Алматыда 350 мың теңгені қалай жаратуға болады?
YE-нің әндерін тегін-ақ тыңдап қайтуға болады.
14 тамызда Алматыда YE-нің концерті өтпек. Билеттер 120 мың теңгеден басталып, ең қымбаты 350 мың теңгеден сатылып жатыр. Бір кешке мұндай ақша жұмсауға дайын емеспін десеңіз, алдағы демалыс күндері бұдан басқа да талай қызық бар. Мысалы, шетелге арзанға билет алуға, фестиваль не рейвке баруға я қала сыртында демалып қайтуға болады.
Арзан билет тауып, аяқ астынан саяхатқа шығып кету
Aviasales.kz сайтындағы «Ыстық билеттер» бөлімін айналып өте алмадық. Онда 11%-дан 64%-ға дейін жеңілдікпен сатылатын ұшақ билеттері топталып тұрады. Жолаушылар санын, аймақты, багаж қажет пе, жоқ па — бәрін таңдап, ең тиімді нұсқаны табуға болады.
Сапар күндері концертпен дәл сәйкес келмесе де, одан үнемделген ақшаны саяхатқа жұмсауға болады. 100–150 мың теңгеге Ташкент, Ереван, Тбилиси, Баку не БАӘ жағажайларына барып-қайтуға тікелей рейске билет таба аласыз. Қалған 200–250 мың теңгені сол жердегі демалыс пен ойын-сауыққа жұмсайсыз.
Айтпақшы, көрші бөлімде бір-екі күндік қысқа сапарларға арналған билеттер де бар. Мысалы, 52 мың теңгеге Астанаға барып, жақындарыңызды көріп қайтуға не досыңызға тосынсый жасауға болады.
Фестивальге не рейвке бару
Қаладан ешқайда кете алмайсыз, бірақ демалыс көңілді өтсе десеңіз, 14–16 тамызда өтетін мына іс-шаралардың біріне барыңыз.
POST CRAFT BEER FEST 2026
Қайда: Сейфуллин көшесі, 555А
Қашан: 15 тамыз, 12:00
Билет: 25 000 теңгеден бастап
Бұл — кәдімгі лагерден бөлек сыра түрлерін байқап көргісі келетіндерге арналған фестиваль. Бір алаңға оннан астам жергілікті сыра қайнатушы жиналады. Фестивальға деп арнайы сусын түрлері де дайындалады. Билет бағасына сусындар дегустациясы кіреді: кіреберісте берілетін арнайы бокалмен қалаған түрінен татып көруге болады.
Тамаққа бөлек төлейсіз. Ұйымдастырушылар Орталық Азия халықтарының тағамдары ұсынылатынын айтады. Күндіз диджейлер музыка қояды, кешке музыкалық топтар өнер көрсетеді, ал арасында викториналар мен ұтыс ойындары өтеді. Билеттер Ticketon.kz сайтында және серіктес барларда сатылады.
Фестиваль 22:00-де аяқталады. Бірақ осы мекенжайдағы «Угол» кеңістігінде тағы алты бар, тату-салон, пиццерия мен шайхана бар.
SUAQ
Қайда: Шарын шатқалы
Қашан: 15 тамыз, 17:00
Билет: 30 000 теңгеден бастап
Шарын шатқалындағы электрон музыка фестивалі көпшілікке арналған шара емес. Бірақ былтыр барғандар фестивальден жақсы әсер алғанын айтады.
Мұнда музыка колонкадан емес, құлаққаптан естіледі: әр адамға сымсыз құлаққап беріледі. Лайнапта Edigee, AINA, Akmaral Mergen, Ayacantstop, Koloah, Monoconda, QOSO мен Slickback бар. Фестиваль атмосферасы Burning Man мен «Безумный Макс» әлемін еске салады. Түнде кемпингте өз шатырыңызбен не жалға алынған шатырда қонып шығуға болады.
Әдеттегі билет — 30 000 теңге. Алматыдан барып-қайту трансфері қосылған билет — 40 000 теңге. Шатырды бүкіл сапарға жалға алу 12–24 мың теңге тұрады. Билеттер Sxodim сайтында сатылады.
Табиғат аясында демалу
Демалыс күндері қалада адам көп болуы мүмкін: Алматыдағы концертке ТМД елдерінен көп фанат келеді. Сондықтан кептеліс пен қарбаластан қашып, су жағасына не тауға кетіп қалыңыз.
Сапбордпен серуендеу
Қайда: Қапшағай су қоймасы мен Іле өзені
Бағасы: 8 000 теңгеден бастап
Жаз бойы су үстіндегі таңғы көріністер түсірілген рилстерді «бір күні барамын» деп сақтап жүрсеңіз, сол күн келген сияқты.
Қарапайым сапбордпен серуендеу бір жарым сағатқа 8 000 теңге тұрады. Ал жолға, дәмді тамаққа және демалыс базасында түнеуге ақша қоссақ, концерт билетінен үнемделген қаражатты осында жұмсауға болады. Белсенді демалысты ұнататындар үшін Іле бойымен жүретін сапборд турлары бар. Бағасы — 25 000 теңге.
Глэмпингте жайлы түнеу
Қаладан сыртына шыққысы келетін, бірақ шатыр тігіп, газ плитасында консерві қыздырып отырмайықшы дейтін оқырманға мынадай ұсыныстар бар.
- We Camp (Космос ауылы, Октябрьское көлі, 3). Алматыдан 40 шақырым жерде орналасқан жайлы кемпинг. От жағатын орын, душ, биодәретхана, асүй және ашық аспан астындағы кинотеатр бар. Шамдармен безендірілген шатырда бір түн өткізу 50–65 мың теңге тұрады.
- Wildhome (Бұтақты, Butakty визит-орталығының маңы). Интерьері әдемі автокемперлер. Бұл жерде фотосессия мен романтикалық кездесу өткізіп жатады. Бір тәулігі 40 мың теңгеден басталады.
- Umbra village (Бұтақты, Butakty визит-орталығының маңы). Саяжайдағыдай жайлы атмосферасы бар қонақүй. Мұнда әдемі сервизбен шай ішіп, алауошақ басында отырып, жұлдызды аспан астында кино көруге болады. Ит жетектеп келуге болады. Үй, шатыр не киіз үйдің бірін таңдай аласыз. Таңғы ас бағаға кіреді. Бір тәулігі 40 мың теңгеден басталады.
Асы үстіртінде жұлдыз жауынын тамашалау
Бағасы: турлар 230 000 теңгеден басталады
Дәл осы күндері Персеид метеор ағынының белсенді кезеңі болады. Оның ең қарқынды шағы 12-сінен 13 тамызға қараған түні өтеді, бірақ демалыс күндері де метеорларды көруге мүмкіндік болады.
Асы үстірті — қала жарығынан қашықта түнгі аспанды тамашалауға қолайлы орындардың бірі. Трансфері мен түнеуі кіретін екі күндік ұйымдастырылған турлар орта есеппен 230 мың теңге тұрады. Арзан емес, бірақ 350 мың теңге бюджетке сыяды.
Айтпақшы, концертті тегін тыңдай аласыз
Оқиға ортасынан тым алыстап кеткіңіз келмесе, Абай — Байтұрсынұлы — Сәтбаев — Байзақов көшелерінің арасындағы аумаққа баруға болады. Кешті осы маңда өткізіп, рэпердің хиттерін алыстан естіп қалуыңыз мүмкін.
- Rakhat Fitness-тегі ашық бассейн (Абай даңғылы, 48). Бір реттік кіру ересектерге 20 000 теңге, балаларға 10 000 теңге тұрады. Олимпиада стандартына сай ашық бассейн 23:00-ге дейін жұмыс істейді. Суда жүзіп жүріп, стадион жақтан жеткен музыканы тыңдауға болады.
- Неке сарайының жанында фотосессия жасау (Абай даңғылы, 101А). Неке сарайының өзі қазір жабық тұр. Бірақ әйгілі ғимараттың алдында Bound 2 алыстан естіліп тұрғанда лавстори түсіруге болады.
- Qaimaq-та кешкі ас ішу (Абай даңғылы, 46А). Ет пен қуырдақ ұсынатын ұлттық тағамдар мейрамханасы стадионның жанында орналасқан. Жазғы үлкен террасасында тапшандар мен күркелер бар. Орташа чек — 12 000 теңге.
- Tangiers Lounge-да кеш өткізу (Сәтбаев көшесі, 30/7). Мекеменің руфтопы аренаның қарсысындағы Сәтбаев көшесіне қарайды. Концерт дауысы айналадағы көпқабатты үйлерден жаңғырып, музыканы жақынырақ естуге мүмкіндік береді. Орташа чек — 10 000 теңге. Үстелді алдын ала брондаған дұрыс.
- Grand Aiser Hotel-де түнеу (Пожарский көшесі, 1). 14 қабатты қонақүй стадионға тиіп тұр. 5-қабаттан жоғары, терезесі Сәтбаев көшесіне қарайтын бөлме алсаңыз, концертті бөлмеден тыңдауға мүмкіндік болуы мүмкін. Нақты бөлмені қонақүйге тікелей хабарласып брондаған дұрыс. Стандарт бөлме — бір түнге 45 000 теңге.
