Роумиң, SIM-карта немесе eSIM: шетелде өзіңізге ыңғайлы байланыс түрін таңдаңыз

Шетелге жиналсаңыз қонақүй мен билеттен кейін ойлайтын нәрсе — интернет пен байланыс. Ол болмаса қайда қалай баратыныңызды шатастырып, төлеуге қиналып, такси не өзге де онлайн қызметтерден шектеліп, бірге жүрген адамыңыздан көз жазып қалған кезде таппай қалуыңыз мүмкін. Сондықтан бүгін сапардағы ең басты мәселелердің бірі — өзге елде байланыс пен интернетті реттеудің амалдарын талдаймыз. 

Роумиң

Роумиң деген не? Қазақстан операторларының (Beeline, Izi, Tele2 және т.б.) роумиңін қоссаңыз, өз нөміріңіз басқа елде жұмыс істей береді. Қосымша ақша төлеп, уақытша роумиңте жүресіз.

Артықшылықтары: Ештеңе істемейсіз, автоматты түрде қосылады. Нөмір ауыстырудың қажеті жоқ. 1–2 күндік сапарға ыңғайлы.

Кемшіліктері: Бағасы удай. Мысалы, Түркияда Beeline роумиңін қоссаңыз, ішінде 1ГБ интернеті, 30 минут сөйлесу мүмкіндігі бар «СуперВиза М» пакетін алуға болады. Бағасы 5 990 теңге, Түркиядағы бір кешкі астың құнымен бірдей, бірақ интернеті мен минуты аз. Операторлардың роумиң тарифтерін мына кестеде салыстырып қойдық:

Бұл кімге арналған? Басын ауыртқысы келмейтін әрі бағасына аса мән бермейтіндерге ыңғайлы. Не болмаса іссапарда жүріп, өз нөмірі үнемі қосулы болғанын қалайтын жандарға таптырмайды. 

Жергілікті SIM-карта

Басқа пластик SIM-карта. Барған еліңізде жергілікті сим-картаны сатып аласыз, өз нөміріңізді уақытша өшіріп, орнына қолданасыз.

Артықшылықтары: Интернеті арзан, тарифтері тиімді. Жергілікті халыққа оңай сіңісіп кетесіз. Мысалы, Тайландтың барлық операторының сим-картасы 50-60 бат шамасында, теңгеге шаққанда шамамен 1 000 теңге тұрады. Шетел операторларын мына кестеде салыстырып көрдік:

Кемшіліктері: Іздеу керек болады, себебі әуежайда сатылмауы мүмкін. Қалада кез келген дүкеннен де таппауыңыз мүмкін. Тапсаңыз да іске қосу үшін паспорт мәліметтерін сұрауы мүмкін. Негізгі нөміріңізді өшіруге тура келеді. Тіл білмесеңіз, сатып алудың өзі біраз терлетуі мүмкін. 

Әрине, жергілікті нөмірді, ең алдымен, әуежайдан қараған дұрыс. Кейбір жерде тарифтері қала дүкендеріне қарағанда сәл қымбатырақ болуы мүмкін. Сондықтан аса асығыс болмасаңыз, нөмірлер фирмалық дүкендерде сатылады. Ондай дүкендер көбіне сауда орталықтарында, бас көшелерде, метро мен автобус тұрақтарында жиі кездеседі. Google Maps, Maps.me, Apple Maps, 2GIS карталарынан тауып алсаңыз болады. Ең бастысы, туристік агенттерден, логосы жоқ дүкендер мен шатырлы сауда нүктелеріне жоламаңыз. Бірнеше есе артық төлеп қоюыңыз не шектеулі тарифке тап болуыңыз мүмкін.

Бұл кімге арналған? Бір апта, не одан көп уақытқа сапарға шыққандарға ыңғайлы. Үнемі байланыста болуы керек әрі үнемдеуді көздеген адамдарға арналған. 

eSIM

Телефонға QR-код арқылы жүктелетін виртуал сим-карта. Пластик картаны ішіне орнатудың қажеті жоқ.

Артықшылықтары: Қазақстанда үйде отырып та орнатып алуға болады. Өзге елге барғанда бәрі бірден жасап кетеді. Әртүрлі елдердің eSIM-дерін бір телефонға орната аласыз. Негізгі нөміріңіз пластик SIM-картада жұмыс істей береді.

Кемшіліктері: Жергілікті сим-картаға қарағанда қымбатырақ болуы мүмкін. Іске қосу үшін Wi-Fi  керек болады. Смартфонның жаңа модельдері болмаса, ескі модельдерде eSIM орнату мүмкіндігі жоқ. Мәселен, iPhone 2018 жылдан бастап шыққан модельдерге eSIM енгізді. Samsung-тың Galaxy S, Galaxy Z, Galaxy Note модельдерінде eSIM бар. Басқа да eSIM енгізілген смартфон модельдерінің тізімін мына жерден көре аласыз.

Иә, шетелге жиі шығатын болсаңыз қазақстандық операторлар роумиңінен eSIM тарифтері арзанырақ. Оны yesim, Airalo, Holafly, Ubigi сервистерінің сайтында не қосымшасында тіркеліп, іске қоса аласыз.

Мысалы, yesim сервисі 200-ден астам мемлекетте тиімді тариф бойынша eSIM ұсынады. Сайтында тіркелген соң өзіңіз баратын ел мен аумақты таңдайсыз, одан кейін сол елдегі тарифтер мен бағалар жазулы тұрады. Өзіңізге ыңғайлысын таңдап, ақысын төлейсіз де, соңында көрсетілетін QR-кодты сканерлеп, eSIM-ді орнатасыз. Керемет қой, иә?

Төмендегі кестеде eSIM сервистерінің Тайландтағы ең арзан тарифтерін салыстырмалы түрде тізіп шықтық:

Кімге арналған? Ыңғайлы нұсқаны іздеген, заман талабына сай жүретін адамдарға арналған. Бірнеше елге маршрут құрып, саяхаттауды жоспарлағандарға тиімді. 

Б жоспары: Қоғамдық Wi-Fi мен офлайн-карталар

Интернет пен байланыс жағын алдын ала жоспарлауды мүлде ұмытып кетсеңіз, қоғамдық ашық Wi-Fi барын әрі карталарды жүктеп алып, офлайн қарауға болатынын ескеріңіз.

Әдетте әуежайда, вокзалда, сауда үйлерінде, Starbucks, McDonald's сияқты кофеханалар мен кафелерде де тегін Wi-Fi жұмыс істейді.

Бастысы, ондай ашық тұрған тегін Wi-Fi-ға кіргенде сақтықты ұмытпаңыз. Ешқашан банк қосымшаларына қоғамдық Wi-Fi арқылы кірмеңіз, жеке деректеріңіз бен карта мәліметтерін енгізбеңіз.

Офлайн жұмыс істей беретін Google Maps немесе Maps.me карталарын жүктеп алсаңыз болады. Бұлар — интернетті қажет етпейтін құтқарушылар.

Әрине, бұл негізгі амал емес, күтпеген жағдайға тап болғанда байланысқа шығудың, адасып қалмаудың жолдары ғана. Қолдануға болады, бірақ абай болған жөн.

Қорытынды

Міне, байланыс орнатудың амалдары мен интернет қосудың қыр-сырын білесіз. Енді уайымдамай саяхаттай беруге болады — бастысы байланыссыз қалып қоймайсыз. Сәт сапар!

Суретті салған Эмилия Хан.