Ұлыбритания визасын алайық: қанша теңге мен қандай құжат керек?

Британия — бұл тек Лондонның ашық хаттардағы әдемі көріністері ғана емес. Жұрт мұнда Шотландияның айбынды бекіністерін көруге, Премьер-лига матчтарын тамашалауға және британдық рок-топтардың дүркіреген концерттерін сезінуге де келеді. Бірақ шабаданды жинамас бұрын, виза мәселесін шешіп алу керек. Бұл квестен қалай өтуге болатынын айтып берейік.

Қазақстан азаматтары Ұлыбританияға виза алуы керек?

Иә, алуға тиіс. Саяхат, оқу, жұмыс не тұрақты тұру — Қазақстан азаматы қандай мақсатта бара жатса да, алдын ала тиісті виза түріне өтініш беруі керек.

Ұлыбритания визаларының қандай түрлері бар?

Ұлыбританияға барарда сапар мақсатына қарай мынадай бірнеше түрлі визаның біріне өтініш тапсыруыңыз керек:

• Туристік виза (Standard Visitor Visa) — демалыс, туыстарға қонаққа бару, іссапар не қысқа мерзімді оқу үшін берілетін ең кең таралған виза.
• Студенттік виза (Student Visa) — Ұлыбританиядағы оқу орындарына түскен талапкерлерге арналған.
• Жұмыс визасы (Work Visa) — британдық жұмыс берушіден ұсыныс алған шетел азаматтарына беріледі.
• Ұзақ мерзімді визалар — отбасымен табысу, ұзақ уақыт жұмыс істеу не тұрақты тұру мақсатында рәсімделеді.

2026 жылы Ұлыбритания визасын қалай алуға болады? Егжей-тегжей нұсқаулық

1-қадам. Құжаттарды дайындау

Визаға өтініш бермес бұрын қажет құжаттарды дайындаңыз. Әдетте мынадай құжаттар керек:

• паспорт, оның мерзімі сапар аяғына дейін толық жетуі керек;
• қаржылық жағдайды растайтын құжаттар;
• сапар мақсатын растайтын құжаттар (қонақүй броны, шақыру хат, оқу орнының немесе жұмыс берушінің құжаттары);
• қажет болған жағдайда құжаттардың ағылшын тіліндегі аудармасы.

2-қадам. GOV.UK сайтында сауалнама толтыру

Ұлыбритания визасына өтініш ресми GOV.UK порталында онлайн түрде толтырылады. Сауалнамада жеке мәліметтер, сапар мақсаты мен жоспарланған сапар туралы ақпарат көрсетіледі.

3-қадам. Виза алымын төлеу

Сауалнаманы толтырғаннан кейін виза алымы онлайн төленеді. Алым мөлшері таңдалған виза түрі мен оның мерзіміне байланысты.

Мысалы, туристік визаның құны мерзіміне байланысты әртүрлі:

4-қадам. Виза орталығына жазылу

Өтініш беруші биометриялық деректерді тапсыру үшін VFS виза орталығына бару уақытын алдын ала осы сілтеме арқылы брондауы қажет. Кездесу күні онлайн жүйе арқылы таңдалады.

5-қадам. Биометриялық деректерді тапсыру

Белгіленген күні виза орталығына барып, саусақ ізін және цифрлық фотосуретті тапсырасыз. Кейбір жағдайларда қосымша құжаттар сұратылуы мүмкін.

6-қадам. Шешімді күту

Барлық рәсім аяқталғаннан кейін өтініш қаралуға жіберіледі. Қарау мерзімі виза түріне және өтініштер көптігіне байланысты өзгеруі мүмкін. Шешім дайын болған кезде өтініш берушіге хабарлама жіберіледі.

Осы тақырыпта басқа не бар?

Лондон бойынша жолнұсқа: аңызға айналған көрнекті орындар, тегін мұражайлар және жасырын көшелер

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Ұлыбритания визасына тапсырарда қандай құжаттар қажет?

Визаға тапсырарда негізгі, қаржылық және қосымша құжаттар пакетін дайындау керек. Керек құжаттар сапар мақсатына және виза түріне байланысты өзгеруі мүмкін.

Негізгі құжаттар:

• паспорт. Оның мерзімі сапар аяғына дейін толық жетуі керек;
• онлайн өтініш формасы (GOV.UK арқылы);
• биометриялық деректер (саусақ ізі, фото);
• сапар мақсатын түсіндіретін қысқаша ақпарат.

Қаржылық құжаттар:

• банк шотының үзінді көшірмесі, кейінгі 6 айдағы тұрақты қаржы айналымы көрінгені маңызды, ірі сомалардың бірден түсуі сияқты күмәнді операциялар болмауы керек, себебі тұрақты әрі сенімді шот тарихы виза алу ықтималдығын арттырады;
• тұрақты табысты растайтын құжаттар;
• қажет болса, демеуші құжаттары.

Қосымша құжаттар:

Сапар мақсатына қарай қосымша құжаттар сұралуы мүмкін:

• жұмыс орнынан анықтама;
• егер студент болсаңыз, оқу орнының анықтамасы;
• қонақүй броны;
• ұшақ билеттері (брондар жарайды);
• шақыру хаты (Ұлыбританияға жай турист ретінде бара жатпаған болсаңыз).

Ұлыбритания визасына анкетаны қалай толтырамыз?

Анкета шамамен осылай көрінеді.

Визаға өтініш GOV.UK сайтында онлайн түрде толтырылады. Алдымен виза түрін таңдап, жеке мәліметтеріңізді (аты-жөні, паспорт деректері, сапар мақсаты, қаржы жағдайы) енгізесіз. Барлық ақпарат ағылшын тілінде және дәл болғаны маңызды, қате не шала мәлімет виза шешіміне кері әсер етуі мүмкін.

Ұлыбритания визасы қанша уақытта дайын болады?

Орта есеппен шешім 3–6 апта ішінде шығады. Кей жағдайда, әсіресе құжаттарды қосымша тексеру қажет болса, бұл мерзім ұзаруы мүмкін.

Тағы қайда бару үшін сізге виза қажет болады?

Италия

Испания

АҚШ

Оңтүстік Корея

Жапония

Үндістан

Ұлыбритания визасы қанша уақытқа беріледі?

Туристік виза әдетте 6 айға беріледі. Сонымен қатар 2, 5 және 10 жылдық көп реттік визалар да бар, бірақ олар сапар тарихына және өтініш берушінің жағдайына байланысты беріледі.

Ұлыбритания визасын қайда рәсімдеуге болады?

Қазақстан азаматтары визаны онлайн рәсімдеп, биометрия тапсыру үшін ресми виза орталықтарына (Visa Application Centre) жүгінеді. Олар әдетте Алматы, Астана сияқты ірі қалаларда орналасқан.

Неліктен Ұлыбритания визасын беруден бас тартуы мүмкін?

Виза беруден бас тартуға әдетте мынадай себептер әсер етеді:  

• табыстың жеткілікті болмауы не қаржылай тұрақсыздық;
• анкетадағы қателер;
• туған елмен байланыстың әлсіз болуы (жұмыс, оқу не отбасы жоқтығы);
• иммиграциялық тәуекел күдігі.

Осы тақырыпта басқа не бар?

Неліктен сізге виза бермеуі мүмкін және ондай жағдайда не істеуге болады

Виза алу мүмкіндігін қалай арттыруға болады?

Барлық құжатты дәл толтырып, дұрыс тапсыру, тұрақты табысты көрсету, сапар мақсатын нақты түсіндіру және анкетадағы ақпараттың құжаттармен сәйкес болғаны виза алу мүмкіндігін арттырады.

Виза беруден бір рет бас тартса, қайта өтініш беруге бола ма?

Иә, болады. Бірақ алдымен бас тарту себебін түзетіп, жетпей қалған не қате кеткен ақпаратты толықтыру қажет. Жаңа өтініш қатесіз болсын, құжаттарды толықтыра түссеңіз де құба-құп.

Жиі қойылатын сұрақтар (FAQ)

Ұлыбритания визасын алу қиын ба?

Қиындық деңгейі сіздің құжаттарыңызға және қаржы жағдайыңызға байланысты. Егер барлық ақпарат толық әрі дәл болса, виза алу   мүмкіндігі жоғары болады.

Шенген визасымен Англияға баруға бола ма?

Жоқ, Шенген визасы Ұлыбританияға жарамайды. Ұлыбританияға бөлек виза қажет.

Ұлыбритания визасымен қай елдерге баруға болады?

Ұлыбритания визасы тек Ұлыбритания аумағына ғана жарамды. Ол басқа Еуропа елдеріне кіруге құқық бермейді.

Шотта қанша ақша болуы керек?

Нақты бекітілген сома жоқ, бірақ сіз сапар шығындарын (жол, тұру, тамақ) өзіңіз төлей алатыныңызды дәлелдеуіңіз керек. Жалпы ұсынылатын есеп бойынша күніне шамамен 100–150 фунт стерлинг қажет (бір адамға, ұшақ билеті мен қонақүй ақысынан бөлек).

Визаға тапсырарда ұшақ билеті мен қонақүй броны міндетті түрде керек пе?

Міндетті емес, бірақ олар сапар жоспарыңызды растауға көмектеседі және шешімге оң әсер етуі мүмкін.

Ресми жұмысы жоқ адам өтініш бере ала ма?

Иә, болады. Бірақ қаржылық жағдайды дәлелдейтін қосымша құжаттар қажет болуы мүмкін.

Саяхат тарихы болмаса, виза алуға бола ма?

Иә, бірақ саяхат тарихы аз болса, консул қосымша құжаттар сұратуы мүмкін. Сондықтан құжаттарды барынша толық ұсынған маңызды.