттарын және әтірін алуды ұмытпайды. Бірақ әуежайдың қауіпсіздік қызметі сіздің қымбат иіссуыңызды қатаң шектеу қойылған «қауіп төндіруі мүмкін сұйықтық» деп қана көретінін ұмытпаңыз.
Әтірді қол жүгіне салуға бола ма, оны багажда қалай қауіпсіз тасымалдау керек және дьюти-фриден сауда жасағанда қандай тосын жайттар болуы мүмкін? Осы сұрақтарды бірге қарастырайық.
Әтірді қол жүгіне салуға бола ма?
Иә, болады. Бірақ ол кез келген сұйықтықты тасымалдау ережесіне сай келуі керек:
- Құты көлемі 100 миллилитрден аспауы керек. Тіпті 200 миллилитрлік ыдыстың түбінде бірер тамшы қалса да, оны өткізбейді. Үлкен көлемдегі әтірлер үшін арнайы атомайзер (көлемі әдетте 10–15 мл болатын, бүріккіші бар шағын ыдыс) сатып алуға кеңес береміз. Бірнеше атомайзер сатып алып, сүйікті әтірлеріңіздің тревел-нұсқасын жасап алуға болады.
- Жалпы көлемі 1 литрден аспауы керек. Бұған ұшақ салонына өзіңізбен бірге ала кіретін әтірден бастап дәрілік сироптарға дейін барлық сұйықтық кіреді.
- Герметикалық пакетке салыңыз. Барлық құты сыдырмасы бар бір түссіз пакетке салынуға тиіс. Барлық әуе компаниялары бұл ережені қатаң талап ете бермейді, бірақ алдын ала сақтанған артық етпес.
Бұл ереже денеге арналған мист, иіссу, одеколон, майлы әтір мен роликті дезодорант сияқтыбарлық сұйық парфюмерияға ортақ. Тек қатты әтірлерді ғана ешбір шектеусіз тасымалдауға болады.
Әтірді багажбен қалай тасу керек?
Багажға келгенде ереже әлдеқайда жеңіл: чемоданға кез келген көлемдегі әтірді салуға болады, бірақ олар діттеген жерге аман-есен жетуі үшін бірнеше жайтты ескерген жөн.
Ұшақта қысым өзгеретінін ескеріңіз. Соның салдарынан ұшақ көтерілген кезде құтының бүріккішінен сұйықтық ағуы мүмкін. Қымбат парфюм ағып кетіп, киімдерді бүлдірмесін десеңіз, қақпағын нықтап жауып, әтірді жеке пакетке салып қойыңыз.
Шыны құты сынып кетуі мүмкін. Қорабы мен құтысын зақымдап алмас үшін әтірді шабаданның дәл ортасына салып, жан-жағынан жұмсақ киімдермен орап қойыңыз.
Дьюти-фриден алған парфюмді қалай тасымалдау керек?
Дьюти-фри дүкендері — парфюмерия саласындағы жаңа өнімдер ертерек пайда болатын және Қазақстанда жоқ брендтерді табуға болатын аумақ. Негізгі артықшылығы — бұл дүкендерден жасалған саудаға «100 миллилитр» ережесі жүрмейді, сондықтан толық өлшемді құтыны қол жүгіне еш алаңсыз салуға болады. Ол үшін кассада төлем жасау кезінде сатушы сізден міндетті түрде отырғызу талонын сұрайды. Бұл сіздің шетелге ұшып бара жатқаныңызды және салықсыз сауда жасауға құқығыңыз бар екенін растауға қажет. Орау бөлшектеріне ерекше назар аударыңыз:
- Арнайы пакет. Сатушы әтіріңізді түссіз пластик пакетке өзі салып береді. Оны ашпаңыз және әтірді басқа жерге салып жүрмеңіз, бұл кез келген көлемдегі сұйықтықты тасымалдауға мүмкіндік беретін арнайы қаптама.
- Қызыл таспа мен чек. Пакет білдірмей ашу мүмкін емес арнайы индикаторлық таспамен желімделеді. Ал чек пакет ішіне сырттан көрінетіндей етіп салынады. Бұл — әтір расымен дьюти-фриден сатып алынғанын растайтын айғақ.
Әтірді неге тәркілеп алуы мүмкін?
Ең жиі кездесетін себеп — құтының тым үлкен болғаны. Әтіріңіз 125 миллилитрлік ыдыста болып, бірақ ол жартылай ғана толы болса да, бәрібір өткізбейді. Тәуекелге бармас үшін, әтірді арнайы саяхатқа арналған тревел-форматтағы шағын құтыларға құйып алған дұрыс.
Кейбір елдерде әтір әкелу ережесі әлдеқайда қатаң болуы мүмкін. Мысалы, Мальдив аралдарына бір адамға 125 миллилитрден артық парфюм әкелуге болмайды (тіпті багаждың өзінде), ал Израильге 250 миллилитрден артық өткізуге рұқсат етілмейді.
Әтірді алып жүрерде мынаны ескеріңіз
Тексеру кезінде артық сұрақ туындамасын әрі сүйікті әтірім шабаданда сынып қалмасын десеңіз, мына ақыл-кеңесті ескеріңіз:
- Қақпағы мен бүріккішін тексеріңіз. Құтыны сөмкеге салмас бұрын, оның тығыз жабылғанына көз жеткізіңіз. Кейде дірілден не қысым өзгергенінен помпасы бұзылуы мүмкін, сондықтан қорғаныш қақпағы жай сән емес, қажеттілік.
- Тағамдық пленканы пайдаланыңыз. Егер әтірді багажға өткізетін болсаңыз, бірақ қатты алаңдасаңыз, қақпағын ашып, құтының мойнын бірнеше қабат пленкамен ораңыз, содан кейін қақпақты қайта жабыңыз. Бұл қосымша қабат жасап, тіпті ішінде қысым пайда болса да, әтір сыртқа ағып кетпейді.
- Парфюмді оңай алуға болатын жерге қойыңыз. Қол жүгіндегі сұйықтықтар салынған түссіз пакетті сөмкенің ең үстіне не ыңғайлы сыртқы қалтасына салыңыз. Тексеру кезінде қауіпсіздік қызметкерлері барлық сұйықтықты бөлек науаға салыңыз деп жиі сұрайды.
- Құтыны соққыдан қорғаңыз. Парфюм багажға салсаңыз, оны шабадан шетіне қоймаңыз. Ең қауіпсіз жер — ортасы, жұмсақ жемпірлер мен жейделер арасы.
- Дьюти-фриден алынған заттардың чегі мен қаптамасын сақтаңыз. Әуежайда өзіңізге немесе сыйлыққа жаңа әтірді тиімді бағада сатып алуға болады, бірақ 100 миллилитрден асатын көлемді заңды түрде өткізу үшін чекті тастамаңыз және қорғаныш пленкасын ашпаңыз.
Суреттерді салған — СашаШура.
