Испания визасын алу: талаптары қандай, төлемі қанша?
Мөп-мөлдір теңіз жағасын, Испаниядан ғана табасың.
Барселонаның көздің жауын алар көшелерінде қыдырып, Мадридтің жәдігерге бай музейлерін аралау — әр саяхатшының арманы. Алайда Испанияға жолға шықпас бұрын сапар мақсатына қарай виза алуыңыз керек. Ол үшін биыл қандай құжаттар тапсырасыз, жарна ретінде қанша төлейсіз және өтінішті қалай толтырған дұрыс — осы және өзге сауалдарға мақалада егжей-тегжейлі жауап береміз.
Испанияға виза қажет пе?
Иә, Қазақстан азаматтарына Испанияға барарда виза алуы керек. Испания Шенген аймағына кіреді. Ал Қазақстан азаматтары бұл аймаққа кіру үшін виза алуы керек. Визаның бірнеше түрі бар. Сапар мақсатына қарай тапсырасыз.
- Қысқа мерзімді Шенген визасы (C түрі) — Испания мен Шенген елдерінде 180 күн ішінде 90 күнге дейін еркін жүруге мүмкіндік береді. Көбіне саяхатқа, қысқа сапарлар мен іссапарларға беріледі, бірақ жұмыс істеуге болмайды.
- Ұзақ мерзімді виза (D түрі) — 90 күннен ұзақ тұру үшін беріледі және кейін тұруға рұқсат алуға негіз болады. Әдетте оқу, жұмыс немесе отбасыға қосылу сияқты мақсаттарға рәсімделеді. Университетке не тіл курсына оқуға бара жатқандар да осы виза түрін рәсімдейді.
- Жұмыс визасы — Испанияда ресми жұмыс істеу үшін қажет және алдын ала еңбек шарты болуға тиіс. Рұқсатты әдетте жұмыс беруші рәсімдейді.
- Транзиттік виза (A түрі) — Испания әуежайы арқылы үшінші елге ұшып өтетін кей жолаушыларға керек. Елге кіруге рұқсат бермейді, тек транзит аймағында жүре аласыз.
Құжатты қалай тапсырасыз?
1-қадам. Қабылдауға жазылу
Алдымен BLS International ресми сайты арқылы онлайн тіркеліп, құжат тапсыратын күн мен уақытты таңдайсыз. Жазылуды ертерек жасаған дұрыс, әйтпесе бос слоттар тез толып қалады.
2-қадам. Құжаттарды жинау
Негізгі құжаттар: төлқұжат, толтырылған анкета, фотосурет, қаржы жағдайын растайтын анықтамалар, жұмыс немесе оқу орнынан анықтама. Сонымен қатар сапар мақсатын дәлелдейтін құжаттар (қонақүй броні, шақыру хаты, билет броні) қажет.
3-қадам. Құжат тапсыру және биометрия
Белгіленген күні визалық орталыққа барып, құжаттарды тапсырасыз. Сол жерде саусақ іздері алынып, фото түсіріледі (егер соңғы 59 айда тапсырмаған болсаңыз).
4-қадам. Виза алымын төлеу
Консулдық алым ересектерге — 90 еуро, 6–11 жас аралығындағы балаларға — 45 еуро, ал 6 жасқа дейінгі балаларға тегін, алайда визалық орталықтың (мысалы, BLS International) қызмет көрсету ақысы бөлек төленеді.
5-қадам. Визаны алу
Өтініш қаралғаннан кейін дайын визаны визалық орталықтан алып кетуге немесе курьер арқылы алдыртуға болады. Қарау мерзімі көбіне 15 күнге дейін, бірақ маусымға қарай мерзімі ұзаруы мүмкін.
Қандай құжаттар қажет?
Құжат | Талаптар |
|---|---|
Паспорт | Кемінде 2 бос беті болуы және сапар аяқталғаннан кейін кемінде 3 ай жарамды болуға тиіс. Сонымен қатар паспорт соңғы 10 жыл ішінде берілген болуы керек (маңызды талап). |
Студент не зейнеткер | Студенттер — оқу орнынан анықтама, зейнеткерлер — зейнетақы куәлігі немесе анықтама ұсынады. Кей жағдайда қаржылық кепілдік (спонсорлық хат) талап етілуі мүмкін. |
Визаға өтініш анкетасы | Толық әрі дұрыс толтырылған, міндетті түрде қол қойылған. Анкета әдетте Шенген аймағы елдері үшін бір үлгіде болады. |
Фотосурет | 3.5×4.5 см, ақ фонда, кейінгі 6 айда түсірілген сурет керек. |
Жеке куәлік көшірмесі | ҚР азаматы екенін растайтын құжаттың көшірмесі |
Қаржылық жағдайды растау | Банктік анықтама немесе шоттағы ақша айналымының көшірмесі (кейінгі 3–6 ай), жеткілікті қаражат болуы қажет. |
Жұмыс орнынан анықтама | Лауазымы, жалақысы және демалыс мерзімі көрсетілуі керек. Құжатта компанияның деректері мен қолы/мөрі болуға тиіс. |
Сапар мақсатын растайтын құжаттар | Қонақүй броні не шақыру хаты. Қосымша ретінде маршрут (сапар жоспары) сұралуы мүмкін. |
Ұшақ билеттерін брондау | Бару және қайту билеттерінің броні. Толықтай сатып алу міндетті емес — көбіне брон жеткілікті. |
Медициналық сақтандыру | Кемінде 30 000 еуро төлемді өтеп беретін түрі керек. Сақтандыру бүкіл сапар мерзімін және Шенген аймағы елдерін түгел қамтуға тиіс. |
Құжат | Талаптар |
|---|---|
Паспорт | Кемінде 2 бос беті болуы және сапар аяқталғаннан кейін кемінде 3 ай жарамды болуға тиіс. Сонымен қатар паспорт соңғы 10 жыл ішінде берілген болуы керек (маңызды талап). |
Студент не зейнеткер | Студенттер — оқу орнынан анықтама, зейнеткерлер — зейнетақы куәлігі немесе анықтама ұсынады. Кей жағдайда қаржылық кепілдік (спонсорлық хат) талап етілуі мүмкін. |
Визаға өтініш анкетасы | Толық әрі дұрыс толтырылған, міндетті түрде қол қойылған. Анкета әдетте Шенген аймағы елдері үшін бір үлгіде болады. |
Фотосурет | 3.5×4.5 см, ақ фонда, кейінгі 6 айда түсірілген сурет керек. |
Жеке куәлік көшірмесі | ҚР азаматы екенін растайтын құжаттың көшірмесі |
Қаржылық жағдайды растау | Банктік анықтама немесе шоттағы ақша айналымының көшірмесі (кейінгі 3–6 ай), жеткілікті қаражат болуы қажет. |
Жұмыс орнынан анықтама | Лауазымы, жалақысы және демалыс мерзімі көрсетілуі керек. Құжатта компанияның деректері мен қолы/мөрі болуға тиіс. |
Сапар мақсатын растайтын құжаттар | Қонақүй броні не шақыру хаты. Қосымша ретінде маршрут (сапар жоспары) сұралуы мүмкін. |
Ұшақ билеттерін брондау | Бару және қайту билеттерінің броні. Толықтай сатып алу міндетті емес — көбіне брон жеткілікті. |
Медициналық сақтандыру | Кемінде 30 000 еуро төлемді өтеп беретін түрі керек. Сақтандыру бүкіл сапар мерзімін және Шенген аймағы елдерін түгел қамтуға тиіс. |
Визаға тапсырарда анкетаны қалай толтыру керек?
Испания визасына арналған анкета ағылшын не испан тілінде толтырылады. Ондағы барлық мәлімет төлқұжаттағы ақпаратпен сәйкес келуі керек: аты-жөні, туған күні, паспорт нөмірі, сапар мерзімі және байланыс деректері қате жазылмауға тиіс. Сапар мақсатын да нақты көрсету қажет: туризм, оқу, іссапар немесе қонаққа бара жатқаныңызды көрсетіңіз. Анкета соңына міндетті түрде қол қойылады.
Испания визасы қанша уақытта дайын болады?
Шенген визасы әдетте 5–15 жұмыс күні ішінде қаралады. Бірақ өтініш көп түсетін маусымда немесе қосымша тексеру қажет болса, бұл мерзім ұзаруы мүмкін. Сондықтан құжаттарды сапарға дейін алдын ала тапсырған дұрыс.
Испания визасы қанша уақытқа беріледі?
Туристік Шенген визасы Испания мен басқа Шенген елдерінде 180 күн ішінде 90 күнге дейін болуға мүмкіндік береді. Бірақ визаның нақты мерзімі өтініш берушінің визалық тарихына, сапар мақсатына және құжаттардың сапасына байланысты. Кейде виза тек сапар күндеріне беріледі, ал бұрын Шенген визаларын дұрыс пайдаланған саяхатшыларға көп реттік виза (multivisa) берілуі мүмкін.
Неліктен виза бермей қоюы мүмкін?
Визадан бас тартудың жиі себептері — құжаттардың толық болмауы, анкетадағы қате немесе сәйкес келмейтін мәлімет, қаржы жағдайының жеткілікті дәлелденбеуі және сапар мақсатының түсініксіз болуы. Бұрын визалық режимді бұзу немесе жалған ақпарат ұсыну да шешімге әсер етуі мүмкін. Сондықтан барлық құжатты мұқият тексеріп, ақпаратты нақты әрі дұрыс көрсеткен маңызды.
Визаға қай жерде тапсыруға болады?
Қазақстан азаматтары Испания визасына өтінішті арнайы визалық орталықтар арқылы тапсыра алады. Әдетте құжаттар BLS International компаниясы арқылы қабылданады, бұл компания Испанияға түскен визалық өтініштерін қабылдаумен айналысады. Визалық орталықтар Астана және Алматы қалаларында орналасқан. Өтініш беруші құжат тапсырардан бұрын алдын ала жазылуға тиіс.
Жиі қойылатын сұрақтар
Испания визасымен Еуропаның басқа елдеріне баруға бола ма?
Иә, әрине. Испания визасымен бүкіл Шенген аймағын аралай аласыз. Бірақ сапарыңыздың көбі Испанияда өтсін не Еуропаға алғаш рет осы ел арқылы кіргеніңіз жөн. Бұл ережені сақтамасаңыз, шекарада сұрақтың астына алып, тіпті елге кіргізбей кері қайтаруы мүмкін. Ең басты қауіп — Испанияға мүлдем бармағаныңыз анықталса, келесі жолы Шенген визасын алу өте қиын болады. Сондықтан виза тарихыңызды бұзбау үшін сапарды Испаниядан бастаған немесе уақытыңыздың көбін сонда өткізген жөн.
Билет пен қонақүйге алдын ала төлеп тастауым керек пе?
Жоқ. Құжат тапсыру үшін билет пен қонақүйдің брондалғанын көрсетсеңіз болды. Виза алғанша ақшасын толық төлемей-ақ қойыңыз, сонда артық шығынға ұшырамайсыз.
Құжаттарды өзім барып тапсыруым керек пе?
Иә, виза орталығына өзіңіз барыңыз. Себебі онда саусақ іздерін тапсырып, биометриялық суретке түсуіңіз қажет. Бұл деректер базада 5 жыл бойы сақталады.
Банк шотында қанша ақша болуы керек?
Испания қаржы мәселесіне өте мұқият қарайды. 2026 жылғы талап бойынша, шотыңызда әр күнге кемінде 118 еуро (шамамен 60-65 мың теңге) болсын. Мысалы, 10 күндік демалысқа баратын болсаңыз, шотыңызда кемі 650 000 теңге жатқаны жөн.
