Көрпешедегі отырыс, мата мәзір мен мысықтар. Алматыдағы ерекше алты бар
Басқа еш жерде жоқ сусындарды осы жерлерден табасыз.
Коктейль дегенде көз алдыңызға әлі де тек Лонг-Айленд не Джин-тоник келер болса, Алматы барларының сан алуан мәзірімен таныспаған екенсіз. Өйткені бұл қала баяғыда-ақ елдің бар астанасы болып танылған. Мұнда апта сайын бармендер бір-бірімен орын алмасып, шулы гесттер өткізіп тұрады (басқа жерден шақырылған маманның сол бардың сөресіне тұрып, сусын дайындауы), мастер кластар ұйымдастырады. Өзім Аперольді қатты жақсы көремін (әсіресе мамырда Алматының жазғы террасаларында), бірақ бұл мақалада авторлық микстер туралы айтып беремін.
Сёсё
Мекенжайы: Мақатаев көшесі, 45/1.
Жұмыс кестесі: күнделікті 12:00-ден 00:00-ге дейін.
Алматыдағы «Сёсё» кеспеханасының алкогольсіз сусындар картасы 2024 жылы The World’s 50 Best Bars шорт-листіне енген. Ол жаһандық сын-қатер мен апаттарға арналған пацифистік бағыттағы сусындар топтамасы еді.
Қазір бұл азиялық кеспехана мәзірін жаңартты — енді мұнда алкоголь де бар. Осы маусымның тақырыбы — кинотерапия. «Басқаға төле» деп аталатын коктейльді мұнда тегін береді. Тек ақысының орнына басқаға жақсылық жасауды және қаласаңыз, бұл туралы барға айтып беруді өтінеді.
Мәзірі интерактивті: бәрін айналдырып, қозғалтуға болады. Менің сүйіктім — «Бәрі, бір уақытта, барлық жерде» фильміне арналған бет. Сіз бейглді айналдырасыз, ол сіздің алдағы жарты сағаттық тағдырыңызды (және сусыныңызды) анықтап береді. Әлемнің маған жасаған таңдауы ұнады — бұл ескі мәзірдегі менің ең сүйікті коктейлім болып шықты. Бардағы бұл тәжірибе ақырына дейін әсерлі болуы үшін сусындар құрамы ашып жазылмайды.
Adept
Мекенжайы: Самал-3 шағын ауданы, 25.
Жұмыс кестесі: сәрсенбіден бейсенбіге дейін — 19:00–02:00; жұма мен сенбі — 19:00–03:00.
Қаланың жоғарғы бөлігінде орналасқан, жеке зертханасы бар спикизи-бар. Мұндай барлардың форматы өткен ғасырдың 20-жылдарында АҚШ-та «құрғақ заң» кезінде пайда болған. Олардың сыртында ешқандай маңдайша жазуы болмайды, жасырын есіктердің артында елеусіз ғана тұрады және кірерде құпия сөз сұралады. Баяғыда келушілерден полицияның назарын аудармас үшін «ақырын сөйлеуді» (speak easy) өтінетін, атауы да осыдан шыққан.
Алматыдағы Adept барында бұл ереже көбіне ерекше атмосфера үшін қолданылады. Бұл жерде табиғи өнімдерді пайдаланады, бірақ олармен көп эксперимент жасайды: қажет әсерге жету үшін түсін анықтайды, құрылымы мен дәмін өзгертеді. Мұндай сусындардан алатын әсер классикалық коктейльдерден мүлдем бөлек.
Бұл жердегі коктейльдердің құрамын сипаттап жатпай-ақ қояйын, оларды жай ғана татып көру керек. Бірақ мен ұсынатын масттрай: гастрономиялық Jusai Mary (жұсай мен болгар бұрышының дистилляты) және ваниль парфюмі қосылған Tary gimlet (тары мен пало санто дистилляты).
Contrast
Мекенжайы: Назарбаев даңғылы, 120.
Жұмыс кестесі: дүйсенбіден бейсенбіге дейін — 20:00–04:00; жұмадан жексенбіге дейін — 21:00–06:00.
Қаланың негізгі көңіл көтеру көшесінде тұрған бар. Өзінің қызмет көрсету деңгейімен және сусындарының сапасымен көршілерінен айтарлықтай ерекшеленеді (бағалары бірдей болса да). Атмосферасы театрға келеді, бірақ өте жайлы.
Маған нақты бір сусынды кесіп айтқан қиын, өйткені авторлық сусындар апта сайын жаңарып тұрады. Ерекше дәмдерді татқыңыз келсе, ал жаңа орындар қалмаса — бұл концепция сізге міндетті түрде ұнайды. Өткен бейсенбіде бізге үш түрлі спешл ұсынды. Маған әсіресе соңғы нөмір қатты әсер етті: текила, тархун, алма мен жалбыз — өте балғын әрі нағыз Алматының стиліндегі сусын екен.
Осыдан бір-екі апта бұрын коктейль картасының концепциясы бармен танысудың 10 кезеңі іспеттес 10 сусыннан тұрған еді. Ал сіз бас сұққан кезде олардың не ойлап табатыны — жұмбақ.
Бонус: Мен бұл жерге Кокос пен Сёсё үшін келемін (есімдері жоғарыда айтылған кеспехананың құрметіне қойылған). Бұл коктейльдер емес, осы барда тұратын, адамға үйірсек әрі өте сүйкімді екі мысық.
Barbolsyn
Мекенжайы: Уәлиханов көшесі, 47.
Жұмыс кестесі: жексенбіден бейсенбіге дейін — 18:00–02:00; жұма мен сенбі — 18:00–03:00.
Бұл орынның негізін қалаушылар өзін «жергілікті бархана» деп атайды. Бұрын мұнда туиттершілер мен қазақстандық журналистер ортасынан шыққандар ғана жиналатын, сондықтан мәзірде әлі күнге дейін бар иелерінің достары мен тұрақты клиенттерінің құрметіне қойылған сусындар өте көп.
Қазір бар Арбатқа жақынырақ жерге көшіп, шетелдіктер арасында хитке айналды. Бұл жерде көрпешелерде отырып, коктейль не сырадан сіміріп, құрттан тістеп отыруға болады. Шетелдік қонақтарға көрсеткенге таптырмас орын. «Құртты Танат» (құрт ликёрі мен ваниль арағы) немесе «Қымызды Мейірбек» (қымыз, құлпынай және шие бурбоны) сынды сусындар — нағыз экзотика.
Atelier
Мекенжайы: Уәлиханов көшесі, 47.
Жұмыс кестесі: сәрсенбіден жексенбіге дейін — 18:00–03:00; жұма мен сенбі күндері 04:00-ге дейін.
Barbolsyn-ның көршіcі, сырттай қарағанда тігін ательесіне ұқсайтын орын. Атмосферасы фенси, дресс-коды да бар. Жұмыс күндері мұнда тып-тыныш, ал демалыста диско-кештер өтеді.
Кәдімгі мәзірдің орнына сізге мата үлгілері бар карта әкеледі. Коктейльді сипап сезу арқылы таңдау керек: барқыт, хопсак немесе шілтер. Матаның құрылымы сусынның мінезін — оның қышқылдығын, тәттілігін не ащылығын білдіреді. Менің таңдауым — «Барқыт» пен «Қызыл тері». Айтпақшы, Atelier-де моктейльдердің (алкогольсіз нұсқалардың) керемет картасы бар, олар дәмі жағынан түпнұсқадан еш кем түспейді.
Point 44
Мекенжайы: Құрманғазы көшесі, 44.
Жұмыс кестесі: дүйсенбіден бейсенбіге дейін — 17:00–02:00; жұма мен сенбі күндері 03:00-ге дейін.
Мұнда алкогольді де, алкогольсіз де сусындардың түрі өте көп. Қазіргі уақытта бұл сирек кездесетін жағдай, өйткені мұндай сусындарды мәзірге енгізу оңай емес. Бармендердің айтуынша, бұған сұраныс тудыратын аудитория әлі толық қалыптаспаған. Сусынды дайындау үшін оның құрамынан алкогольді алып тастаған жеткіліксіз — оның дәмін келтіретін арнайы алмастырғыштар керек, ал оларды сатып алған тиімсіз.
Бірақ бұл жерде достарыңыз керемет коктейльдерін талқылап жатқанда, мөлейіп кола ішіп отырмайсыз. Өзім ішкенді жақсы көрсем де, кейде теңселтіп жібермейтін жай ғана дәмді сусыннан ұрттағым келеді. Бұл жерге мен Le Fizz (лайм кордиалы, аюбадам гүлдері мен цитрус парфюмі) және Jungle Love (райхан кордиалы мен батпақ жидегі) үшін келемін.
Суретті салған — СашаШура.
