Лондон бойынша жолнұсқа: аңызға айналған көрнекті орындар, тегін мұражайлар және жасырын көшелер

Лондон мен үшін жай картадағы бір қала емес. Мен мұнда бір жыл өмір сүрдім. Сондай-ақ бұл мекен менің өмірімді түбегейлі өзгертті. Осында мен жарымды кездестірдім, және біз екеуміз бұл ғажайып қаланың әр бұрышын бірге зерттедік: Брик-Лейннің у-шу базарларынан бастап, Сохоның жайлы пабтарына дейін, ұлы саябақтардан бастап, уақыт тоқтап қалғандай көрінетін жасырын аула-қуыстарға дейін аралап шықтық.

Лондонның сұлулығын шын мәнінде сезініп, толық көріп шығу үшін бірнеше жыл қажет, ал турист ретінде келсеңіз, кем дегенде бес күн бөлген жөн. Әрине, үш күнде де үлгеруге болады, бірақ ол кезде сіз бір көрнекті жерден екіншісіне жүгіріп, дал боласыз. Сондықтан да бұл жолнұсқа бір аптаға жуық уақытқа арналған.

Сонымен, сіз Лондондасыз, жүгіңізді қалдырдыңыз, кроссовкаңызды киіп, телефоныңыз қуатталған. Марафонға дайынсыз ба? Керемет! Менің серіктерім орта есеппен күніне 25–30 мың қадам жасайды, егер баратын жер 30 минуттан жақын болса — жаяу жүре беруге болады. Кеттік! 

1 күн: барлық көрнекті орынды көріп үлгеруге арналған қарқынды күн

Бұл маршрут ең әйгілі орындарды қамтиды және елорда атмосферасын (аз да болса) сезінуге мүмкіндік береді.

Waterloo метросы 

Қай жерде тоқтасаңыз да, ең алдымен Waterloo метро станциясына барыңыз. Метросыз Лондон — сүт қосылмаған шай сияқты. Жол ақысын банк картасымен немесе Apple/Google Pay арқылы төлеңіз. Бұл ыңғайлы әрі өзіңізді жергілікті тұрғын сияқты сезіне аласыз. Орташа жол ақысы — 1-2 фунт. 

London Eye

Келесі кезекте — әйгілі шолу дөңгелегі. Ол үлкен, баяу қозғалады және Лондонды биіктен тамашалау үшін жарты сағатына £30 (шамамен 20 мың теңге) төлеу керек. Кезек? Әрине, бар! Бұл — Лондон ғой! Мен өзім оған бес рет мінгенмін, бірақ қазір қонақтар көріністен ләззат алып жатқанда, жай ғана қасындағы сүйікті орындыққа отырып демаламын. 

Шолу дөңгелегімен суретке алыстан түскен жөн, ал кезекте тұрмау үшін билеттерді онлайн сатып алуға болады.

Big Ben

Ары қарай Биг-Бенге қарай бет аламыз. Суретке түсу үшін ең жақсы жер — осы көпірдің асты. Егер туристердің қалың тобын көрсеңіз, кейінірек қайтып келгеніңіз дұрыс.

Биг-Бен көрінісімен қызыл телефон кабинасының жанында классикалық фото түсіруді ұмытпаңыз. Сонымен қатар осы жағалаудан London Eye-мен тамаша суреттер түсіруге болады. 

Westminster Abbey

Осыған жақын жерде Вестминстер аббаттығы орналасқан. Бұл британ монархтарын таққа отырғызатын орын. Кіру билеті £30 тұрады, келетін күн мен уақытты алдын ала таңдап, кіруді онлайн брондау керек. Егер сізді тарих пен сәулет қызықтырса, оны міндетті түрде көру керек. Мұнда барлық ағылшын монархы таққа отырғызылған. Мұндағы атмосфера өте әсерлі: осы ғажайып биік күмбездер мен витраждары бар готикалық залдармен серуендеп жүріп, осы қабырғалар мың жылға жуық уақытта нені көрмеді екен деп еріксіз ойға қаласыз. 

Buckingham Palace

Сарайға дейін жаяулатып, шамамен 20 минутта жетуге болды. Бұл жер әлі күнге дейін король резиденциясы, британ монархтары бірнеше ғасыр бойы осы жерде өмір сүріп келеді. Мұнда (егер сәті түссе) қарауыл ауысымын көре аласыз не өзіңізді патша отбасымен бірге балконда тұрғандай елестетуге болады. Жаз мезгілінде сарай келушілер үшін ашық, сол кезде ішке кіріп, корольдің тұрмысы қалай ұйымдастырылғанын көруге болады. Осылайша нағыз патшалық өмірге еніп, өзіңізді нағыз сарайға қонаққа келгендей сезінудің бірегей мүмкіндігі! Билетті егер алдын ала онлайн сатып алсаңыз, бағасы — £32. 

Piccadilly Circus

Сарайдан шығып, тағы 20 минуттай жүріп, Пикадилли алаңына жетеміз. Бұл Лондондағы Таймс-сквердің баламасы. Танымал билборд пен неонды жарнамалар сізді әсерлі кадрлар үшін күтіп тұр. 

Chinatown Gate

Чайна-таун қақпасынан өтіп, кеспе мен пекинше үйректің хош иістерін сезініңіз. Егер қарныңыз ашса, мұнда дәмді нәрсе міндетті түрде табылады. Мен Bun House деген жерді ұсына аламын. Бұл орын әртүрлі салма қосылған фирмалық бәліштерімен (бао) танымал. Ең танымалы — жұмыртқалы пісірілген крем қосылғаны (custard), бірақ шын айтсам, ол маған аса ұнамады. Егер сенімді нұсқасын жеп көргіңіз келсе, тауық еті қосылғанын таңдаңыз — ол әрқашан дәмді әрі қытайша баоны бірінші рет жейін деп тұрған адамға да ұнайды.

Leicester Square

Одан кейін Лестер-скверге шығамыз — бұл кино мен театрдың орталығы. Мұнда дәмханада отырып демалуға немесе M&M’s дүкеніне кіріп шығуға болады. Тәттіқұмар болмасаңыз да, сізге бұл алып дүкен, сан түрлі жарқын кәмпиттер, фотоаймақтар мен кәдесыйлар ұнайтыны сөзсіз — мұнда нағыз мерекелік атмосфера сезіледі!

Трафальгар алаңы

Мұнда сізді субұрқақтар, Нельсон колоннасы және камера ұстаған туристердің қалың шоғыры қарсы алады. Егер өнерді ұнатсаңыз, Ұлттық галереяға кіріп көріңіз (кіру тегін). Сонымен қатар керек болып қап жатса, жақын жерде Қазақстан елшілігі жақын орналасқан.  

BFI IMAX кинотеатры 

Егер аяқтарыңыз әлі қатты шаршамаса, Waterloo станциясына қайта барыңыз (жаяу 15–20 минут). Оның жанында BFI IMAX кинотеатры орналасқан, онда Ұлыбританиядағы ең үлкен экрандардың бірі бар. Билеттерді алдын ала брондаңыз да, күніңізді фильм көрумен аяқтаңыз.

Soho

Кешке Сохо — Лондондағы ең ерекше атмосферасы бар аудандардың бірі! Мұнда өмір қайнап жатыр: барлар, мейрамханалар, клубтар — бәрі көшедегі керемет энергиямен үйлесіп тұрады. Тар көшелермен серуендеп, жергілікті пабтарға кіріп көріңіз немесе жай ғана богемалық Лондонның ерекше рухынан ләззат алыңыз. Егер жеңіл тамақ немесе коктейль ішкіңіз келсе — бұл нағыз таптырмас орын.

The Coach & Horses, The Crown & Two Chairmen, The George Soho — бұлар танымал дәстүрлі пабтар, мұнда әрдайым көңілді, дабырлы әрі түрлі британдық сыра мен эльден дәм татып көруге болады. Міндетті түрде London Pride элін татып көріңіз.

2 күн: осы күні тарих туындылары мен ғажайып көріністер тоғысады

Егер бірінші күннен кейін әлі де жүре алатын күйде болсаңыз — құттықтаймын! Бүгін біз Лондонның тарихи және заманауи жауһарларын зерттеп, керемет көріністер мен дәмді тағамдардан ләззат аламыз. Ыңғайлы аяқ киім киіп, телефоныңызды зарядтап алыңыз — өте көп сурет түсіресіз!

St. Paul’s Cathedral

Күнді Әулие Павел соборынан бастаймыз. Бұл Лондонның ең танымал символы және әлемдегі ең ірі шіркеулердің бірі. Оның алып күмбезінің биіктігі 110 метрді (366 фут) құрайды, демек ол Римдегі Әулие Петр соборынан кейінгі әлемдегі екінші ең үлкен күмбез болып саналады.

Millennium Bridge

Одан кейін әйгілі «Wobbly Bridge» (Дірілдейтін көпір) арқылы серуендеңіз. Көпір Әулие Павел соборын Темза өзенінің оңтүстік жағалауымен байланыстырады. Бұл собор және өзен көрінісімен әдемі фото түсіруге арналған тамаша орын.

Borough Market

Келесі аялдама — Borough Market, нағыз гурмандарға арналған жұмақ. Мұнда 100-ден астам дүңгіршек, киоск пен фуд-трак бар, оларда балғын устрицалар мен ірімшіктерден бастап, экзотикалық дәмдеуіштерге дейін сатылады, сондай-ақ органикалық көкөністер мен әлемнің түкпір-түкпірінен келген тағамдардың да дәмін татуға болады.

The Shard

The View from The Shard бақылау алаңына көтеріліңіз (68–72-қабаттар). Бұл — Лондондағы ең зәулім ғимарат, ол жерден 360 градусқа керемет көріністер ашылады. Билет бағасы — £32, немесе жай ғана жоғарғы қабаттағы мейрамханадан орын брондап қоюға болады. Tower Bridge-та түсірілген фотолар керемет шығады. Егер бағасы қымбат болып көрінсе, Лондонда осындай көріністі тегін тамашалауға болатын орындар да бар.

The Shard маңында Tower Bridge-пен суретке түсуге өте қолайлы әдемі бір көше бар. Бұл жерді туристік деп айтуға бола қоймас, бірақ көпір мен Темзаның көрінісі ашықхаттағыдай әсем.

Tower of London

Tower Bridge маңында орналасқан Тауэр — Лондондағы мыңжылдық тарихы бар ең әйгілі көрнекті орындардың бірі. Ол 1070-жылдары Жаулап алушы Вильгельмнің бұйрығымен салынған және әр кезеңде қамал, король сарайы, түрме, монета сарайы мен тіпті хайуанаттар бағы ретінде қызмет еткен. Қазіргі уақытта бұл Лондондағы аз ғана ақылы мұражайлардың бірі — билет құны £35.80-ден басталады (шамамен 25 мың теңге).

Егер сіз тарихқа аса құмар болмасаңыз, бұл жерге соқпасаңыз да болады: Лондонда көруге болатын тамаша тегін мұражайлар жетерлік. Төменде бірнеше нұсқа келтірдік. 

Sky Garden

Sky Garden-ге барыңыз — бұл Walkie-Talkie ғимаратының 35-қабатында орналасқан тегін қоғамдық бақ. Билеттерді алдын ала (сапарға бірнеше ай қалғанда) брондап қойған дұрыс! Мұнда жасыл өсімдіктердің арасында Лондонның керемет көріністері ашылады. Иә, кіру тегін. 

30 St Mary Axe (The Gherkin)

Атақты «Қияр» ғимаратына (The Gherkin) барып көріңіз — бұл футуристік зәулім ғимарат Лондонның заманауи сәулет өнерінің символына айналған. Ішіне кіру қиын, негізі аса қажет те емес — ішінде қарапайым кеңселер орналасқан. Бірақ ғимараттың өзі ерекше: оның бірегей сәулеті сіздің фото жинағыңызда бірнеше суретке әбден лайық. Жай ғана сырттай тамашалап, естелікке бірнеше фото түсіріп алыңыз!

Horizon 22

Егер әлі де күшіңіз қалса, Horizon 22 алаңына барыңыз — бұл 22 Bishopsgate ғимаратының 58-қабатында орналасқан тегін бақылау алаңы. Бұл Лондонды тамашалауға арналған жаңа орындардың бірі, мұнда керемет көріністер ашылады. Ең бастысы — кіруді бірнеше ай бұрын брондап қойыңыз.

Liverpool Street Station

Маршруттың соңғы нүктесі — Liverpool Street станциясы. Мұнда демалып, кофе ішіп немесе вокзалдың сәулетін тамашалауға болады.

Күніңізді Galvin La Chapelle мейрамханасындағы кешкі аспен аяқтаңыз — бұл Michelin жұлдызын алған мейрамхана. Француз тағамдары, ләззат сыйлайтын ас пен бұрынғы шағын шіркеу ғимаратындағы керемет атмосфера кешіңізді ұмытылмас етеді. Ол Michelin жұлдызы бар ең қолжетімді мейрамханалардың бірі — үш тағамнан (стартер, негізгі тағам және десерт) тұратын кешкі ас мәзірі £55-тен (шамамен 38 мың теңге) басталады.

3 күн: аңызға айналған орындар мен жасыл саябақтардың үйлесіміндегі Лондон

Лондонда саяхаттың үшінші күні аңызға айналған орындарға, жасыл саябақтарға және ерекше атмосферасы бар аудандарға арналады. Аяқтарыңызды таңып алыңыз — бүгін нүктелер арасындағы қашықтық сәл ұзақтау, бірақ серуендеу қарқыны баяулау.

King’s Cross

Күніңізді King’s Cross St. Pancras вокзалына барудан бастаңыз — бұл Виктория дәуірінің сәулеттік жауһары. Бұл жер тек маңызды көлік торабы ғана емес, сонымен қатар ғимараттың асқақ сыртқы келбеті мен ішкі безендіруі де ерекше әсер қалдырады.

Platform 9¾ at King’s Cross Station

Поттерсүйерлер үшін міндетті аялдама — 9¾ платформасы. Мұнда сіз қабырғаға жартылай кіріп тұрған арбашаны көре аласыз және атақты белгінің алдында суретке түсе аласыз. Кәдесыйлар алу үшін Harry Potter дүкеніне кіріп шығуды ұмытпаңыз. Кезек әдетте ұзын-сонар, сондықтан суретті қоршаудың ар жағынан түсіруге тура келеді.

Granary Square

Granary Square-ға дейін серуендеп барыңыз — бұл King's Cross ауданындағы заманауи мәдени орталық. Мұнда жайлы дәмханалар, мейрамханалар және интерактивті субұрқақтар бар. Бұл орын Гарри Поттер арбасына ұзақ кезектен кейін демалып, өзіңізге келу үшін таптырмас мекен.

Camden Town

Атмосферасы ерекше Camden Town ауданына аттаныңыз — бұл Лондонның баламалы мәдениетінің орталығы. Мұнда бәрін табуға болатын (Camden Lock Market және Stables Market) базарларды аралап көріңіз: көше тағамдарынан бастап, винтажды киімдер мен ерекше кәдесыйларға дейін бар. Камдендегі көше тағамдары – нағыз гастрономиялық шытырман оқиға! Мұнда әлемнің түкпір-түкпірінен келген тағамдарды: азиялық кеспе мен малай рендангтарынан бастап мексикалық тако, Таяу Шығыстың кебабы және британдық йоркшир бурритосына дейін татып көруге болады. Бір базардан шықпай-ақ, түрлі елдердің тағамдарымен гастрономиялық саяхат жасау оңай — басты хош иістерге еріп, жаңа дәмдер ашыңыз! Тағамды дәл сол жерде, канал жағасына жайғасып, аяғыңызды суға салбыратып жеуге болады.

Abbey Road

Бұл көше Abbey Road Studios студиясымен танымал. Сондай-ақ 1969 жылдың қыркүйегінде The Beatles тобы атақты «Abbey Road» альбомын шығарды. Соның аңыз мұқабасы дәл осы көшеде түсірілген. Бүгінде бұл жерге күн сайын әлемнің түкпір-түкпірінен жанкүйерлер келіп, дәл сол жаяу жүргіншілер өткелінен өтіп, Instagram-ға немесе есте қалдыру үшін сол суретті қайталап, түсіреді.  

The Regent’s Park

Камденнің қарбаласынан кейін Лондондағы ең әдемі корольдік бақтардың бірі — Regent’s Park-та демалыңыз. Queen Mary’s Gardens гүлденген бақтарымен серуендеп, ZSL London Zoo хайуанаттар бағына кіріп көріңіз немесе Primrose Hill төбесіне көтеріліп, қаланың панорамалық көрінісін тамашалаңыз. 

The Sherlock Holmes Museum

Детектив жанрының жанкүйерлері үшін міндетті аялдама — Baker Street, 221B мекенжайындағы Шерлок Холмс мұражайы. Бұл үй-мұражай сізді Артур Конан Дойлдың кітаптарындағыдай интерьерлері бар виктория дәуіріне жетелейді. Билет бағасы £19 (шамамен 13 мың теңге). Егер барғыңыз келсе, билетті сол жерде сатып алуға болады.

Hyde Park

Күніңізді Лондондағы ең үлкен саябақтардың бірі — Hyde Park-тағы серуенмен аяқтаңыз. Мұнда әйгілі Speakers’ Corner-ды, ханшайым Диананың мемориалдық субұрқағын көре аласыз немесе жай ғана Serpentine көлінің көрінісінен ләззат ала аласыз. Уақытыңыз болса, қайық жалдап мініп көріңіз немесе саябақтағы дәмхананың бірінде кешкі ас ішіңіз. Егер әлі барып үлгермеген болмасаңыз, Oxford Street-ке шығып, сауда жасап қайтыңыз. 

4 күн: панорамалық көріністер мен мәдени ашулар – ерекше локациялар мен мұражайлар күні

Бұл күні сізді көптеген ерекше орын, панорамалық көріністер мен қызықты мұражайлар күтеді. Шынымды айтсам, мен мұражайлардың үлкен жанкүйері емеспін (тіпті Париждегі Лувр да ұнамаған), бірақ осы екі мұражай — шынымен де баруға тұрарлық орындар.

Westminster Pier и Greenwich Pier

Күнді Westminster Pier-ден Greenwich Pier-ге дейінгі Uber Boat паромымен саяхаттан бастаймыз. Бұл бір жерден екінші жерге жетудің ыңғайлы тәсілі ғана емес, сонымен қатар Темза өзенінің көріністерінен ләззат алуға тамаша мүмкіндік. Билет бағасы £11 (шамамен 7 500 теңге), ал жол шамамен бір сағатқа созылады. 

Prime Meridian мен Корольдік обсерватория 

Гринвичте Корольдік обсерваторияға барыңыз, сонда бір аяғыңыз шығыс жартышарда, ал екінші аяғыңыз батыс жартышарда нөлдік меридиан сызығының үстінде тұра аласыз. Обсерваторияға кіру бағасы £24 (шамамен 16 500 теңге). Маған бұл сәл қымбаттау сияқты, сондықтан егер сіз астрономияны жақсы көрмесеңіз, нөлдік меридианның бір бөлігін сыртынан тамашалауды ұсынамын. 

Greenwich Foot Tunnel

Обсерваторияны аралап болған соң, Темза өзеніне қарай түсіп, өзеннің астымен өтетін Greenwich Foot Tunnel арқылы жүріп өтіңіз. Ұзындығы 370 метрді құрайтын түнел Гринвичті Isle of Dogs ауданымен байланыстырады. Егер сіз бұрын-соңды өзеннің астымен жаяу жүріп көрмесеңіз, бұл ерекше тәжірибе болмақ. 

Canary Wharf

Түнелден шыққан соң, сіз Лондонның заманауи қаржы орталығы — футуристік сәулетімен әйгілі Canary Wharf ауданына тап боласыз. Мұнда аспанмен таласқан ғимараттардың арасында серуендеп, жергілікті саябақтарға кіріп көріңіз немесе сәнді дәмхананың бірінде жүрек жалғап алыңыз. 

The O2

Бұл Гринвич түбегінде орналасқан әлемдегі ең үлкен ареналардың бірі. Егер сізде қандай да бір концертке билет болса немесе Up at The O2 экскурсиясымен аренаның төбесіне көтеріліп, қаланың керемет көрінісін тамашалағыңыз келсе, бұл жерге баруға тұрарлық. Бағасы: £37 бастап (шамамен 25 мың теңге).

Natural History Museum

Келесі кезекте Оңтүстік Кенсингтонға қарай бағыт алып, ондағы атақты Табиғат тарихы мұражайына барамыз. Бұл мұражай динозаврлардың қаңқалары, Норе атты алып көк киттің қаңқасы және жанартау мен жер сілкіністері туралы интерактивті экспозицияларымен танымал. Кіру тегін.

The British Museum 

Бұл әлемдегі ең ірі мұражайлардың бірі. Мұнда бүкіл әлемнен жиналған артефактілер қойылған: мысырлық мумиялар, Розетта тасы, Парфенон мәрмәрлері және тағы басқалары. Кіру тегін, сондықтан бұл мұражайға бару міндетті деп айтуға болады. 

5 күн: шопинг үшін Oxford пен Bond Street-ке аттанамыз

Oxford Street — бұл ұзындығы 2,5 километрден асатын нағыз шопинг жұмағы. Мұнда әр талғам мен әр бюджетке сай келетін 300-ден астам дүкен мен бутик бар. Сіз мұнда ірі флагмандық дүкендерден (Selfridges, Marks & Spencer, John Lewis, House of Fraser) бастап, жаппай нарықтағы танымал брендтерді — Zara, H&M, Uniqlo, Primark, Nike, Adidas — таба аласыз.

Bond Street — люкс пен дизайнерлік брендтерді қалайтындар үшін мінсіз орын. Мұнда Chanel, Louis Vuitton, Burberry, Hermès, Cartier, Tiffany & Co, Jimmy Choo бутиктері және атақты Sotheby’s аукцион үйі орналасқан. 

Егер Лондонда көбірек уақыт өткізуге мүмкіндік болса — міндетті түрде пайдаланыңыз! Бұл қала көпқабатты әрі сан қырлы: әр бұрылыста жаңа бір нәрсе күтіп тұрады. Күніңіз қаншалық көп болса, соншалық тек туристік орындарды ғана емес, сонымен қатар Soho-дағы жайлы пабтар немесе Shoreditch ауданындағы туристер көп бара бермейтін көшелер секілді жасырын жауһарларды да ашу мүмкіндігі артады.