АҚШ визасын қалай алуға болады? Оған қанша ақша кетеді? Бәрін түсіндіреміз
АҚШ визасы қанша тұрады, оны қанша уақыт күтесіз және неге көп адамға виза бермей жатады?
АҚШ визасын өтінішті бірінші тапсырғаннан-ақ алу — көп саяхатшының арманы. Кейінгі жылдары Америка миграциялық саясатын қатаңдатып жіберді. Қазақстан азаматтарына иммиграциялық виза беру белгісіз мерзімге шектелді, ал грин-карта лотереясы уақытша тоқтатылды. Бірақ туристік визаға әлі де тапсыруға болады. Оған қандай құжаттар керегін, виза алу мүмкіндігін қалай арттыруға болатынын осы мақалада егжей-тегжейлі түсіндіреміз.
АҚШ визасының қандай түрлері бар?
Қазақстан азаматтары Америка Құрама Штаттарына бару үшін міндетті түрде виза алуы керек. Виза алдын ала рәсімделеді және негізгі құжаттың бірі саналады.
Америка заңнамасында визаның 20-дан астам түрі бар. Олар негізгі екі топқа бөлінеді: иммиграциялық (тұрақты көшіп баратындарға) және иммиграциялық емес виза (туристер, студенттер мен уақытша жұмысшыларға).
- B1/B2 (Visitor Visa): Ең танымал түрі. B1 — іскерлік сапарларға (конференция, келіссөз), B2 — туризм, емделу және достарыңызға баруға беріледі.
- F1 — Студенттік виза: Университетте немесе тіл курстарында оқитындарға арналған.
- J1 — Алмасу бағдарламалары: Мысалы, Work and Travel қатысушыларына беріледі.
- C1/D — Транзиттік: Кеме не ұшақ экипажы мүшелеріне арналған.
Сонымен әуелі не істеймін?
1-қадам. DS-160 анкетасын толтыру
Алдымен CEAC сайтына кіріп, DS-160 анкетасын толтырыңыз. Онда жеке мәліметтер, сапар мақсаты, жұмыс орны, білім деңгейі мен қаржылық жағдайыңыз туралы деректерді көрсетіңіз. Әлеуметтік желідегі парақтарыңызды да жазыңыз. Оларды да тексеруі мүмкін.
14 жастан асқан бала сауалнаманы өзі толтырады. Одан кіші балаларға ата-анасы толтыруы керек. Отбасының әр мүшесіне сауалнама жеке-жеке толтырылады.
Анкетаны толтырып болған соң, штрих-коды бар растау парағы (confirmation page) шығады. Оны басып шығарып алыңыз — бұл келесі кезеңге өтуге керек болады.
2-қадам. Консулдық алымды төлеңіз
Келесі қадам — визалық алымды төлеу. 2026 жылы туристік виза үшін консулдық төлем — шамамен 185 USD (шамамен 87 256 KZT). Төлемді онлайн не банк арқылы жасауға болады. Төлемнен кейін сіз сұхбаттасу кезеңіне жазылу мүмкіндігіне ие боласыз.
3-қадам. Сұхбаттасуға жазылу
Төлем расталған соң, АҚШ елшілігінің жүйесі арқылы сұхбатқа жазыласыз. Сұхбат Астанадағы АҚШ елшілігі не Алматыдағы АҚШ консулдығында өтеді. Жазылу кезінде бос уақыттарды таңдап, өзіңізге ыңғайлы күнді белгілейсіз.
4-қадам. Сұхбаттан өту
Бұл — ең маңызды кезең. Сұхбат кезінде консул сізге бірнеше сұрақ қояды: сапар мақсаты, жұмыс, қаржылық жағдай мен Қазақстанға қайта оралу жоспары туралы сөз болуы мүмкін. Сұхбаттың негізгі мақсаты — сіздің сапардан кейін елге оралатыныңызға көз жеткізу. Сондықтан нақты, қысқа әрі шынайы жауап беріңіз. Сұхбат бес минуттай ғана болады.
5-қадам. Паспортты алу
Егер визаңыз мақұлданса, консулдық паспортыңызды алып қалады. Визаны бастырып, бірнеше күннен кейін қайтарып береді. Паспортты курьер арқылы немесе белгіленген жерден алып кетуге болады. Виза әдетте бірнеше жылға беріледі, бірақ мерзімі консул шешіміне байланысты болады.
АҚШ визасына қандай құжаттар қажет?
АҚШ визасын алу үшін нақты құжаттар пакетін дұрыс дайындаған өте маңызды. Консулдық сұрап қалса деп, қосымша құжаттарды да ала барыңыз.
Құжат түрі | Қаншалықты керек? | Қойылатын талаптар |
|---|---|---|
Паспорт | Міндетті түрде | Паспортыңызда бос беттер болуы керек және жарамдылық мерзімі өтіп кетпеген болуға тиіс. Қайтар күннен кейін кемінде тағы 6 айға жарамды болғаны жөн. |
DS-160 анкетасы толтырылғанын растайтын қағаз | Міндетті түрде | Қағаздағы штрих-код анық көрініп тұруы керек. |
Жазылғаныңызды растайтын қағаз | Міндетті түрде | Сұхбат күні мен датасы жазылған қағаз. |
5х5 см фото | Міндетті түрде | Фото анкетаға электронды түрде жүктеледі, бірақ бір дана қағаз нұсқасын өзіңізбен бірге алып жүрген дұрыс. Фото 6 айдан ескі болмауға тиіс: егер анкетаны жібергеннен кейін біраз уақыт күтуге тура келсе, сұхбатқа жаңа басып шығарылған фото апаруыңыз керек болады. |
Жұмыс орнынан анықтама | Болғаны дұрыс | Компанияның ресми бланкісінде жұмыс өтіліңіз жазылып тұруы керек. |
Банк шотының көшірме қағазы | Болғаны дұрыс | Бұл құжат сапарға жеткілікті қаражатыңыз бар екенін және кейінгі 3–6 айдағы қаржы айналымын көрсетеді. Осы арқылы АҚШ-та демалуға мүмкіндігіңіз барын дәлелдейсіз. |
Неке қию туралы, балаларыңыздың туу туралы куәліктер, Қазақстанда жылжымайтын мүлік бар екені туралы анықтама | Болғаны дұрыс | Бұл құжаттар елге оралатыныңызды айғақтауы мүмкін. |
Паспорт
Қаншалықты керек?
Міндетті түрде
Қойылатын талаптар
Паспортыңызда бос беттер болуы керек және жарамдылық мерзімі өтіп кетпеген болуға тиіс. Қайтар күннен кейін кемінде тағы 6 айға жарамды болғаны жөн.
DS-160 анкетасы толтырылғанын растайтын қағаз
Қаншалықты керек?
Міндетті түрде
Қойылатын талаптар
Қағаздағы штрих-код анық көрініп тұруы керек.
Жазылғаныңызды растайтын қағаз
Қаншалықты керек?
Міндетті түрде
Қойылатын талаптар
Сұхбат күні мен датасы жазылған қағаз.
5х5 см фото
Қаншалықты керек?
Міндетті түрде
Қойылатын талаптар
Фото анкетаға электронды түрде жүктеледі, бірақ бір дана қағаз нұсқасын өзіңізбен бірге алып жүрген дұрыс. Фото 6 айдан ескі болмауға тиіс: егер анкетаны жібергеннен кейін біраз уақыт күтуге тура келсе, сұхбатқа жаңа басып шығарылған фото апаруыңыз керек болады.
Жұмыс орнынан анықтама
Қаншалықты керек?
Болғаны дұрыс
Қойылатын талаптар
Компанияның ресми бланкісінде жұмыс өтіліңіз жазылып тұруы керек.
Банк шотының көшірме қағазы
Қаншалықты керек?
Болғаны дұрыс
Қойылатын талаптар
Бұл құжат сапарға жеткілікті қаражатыңыз бар екенін және кейінгі 3–6 айдағы қаржы айналымын көрсетеді. Осы арқылы АҚШ-та демалуға мүмкіндігіңіз барын дәлелдейсіз.
Неке қию туралы, балаларыңыздың туу туралы куәліктер, Қазақстанда жылжымайтын мүлік бар екені туралы анықтама
Қаншалықты керек?
Болғаны дұрыс
Қойылатын талаптар
Бұл құжаттар елге оралатыныңызды айғақтауы мүмкін.
Виза берердегі сұхбат қалай өтеді?
Қазақстанда визалық қызметтер Астанадағы АҚШ елшілігі (Қошқарбаев көшесі, 3) мен Алматыдағы АҚШ-тың бас консулдығында (Самал-2 шағынауданы, 97-үй) көрсетіледі. Сұхбат консулдық қызметкерімен бетпе-бет өтеді. Сұхбат кезінде сізден мынаны сұрауы мүмкін:
- Сапар мақсаты (туризм, туыстарды көру және т. б.)
- Қазақстанға оралу жоспары (жұмыс, отбасы, оқу)
- Қаржылық жағдайыңыз (саяхатқа кететін шығындар)
- Бұрынғы шетел сапарлары туралы ақпарат
Сұхбаттың мақсаты — сіздің АҚШ-қа уақытша барғыңыз келетініне, елге қайта оралатындығыңызға көз жеткізу. Бұл сұрақтарға қысқа, шынайы әрі нақты жауап беріңіз. Ағылшыныңыз нашар болса, саспаңыз, консулдықтағылар қазақша да, орысша да түсінуі мүмкін.
Сұхбат кезінде АҚШ-қа не үшін бармақсыз, саяхат қанша уақытқа жоспарланған, баратын шығыныңызды кім төлейді, Қазақстанда жұмыс істейсіз бе не оқисыз ба, бұрын басқа елдерге барғансыз ба деп сұрауы мүмкін.
Виза тапсыруға қанша кетеді?
АҚШ-қа баруды жоспарласаңыз, жалпы бюджетіңізді шамамен былай есептеуге болады:
- Консулдық алым (MRV Fee): 185 USD (шамамен 87 256 KZT). Бұл — міндетті төлем.
- Фото: шамамен 2 000 теңге.
- Көмек көрсететін агенттіктердің қызметі (міндетті емес): 30 000–100 000 теңге аралығында. Егер мұндай алыс сапарға алғаш рет шыққалы отырсаңыз немесе бұрын виза алмаған болсаңыз, осындай қызметтерге жүгінуге болады. Себебі АҚШ визасын алғашқы өтініштен-ақ алу тәжірибелі саяхатшыларға да оңай емес.
- Паспортты жеткізу: Алматы мен Астанадан тыс қалаларда тұратындарға үшін — шамамен 3 500 теңге.
Бірақ егер біреу сізге қомақты ақшаға «100% кепілдікпен виза алып береміз» десе, бұл — алаяқтар. Ақырғы шешімді тек консул қабылдайды. Айтпақшы, сізге виза берілмесе, консулдық төлем қайтарылмайды. Бұл төлем — өтінішті қарау үшін алынатын қызмет ақысы.
АҚШ визасын алу мерзімдері
Сұхбатқа дейінгі күту
Биыл Алматыдағы консулдықта B1/B2 визасына сұхбатқа жазылу күту уақыты аз емес. Бұл уақытты жоспарлағанда сапар күнінен кемінде 6–9 ай бұрын өтініш берген дұрыс, өйткені бос уақыттарды тез алып тастайды.
Айтпақшы, биыл АҚШ-та өтетін футболдан әлем чемпионатына баратын болсаңыз, сұхбаттарға жазыларда басымдық беріледі.
Визаның мақұлданғанын қалай білуге болады?
Сұхбаттан кейін виза мақұлданса, паспорт пен виза бірнеше күн ішінде дайын болады (әдетте 3–7 жұмыс күні, бірақ бұл уақыт консулдықтың жүктемесіне қарай өзгеруі мүмкін). Сұхбаттан кейін өтінішіңіздің статусын АҚШ мемлекеттік департаментінің ресми сайтында DS-160 не паспорт нөмірі арқылы тексеруге болады.
АҚШ визасы бойынша шешім көбіне сұхбат аяқталғаннан кейін бірден белгілі болады. Консул сізге виза берілетінін, қосымша тексеріс қажет екенін не сізге виза берілмейтінін сол жерде-ақ хабарлайды.
Виза мақұлданса, паспортыңыз консулдықта қалып, виза жапсыру процесіне жіберіледі. Кейін сіз онлайн жүйе арқылы өтінішіңіздің статусын тексере аласыз. Әдетте виза дайын болғаны туралы SMS немесе email хабарлама келеді, содан кейін паспортты курьер арқылы немесе белгіленген жерден барып, алып кетесіз.
АҚШ визасы қанша уақытқа беріледі?
Қазақстан азаматтарына B1/B2 туристік визасы әдетте 1 жылдан 10 жылға дейін беріледі. Ең жиі кездесетін нұсқа — 10 жылдық көп реттік виза. Бұл сізге АҚШ-қа бірнеше рет баруға мүмкіндік береді, әр барған сайын елде болу мерзімі шекарада анықталады.
Дегенмен виза мерзімі әр адамның жағдайына байланысты жеке шешіледі. Консул сіздің құжаттарыңызға, жұмыс не оқу жағдайыңызға және сапар мақсатыңызға қарай шешім қабылдайды.
Мен АҚШ визасын 2017 жылы алдым, 10 жылға берді. Паспортымның мерзімі 2020 жылы аяқталды, визам күйіп кете ме деп уайымдадым. Сөйтсем мұндай жағдайда ХҚКО-ға өтініш жазып, ескі паспортты өзіңізде қалдыруға болады екен. Оны шетінен тесіп, өзіңізге қайтарады.
Неге виза бермей қоюы мүмкін?
АҚШ визасын бермеуінің ең жиі кездесетін себебі — сонда қалып қоя ма деген күдік. Консул сіздің Қазақстанға қайтып оралатыныңызға сенімді болмауы мүмкін.
Сондай-ақ қаржылық жағдай нашар әрі банк шотында күмәнді операциялар болуы, сапар мақсатының нақты емесі не DS-160 анкетасындағы қателер жүргені де виза бермеуге ілік болады. Кейде бұрынғы саяхат тарихының болмауы да әсер етеді, себебі консул сіздің халықаралық тәжірибеңізге де баға береді. Сұхбат кезінде сенімсіз не қарама-қайшы жауап берсеңіз де, Америкаға жібермей қоюы мүмкін.
Визаға қайта өтініш беруге бола ма?
Иә, болады. Оған арнайы күту мерзімі жоқ. Бастысы — қайта өтініш берген кезде бұрынғы қателіктерді түзету. Әйтпесе тағы да визадан қағыласыз.
Қазақстаннан АҚШ визасы туралы жиі қойылатын сұрақтар
Сұхбатсыз виза алуға бола ма?
Кей жағдайда бұрын АҚШ визасын алған адамдар оны жаңартқанда сұхбатсыз рәсімдей алады. Бірақ, бірінші рет виза алушылар үшін сұхбат міндетті болып табылады.
Маңызды: Сұхбатсыз визаны тек алдыңғы визасының мерзімі аяқталғаннан кейін 12 ай ішінде визасын жаңартатындар үшін және барлық шарттарды орындағандарға ғана арналған.
Жеке қатысусыз виза рәсімдеуге бола ма?
Жоқ, көп жағдайда АҚШ визасын алу үшін өтініш берушінің жеке өзі қатысуы керек. Бұл әсіресе бірінші рет өтініш берген адамдарға қатысты. Консул сізбен тікелей сұхбат жүргізеді.
Басқа елде визаға тапсыруға бола ма?
Иә, АҚШ визасын басқа елдердегі консулдықтарда да тапсыра аласыз. Бірақ бұл сол елдің ережесіне және сұхбатқа бос слоттардың болғанына байланысты.
