Күріш пен көжеге таласқа дайын болыңыз. Алматыда Наурыз тойы өтетін жерлер

Сіз жұмыстан бас көтере алмай отырғанда, Алматы Наурыз тойына қызу дайындықты бастап кетті. Қала ресми түрде Наурызнама тұжырымдамасын қабылдаған. Бұл — 14 наурыз бен 23 наурыз аралығына созылатын, 200-ден астам ресми іс-шараны қамтитын он күндік мерекелік марафон. Бірақ бұл тойдың ең үлкен қызығы — Ұлыстың ұлы күніне орай пісірілетін тегін көже мен палауды таласып жүріп ішіп, бауырсақтан ауыз тию.

Шүкір-шүкір, биыл палау мен көже көптеп әзірленетінге ұқсайды. Мерекеде аш қалмас үшін орталықтағы ғана емес, өз үйіңіздің маңындағы мерекеден де хабардар болсын деп, тегін дәм тартылатын жерлерді топтап қойдық.

Астана алаңы (Ескі алаң)

Қашан бару керек: 21 және 22 наурыз — сағат 11:00-ден 22:00-ге дейін. 

Бұл — қаланың басты аренасы. Мұнда роботтардан бастап әзірбайжандық өнер жұлдыздарына дейін — бәрі болады. 21 наурызда Қазақстан эстрадасының ең жарық жұлдыздары өнер көрсететін ауқымды концерт өтеді, сонымен қатар алаңда алты түрлі киіз үй тігіледі. Соның бірінде роботтар турникке тартылып жатса, екіншісінде сізге сықырлаған қар дауысы естілетін виртуал Шымбұлақты көрсетеді (не үшін деп сұрамаңыздар). 

Не болады: шыны керек, мұнда тамақ жеу мүмкіндігі 50/50. Бұл адам ең көп жиналатын жер, бәсеке деген сұмдық болмақ. Күріш пен көже бұйырмаса да, көңіл көтеріп қайтасыз.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Абай алаңы мен Республика сарайы

Қашан бару керек: 21 наурыз (12:00–22:00), 22 наурыз (11:00–21:30). 

Алаңда түркі әлемінің көрме-жәрмеңкесі өтеді. Риштанның өзбек керамикасына, тәжік сюзанесіне немесе түрік кілемдеріне көз тойдырып қайтуға болады. Музыкалық әуендерге этно-ансамбльдер мен Kyle Ruh сияқты заманауи орындаушылар мойнында. 

Не болады: Абай алаңында әдетте ресми делегациялар мен қонақтар көп болады, сондықтан «тегін дәм» мұнда жүйелірек таратылады, десе де қазанға күріш салынбай тұрып-ақ кезек түзіліп қояды. 

Біз қаланың әр түкпірін жақсы білеміз

Алматының тегін жерлері

Сауда орындарына гайд

Алматының кәуаптары-ай! Дәмді етті қайдан жейміз?

Арбат пен Панфилов көшесі

Қашан бару керек: 21–23 наурыз — 11:00-ден 19:00-ге дейін, KitapFest — 10:00-ден 18:00-ге дейін. 

Арбатта «КітапФест-2026» кітап фестивалі, ал Панфилов көшесінде Dream Light жарық шоуы, робо-диджейдің өнері мен халықтық караоке өтеді. 23 наурызға дейін сіздерді қуыршақ спектакльдері мен этно-көрмелер күтеді. 

Не болады: Жұрт Панфилов көшесіне тегін тамақ іздеп бармайды. Мұнда эстетикақұмар, суретке түскісі келген және кітап іздеген жұрт ағылады. Бірақ айналадағы кафелердің көптігін ескерсек, қарныңыз ашпайды. Тегін палау алу мүмкіндігі өте төмен, десе де караоке-баттл кезінде бір бауырсақ бұйырып қалар.

Аудандардағы алаңдар

Қашан бару керек: негізінен сағат 11:00-ден 16:00-ге дейін.

Орталыққа барғыңыз келмесе, өз ауданыңызда да біраз қызық күтіп тұр. Дәстүрлі жоралғылар, жергілікті ұжымдардың концерті, алтыбақан мен спорттық жарыстар өтеді. Асықпай, аптықпай, Наурызды көзтаныс кісілермен тойлап қайтыңыз.

Қайда және қашан (негізінен 21 наурыз):

• Алатау ауданы: Almaty Arena (11:00–16:30).
• Алмалы ауданы: Ганди паркі (12:00–16:00).
• Әуезов ауданы: Сайран (Төле би жағынан кіресіз, 11:00–16:30).
• Бостандық ауданы: Тұңғыш Президент саябағы (21-22 наурыз, 13:00–16:00).
• Жетісу ауданы: Ипподром (11:00–17:00).
• Медеу ауданы: Пушкин көшесі (11:00–15:00).
• Түрксіб ауданы: Сейфуллин паркі (10:00–16:00).
• Наурызбай ауданы: №221 мектеп (11:00–16:30). 

Не болады: Күріш жеп, көше ішу мүмкіндігі мұнда мол сияқты! Тек басталуына 30–40 минут қалғанда (10:30-ға қарай) келіп, позицияңызды белгілеп қойыңыз және тәрелкеңіз дайын тұрсын. Ең қызу тартыс Президент саябағы мен Сайранда өтуі мүмкін. Бірнеше қазанға кезекке тұру үшін достарыңыз бен туыстарыңызды ерте барыңыз.

Тегін астан дәметкенде мынаны ұмытпаңыз

• Көлік: Орталыққа жетудің жалғыз жолы — метро, өйткені орталық көшелердің көбі жабылады, ал көлік қоятын жер тапқан қиын болмақ.
• «Өз қасығыңды ала кел» принципі: Мереке қызған шақта пластик қасыққа талас күшті болмақ. Өз қасығыңызды (тіпті тәрелкеңізді де) ала келсеңіз, ешкімге қарап қалмайсыз әрі оныңыз көктемде экологияға танытқан зор қамқорлығыңыз болмақ.
• 11:30 ережесі: Тамақ тарату әдетте тал түсте басталады. Пысықтар жақсы орындарды 30-40 минут бұрын иеленіп қояды.
• Киім үлгісі: Оңай жуылатын әрі кір көтеретін киім киіңіз. Күріш мен көжеден қалатын дақтарға дайын болыңыз. Қазанның күйесі жұқпаса болды әйтеуір.

Наурыз бірлік пен татулық мерекесі екенін ұмытпаңыз. Аспазға айтылған бір ауыз жылы сөз сіздің порцияңыздағы еттің мөлшерін 20-30%-ға арттыруы мүмкін (бұл болжамға көз жеткізуді ұмытпаңыз). Кезекті бұзбай, ешкімді итермей, әдеп сақтап тұрыңыз. Палау мен көже бәріне жетеді. Ас болсын!