Қыз-келіншек қыдырғанға қауіпсіз елдер: Жапония, Сингапур мен Исландия
Мерекеде гүлдің қасына саяхатқа жолдама қосып беріңізші.
Биыл 8 наурызға иіссу не гүл сияқты жауыр болған сыйлықтарды бермей-ақ қойыңызшы? Адамның өзіне, анасына, әпке-сіңлісіне не жақын құрбысына беретін ең үлкен сыйлығы — ортақ естелік деп білеміз. Бұл гидте әйелдер болып саяхаттағанға ең жайлы елдерді жинап шықтық.
Елдерді қалай іріктеп алдық?
Тізімді жасау кезінде әр елдің ішкі істер министрлігі жариялаған есептердегі құрғақ цифрларға ғана сүйенген жоқпыз. Саяхаттың мейлінше жайлы өтеріне көз жеткізу үшін Global Peace Index (елдегі бейбітшілік деңгейі мен қақтығыстар бар-жоғын бағалайды) және Numbeo (қалалардағы қауіпсіздік туралы тұрғындар мен туристердің нақты пікірлеріне негізделеді) деректерін есепке алдық. Рейтингіде көш бастап тұрған елдерді мынадай төрт өлшемге салдық:
- Жақындығы. Қауіпсіздік пен жайлылық әуежайдан басталады. Тізімге Қазақстаннан тікелей рейстер арқылы немесе бірнеше күн жол жүрмей-ақ, ыңғайлы түйісулермен жетуге болатын елдер алынды.
- Мәдениеті. Біз жергілікті тұрғындардың менталитеті жақын, ал тілдік кедергілер мен мәдени ерекшеліктер демалысқа кедергі келтірмейтін бағыттарға басымдық бердік.
- Қыдырғанға жайлы. Қауіпсіздік дегеніміз — инфрақұрылымның сағаттай дәл жұмыс істеуі. Түсінікті навигация, кесте бойынша жүретін көлік және ыңғайлы өткелдер сапарды жайлы етеді. Бұл әсіресе алғаш рет жалғыз саяхатқа шыққанда немесе артық жүрістен гөрі жайлылықты қалайтын анаңызды ертіп жүргенде өте маңызды.
- Телефон байланысы. 2026 жылы тұрақты интернет пен такси шақыруға, экскурсияларды брондауға және тұрғын үй іздеуге арналған цифрлық сервистер сенімділік пен қауіпсіздік сыйлайды.
Қыдырғанға қауіпсіз топ-8 ел
Әрине, тосын жайт кез келген елде болуы мүмкін. Дегенмен өз қауіпсіздігіңіз бен жақындарыңыздың жайлылығы үшін алаңдауға негіз аз болатын бағыттар бар.
БАӘ
Виза: керегі жоқ.
Қалай жетесіз: Алматыдан Дубай, Абу-Даби және Шарджыға тікелей рейстер бар, Астана, Шымкент, Ақтаудан тек Дубайға жетесіз.
Дубай мен Әбу-Даби — қазақтар арасында ең танымал бағыттардың бірі, сонымен қатар бұл әйелдер саяхаттағанға да таптырмас орын. Мұнда инфрақұрылым мұқият ойластырылған: әйел жүргізушілері бар арнайы таксилер бар (Bolt қосымшасы арқылы тапсырыс беруге болады), метрода бөлек вагондар ашылған, ең үздік жағажай клубтары мен спа-орталықтарында тек қыз-келіншектер кіретін күндер бар.
Дубай үй ішімен саяхаттағанға да қолайлы: анаңызды Dubai Miracle Garden-ге апарыңыз — бұл петуния мен барқытгүлден ұшақтар мен қамалдар тұрғызылған үлкен гүл бағы. Онда орындық пен көлеңкелі жер көп, ал шаршап қалсаңыз, аумақты аралататын электрокарлар жүреді. Кешкісін Марина шығанағында арабтың Доу қайығында кешкі ас ішуге немесе Әбу-Дабидегі Луврға баруға болады.
Құрбылармен демалып жүрсеңіз, Ladies Days күндеріне назар аударыңыз. Барлық дерлік үздік қонақүй мен жағажай клубында тек қыздар тегін кіретін не коктейльдер тегін берілетін күндер бар. Ал күн батарда әлемдегі ең биік панорамалық бассейн — Aura Skypool-дан үстел брондауыңызға болады.
Жапония
Виза: елшіліктен туристік виза алуыңыз керек.
Қалай жетесіз: Қазақстан мен Жапония арасында тікелей рейс жоқ. Қытай не Корея арқылы баруға болады.
Жапонияда турист қыздар жеке шекарам бұзылмай ма деп қорықпаса болады. Бұл елдің мәдениетіне жат құбылыс, тіпті қоғамдық орындардың өзінен оны байқауға болады: мейрамханаға барып, даяшымен де жүздеспестен, бөлек кабинада рамен ішіп шыға аласыз.
Жапонияда харассментпен күрес күшті: метрода қарбалас уақытта әйелдерге арналған бөлек вагондар қарастырылған, тіпті тек әйелдер ғана түнейтін қонақүйлер бар. Мысалы, Токиодағы Akihabara Bay Hotel — Акихабараның қақ ортасында орналасқан өте сәнді, ақ-қызғылт түсті капсулалы қонақүй. Қажет болған жағдайда полицияға жүгінуге болады: мұнда әрбір адам көп шоғырланған қиылыста тәулік бойы жұмыс істейтін Koban полиция бекеттері бар. Олардан адасып қалсаңыз да көмек сұрауға болады.
Токиода негізгі аудан — Сибуяны аралап, ал тыныштық іздесеңіз, қала ортасындағы қалың орман ішінде орналасқан Мэйдзи ғибадатханасына соғуға болады. Анаңызбен бірге саяхаттап жүрсеңіз, оған Киото қаласы ұнары сөзсіз: кимоно жалдап, Фусими Инари ғибадатханасының мыңдаған қызыл қақпаларынан өтіңіз немесе Арасияма бамбук тоғайында серуендеп қайтыңыздар.
Нидерланд
Виза: Шенген визасын алу керек.
Қалай жетесіз: Қазақстан мен Нидерланд арасында тікелей рейс жоқ, бірақ Стамбұл арқылы жетуге болады.
Бұл ел рюкзак асынған ширақ бойжеткенге де, баяу қыдырғанды сүйетін егде жастағы ханымға да бірдей жайлы. Нидерланд Women, Peace and Security Index рейтингінде тұрақты түрде көш бастап тұрады және әйелдерге ең қауіпсіз 10 елдің қатарына кіреді. Көлік жүйесі таңертең Амстердамда кофе ішіп, бір сағаттан соң Гаагадағы Маурицхёйс музейінде «Інжу сырғалы қыз» картинасын тамашалауға мүмкіндік береді.
Астананың классикалық каналдарынан бөлек, Утрехтке барыңыз — ол дәл су жиегінде тұрған, тып-тыныш әрі жайлы террасалары бар. Сапарыңыз көктем айларына тұспа-тұс келсе, Кёкенхоф саябағына соғыңыз: мұнда әйгілі нидерландық мыңдаған қызғалдақ гүлдейді.
Көшедегі дүңгіршектен майшабақ салынған голландиялық сэндвич — харингтің дәмін татып көріңіз немесе жұмсақ қарамелі бар ыстық вафлиден ауыз тиіңіз. Тыныш жер керек еді дегендерге Тексел аралы таптырмас мекен — онда велосипед жалға алып, шағалалардың даусымен құм төбешіктер бойында серуендеуге болады.
Сингапур
Виза: онлайн түрде туристік виза алу керек. Оны Сингапур резиденті не аккредиттелген агенттік арқылы ғана рәсімдейсіз.
Қалай жетесіз: Қазақстан мен Сингапур арасында тікелей рейстер жоқ, бірақ Мумбаи арқылы ауысып ұшуға болады.
Заңы қатал әрі адам жүрген барлық жерге бейнебақылау орнатқан Сингапур — әлемдегі ең қауіпсіз мегаполистің бірі. Түннің бір уағында Марина-Бэй жағалауында емін-еркін серуендеп, күзет қойылған саябақта жүргендей сезіне аласыз. Бұл ел — құрбы-құрдаспен барғанға таптырмас жер: күнді Орчард-роуд сауда орталығындағы шопингтен бастап, кешкісін зәулім ғимараттардың төбесіндегі коктейльден ұрттап отыруға болады.
Егер үй ішіңізбен жүрсеңіз, алып Ботаника бағына міндетті түрде барыңыздар. Бұл — жолы теп-тегіс, мың түрлі гүлі жайқалған өте әсем жер. Кешкісін анаңызды Raffles қонақүйіне шай ішуге апарыңыз. Бұл — XIX ғасырға тән сәулетпен жасалған жерде күміс сервиздермен шай беретін тарихи рәсім.
Сингапурдың түнгі өмірі де тамаша. Кларк-Ки жағалауындағы жанды дауыста музыка ойнап тұратын ондаған бардан бастауға болады. Сондай-ақ «хокер-орталықтарға» — көше тағамдары сатылатын дүңгіршектері бар жергілікті фуд-корттарға кіріп шығыңыз.
Жаңа Зеландия
Виза: туристік визаны онлайн рәсімдеу қажет. Құны — 441 жаңазеландиялық доллар (шамамен 130 мың теңге).
Қалай жетесіз: Жаңа Зеландия мен Қазақстан арасында тікелей рейстер жоқ, алайда Азия елдерінде бірнеше рет ауысып отырып жетуге болады.
Қызық қуған адам болсаңыз және ұзақ жолдан тайсалмаймын десеңіз, Жаңа Зеландияға билет алыңыз. Мұнда тау соқпақтарында бейтаныс адамдармен амандасқан қалыпты жағдай, ал фермерлер әлі күнге дейін жол жиегіне жеміс-жидек толы сөрелері мен «адалдық кассасын» бақылаусыз қалдырып кете береді. Бұл ел Global Peace Index рейтингінде үшінші орында тұр. Мұнда 111 тегін көмек қызметі жұмыс істейді, ал мобильді байланыс шалғайдағы ұлттық саябақтарды да ұстап тұрады.
Киносүйер қауымға Хоббитон ұнайтыны анық — мұнда көк шалғын төбелер қоршаған, дөңгелек есікті кіп-кішкентай үйшіктер арасында сейіл құруға болады. Роторуа қаласында маори мәдениетімен танысып, бүлк-бүлк еткен лай гейзерін көре аласыз. Суы жердің геотермал қызуымен жылынатын, көлге қарап тұрған спа-орталыққа барыңыз.
Сондай-ақ әлемдегі ең әдемі теміржол бағыттарының бірі — TranzAlpine пойызымен саяхаттаңыз. Бұл жақындарыңызбен қыдырғанға тамаша таңдау: анаңыз үлкен терезесі бар жайлы креслода отырып, Альпі шалғындарының қарлы шыңдарға қалай ұласатынын сүйсіне тамашалап отырғанын елестетіңізші.
Ас мәзіріне келер болсақ, Жаңа Зеландия қозы етін, қабыршағының реңкіне байланысты « көк ерінді» деп аталатын мидияларды және Австралия мен Жаңа Зеландия біздікі-біздікі деп таласатын «Павлова» десертін жеп көру керек.
Португалия
Виза: Шенген рәсімдеу керек.
Қалай жетесіз: Қазақстан мен Португалия арасында тікелей рейстер жоқ, бірақ Доха немесе Стамбул арқылы ауысып ұшуға болады.
Португалия — Еуропадағы ең қауіпсіз елдердің бірі. Global Peace Index рейтингінде жетінші орында тұр. Мұны цифрлар да айғақтайды: мұнда ауыр қылмыстар деңгейі жалпы құқық бұзушылық санының шамамен 4%-ын ғана құрайды, ал қасақана кісі өлтіру көрсеткіші — 100 000 тұрғынға шаққанда 1 жағдайдан да аз. Бұл ел турист әйелдер қауымына өте қолайлы: Лиссабонның жарықтандырылған ескі кварталдарында кешкісін емін-еркін серуендеуге немесе жеке заттарыңызға алаңдамай, қалалар арасында пойызбен саяхаттауға болады.
Синтра қаласына да соғыңыздар. Жақындарыңызды қамалдарға баратын тік өрлеумен шаршатпас үшін шағын электрлі тук-туктар көмегіне жүгініңіз. Оның жүргізушілері кейде гид қызметін де атқарып, қала туралы әңгімелеп береді. Ашық түсті мұнаралары бар Пена қамалы ертегі, ал төмендегі Регалейра иелігінің көлеңкелі бақтарында ыстықты сезінбей серуендеуге болады. Кешкісін Лиссабонның Алфама ауданынан махаббат пен тағдыр туралы фаду ұлттық мұңды әндерін тыңдау үшін үстел брондаңыз.
Негізінен қаланың көрікті жерлері шарлап іздеудің қажет жоқ. Португалия — табиғаты тұмса, сұлу ел. Атлант мұхитында серфингіден бірлескен сабақ алып көруге болады. Ал эстетиканы жаныңыз сүйсе, мұхитқа қараған террасада жергілікті «жасыл шараптан» ұрттап отырыңыз.
Словения
Виза: Шенген рәсімдеу керек.
Қалай жетесіз: Қазақстан мен Словения арасында тікелей рейстер жоқ, бірақ Стамбұл арқылы ауысып ұшуға болады.
Еуропадағы арзан әрі шағын елдердің бірі — Словения. Көршілес Италиямен салыстырғанда туристі әлдеқайда аз. Мұнда қар жамылған Альпі тауларын, айнадай мөлдір көлдерді және Адриатика жағалауын бір сапарда-ақ көруге болады. Словенияда қоғамдық көлікте дауыстап сөйлеу де, өзгенің жеке кеңістігін бұзу да әбестік саналады, ал қылмыс деңгейі нөлге жуық.
Любляна — Еуропадағы ең жасыл әрі серуендеуге ең қолайлы астаналардың бірі. Қалада саябақ өте көп, ал орталық бөлігінде көлік жүрмейді. Сондықтан Любляница өзенінің бойындағы террассаларда отырып, Дракондар көпіріне қараған күйі асықпай бранч істеуге болады. Міндетті түрде Метелкова арт-орталығына соғыңыз: бұрынғы әскери казармалар бүгінде ғажайып граффитилерге, галереялар мен андеграунд барларға толы шығармашылық кеңістікке айналған. Ерекше жер іздесеңіз, Постойна үңгіріне барыңыз. Онда арнайы жерасты пойызына отырып, алып сталактитті залдардың арасынан өтесіз. Көрінісі өзге ғалам туралы фильмдердің декорациясын еске салады.
Словениядан бір сағаттай жерде көздің жауын алатын Блед көлі бар. Бұл — аспай-саспай, әдемі демалғанға таптырмас жер: биіктік айырмасы жоқтың қасы, ал көлді жиектей салынған жол ұзақ серуенге өте жайлы. Көл ортасындағы аралға дәстүрлі ағаш қайығымен барып қайтыңыз. Серуеннен кейін Park қонақүйі жанындағы тарихи кафеге кіріп, «Кремна резина» десертін татып көріңіз. Атауы өзгеше болғанымен, бұл — аузыңызда еріп кететін, ауадай жеңіл кремі бар нәзік бәліш. Қазір ол елдің гастрономиялық нышанына айналған.
Исландия
Виза: Шенген рәсімдеу керек.
Қалай жетесіз: Қазақстаннан Рейкьявикке тікелей рейстер жоқ, алайда бірнеше нүкте арқылы ауысып ұшып, жетіп алуға болады.
Исландия бейбітшілік индексі бойынша әлемде көп жылдан бері бірінші орыннан түспей келеді. Мұндағы қауіпсіздікке бәрінің еті үйренген. Жергілікті жұрт көлігін құлыптамай-ақ қоя салады, ал қылмыс деңгейі төмен болғаны сонша — полиция қызметкерлері тапаншасын алып жүрмейді. Елдегі басты «қауіпсіздік қызметі» — 112 Iceland қосымшасы. Ол тек көмек шақыруға ғана емес, тауға не алыс аймақтарға шыққанда құтқарушыларға орналасқан жеріңізді нақты уақыт режимінде жіберуге мүмкіндік береді.
Үй ішімен демалғыңыз келсе, Аспан лагунасына баруға болады. Ол Рейкьявик әуежайынан алыс емес. Әйгілі Көгілдір лагунамен салыстырғанда мұнда біршама тыныш, ал көкпеңбек бассейн мұхитпен астасып жатқандай көрінеді. Бұл жерде «жеті қадамнан тұратын рәсім» кең тараған: ыстық пен суық температураны алмастырып отыратын сауықтыру процедурасынан өтіп, арнайы скраб жасатып, ақырында орман жидектерінен жасалған сусын ішіп көресіз. Кешке Рейкьявик жағалауының бойында серуендеп, Харпа концерт залына дейін баруға болады. Оның әйнек қасбеттері айдаһардың қабыршағына ұқсайды, ал ішінде камералық концерттер өтіп тұрады.
Ал құрбыларыңызбен жүрсеңіз, жол талғамайтын қуатты көлік жалдап, оңтүстікке — қара құмды Рейнисфьяра жағажайына тартып кетіңіз. Базальт бағандарының арасында фотосессия жасап, кейін Атлант мұхиты жағасындағы Исландияның ең оңтүстігіндегі елді мекені — Викке соғыңыздар. Адреналин жетіспесе, жол талғамайтын көліктермен мұз үңгірлеріне тур брондаңыз немесе солтүстік шұғыласын тамашалауға шығыңыз. Ал кешке Рейкьявикке қайтып, Лёйгавегур көшесінде бар-хоппинг ұйымдастыруға болады.
Мына алты қағиданы есте ұстаңыз
Үнемі байланыста болыңыз. Жергілікті SIM-карта сатып алыңыз не алдын ала e-SIM рәсімдеп қойыңыз. Қауіпсіздік ең алдымен тұрақты байланыстан басталады: картаңыз істеп тұрғаны және қажет кезде таксиді қосымша арқылы шақыра алғаныңыз өте маңызды.
Пікірлерді мұқият оқыңыз. Түнер жеріңіз туралы пікірлерді асықпай қарап шығып, құлыптардың жұмысы, тазалық деңгейі және қызметкерлермен қарым-қатынас бойынша шағым бар-жоғын тексеріңіз.
Геолокацияңызды жіберіп жүріңіз. Кейбір смартфондарда кіріктірілген бақылау қосымшалары бар (мысалы, iPhone-дағы Find My), болмаса үшінші тарап қолданбасын орнатуға болады (мысалы, Life360).
Құжаттардың бірнеше көшірмесін жасаңыз. Паспорт пен сақтандырудың фотосын не сканын бірнеше жерде сақтап қойыңыз: бұлтта (Google Drive не iCloud), қағазға басып шығарылған нұсқасын өзіңізбен алып жүріңіз және eGov қосымшасына жүктеп қойыңыз.
Құнды заттарды әр жерде сақтаңыз. Паспортты күнделікті сөмкеде алып жүргеннен гөрі, қонақүйдегі сенімді орында қалдырған дұрыс. Ақшаны да әртүрлі қалтаға немесе сөмкеге бөліп салыңыз — бірдеңе болса, бәрінен бірдей айырылып қалмайсыз.
Елшіліктің телефон нөмірін жазып қойыңыз. Қазақстанның елшілігі бар елдерде пана болар жерім бар деп біліңіз. Елшіліктің мекенжайы мен байланыс нөмірін алдын ала жазып алғаныңыз жөн.
Суретті салған — СашаШура.
