Дубайда демалғанға қанша ақша керек: сіз үшін есептеп шықтық

Дубайға Қазақстанда халықтың жартысы барып келгендей көрінеді. Ал екінші бір жартысы «ол жаққа барған тым қымбат» деп ойлап жүрген сияқты. Сән-салтанатты қаланы тек қалталы туристер баратын жер деп біледі. Әсте олай емес.

Біз Дубайға саяхаттап қайтқанға қанша ақша кететінін есептеп шықтық. Сондай-ақ үнемді демалысты қалай жоспарлау керегін, үй ішіңмен жайлы саяхаттап қайтқан шамамен қанша болатынын және толыққанды люкс демалысқа қанша қаражат керек болатынын айтып береміз.

Дубайдағы демалыс құнына не әсер етеді?

Демалысқа қанша қаражат кететінін есептеу үшін алдымен ұшақ билеттерін, қонақүйді, тамақты, транспортты және ойын-сауықты ескерген дұрыс. Сонымен бірге қосымша әсер ететін факторлар да бар:

Маусым. Күнге күйіп кетпей, қалада еркін серуендегенге ең қолайлы уақыт — қазаннан сәуірге дейінгі кез. Бірақ бұл айларда баға жоғарырақ әрі турист көп болады. Жазда қонақүйлерде жеңілдік көп, бірақ аптап ыстық пен ылғал ауа бәріне бірдей ұнай бермейді.

Ұшу. Тікелей рейстер уақыт үнемдейді, бірақ кейде қымбат болуы мүмкін. Ақша үнемдегіңіз келсе, көрші қалалардан да билет қарап көріңіз.

Қаңтардың соңына Ақтаудан ұшатын билет Шымкенттен ұшатын рейстерге қарағанда екі есе арзан

Демалыс форматы. Palm Jumeirah-тағы жағажай демалысы, сауда орталықтарын аралау немесе хостелде түнеу — таңдау өзіңізде. Бірақ осының бәрі сапардың жалпы құнына әсер етеді.

• Мүмкіндігінше үнемдеймін десеңіз, Дубайға күніне шамамен 30 мың теңге және ұшаққа тағы 160 мың теңге керек болады. Бұл жағдайда хостелде тұруға, барлық затты қол жүгінде алып жүруге және түскі асқа көше тағамдарын жеуге тура келеді.

• Жайлылық маңызды болса, күніне 175 560 теңге керек. Бұған қаланың орталық ауданындағы төрт жұлдызды қонақүй, сән-салтанатты мейрамханадағы түскі ас, такси мен экскурсия немесе бір музейдің билет құны кіреді. Ұшақ билеттері шамамен 300 мың теңге тұрады.

• Ал Дубайда қымбат демалысқа шектеу жоқ — бәрі сіздің қиялыңызға (және бюджетіңізге) байланысты. Күніне шамамен 660 мың теңге керек: мұндай сомаға Dubai Marina жағасында тұра аласыз, «Мишлен» жұлдызы бар мейрамханада кешкі ас ішесіз, люкс-класс көлік жалдап, тіпті тікұшақпен ұша аласыз. Air Astana-ның бизнес-класс билеті шамамен 1,5 миллион теңге тұрады. Төменде бюджетіңізге қарай Дубайда немен айналысуға болатынын айтып береміз.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Дубайға ұшып бару: бағалар мен әуе компаниялары

Дубайға тікелей рейстер төрт қаладан ұшады: Алматы, Астана, Шымкент және Ақтау. Егер үнемдегіңіз келсе, тек Дубай әуежайына (DXB) емес, жақын орналасқан қалаларға да билет қарап көріңіз. БАӘ — шағын ел, сондықтан кейде Шарджаға немесе Абу-Дабиға ұшып барып, әрі қарай таксимен немесе автобуспен жеткен тиімдірек. Жол бір–бір жарым сағат қана, ал билеттен үнемдеген ақшаңыз трансфер шығынын жабады.

Дубайға Fly Arystan немесе Air Arabia сияқты лоукостерлермен де, Air Astana немесе Flydubai секілді жайлы әуе компанияларымен де ұшуға болады. Айтпақшы, Дубай — қазақстандықтар бизнес-класпен ең жиі ұшатын үш бағыттың бірі.

Алматы

Алматыдан тікелей рейстер күнде ұшады. Багажсыз эконом-билет 83 мың теңгеден басталады. Жайлырақ ұшқыңыз келсе, Air Astana билеттері (тек бір жаққа) 149 мың теңгеден сатылады.

Астана

Астанадан да күн сайын тікелей рейстер бар. Билеттер Air Astanaда — 145 мың теңгеден, Flydubai — 175 мың теңгеден басталады. Бюджетті нұсқа іздесеңіз, ауысып мінетін рейстерді қараңыз: мысалы, Бакуде бір ауысып мініп баратын билет орта есеппен 86 мың теңге тұрады.

Шымкент

Flydubai сәрсенбі және сенбі күндері тікелей ұшады. Бағасы 145 мың теңгеден басталады. Арзандау нұсқа да бар: Ақтауда ауысып мінсеңіз, 95 мың теңгеден басталады.

Ақтау

Fly Arystan тікелей рейстерге тек сенбі күндері шығады. Бағасы 70 мың теңгеден басталады.

Дубайда тұру: хостелдер мен қонақүйлер

Дубай — өте үлкен қала, сондықтан қай ауданда тұратыныңыз тек бағаға емес, бүкіл сапардың атмосферасына да әсер етеді.

• Bur Dubai, Deira — қаланың ескі бөлігі, бағасы қолжетімді әрі бірегей атмосферасы бар аудандар. Мұнда базар мен арзан дәмхана көп. Ең үнемді нұсқа — хостелдің сегіз адамдық бөлмесінен орын жалдау: шамамен 20 доллар (10 мың теңге). Капсулалық қонақүйлер де бар, бірақ олар қымбатырақ — 70 доллар (35 мың теңге).

• Downtown, Business Bay, DIFC, DWTC — қаланың қарбалас аудандары. Негізгі сауда орталықтары, Dubai Mall, Бурдж-Халифа және басқа да көк тіреген зәулім ғимараттар осы жерде. Бұл ауданда бір түнге баспана орташа есеппен 250 доллар (шамамен 128 мың теңге) тұрады.

• Dubai Marina, Jumeirah, Palm Jumeirah — теңізге ең жақын тұрған аудандар. Пальма пішінді атақты жасанды арал — Palm Jumeirah-та бағалар 300 доллардан (152 мың теңге) басталады.

Тамақ бағасы

Дубайдағы контраст тамақтан-ақ байқалады. Фастфуд сататын орындар, отбасылық кафе мен «Мишлен» жұлдызды мейрамханалар бір көшеде қатар-қатар тұрады. Бағалары әртүрлі. 

Көше тағамы

Мейрамхана брондауға уақытыңыз немесе көңіл-күйіңіз болмаса, жергілікті стритфудты байқап көріңіз. Классикалық бургер немесе хош иісті шаурма орташа есеппен 50 дирхам (7 мың теңге) тұрады.

Орташа деңгейдегі кафе

Баламен саяхаттайтындарға ыңғайлы, қарапайым әрі дәмді нұсқа. Бір адамға орташа чек — 80–150 дирхам (11–21 мың теңге).

Авторлық тағамдары бар мейрамханалар

Дубайда атақты британдық шеф Гордон Рамзидің Bread Street Kitchen мейрамханасына барып, оның фирмалық Beef Wellington тағамын жеп көруге болады. Немесе түрік шефі Нусрет Гөкченің мейрамханасына барып, стейк немесе алтынмен апталған пахлавадан ауыз тиіңіз. Мұнда орташа чек — 200 дирхам (28 мың теңге).

«Мишлен» жұлдызды мейрамханалар

Ең қымбат нұсқа, бірақ алатын әсеріңіз соған тұрарлық. Мұндай жерлерге тек тойып қайтуға емес, ерекше гастрономиялық тәжірибе іздеп барады. Мысалы, Trèsind Studio-ға барып заманауи үнді молекулярлық тағамдарын, немесе STAY by Yannick Alléno-ға барып француз тағамдарын көруге болады. Бағасы да соған сай — бір адамға 1000 дирхам (140 мың теңге).

Қоғамдық көлік пен такси бағасы

Дубайда жаяу серуендеген қиын. Көрікті жерлердің арасы ұзақ, жаяу жүргіншілер жолы жоқ, ал ыстық күн ешкімді аямайды. Сондықтан көлікке жеке бюджет қарастырған дұрыс.

Қоғамдық көлік

Қоғамдық көлікке мінгенге арнайы карта керек. Оны метро станцияларының кассасынан сатып алуға болады. Метро ақысы аймақтарға байланысты есептеледі, бірақ әдетте 15 дирхамнан (2090 теңге) аспайды. Жайлы көлік түрлерін ұнатсаңыз да, Дубай метросына бір рет түсіп көруді ұсынамыз!

Қалада автобус пен трамвай да жүреді. Жолақысы — 8 дирхам (1126 теңге). Кестені ресми сайттан көруге болады.

Такси

Ыңғайлы әрі салыстырмалы түрде арзан. Такси есептегішпен жүреді: әр шақырымы — 2 дирхам, ал шақырғаныңыз үшін қосымша 10 дирхам. Орта есеппен бір сапар 40 дирхамға (5–6 мың теңге) шығады. Танымал қызметтер — YanGo және Careem.

Каршеринг

Үлкен отбасымен саяхаттап жүрсеңіз немесе көлікпен жүргенді жайлы көрсеңіз, каршеринг — жақсы нұсқа. Дубайда бірнеше сервис бар, ең танымалы — Udrive. Бағасы — минутына 0,8 дирхам. Яғни, 30 минуттық жол (Дубайда қашықтық үлкен екенін ұмытпаңыз!) шамамен 25 дирхам (3500 теңге) болады.

Көлік жалдау

Дубайда люкс-класс көліктерді көбі жалға алады. Бұл көбіне туристерге ермек ретінде ойластырылған. BMW немесе Porsche мінуді армандасаңыз, орташа жалдау құны — тәулігіне 800 дирхам (115 мың теңге).

Ойын-сауық пен экскурсия

Біреуге өтірік, біреуге шын — Дубайда қалтаны қақпайтын демалыс түрлері де бар. Ең кемі, жағалауда серуендеу тегін екенін ұмытпаңыз. Ал қаласаңыз, әуе шарына мінуге немесе теңіздің үстіндегі аспалы алаңда кешкі ас ішуге болады.

Тегін немесе арзан нұсқалар (100 дирхам немесе 14 мың теңгеге дейін)

• Бурдж Халифа жанындағы әйгілі әнші субұрқақтар. Шоуды жағалаудан ақысыз тамашалауға болады. Субұрқақты жақыннан көргіңіз келсе, 68 дирхамға (9 500 теңге) қайықпен экскурсия бар. 

• Әл-Фахиди ауданына серуен. Бұл — Дубайдың тарихи бөлігі, қазір мұнда шағын музейлер, арт-кеңістіктер мен мәдени орталықтар бар. Әдемі фотоға түсіп, стритфуд алып, қыдырып қайтқанға тамаша орын.
• Жағалаулар. Дубайдың қоғамдық жағажайлары таза әрі ыңғайлы. Kite Beach не Sunset Beach жағажайларында күнге (тегін) қыздырынуға болады.

Орташа сегмент (400 дирхам немесе 56 мың теңгеге дейін)

• Ain Dubai шолу дөңгелегі. Теңіз жағасындағы алып аттракцион. Кабиналарынан қала, Palm Jumeirah аралы және Jumeirah Beach Residence зәулім үйлері көрінеді. Билет бағасы адам басына 145 дирхам (20 450 теңге).
• Miracle Garden. Бұл — алып гүл бағы: мұнда гүлдерден мультфильм қаһармандары, жануарлар, үлкен сарайлар мен ұшақтар да жасалады. Кіру — адам басына 100 дирхам (14 мың теңге).
• Болашақ музейі. Лоббидегі роботтардың шағын шоуын тегін көруге болады, ал көрме билеті — 169 дирхам (23 мың теңге).
• Шөлдегі сафари. Қала сыртында демаламын десеңіз, құмды бархандарға экскурсияға жазылуға болады. Гидпен бірге таңды шөлде қарсы алып, квадроцикл немесе түйемен серуендеуге мүмкіндік бар. Бағасы — адам басына 250 дирхам (35 мың теңге).

VIP-демалыс (700 дирхамнан немесе 100 мың теңгеден жоғары)

• Тікұшаққа міну. Дубайдағы зәулім ғимараттарды толық көрудің жалғыз жолы — олардың үстінен ұшу өту. Ұшу ұзақтығына қарай бағасы өзгеріп отырады. Ең қолжетімді нұсқа — топпен 12 минуттық тур, адам басына 700 дирхамнан (98 550 теңге). Ал жеке немесе екі адамға арналған 40 минуттық тур — 11 200 дирхам (1,5 млн теңге).
• Биіктегі кешкі ас. Арнайы платформа кранмен теңіз үстінен 50 метр биікке көтеріледі. Сол жерде меймандар шеф әзірлеген тағамдарды жеп, әдемі көрініске тамсанып, биіктіктен қорқатындар фобиясымен «күреседі». Бағасы — адам басына 699 дирхам (98 мың теңге).
• Дайвинг. Әлемдегі ең терең бассейн — су астындағы қала стилінде жасалған. Көпті көрген сүңгуірдің өзін таңғалдырады, бірақ бағасы өте қымбат: бір реттік сүңгу билеті — адам басына 1 800 дирхам (253 мың теңге).

Ары‑бері, Дубай

Wow‑сауық

Парашютпен секіру

Хатта қаласындағы байдарка

Королева Елизавета 2 тур

Багги Сафари

Парашютпен секіру

Хатта қаласындағы байдарка

Королева Елизавета 2 тур

Барлық жерлерді қарап шығу

Aviasales.kz бағыттауларында

Барлық жерлерді қарап шығу

Aviasales.kz бағыттауларында

Сонымен Дубайда демалғанға қанша керек?

Дубай — қалауыңыз бен қалтаңызға қарай қыдыруға болатын бағыт. Мұнда эксклюзив мейрамхана, сәнді қонақүй мен алып сауда орталығы өте көп. Бірақ арзан әуе билеттері мен хостелдердің мол түрінің арқасында қала үнемдеп саяхаттайтындарға да әбден қолайлы. 

2026 жылы Дубайда демалғанға қанша ақша жұмсайсыз?

Біз демалыс түріне қарай Дубайда бір күнде орта есеппен қанша ақша кететінін есептеп шықтық. Мұнда көрсетілген сомаға барып-қайту билеті, бір рет мейрамханаға бару, қонақүйдегі бір түн, жолақы мен күн сайынғы бағдарламадан бір іс-шараның құны кіреді. Бюджетті алдын ала жоспарлау үшін бағаларды шамалап көрсетіп отырмыз.

БАӘ-де қалай үнемдеуге болады?

• Әуе компанияларының жеңілдіктерін бақылап жүріңіз. Дубайға лоукостерлер жиі ұшады — Air Arabia, Pegasus және Fly Arystan. Ал біз өз Telegram-арнамызда арзан ұшақ билеттері мен әуе компанияларының жаңа науқандары туралы жазып отырамыз;
• Билетті Шарджаға немесе Абу-Дабиге қарап көріңіз. Екі әуежайдан да Дубайға шамамен бір–бір жарым сағатта жетесіз. Бірақ онда ұшақ билеттері әдетте арзанырақ болады;
• e-SIM-ді алдын ала рәсімдеңіз. БАӘ-дегі байланыс қымбат — екі гигабайт интернет шамамен 50 дирхамнан (7 мың теңге) басталады. Телефоныңыз e-SIM оқыса, халықаралық e-SIM қосқан тиімді;

• Қонақүй мен ұшақ билеттерін алдын ала брондаңыз және арзан билеттерді қашан алған тиімді екенін көрсететін күнтізбемізді тексеріп отырыңыз;
• Қоғамдық көліктен қорықпаңыз. Ол таксиге қарағанда әлдеқайда арзан, ал қарбалас уақыттарда қалаған жеріңізге көліктен тез жетесіз.

Суретті салған — Олег Бородин.