Лондондағы музыкасы мықты жерлер: DJ Arsen Superfly ұсынатын орындар
Лондонға тек Биг-Бенді көруге емес, қаланың шынайы музыкалық рухын сезінсем дегендерге арналған топтама.
Лондон — менің шығармашылық жолымды ғана емес, өмір жолымды да түбегейлі өзгерткен қала. Мұнда алғаш рет 2004 жылы жұмыс бабымен тренингіге келгенім бар. Көп туристің бір болып, қаланың танымал жерлерін аралап қайтқанмын. Кейін тағы екі жыл бойы жиі келіп тұрдым. Ал 2008 жылдың аяғында Лондонға мүлде басқа себеппен оралдым: қызыммен (қазір жұбайым) осында Жаңа жылды қарсы алдық. Ол кезде сүйіктім қалада магистратурада оқитын.
Ал Лондондағы өмірімнің жаңа парағы 2024–2025 жылдары ашылды. Бұл жолы қалаға диджей ретінде келе бастадым. Brick Lane Jazz Festival фестивалінде өнер көрсеттім, CoOperation Records кешінде сет ойнадым, My Analog Journal YouTube-арнасы үшін қазақ винил пластинкаларынан арнайы микс жаздым.
Лондонға жолыңыз түсіп жатса деп, қалада музыкасы сапалы, өзім қайта-қайта баратын сүйікті орындарды тізіп жазып шықтым. Топтамада барлар, клубтар, мәдени кеңістіктер мен винил дүкендері бар. Бұл жерлер сізге қаланы мүлде жаңа қырынан тануға септесеріне сенімдімін.
NT’s Loft
Мекенжайы: 207, 1 Westgate St, London E8 3RL
Кіру құны: Егер алдын ала бронь жасасаңыз, кешкі 21:00 немесе 22:00-ге дейінгі ерте сеттерге кіру тегін. Түнгі кештердің билеті 5–15 фунт тұрады.
Әлеуметтік желісі: Instagram
Далстон ауданындағы теміржолдың дәл үстінде орналасқан лофт-бар. Мұнда түрлі музыкалық бағыттағы тамаша кештер ұйымдастырылады, белгілі продюсерлер мен диджейлер келеді. Жолыңыз болса, Aroop Roy, Melvo Baptiste не Mousse T сияқты музыканттардың сетіне тап болуыңыз да мүмкін.
Caia
Мекенжайы: 46 Golborne Rd, London W10 5PR
Кіру құны: Тегін. Тек асхана мен барға төлейсіз. Үстелді алдын ала брондаған дұрыс.
Әлеуметтік желісі: Instagram
Caia-ға алғаш рет досым Danny WheelUP ертіп барған. Содан бері Лондонға әр келген сайын осында соғамын. Бұл жай ғана мейрамхана емес. Мұнда тағамға қандай мән берсе, музыкаға да дәл сондай көңіл бөледі. Дыбысы өте сапалы, иесінің өзі жинаған винил топтамасы бар, диджейлер мен селекторлардың кештері өтіп тұрады. Дәмді тамақ ішіп, жақсы музыка тыңдағысы келетіндерге таптырмас орын.
Café 1001
Мекенжайы: 91 Brick Ln, London E1 6QL
Кіру құны: Көбіне тегін. Бірақ фестиваль кезінде не арнайы қонақтар келетін кештерде билет құны әдетте 10 фунттан басталады.
Әлеуметтік желісі: Instagram
Бұл орын Brick Lane Jazz Festival фестивалінің негізгі алаңдарының бірі. Мұндағы әрбір диджей сетін тосынсый деуге болады. Өнерпаздар сахнаға шыққан кештердің көбі кейін YouTube-ке жүктеледі. Егер қазіргі Лондон андеграундының тынысын сезінгіңіз келсе, міндетті түрде осы жерге соғыңыз.
Hootananny Brixton
Мекенжайы: 95 Effra Rd, London SW2 1DF
Кіру құны: Жұмыс күндері көбіне тегін. Демалыс күндері концерттер мен кештердің билеті шамамен 5–12 фунт.
Әлеуметтік желісі: Instagram
Брикстондағы үлкен паб-клуб. Дыбысы аса қуатты. Мұнда реггиден бастап афробитке, broken beat пен bass-кештерге дейін түрлі концерттер өтеді.
Мен дәл осы жерде CoOperation Records және Bugz In The Attic кешінде өнер көрсеттім. Батыс Лондонның ерекше музыкалық стилі қалыптасқан орында өзіңнің диджей сетін ойнау мен үшін ұмытылмас тәжірибе болды. Егер Брикстонның шынайы атмосферасын сезініп, жаңа адамдармен танысқыңыз келсе, міндетті түрде осында келіңіз.
Ronnie Scott’s
Мекенжайы: 47 Frith St, London W1D 4HT
Кіру құны: Билетпен кіргізеді. Кешкі Main Shows концерттері 25–55 фунттан жоғары болса, түнгі Late Late Show джемдерінің бағасы шамамен 12 фунт. Студенттер мен музыканттарға жеңілдіктер бар.
Әлеуметтік желісі: Instagram
Жанды джазды жақсы көрсеңіз, өміріңізде бір рет болса да Ronnie Scott’s клубына баруға кеңес беремін. Мұнда әлемге әйгілі музыканттар да, жаңа танылып келе жатқан орындаушылар да өнер көрсетеді. Ал түн ортасына дейін жалғасатын джемдер бұл жердің ерекшелігі саналады. Лондон неге әлі күнге дейін әлемдегі джаз астаналарының бірі саналатынын осы жерге келгегде түсінесіз.
Love Vinyl (Hoxton)
Мекенжайы: 5 Pearson St, London E2 8JD
Бағасы: Винил пластинкаларының құны — 4 фунттан 300 фунтқа дейін.
Әлеуметтік желісі: Instagram
Лондонға келген сайын міндетті түрде баратын орнымның бірі — Love Vinyl. Шығыс Лондонда орналасқан бұл дүкен 2014 жылдың жазында ашылып, аз уақыттың ішінде Ұлыбританиядан тыс жерлерге де танымал болды.
Мұнда соул, джаз, диско, хаус және broken beat жанрларындағы сирек пластинкаларды, сондай-ақ Лондон мен әлемнің түрлі лейблдерінің жаңа релиздерін табуға болады. Бұл жерге нақты бір пластинка іздеп кіріп, қолыңызда жаңа музыкаларға толы сөмкемен шығуыңыз әбден мүмкін.
Jazz Café
Мекенжайы: 5 Parkway, London NW1 7PG
Кіру құны: Ақылы. Кешкі концерттердің билеті — 20–35 фунт, ал түнгі клубтық кештерге кіру — 5–15 фунт аралығында.
Әлеуметтік желісі: Instagram
Кэмден ауданындағы бұл клубта бір кеште соул концертін де, хип-хоп орындаушысын да, түнгі диджей сетін де көруге болады. Бағдарламасы әртүрлі болғанымен, бәрін біріктіретін нәрсе — сапалы музыка мен тербейтін ырғақ. Келсеңіз, қайтқыңыз келмей, түннің бір уағына дейін отырып қалуыңыз әбден мүмкін.
The BBE Store
Мекенжайы: Arch 376, 10 Helmsley Pl, London E8 3SB
Кіру құны: Дүкенге және күндізгі шараларға кіру тегін. Кешкі арнайы іс-шаралардың билеті шамамен 10 фунт.
Әлеуметтік желісі: Instagram
BBE Music лейблінің дүкені бірден бірнеше қызмет атқарады: бұл — винил дүкені, сапалы дыбыс жүйесі бар кеңістік әрі кештер өтетін алаң. Мұнда диджей сеттері, жаңа пластинкалардың таныстырылымы мен музыка тыңдау кештері ұйымдастырылады.
Кез келген күні Louie Vega, DJ Spinna не Osunlade сияқты музыканттардың тосыннан өнер көрсетіп жатқанын көріп қалуыңыз мүмкін. Тіпті сол жерде олардың пластинкаларын бірден сатып алуға болады. Егер музыкаға құмар болсаңыз не диджей болсаңыз, бұл жерді міндетті түрде картаңызға белгілеп қойыңыз.
Brixton Village Market
Мекенжайы: Coldharbour Ln, London SW9 8PS
Кіру құны: Тегін.
Әлеуметтік желісі: Instagram
Күндіз бұл — түрлі тағамдар, шағын кафелер мен дүкендер орналасқан базар. Ал кешке қарай Ұлыбританияның көпұлтты мәдениеті тоғысатын ерекше орынға айналады. Ішінде де, маңында да жергілікті диджейлер мен көше музыканттарының әуені үзілмейді.
Концертке не кешке бармас бұрын осы жерге келіп, ауданның атмосферасын сезініп, көңіл-күйіңізді көтеруге болады. Жанында орналасқан Pop Brixton кеңістігіне де кіріп, тамақтанып әрі музыка тыңдап шығуға кеңес беремін.
Lion Vibes
Мекенжайы: 98, Granville Arcade, London SW9 8PS
Әлеуметтік желісі: Instagram
Бұл дүкен регги, даб, ска және жалпы Ямайка музыкасын жақсы көретіндерге ұнары анық. Brixton Village Market аумағында орналасқан.
Мұнда сағаттап пластинка ақтарып, сатушылармен сүйікті релиздеріңізді талқылап, бұрын естімеген орындаушылармен танысуға болады. Егер soundsystem мәдениеті сізге жақын болса, бұл дүкенге міндетті түрде кіріңіз.
