Жапониядан не әкелдің дегенде, ұялмай беретін сыйлықтар тізімі

Жапонияға артық бір бос шабадан ала бару керек дейді білетіндер. Мән-мағынасы терең мың түрлі мүсінше мен елде жоқ кәмпиттерді көргенде, бұл елден құр қол қайта алмайтыныңыз анық. Сіз сапар барысында ойыңыз сан-саққа жүгіріп, саяхат бюджетін бір күнде жаратып тастамасын деп, арнайы тізім әзірлеп қойдық. Мақалада Жапониядан не сатып алу керегі және оларды қай жерден арзанға табуға болатыны егжей-тегжейлі жазылған.

Дәстүрлі жапон кәдесыйлары

Жапон мәдениеті терең символизмге бай, сондықтан дәстүрлі кәдесыйлар туристер арасында сұранысқа ие.

Кимоно мен юката

Дәстүрлі жапон кимоносы — жібектен тігілетін бағалы киім. Оны өз бетіңше киген оңай емес, ал шабаданға сыйғызу тіптен қиын. Бағасы да біршама қымбат. Сондықтан мақтадан тігілетін жеңіл түрін — юкатаны алуға болады. Жапонияда оны жазғы фестивальдерге киеді. Юката үйде киіп жүргенге де жайлы. Мұндай кимонолар Uniqlo-ның жазғы топтамаларында көп. Жеңіл түрлерін жергілікті секонд-хендтерден де табуға болады.

Жапон желпуіштері

Сэнсу — жиналмалы желпуіштер, ал утива деген — дөңгелек пішінді түрлері. Бұл Жапонияның аптап ыстығында таптырмас зат қана емес, аса көркем аксессуар әрі ерекше кәдесый. Желпуіштерді бамбук пен күріш қағазынан қолмен жасап, содан кейін оны акварельге ұқсайтын арнайы бояумен өрнектеп шығады.

Но маскалары

Туыс-тума арасында тылсым шытырманға қызығатындар болса, оларға Но дәстүрлі жапон театрындағы Хання демонының бетпердесін не аппақ жүзді маска ала барыңыз. Кезінде әртістер осындай маскаларды тағып алып, өнер көрсетіп, түрлі эмоцияларды бейнелеген. Қазір бұл маскалар үйді жын-шайтаннан қорғайды деген сенім бар. Бірақ кейбірінің түрі тым қорқынышты болуы мүмкін. 

Дарума қуыршағы

Дарума — бақыт әкелетін Бодхидхарма құдайы бейнесіндегі тербелгі қуыршақ. Бұл қуыршақтың көзі ақ болып сатылады. Бір тілек тілеп (мысалы, ипотекамды жабайын не жапон тілін үйренейін деп), бір көзін бояп қою керек. Тілегіңіз орындалғанда, екінші көзін бояйсыз. Бір жыл ішінде тілек орындалмаса, қуыршақты ғибадатханаға апарып, өртеп жіберу керек. Ал ырымға сенбейтіндерге бұл қуыршақты интерьердің сәнін келтіретін мүсінше деп беруге болады. 

Манеки-нэко

Мейрамханалар мен қонақүйлер кіреберісінде тұратын, cирағын бұлғап отырып, ішке қонақ шақыратын әйгілі мысық. Оң табанын көтеріп тұрған мысық — ақша, ал сол табанын көтергені — адам тартады деген сенім бар. Барлық кәдесый дүкенінде сатылатын бұл бұйым бизнеспен айналысатын досыңызға мәні зор естелік болмақ.  

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Косметика мен күтімге керек тауарлар 

Shiseido 

Күтім косметикасы туралы айтар болсақ, ең көне әрі танымал Shiseido брендіне назар аударған жөн. Бүкіл әлем олардың аңызға айналған Ultimune сарысуын іздеп жүргенде, сіз оны осы жерден-ақ сатып ала аласыз. Бірақ эксклюзив өнімдерді іздеген — қып-қызыл азарт! Shiseido шет елдерге экспорттамайтын Elixir не Haku желілерін қарап көріңіз. Ал сәндік косметикаға келсек, Shiseido-ның Maquillage қосалқы брендіне көңіл бөліңіз. Бұл — люкс орамадағы сапалы әрі бағасы тиімді косметика. Мысалы, опасы шамамен 30 доллар (15 мың теңге) тұрады. Maquillage брендін де Жапониядан басқа жерден тапқан қиын, сондықтан біраз ақша ала барып, көбірек сатып алған дұрыс.

SK-II

Люкс өнімдерін ұнататындарға Жапонияда SK-II деген бренд бар. Бұл косметика ашытқыдан алынатын Pitera атты сиқырлы компоненттен жасалады. Крем теріні жарқыратып, мінсіз реңк береді. Бірақ арзан тұрмайды: бір кремнің бағасы шамамен 200 долларға (102 мың теңгеге) жетуі мүмкін. Есесіне мұндай сарысудың түпнұсқасын басқа еш жерден таба алмайсыз.

Muji

Ал жаныңызға минимализм мен экологиялық тазалық жақын болса, Muji дүкеніне барыңыз. Олардың косметикасы Ивате префектурасындағы үңгірлерден алынатын ең таза табиғи су негізінде жасалады. Көпшілікке танымал Sensitive Skin Toning Water тонерінің 300 мл құтысы Жапонияда шамамен 15 доллар (7 600 теңге) тұрады. Айтпақшы, Muji — бұл косметикадан бөлек, киім-кешек пен интерьер бұйымдарын да алуға болатын әмбебап дүкен.

Жапонның дәмі

• 
• 

Шай

Матчаның тек бір түрі болады деп ойласаңыз, қателесесіз. Сапалы ұнтақ шайды арнайы дүкендерден алған дұрыс, ал сыйлыққа сэнча (классикалық көк шай) не ерекше гэнмайча (қуырылған күріш қосылған, попкорн иісі шығатын көк шай) өте қолайлы. Матчаның отаны — Киото, сондықтан мүмкіндік болса, шайды сол жерден сатып алған жөн. Дегенмен Токиода да сапалы шай сататын жер аз емес. Мәселен, Ippodo Tea дүкендеріне не Ujicha Kigetsudo-ға барып көріңіз.

Тәтті-пәтті

Тың дәмді тәттілерді ұнататындарға Жапонияда KitKat шоколадының барлық түрін тауып, дәмін татып көрген — өте қызық квест! Мұнда саке, васаби, ходзича шайы, Хоккайдо қауыны, тіпті пешке піскен батат дәмі бар шоколадтарды кездестіресіз. Шектеулі топтама әр маусым сайын шығып тұрады. Мысалы, көктемгі гүлдеу кезінде құлпынай мен сакура дәмі бар шоколадтар шығады. Сөрелерден моти де іздеп көріңіз. Ол — ішінде тәтті салмасы бар, күріш қамырынан жасалған нәзік тоқаштар.

Тұздықтар

Жапон тамақтарын үйде пісіріп көргіңіз келсе, саяхат кезінде түрлі тұздық пен дәмдеуіш сатып алыңыз. 

Күнжіт, балдыр мен балық қосылған, күрішке себетін фурикаке қоспасын алуды ұмытпаңыз. Нағыз жапон соя тұздығы не салаттарға арналған қою күнжіт тұздығы елдегі супермаркеттерде сатылатындардан ерекше. 

Ал азиялық сорпаларды ұнататындарға вакуумдағы мисо-пастасын және танымал мейрамханалармен бірлесе жасалған премиум рамен жинақтарын алуға кеңес береміз. Оларды 7-Eleven дүкендерінен табуға болады.

Алкогольді сусындар

Арақ-шарап дайындау кезінде жапондар су сапасы мен дәм тазалығына ерекше көңіл бөледі. Сондықтан өзіңізге не дос-жаранға сыйлық ретінде бір бөтелке саке немесе умэсю ала келуге болады.

Сакэ

Бізге үйреншікті сакэ Жапонияда Нихонсю деп аталады (ал «сакэ» сөзі кез келген алкоголь түрін білдіреді). Өндіріс технологиясы бойынша бұл арақ емес (көпшілік ойлағандай градусы жоғары емес), керісінше күріш шарабына көбірек ұқсайды. 

Сакэнің сапасы күріштің қалай өңделгеніне байланысты. Дақылдың сыртқы қабығы неғұрлым көп тазартылса, дәмі соғұрлым нәзік болады. Заттаңбада Daiginjo деп жазылып тұрса, бұл өте жоғары деңгейде өңделген элиталық сакэ деп біліңіз. Одан спирттің өткір иісі шықпайды. Оның хош иісі қауынға, гүлдерге не жаңа піскен алмаға ұқсауы мүмкін.

Жапонияның әр аймағында сакэнің өз түрі бар, өйткені дәмге күріштің сұрпы мен ол өсірілген жердің климаты қатты әсер етеді. Мысалы, Ниигатадағы сакэсі онша тәтті емес, құрғақ әрі балғын келеді. Ал Хиросимада, керісінше, тәттілеу сакэлер сатылады.

Жапон вискиі

Қазір жапон вискилері, әсіресе Suntory мен Nikka брендтерінің өнімдері әлемдегі ең үздік шотландиялық вискилермен бір деңгейде тұр. Әлемде сұраныс артуына байланысты көптеген сұрыптар тапшы болып жатыр. Бірақ Жапонияда сіз әлі де кез келген талғамға сай келетін виски түрлерін таба аласыз.

Умэсю

Бұл — жапондық умэ өрігінен ашытылған тәтті ликер. Ащы алкогольді ұнатпасаңыз, осыны алыңыз. Дәмі қышқылтым-тәтті, қою әрі бадам хош иісі сезіледі. Ал кейбір умэсюлер ішінде өрік те болады.

Поп-мәдениет пен аниме-мерч

Жапония — «Титандар шабуылы» немесе «Наруто» сияқты культтік анимелердің отаны. Сирек кездесетін коллекциялық мүсіншелерді, манганың эксклюзив шығарылымдары мен фанаттарға арналған мерчтерді дәл осы жерден алмағанда, қайдан алмақсыз? Ал ондағы аниме-шоптар анименің не екенін білмейтін адамдарға да қызық болады. 

• Коллекциялық мүсіншелер. Сапалы өнім керек десеңіз, Good Smile Company және Bandai брендтерінен алыңыз. 
• Pokémon Center. Пикачу мен Слоупок жанкүйерлеріне арналған ірі дүкен. Мұнда ұшқыш, самурай формасындағы не маусымдық киімдегі эксклюзив покемондарды таба аласыз. Мұндай заттар тек Жапонияда сатылады, ал ел оларды делдалдар аз мөлшерде әкеліп, қымбатқа сатады. 
• Ghibli Store. Хаяо Миядзакидің мультфильмдерін көріп өскендер баруы керек жер! Бұл жерден мамық Тотороларды, «Лапутадағы» роботтарды және «Елестер әлеміндегі» сусуватариді табуға болады.
• Манга. Түпнұсқа манга немесе сүйікті анименің эскиздері жинақталған артбук — жапон тілін білмесеңіз де сатып алуға тұратын құнды естелік. Мұнда кәдімгі мангаларды да, жоғары сапалы полиграфиямен шыққан коллекциялық басылымдарды да табуға болады. Ең танымал дүкендер — Mandarake, AniMate және BookOff.

Айтпақшы, мерчтің мың түрін Токионың Акихабара және Икэбукуро аудандарынан табасыз.

Тағы осы тақырыпта

Жапониядағы он күнге 2,4 млн теңге кетті. Не істеп үлгердік?

Киім-кешек

Жапон модасында минимализм мен бірегей сән үйлесім табады. Мұнда тек жергілікті дүкендерді аралап қоймай, халықаралық брендтердің бөлімдеріне де бас сұғуға болады. Ондағы баға әдетте Қазақстандағымен бірдей, бірақ таңдау әлдеқайда көп болуы мүмкін.

Uniqlo

Киім өте ыңғайлы, матасы аса сапалы болсын десеңіз, Uniqlo-ға соқпай кетпеңіз. Мұндағы киім-кешек бағасы байерлер арқылы тапсырыс бергеннен төмен, ал таңдау әлдеқайда көп. Бірақ үлкен ерекшелігі — кестелеу аумағы. Тура дүкен ішінде футболка не худиге бірегей патч я ерекше кесте салдыра аласыз. Осылайша, қарапайым базалық киім ешкімде қайталанбайтын эксклюзив кәдесыйға айналады. Мұндай аумақтар барлық дүкенде бола бермейді, сондықтан «Remake» опциясы бар Uniqlo бөлімшелерін іздеңіз.

Аяқ киім

Эксклюзив кроссовкаларды ұнататындарға көретін дүние көп. ABC-Mart сияқты ірі желілерден «Japan Exclusive» белгісі бар сөрелерді іздеңіз. Бұл брендтің өзі басқа елдерде сатылмайды деген сөз емес, бірақ мұнда сіз тек Жапонияға арналған түстер мен саны шектеулі тауарларды таба аласыз. 

Мысалы, мұнда ASICS-тің Onitsuka Tiger топтамасының ең толық ассортименті бар. Әсіресе «Nippon Made» премиум желісіне кірмей кетпеңіз. Бұл кроссовкалар жапон фабрикаларында ең жоғары сапалы теріден қолмен жиналады. Оларды елден тыс жерде тапқан қиын, ал табылған күннің өзінде бағасы екі-үш есе қымбат болады.

Шопингіге қайда шыққан дұрыс?

Бюджетіңіз шектеулі болса, Токионың шетіндегі аутлеттердің біріне барыңыз. Онда брендтік заттар жеңілдікпен сатылады. Токионың өзінде дүкендердің басым бөлігі Сибуя немесе Синдзюку аудандарында орналасқан. Сол жерлерден винтаж дүкендерді де табуға болады: ескі топтамалардан алынған бірегей заттарды осы аудандардан іздеңіз.

Ыдыс-аяқ

Саяхаттан күн сайын қолданатын бұйым әкелгіңіз келсе, жапонның ыдыс-аяқ дүкендерін аралап шығыңыз. Онда қалағаныңыздан артық зат табылатыны сөзсіз.

Пышақ

Жапон пышақтарының құпиясы сол — заманауи шеберлер оны жасағанда самурай семсерлерін соғу технологиясын қолданады. Сол себепті әлемнің түкпір-түкпірінен келген бас аспаздар жапонның болаттан жасалған, жүзі ерекше жұқа жапон пышақтарын іздеп жүреді. Тек қолдан жасалған бұйымдар қымбат тұратынын ескеріңіз. Бір пышақтың бағасы 20 000-нан 80 000 иенаға (шамамен 60 мың–250 мың теңгеге) жетуі мүмкін. Бірақ өнім сапасы бағасына лайық. Пышақтарды багажға салып қана тасымалдауға болатынын ұмытпаңыз.

Қыш

Тағы бір құнды олжа — жапон фарфоры мен керамикасы. Бұл жай ғана кеселер мен тәрелкелер емес, шай ішу мәдениетімен тығыз байланысты өнер жәдігерлері. Оларды жоғары температурада күйдіреді, кейде пеште пішінін бірнеше рет түзетеді. Нәтижесінде төзімді, жеңіл әрі бірегей текстураға ие ыдыс шығады. 

Сырлы аяқтың сыры кетсе де, сыны кетпейді деген сөз жапонның қыш өнімдеріне айтылған ба дерсіз. Мұндағы әр кесе не тәрелке — төл болмысы бар, қайталанбас жәдігер іспетті. Ал қарапайым, бірақ талғаммен таңдалған сыйлық ретінде тамақ ішетін таяқшалар (хаси) өте қолайлы — шебер ойылған немесе есіміңіз жазылған нұсқаларын іздеп көріңіз.

Жапон ыдыстарын сатып алу үшін Токиодағы Каппабаши көшесіне барыңыз. Бұл — ыдыс-аяқ дүкеніне толы бірнеше орам. Киотода нағыз керамика алу үшін ғасырлар бойы өзінің фарфорымен танылған Нишики базарына барыңыз. Екі адамға арналған, сапасы жақсы шай ішу жиынтығы 3–10 мың иена (9–30 мың теңге) шамасында тұрады.

Ары‑бері, Токио

Жергілікті

Miyashita Park мекені

Нэдзу музейі

Оэдо актикварлы нарығы

Харадзюку ауданы

Miyashita Park мекені

Нэдзу музейі

Оэдо актикварлы нарығы

Барлық жерлерді қарап шығу

Aviasales.kz бағыттауларында

Барлық жерлерді қарап шығу

Aviasales.kz бағыттауларында

Техника мен электроника

Жапон нарығының бір ерекшелігі — мұнда жұрт жаңа өнімге жаппай құмар емес. Сондықтан секонд-хенд нарығы қатты дамыған. Жапондардың ұқыптылығының арқасында екінші нарықтан өте тиімді бағаға күйі мінсіз техниканың түр-түрін табуға болады.

Жапонияда тек таңдау көп демесеңіз, ресми дүкендеріндегі жаңа тауарлар бағасы Қазақстандағымен бірдей. Тек жағымды бонустары бар. Мысалы, студенттерге жеңілдіктер беріледі. Қолыңызда халықаралық студенттік карта болса, ресми Apple дүкендері шамамен 15 мың иена (шамамен 50 мың теңге) жеңілдік жасайды.

Жаңа не қолданыстағы техниканы Акихабара ауданынан іздеген дұрыс. Орталық Чюо Дори көшесі мен оған іргелес барлық тұйық көшеде жүздеген дүкен шоғырланған: қосалқы бөлшектер сататын кіп-кішкентай дүңгіршектен бастап, алып сауда орталықтарына дейін табасыз. Су жаңа техника іздеп жүрген болсаңыз, Dospara Akihabara сияқты ірі нүктелерге бас сұғыңыз. Ал ақша үнемдеп, ерекше бір нәрсе тапқыңыз келсе, HARD OFF немесе Janpara D-Style сияқты ескі электроника дүкендеріне барыңыз. Бұл жерлерден жап-жаңа гаджетті өз құнынан екі есе арзанға сатып алуға болады. Сатып алмас бұрын мыналарды міндетті түрде тексеріңіз:

• Кернеу. Жапонияда стандарт — 100V. Құрылғының әмбебап кернеуді (100–240V) көтеретініне көз жеткізіңіз, әйтпесе ол үйде жанып кетуі немесе мүлдем қосылмай қалуы мүмкін.
• Тілше. Жапониядағы розеткалардың түрі біздікінен өзгеше (екі жалпақ параллель тілше), сондықтан өзіңізбен бірге адаптер ала жүріңіз.
• Тіл. Интерфейс баптауын тексеріп алыңыз. Кейбір гаджеттер тек ішкі нарыққа арналып шығарылады, сондықтан оларды басқа тілге ауыстыру мүмкін болмауы мүмкін.

Мұның бәрін қайдан алуға болады?

• 

  Акихабара ауданы
• 

Сатып алатын заттар тізімі дайын болғанда, енді мұның бәрін қалада сандалып жүрмей, қайдан тапсам болады деген сұрақ туады. Жапонияда бюджетіңіз бен уақытыңызды үнемдейтін дүкендердің бірнеше форматы бар.

Don Quijote

Бұл — бір шаршы метрде косметика, жапон тәттілері, электроника, тіпті брендтік сөмкелер қатар тізілген алып гипермаркет. Үлкен артықшылығы — мұнда бәрін бір жерден әрі өте тиімді бағамен сатып алуға болады, ал көп нүктесі тәулік бойы (24/7) жұмыс істейді. Бірақ Сибуя немесе Синдзюку сияқты орталықтағы дүкендерде адам қарасы өте көп болуы мүмкін.

Емін-еркін сауда жасағыңыз келсе, тұрғын аудандардағы бөлімшелерді таңдаңыз: Don Quijote Korakuen, Gotanda немесе Nakameguro. Онда баға да, тауар түрі де дәл сондай, бірақ турист құжынап жүрмейді.

Базарлар

Жапон колоритін сезінгіңіз келсе, жергілікті базарларға барыңыз. Бұл — мәдениетпен танысудың ең жақсы жолы. Онда керамика, авторлық аксессуарлар мен қолөнер бұйымдары сатылады. Базарлардағы баға кейде дүкендерге қарағанда төмен болуы мүмкін, бірақ бұл сирек кездесетін жағдай. Винтаж заттар алу үшін Токиодағы Ханадзоно базарына немесе Накамисэ-дори сауда көшесіне баруға болады. Ал Киотодағы орталық базар — Никиши.

Daiso мен Seria

Үйге арналған сүйкімді ұсақ-түйек пен пайдалы заттар іздегендерге «Бәрі 100 иенадан» дүкендері — Daiso мен Seria таптырмас орын. Бағасы төмен екенін көріп, ішіңіз қылп ете қалмасын. Мұндағы тауарлардың сапасы басқа дүкендерден еш кем түспейді. Бұл жерден ерекше кеңсе тауарларын, декор бұйымдарын, сыйлық орайтын қағаздарды не ас үйге арналған гаджеттерді сатып алуға болады.

Дьюти-фри

Сыйлық алу керек еді ғой деген ой қайтар жолда ғана түссе, дьюти-фри мен әуежайдағы дүкендерге жүгіріңіз. Мұнда бәрі әдемілеп оралған және сыйлық етіп бергенге дайын тұрады. Иә, бағалар қала ішіндегіден сәл жоғары болуы мүмкін, есесіне жүктің артық салмағы үшін алаңдамайсыз — дьюти-фриден алынған пакеттер, әдетте, қол жүгіне қосымша бонус ретінде есептеледі.

Жапониядан шығаруға болмайтын заттар

Әуежайдың тексеру бөлімі ұстап қалып, бірнеше сағат тергеп отырмасын десеңіз, қандай заттарға толықтай тыйым салынғанын, ал қайсысына қатаң шектеу барын білген маңызды.

Елден шығаруға тыйым салынған немесе шектеу қойылған заттар тізімі мынадай:

• Семсер мен суық қару. Бұл жай кәдесый болса да, оны елден алып шығуға болмайды. Жапон заңдары мұндай заттарды қарумен теңестіреді. Ас үй пышақтарын алып шығуға рұқсат, бірақ өзіңізбен бірге сатып алғаныңыз туралы чектің немесе оның не үшін қолданылатыны көрсетілген қаптамасы болғаны маңызды. 
• Өсімдіктер мен тұқымдар. Сакура көшетін немесе жапон үйеңкісінің тұқымын алып кеткісі келген пысықтар айыппұл арқалауы мүмкін.
• Жаңа піскен жемістер. Жапон қауынын, құлпынайы мен шабдалысын шекара бекетіне дейін жеп қойыңыз. Карантиндік шектеулерге байланысты оларды жаңа піскен күйінде елден алып шығуға тыйым салынған.
• Бағаланбаған көне жәдігерлер. Ескі заттар базарынан музей экспонатына ұқсайтын көне ваза тауып алсаңыз, сақ болыңыз. Мәдени мұра мемлекет қорғауында, сондықтан сарапшылар бағаламаған көне заттарды шекарашылар тәркілеп алуы мүмкін.

Тағы осы тақырыпта

Жапонияға барар алдында неге дайын болу керек?

Жапонияға туристік визаны қалай алуға болады?

Туристерге кеңес

Жапон халқы өте талапшыл және желіде әлдебір тауар туралы егжей-тегжейлі пікір қалдырады. Тауар көңілден шықпаса, бұл бірден рейтингтерге әсер етеді. Сондықтан дүкеннің сенімділігін тексерудің ең оңай жолы — Google Maps-тағы пікірлерге көз жүгірту. Орынға жергілікті жұрт жоғары баға қойса, тауарлар сапасына күмәнданбасаңыз болады.

Тағы нені ескерген дұрыс:

• Тасымалдау. Сынғыш заттарды барынша мықтап ораңыз. Фарфор, қыш заттарды не электрониканы бірнеше қабаттап орап, багажға тапсырған дұрыс.
• Қайда тиімдірек? Косметика мен тәттілерді қала ішіндегі дүкендерден (мысалы, косметика желілерінен немесе Don Quijote-ден) сатып алуға тырысыңыз. Әуежайда бұл тауарлар қымбатқа түседі.
• Сапа белгісі. «Made in Japan» белгісі бар-жоғына назар аударыңыз. Ішкі нарыққа басқа елдерден тапқан қиын болатын тауарлардың бөлек топтамалары шығарылады.
• Такс-фри. Салықты қайтарып алу (Tax-free) қызметін пайдаланыңыз. Бұл сізге тауар құнының 10% үнемдеуге мүмкіндік береді. Бұл жеңілдік әсіресе техника немесе бренд киім-кешекті сатып алғанда кәдімгідей біленеді.