Көктемде көретін жерлер: Маңғыстаудағы қызғалдақ, Жапониядағы сакура мен арзан Түркия
Демалыс кезінде барып-келе салатын жерлер.
Қазақстанда көктемде демалысқа қарық боламыз. Наурызда Халықаралық әйелдер күніне орай — екі күн, Наурызда тағы бес күн демаламыз. Ал мамырда демалыс тіпті 14 күнге жетеді. Сондықтан еңбек демалысына өтініш жазбай-ақ, саяхатты жоспарлай беруге болады.
Көктемде қай жерде теңізге түсуге болады?
Сізге керегі күнге қыздырынып, жылы теңізге шомылу болса, көктем — мұндайға ең қолайлы мезгіл. Біздің тізімдегі елдерде бұл уақытта су жып-жылы болып тұрады, ал аптап ыстық әлі бастала қоймайды.
Египет
Виза: Синай мөрін Шарм-эш-Шейхке келген кезде әуежайда тегін алуға болады (15 күнге дейін). Басқа қалаларға бару үшін виза қажет — оны алдын ала елшілік арқылы немесе онлайн рәсімдеу керек.
Қалай жетуге болады: Алматы мен Астанадан Шарм-эш-Шейхке тікелей рейстер бар.
Наурыз бен сәуірде мұнда күн қызуы жеткілікті: еркін күнге күйюге болады, бірақ жаздағыдай қапырық әлі бастала қоймайды. Үй ішімен баратындарға Хургаданы ұсынамыз: теңізге түскенге ыңғайлы жайпақ жағалау бар, ал балаларды аниматорларға сеніп тапсырып, өзіңіз алаңсыз демалып, күнге қыздырынуға мүмкіндік туады. Іздеп келгеніңіз дайвинг болса, онда жағалаудан-ақ басталатын маржан рифтерімен әйгілі Шарм-эш-Шейхті таңдаған жөн.
Студенттер мен үнемді саяхатты ұнататындар Дахабқа барса болады. Мұндағы атмосфера мүлде бөлек: қымбат желілік қонақүйлердің орнына кең кемпингтер, теңіз жағасындағы коворкингтер мен виндсёрфинг мектептері бар.
БАӘ
Виза: 30 күнге дейін қажет емес.
Қалай жетуге болады: Алматыдан Дубай, Әбу-Даби және Шарджаға тікелей рейстер бар. Астанадан, Шымкенттен және Ақтаудан — тек Дубайға ұшуға болады.
Көктемде Әмірліктерде туристік маусым қыза түседі. Сәуірде ауа райы әлі де жайлы: қала ішінде еркін серуендеуге, Әбу-Дабидегі Лувр залдарын аралауға, Бурдж-Халифаға шығып, аптапқа ұрынбай панораманы тамашалауға болады. Баламен саяхаттайтын отбасылар үшін де бұл қолайлы бағыт: аквапарктерге, Legoland пен Warner Bros World ойын-сауық парктеріне баруға болады, ал Парсы шығанағындағы су көктемде-ақ жылып үлгереді.
Егер бюджет шектеулі болса, Дубайдың қақ ортасында тұру міндетті емес. Рас-эль-Хайма немесе Аджман әмірліктеріндегі қонақүйлерді қарастыруға болады. Мұнда жағажайлар кең әрі таза, ал тұратын жерді жалдау Дубаймен салыстырғанда арзандау. Сапалы әрі тыныш демалысты қалайтын, бірақ ара-тұра сауда орталығына барып-қайтуды жоспарлағандар үшін бұл — тиімді таңдау.
Тайланд
Виза: 30 күнге дейін қажет емес. TDAC көші-қон картасын онлайн толтыру міндетті.
Қалай жетуге болады: Алматыдан Пхукетке және Бангкокке тікелей рейстер бар, Астанадан тек Пхукетке ұшады.
Көктемгі Тайланд — күншуақ пен балғын тропикалық жемістер елі. Қарбалас мегаполис ырғағын, әлемдік жұлдыздардың концерттерін және алып сауда орталықтарын ұнатсаңыз, Бангкокті таңдаңыз. Қашықтан жұмыс істейтіндерге де қала ыңғайлы: мұнда ноутбукпен отырып жұмыс істеуге болатын стильді коворкингтер мен кофеханалар көп, ал кешке Каосан-роудтағы той-думанға қосыла кетуге болады.
Жағажайда тыныш демалғыңыз келсе, Ко Ланта секілді шағын аралдарға барған дұрыс. Адам аз, құмы аппақ әрі таза, дайвинг мектептері жақсы дамыған — су астына сүңгуді осы жерде меңгеруге болады. Ал Пхукет пен Паттайя — әмбебап бағыттар: теңіздегі демалысты шопингпен және аралдарға экскурсиялармен қатар ұштастыруға мүмкіндік бар.
Вьетнам
Виза: 30 күнге дейін қажет емес.
Қалай жетуге болады: Алматы мен Астанадан Нячангке және Фукуок аралына тікелей рейстер (тұрақты және чартерлік) бар.
Фукуок аралы — жұптар мен балалы отбасыларға өте жайлы жер. Мұнда желден ық, тынық шығанақтар бар, толқын қатты емес, ал заманауи қонақүйлер жоғары деңгейдегі қызмет ұсынады. Көктемде аралда теңіз тынық боп тұрады: еркін шомылып, жағажайдың дәл өзінде жаңа ауланған теңіз өнімдерінен дәм татуға мүмкіндік бар.
Нячанг белсенді демалысты ұнататындарға көбірек ұнайды. Мұнда жергілікті кафелерде қолжетімді бағамен тамақтанып, балшықты емдік қайнарларға барып немесе бір күнді VinWonders паркінде өткізуге болады.
Шри-Ланка
Виза: электронды рұқсатты (ETA) онлайн рәсімдеу қажет.
Қалай жетуге болады: Қазақстаннан тікелей рейс жоқ, бірақ БАӘ немесе Стамбұл арқылы ұшуға болады.
Бұл бағыт — Вьетнам не Таиландпен таңғалмайтындар үшін. Дегенмен демалыстың қандай түрін қалайтыныңызды алдын ала айқындап алған жөн. Көктемде Шри-Ланканың солтүстік жағалауы (Джафна, Тринкомалли) тынығырақ: жаңбыр жаумайды, толқын аз, киттерді бақылау турларына шығуға мүмкіндік бар. Ал оңтүстікте керісінше — жиі күн жауады, шомылу қауіпті, бірақ серфингпен айналысатындарға толқын жақсы, әрі серф-мектептердің бағасы қолжетімді.
Аралдың ішкі бөлігіне кемі екі күн арнаған дұрыс: Нувара-Элиядағы шай плантациялары мен Сигирия жартасы көктемде ерекше құлпырады — күн салқын, табиғаты тұмса. Егер пойызбен жолға шықсаңыз, әлемдегі ең көркем бағыттардың бірі саналатын теміржол желісімен жүріп өтесіз.
Мальдив аралдары
Виза: 30 күнге дейін келген кезде тегін беріледі.
Қалай жетуге болады: Алматыдан Мале қаласына тікелей рейс бар.
Көктемде Мальдивте жаңбыр маусымы басталар алдында күн жайлы болып тұрады. 15 сәуір — Қозы Көрпеш пен Баян Сұлу күні. Егер ұсыныс жасауды жоспарлап отырған болсаңыз немесе қарбаластан бірер уақыт алыс кеткіңіз келсе, аралға баратын бұдан қолайлы мезгіл жоқ. Наурыз–сәуірде мұхит мейлінше тынық, суы мөлдір — маржандарды анық көруге болады.
Демалысқа міндетті түрде ондаған миллион жұмсаудың қажеті жоқ. Танымалдығы төмендеу атолдарды таңдауға болады — мысалы, Хулхумале немесе Маафуши. Хулхумалеге әуежайдан көпір арқылы кәдімгі таксимен небәрі 5 долларға (шамамен 2 500 теңге) жетесіз. Мұнда жағажайдың бірінші желісіндегі гестхаустарда тұрып, PastaMania секілді жергілікті кафелерде таңғы ас ішуге (балық қосылған пиццаны міндетті түрде жеп көріңіз), хош иісті колдбрю мен круассаннан дәм татуға болады. Негізгі көңіл көтеру түрі — снорклинг турлары: 90–100 долларға (44 000–50 000 теңге) қайықпен аралдарға апарып, скаттармен бірге жүзуге мүмкіндік береді. Тек жергілікті дресс-кодты ескеріңіз: қоғамдық жағажайларда суға жейде киіп түскен дұрыс, ал бикини кию үшін арнайы белгіленген «bikini beach» аймақтарын таңдаңыз.
Көктемде саяхаттағанға таптырмас елдер
Жағажайдағы демалыс қызық болмаса, бағытыңызды Еуропа мен Шығыс Азияға бұрған жөн. Бұл өңірлерде көктем — серуендеуге, фестивальдерге қатысуға және жайлы ауа райында қалаларды асықпай аралауға ең қолайлы кезең.
Франция
Виза: Шенген визасы қажет.
Қалай жетуге болады: тікелей рейс жоқ, бірақ Стамбұл арқылы қысқа аялдамамен жетуге болады.
Сәуірде Париж жылып, құлпыра бастайды: Люксембург бағы мен Тюильри саябағында гүлдер қауыз жарады, Монмартрға көше музыканттары қайта оралады. Эйфель мұнарасының маңында багет, ірімшік пен құлпынай алып, шағын пикник ұйымдастыруға болады — көктемде Марс алаңында осылай жайғасып отыруға күн әбден жайлы. Бұл бағыт жұптарға, өнерсүйер қауымға (Моне мен Дега туындыларын көру үшін Орсе музейіне соқпай кетпеңіз) және мансардалы терезелер аясында суретке түсуді армандайтын құрбылар компаниясына лайық.
Көп саяхатшының көздеп келетіні — Диснейленд. Ол Париж орталығынан RER A электр пойызымен шамамен 40 минуттық жерде орналасқан. Көктемде ол жер тамаша боп тұрады: жазда парк аумағы тым ысып кетеді, ал аттракциондарға кезек бірнеше сағатқа созылады. Мұнда «Кариб теңізінің қарақшылары» көріністері арқылы қайықпен жүзіп өтуге, Пиноккионың үйіндегі қуыршақтар шоуын тамашалауға немесе Индиана Джонстың «Қауіп ғибадатханасындағы» жұмбағын шешуге болады. Кезек күту уақытын бақылау үшін парктің мобильді қосымшасын жүктеп алған жөн және кешке дейін қалып, Ұйқыдағы ару сарайындағы отшашу мен проекциялық шоуды міндетті түрде көріңіз.
Испания
Виза: Шенген визасы қажет.
Қалай жетуге болады: тікелей рейс жоқ, бірақ Стамбұл немесе Баку арқылы ұшуға болады.
Жайлы күн райында еркін серуендегіңіз келсе, Севильяға не Гранадаға барыңыз. Сәуірде мұнда әйгілі Севилья жәрмеңкесі (Feria de Abril) өтеді: қала тұрғындары ұлттық киім киіп, көшелермен ат жеккен арбалар жүреді, апельсин ағаштары гүлге оранады. Баламен саяхаттайтын отбасыларға Валенсия қолайлы: жергілікті Биопарк пен Өнер және ғылым қалашығы ауқымымен таңғалдырады, ал кең жағалаулар велосипед тепкенге өте ыңғайлы.
Көктемде Барселонада да күн жылынып үлгереді: террасаларда сангрия ішіп отыруға болады, бірақ тамыздағыдай турист көп емес. Саграда Фамилия соборының әр бөлшегін асықпай тамашалап, саябақта пикник жасауға мүмкіндік бар. Егер теңіз жағасында демаламын десеңіз, Канар аралдарына (мысалы, Тенерифе) билет алыңыз. Бұл кезде күнге күйіп, тіпті суға шомылуға да болады, ал баспана бағасы қыс пен жаз маусымымен салыстырғанда едәуір төмен.
Сербия
Виза: 30 күнге дейін қажет емес.
Қалай жетуге болады: Астанадан Белградқа тікелей рейс бар немесе Стамбұл арқылы ұшуға болады.
Көктемде Белград ерекше құлпырады: сәуірден бастап қала жасыл желекке оранып, Дорчол ауданындағы көше террасалары адамға тола бастайды. Ғимараттардағы контраст ұнайтындар үшін бұл бағыт таптырмас: Жаңа Белградтағы бруталистік сәулет Косанчичев венацтың тар, тас төселген көшелерімен қатар өрілген. Күндіз Калемегдан саябағында серуендеп, Дунайды тамашалауға болады, ал кешке су үстіндегі кемелерде орналасқан барлар мен клубтарға баруға мүмкіндік бар. Міндетті түрде плескавица (алып котлета) жеп көріп, Дунай бойындағы ең дәмді балық ұсынылатын австро-венгр рухы сақталған Земун ауданына соғыңыз.
Егер Белград тым қарбалас көрінсе, Нови-Садқа барыңыз. Көктемде мұнда Синагогадан Дунай саябағына дейінгі орталық көшелерде сағаттап қыдыруға болады. Барахолкаларды ұнатсаңыз, сенбі күні таңертең «Найлон» базарына соққаныңыз жөн — мұнда винтаж бұйымдарды өте арзан бағамен табуға болады.
Жапония
Виза: алдын ала елшілік арқылы рәсімдеу қажет.
Қалай жетуге болады: тікелей рейс жоқ, бірақ Куала-Лумпур немесе Қытай арқылы ұшуға болады.
Көктемгі басты бағыттардың бірі — сакура гүлдейтін Жапония. Есте ұстайтын маңызды жайт: сакура кесте бойынша емес, табиғат ырғағымен гүлдейді. Гүлдеу толқыны (Sakura Zensen) елдің оңтүстігінен солтүстігіне қарай жылжиды. Жаңылмас үшін JMC немесе Weathernews сайттарындағы болжамдарды бақылаңыз. Токиода гүлдеу шарықтау шегі әдетте наурыздың соңына тура келеді, ал Тохоку аймағында — сәуірдің екінші жартысында болады. Егер астанаға келгенде ағаштар әлі гүл ашпаған болса, JR Pass алып, жылдам пойызбен оңтүстікке қарай жол тартуға болады.
Айтпақшы, Жапонияға қаражат жетпесе, гүлдеген өрік бақтарын көруге болатын қолжетімді нұсқа бар — Баткен. Наурыздың соңы мен сәуірдің ортасы аралығында Баткен облысындағы Жаны-Бақ ауылында он гектар өрік бағы ақ гүлге оранады. Бұл жерге тіпті көлікпен де жетуге болады.
Сакураның соңынан жүгірмей, тыныштық іздейтіндер үшін де көктемде өзге локациялар бар. Аояма зиратына барыңыз — бұл бірнеше ғасыр бойы өсіп тұрған ағаштары бар, ерекше күтімі бар, турист аз келетін тыныш саябақ. Ал сиқыр әлемін ұнататындар Warner Bros. Studio Tour Tokyo (Хәрри Поттер әлемі) билеттерін алдын ала брондағаны дұрыс.
Оңтүстік Корея
Виза: 30 күнге дейін қажет емес, бірақ K-ETA электронды рұқсатын алдын ала рәсімдеу міндетті.
Қалай жетуге болады: Алматы мен Астанадан Сеулге тікелей рейстер бар.
Сакураны көргісі келетін, бірақ Жапониядағыдай қымбатқа ұрынғысы келмейтіндерге осы бағытты ұсынамыз. Кореяда да сакура шамамен сол мезгілде гүлдейді, алайда сұраныс әлдеқайда төмен. Наурызда суық жел соғып тұруы мүмкін, сондықтан қабаттап киінген дұрыс, ал сәуірдің ортасына қарай қала гүлге бөленеді. Баламен келгенге де ыңғайлы: метро станцияларында лифтілер бар, ал музейлерде (мысалы, Ұлттық этнографиялық музейде) ана мен балаға арналған жақсы жабдықталған бөлмелер қарастырылған.
Қаланың қарбаласынан табиғатқа қашқысы келетіндер Чеджу аралына барсын. Көктемде мұнда ашық сары рапс алқаптары гүлдеп, көгілдір мұхит аясында ерекше көрініс береді. Көлік жалға алуды жоспарласаңыз, халықаралық жүргізуші куәлігі қажет екенін ескеріңіз, кәдімгі куәлік жарамайды.
Нидерланд
Виза: Шенген визасы қажет.
Қалай жетуге болады: тікелей рейс жоқ, бірақ Стамбұл немесе Франкфурт арқылы ұшуға болады.
Көктемгі Нидерланд ең алдымен — әлемдегі ең үлкен гүл саябағы саналатын Кёкенхоф. 2026 жылы ол 19 наурыз бен 10 мамыр аралығында ашық болады, алайда баруға ең қолайлы кезең — сәуірдің ортасынан мамырдың алғашқы күндеріне дейін. Дәл осы уақытта Лиссе маңындағы қызғалдақ алқаптары көз жетпес, сан түсті кілемге айналады. Саябақта лабиринттер мен балалар алаңдары бар, ал ересектер фермерлік алқаптарды бойлай, көкжиекке дейін созылған қызғалдақтардың арасымен қайық не велосипед жалға алып серуендей алады.
Сәуірде Нидерландта Король күні (27 сәуір) атап өтіледі — ұлттық бірлік пен ынтымақ мерекесі. Бұл күні тұрғындар патша әулетіне құрмет ретінде қызғылт-сары түсті киім киеді. Жылына бір рет, дәл осы күні Нидерландта көшеде арнайы лицензиясыз әрі салықсыз сауда жасауға рұқсат етіледі. Сувенирлерді арзан бағаға табуға болады, бірақ көше тағамы мен алкогольге келгенде абай болған жөн.
Ел ішінде көктемде көретін жерлер
Виза рәсімдеп, алысқа ұшып кетуге аяғыңыз тартпай тұрса, ел ішіндегі бағыттарды таңдауға болады. Әсіресе көктемде оңтүстікте өрік гүлдеп, табиғат құлпырып тұрады.
Түркістан
Наурызда мұнда күн райы бірқалыпты жылынады, ал Ұлыстың ұлы күні қала елдегі басты мерекелік орталыққа айналады. Қожа Ахмет Ясауи кесенесінің маңына этноауылдар тігіліп, айналада наурыз көже дайындалады, ал «Керуен-сарайда» қайықтар шеруі мен бәйге секілді ауқымды қойылымдар өтеді.
Алматы мен Астанаға қарағанда Түркістанға көктем ертерек келеді: сәуірдің ортасына қарай көне ескерткіштерді қоршаған бақтар жайқалып, гүлге оранады. Қала отбасылық демалысқа қолайлы — заманауи қонақүйге жайғасып, тарихи киелі орындарды асықпай аралауға болады. Оның үстіне Наурыз қарсаңында Қазақстан бойынша қосымша пойыздар қатынайды, сондай-ақ Алматыдан шығып, Түркістан, Ташкент, Самарқан және Душанбені жалғайтын арнайы Jibek Joly туристік бағыты іске қосылады.
Маңғыстау
Наурыз бен сәуірде Бозжыраның жартастары арасында еркін серуендеген қолайлы болса, мамырдың алғашқы жартысында дала құлпырып шыға келеді. Қарақия ойпаты мен тау етектері қып-қызыл қызғалдаққа оранады. Бұл көрініс небәрі 7–10 күнге ғана созылады, сондықтан дәл осы сәтті түсіру үшін мұнда елдің түкпір-түкпірінен фотографтар жиналады.
Көктемде Тұзбайыр сорына да барған жөн: жаңбырдан кейін ол жер жүзіндегі алып айнадай күйге еніп, аспан мен жер астасып кетеді. Бұл маусымда аптап әлі басталмайды, сондықтан жерасты мешіттерін және Торыштағы шарлар аңғарын күн өтуден қорықпай, емін-еркін аралауға болады.
Алматы облысы
Наурызда тауға шығуға асықпаған жөн: күннің күрт жылып-салқындауына байланысты қар көшкіні мен тас құлау қаупі күшейеді. Оның орнына Іле өзені бойындағы Таңбалы-Тас шатқалына барып қайтқан дұрыс. Өзен жағасы шатыр тіккен демалушыларға толмай тұрғанда, салқын ауада көне петроглифтер мен жартас суреттерін еркін тамашалай аласыз. Айтпақшы, мамырда Қапшағай тасжолы бойынан да гүлдеген көкнәр алқаптарын кездестіруге болады.
Мамырда Шарын шатқалына да соққан жөн. Бұл кезде аңғар жасыл реңкке еніп, күннің қызуы әлі қатты болмайды. Дегенмен қауіпсіздік ережесін ұмытпаңыз: мамыр — тау етектері мен далада кенелер белсенді болатын кезең. Серуенге шыққанда ашық түсті, жабық киім киіп, репеллент қолданған дұрыс.
Аз ақшамен саяхаттап қайтатын елдер
Үнемді, бірақ әсерлі демалыс іздейтіндер үшін баға мен сапа үйлесімі жақсы, өзін әлдеқашан дәлелдеген бағыттар бар.
Грузия
Виза: бір жылға дейін қажет емес.
Қалай жетуге болады: Алматы, Шымкент және Ақтаудан Тбилиси мен Кутаисиге тікелей рейстер бар. Батумиге Астана мен Алматыдан маусымдық тікелей рейстер ашылады.
Гүлге оранған Тбилиси ме, әлде тып-тыныш Батуми ме — қайсысы жаныңызға жақын болса, соны таңдаңыз. Тбилисиді қаласаңыз, көктем — Сололаки ауданында серуендеп, «Фабрикада» жаздағыдай қаптаған туристсіз еркін отыруға ең қолайлы уақыт. Бір күнді Мцхетаға немесе Сигнахиға арнаңыз: көктемде Алазан жазығы ашықхаттай құлпырып тұрады.
Көктемде Батумиге де бір қарап қойған жөн. Жазда қала теңізі лайланып, бағасы шарықтап, адамға толып кетсе, наурыз–сәуірде мұнда турист аз. Шомылуға әлі ерте, бірақ «Али мен Нино» мүсінінің жанынан жағалаумен қыдырып, Ботаника бағын аралап, дәл осы қалада дүниеге келген аджар хачапуридің дәмін татып көруге болады.
Түркия
Виза: 90 күнге дейін қажет емес.
Қалай жетуге болады: Алматы мен Астанадан Стамбұл, Анталья және Анкараға тікелей рейстер бар. Шымкент, Ақтау және Атыраудан — Стамбұл мен Антальяға ұшуға болады.
Сәуірде Стамбұл қызғалдақ фестивалінің арқасында нағыз гүлге көмкерілген қалаға айналады: Эмирган мен Гүлхане саябақтарында миллиондаған қызғалдақ бүр жарады. Бұл — Босфор бойымен ұзақ серуендеп, сауда орталықтарында кезексіз шопинг жасауға қолайлы кезең. Бағыт белсенді саяхатшыларға және мешіттер мен сарайларды аптапсыз, адам нөпірінсіз аралағысы келетін тарих әуесқойларына лайық.
Теңіз ауасын аңсасаңыз, Антальяны немесе Қашты таңдаңыз. Наурыз–сәуірде теңізге шомылуға тек шыныққандар барады, бірақ бес жұлдызды қонақүйлердің көбінде жылытылатын бассейндер жұмыс істейді. Антальядағы көктем — жазбен салыстырғанда 2–3 есе арзан, сапалы отбасылық демалыс уақыты. Ал жаяу серуенді ұнататындарға көктемде жасыл желек пен гүлге оранатын Ликия соқпағы ұнары сөзсіз.
Өзбекстан
Виза: қажет емес.
Қалай жетуге болады: Алматы мен Астанадан Ташкентке тікелей рейстер бар, ал Шымкенттен пойызбен немесе автобуспен жетуге болады.
Наурыз сайын қазақстандықтар жиі таңдайтын бағыттың бірі — Өзбекстан. Себебі көктем — Самарқан, Бұхара мен Хиуаны аралауға ең қолайлы кезең. Наурыз мейрамы мұнда ерекше ауқымда өтеді: көшелерде бидайдың өнген дәнінен жасалатын сумалак қайнатып, жәрмеңке мен фестивальдер ұйымдастырады. Регистан мен Шахи-Зинданы шаң мен аптапсыз, ең көркем шағында тамашалауға мүмкіндік бар.
Қалалар арасында қатынаудың ең ыңғайлы жолы — «Афрасиаб» жоғары жылдамдықты пойыздары. Мереке күндері сұраныс артатындықтан, билетті көктемде алдын ала брондаған жөн.
Әзербайжан
Виза: қажет емес.
Қалай жетуге болады: Ақтау, Алматы және Астанадан Бакуге тікелей рейстер бар.
Көктемгі Баку желді әрі салқын болуы мүмкін, бірақ соның арқасында турист азайып, билет бағасы да төмендейді. Наурыз айында мұнда да Новруз Байрам кең көлемде атап өтіледі: Примор бульвары ұлттық билер мен алаулар жағылған үлкен мерекелік алаңға айналады.
Ескі қаланы аралап, «Бриллиантты қол» түсірілген көшеге соғып, Каспий жағалауындағы Пламенные башниге қарсы орналасқан ашық террасалардың бірінде кешкі ас ішуге болады.
Астанаға ғана емес, көктемде Гобустанға немесе балшық жанартауларына да барған жөн. Бұл маусымда шаң аз, аптап әлі басталмай тұрады. Батыс Қазақстан тұрғындары үшін Баку — демалыс күндеріне ыңғайлы бағыт: Ақтаудан небәрі 50 минутта ұшып жетуге болады, бағасы да қолжетімді.
Саяхатшыға айтар ақыл-кеңесіміз
Көктемгі сапарыңызды ұсақ-түйек кедергілер не аяқ астынан жауған жаңбыр бұзбас үшін бірер кеңес әзірледік. Осы қарапайым қағидалар демалысты жайлы өткізуге әрі бюджеттің басым бөлігін үнемдеуге көмектеседі.
Наурызға билетті ертерек алыңыз. Наурыздағы ұзақ демалыс — Қазақстанда ең қызу маусым. Шетелге ұшуды немесе туыстарға баруды жоспарласаңыз, билетті қазірден брондаған дұрыс.
Жаңбыр маусымын ескеріңіз. Көктемде кейбір теңіз бағыттарында жауын-шашын жиілейді. Сапар алдында күн райын нақтылап алған жөн.
Жылы киініңіз. Көктем — ең алдамшы мезгіл, әсіресе наурызда. Күндіз +20 °C-қа дейін жылып, кешке +10 °C-қа дейін салқындауы мүмкін. Футболка + худи + жеңіл күртеше сияқты жылы киім — ең тиімді шешім.
Сақтандыру полисін тексеріңіз. 2026 жылдан бастап көп ел туристерден міндетті медициналық сақтандыру талап ете бастайды. Виза қажет болмаса да, шекарада полисті сұрауы мүмкін.
Көлік карталарын пайдаланыңыз. Сеул, Токио және Стамбұлда бір реттік билеттер қымбат әрі ыңғайсыз. Әуежайдан-ақ көлік картасын алып қойған дұрыс. Метро мен ауысымдарда уақыт пен қаражат үнемдейсіз.
Жергілікті дәстүрге құрметпен қараңыз. Жапонияда сакура бұтақтарын сілкімеңіз, Киотода гейшалармен рұқсатсыз суретке түспеңіз. БАӘ, Мальдив пен Египетте дресс-код талаптарын сақтаңыз. Биыл Рамазан 19 наурызға дейін жалғасады — бұл мұсылман елдері үшін ерекше кезең, сондықтан туристік нысандардың жұмыс кестесі өзгеруі мүмкін.
