Көктөбе паркінде не қызық бар және қыдырғанға қанша кетеді?
Таудағы саябаққа жету жолдары мен тамағы дәмді жерлер.
Көктөбе — Алматының символы. Жұрт қыдырып келген қонағын ең алдымен осы жерге апарады, өздері де демалыста сонда жүреді. Қаланың қай бұрышынан да көрінетін әйгілі телемұнарадан бөлек, мұнда 1967 жылдан бері жұмыс істейтін ойын-сауық паркі бар. Тау баурайындағы бұл саябақта демалуға арналған ондаған локация, фотозоналар, аттракциондар, кішігірім хайуанаттар бағы, тіпті дәмді бешбармақ пен еуропалық классикалық тағамдарға тапсырыс беруге болатын мейрамханалар жұмыс істейді. Көктөбеден Алматы да, көк тіреген таулар да алақандағыдай көрінеді. Көктөбе паркі туралы қызық деректің бәрін осы мақалаға топтап қойдық.
«Көктөбе» паркіне қалай жетуге болады?
Паркке жаяу да, аспалы жолмен де, автобуспен не көлікпен де жетуге болады.
Аспалы жол
Аспалы жолдың төменгі станциясы Алматының қақ ортасында, Республика сарайы мен «Арман» кинотеатрының жанында орналасқан. Маршрут бойынша сыйымдылығы сегіз адамға дейінгі 17 кабина қатынайды. Жоғары көтерілуге шамамен 6 минут кетеді: осы уақытта қала орталығының көрінісі мен таулардың панорамасын тамашалауға болады. Бұл — Көктөбеге жетудің ең танымал, бірақ ең қымбат түрі: барып-қайту — 10 мың теңге.
Автобус
10 мың теңге төлегіңіз келмесе, бірақ жаяу жеткенге де алыстау болса, балама нұсқа бар. Тура таудың басына дейін баратын автобусқа отырыңыз. №95, №99 және №130 автобустар Омаров көшесіндегі аспалы жолдың төменгі станциясына дейін жеткізіп тастайды. Осы жерден шағын автобусқа ауысып міну керек, ол сізді таудың ең биік шыңына 2 000–3 000 теңгеге апарады.
Такси не жеке көлік
Өз көлігіңізбен шықсаңыз, аспалы жолдың төменгі станциясына дейін баруға не бірден парктің ішіне кіруге болады. Бірақ ол арзан емес: жеңіл автокөлік үшін жоғарғы автотұраққа кіру құны — 25 мың теңге. Таксимен жүрсеңіз, жүргізуші әдетте таудың етегіне дейін ғана апарады. Яғни, жолдың соңғы бөлігін бәрібір жаяу жүруге не автобусқа мінуге тура келеді.
Денсаулық соқпағы
Демаламын, спортпен де айналысамын және табиғат аясында серуендеймін дегендерге осы соқпақты ұсынамыз. Бұл бағыт бойынша жүрсеңіз, Алматы биіктен көрінетін беткейлер арқылы өтесіз. Айтпақшы, соқпақта жүрген тегін. Кейбір тұсы тік, бірақ жаяу жүргіншілерге бар жағдай жасалған: орындықтар, қоқыс жәшіктері, шамдар мен бейнебақылау камералары бар. Жол-жөнекей шолу алаңдары жабдықталған. Су, балмұздақ не тіскебасар сатып алуға болатын шағын дүңгіршек жұмыс істейді. Маршрут Омаров көшесінен басталады.
«Көктөбе» паркінің жұмыс режимі
Парктің өзі тәулік бойы ашық тұрады. Кез келген уақытта серуендей келе аласыз. Бірақ аспалы жол кесте бойынша жұмыс істейді. Көктөбеге жұмыс күндері (дүйсенбі, сәрсенбі, бейсенбі) — 10:00-ден 23:00-ге дейін, сейсенбіде — 13:00-ден 23:00-ге дейін, ал жұма–жексенбі мен мереке күндері 10:00-ден 00:00-ге дейін көтерілуге болады.
Төменгі станциядан жүретін жолаушылар микроавтобусы дүйсенбі–бейсенбі аралығында — 10:00-ден 01:00-ге дейін, жұма–жексенбіде және мереке күндері 02:00-ге дейін жүреді.
Аттракциондар дүйсенбі–бейсенбіде — 10:00-ден 23:00-ге дейін, демалыс пен мереке күндері — 10:00-ден 00:00-ге дейін ашық. Мейрамханалар күн сайын 11:00-ден 00:00-ге дейін жұмыс істейді.
«Көктөбеге» кіру қанша тұрады?
Саябаққа кіру тегін, тек аспалы жол мен аттракциондарға төлеу керек. Паркте алаңсыз демалу үшін қанша ақша керегін төменге толық жазып шықтық.
Фуникулёр
Ересектер билеті бір жаққа — 6 000 теңге, барып-қайту — 10 000 теңге. Балалар билеті бір жаққа (6–12 жас) — 3 000 теңге, барып-қайту — 5 000 теңге. Егер кезекте тұрғанды ұнатпасаңыз, Көктөбеде аспалы жолдың жеке кабинасына Fast-track (кезексіз өту) рәсімдеуге болады, бірақ бұл біршама қымбатқа түседі: 100 000 теңге (бір жаққа) не 130 000 теңге (екі жаққа).
Автобус
Автобус бағасы нақты қай аялдамадан мінетініңізге байланысты. Ересектер Омаров көшесінен жол жүрсе, бір бағытқа 2 000 теңге төлейді. 3 000 теңге беріп, барып-қайту билетін алуға да болады. Достық даңғылынан жүрсеңіз, сәл қымбатырақ: бір жаққа 3 000 теңге, ал барып-қайту — 4 000 теңге. Балалар тарифі қос аялдама үшін де бірдей: бір жаққа бару үшін — 1 000 теңге, ал барып-қайту билеті — 1 500 теңге.
Төменгі аялдамаға өз көлігіңізбен барсаңыз, оны ақылы тұраққа қалдыруыңыз керек. Омаров көшесіндегі автотұрақ ақысы — 700 теңге. Ал Достық даңғылындағы төменгі станцияның жанындағы тұрақта алғашқы сағат — 400 теңге, ары қарай сағат сайын 100 теңге қосылады.
Кімге жеңілдіктер беріледі?
Көпбалалы отбасынан болсаңыз (5 адамнан бастап), аспалы жолға, микроавтобустарға, «Шолу дөңгелегіне» және Fast Coaster-ге 30% жеңілдік аласыз. Сондай-ақ паркке он адамнан тұратын топпен барсаңыз, 10% жеңілдік беріледі. Ал мына кісілер тегін өте алады:
- 5 жасқа дейінгі (бес жасты қоса алғанда) балалар — кез келген күні аспалы жолға, микроавтобус пен «Шолу дөңгелегіне» тегін кіреді;
- зейнеткерлер — сейсенбі күні аспалы жолда мен автобуста тегін жүреді;
- ҰОС ардагерлері — аспалы жолда мен автобуста тегін жүреді;
- мүгедектігі бар адамдар (барлық топ) — аспалы жол мен автобустарда тегін жүреді;
- Семей ядролық полигонындағы сынақтардан зардап шеккен адамдар — жұмыс күндері аспалы жолда тегін жүреді.
«Көктөбедегі» ойын-сауық
Паркте балаларға да, ересектерге де арналған ондаған аттракцион жұмыс істейді. Карусельдерден бастап, адреналин сыйлайтын аттракциондар мен арқанды жолдарға дейін табасыз.
Шолу дөңгелегі
Билет құны: ересектер (13 жастан бастап) — 4 000 теңге, балалар (6–12 жас) — 2 500 теңге, зейнеткерлер мен мүгедектігі бар адамдарға — 1 000 теңге.
Биіктігі 30 метр болатын бұл аттракцион беткейдің тура шетіне орнатылған. Толық бір айналым шамамен 10 минутты алады, кабиналардан қаланың орталық бөлігі мен тау жотасын анық көрінеді. Айтпақшы, биіктіктен қорқатындар уайымдамасын: кабиналар жабық, ішінде отырған аса қорқынышты емес.
Қорқыныш бөлмесі
Билет құны: кіру 3 000 теңге.
Жарық эффектілері, механикалық фигуралар мен дыбыстық сүйемелдеуі бар классикалық жабық лабиринт. Аттракционда жас шектеуі бар, кішкентай балаларды ересектерсіз кіргізбейді.
Тир
Билет құны: павильон мен қаруға қарай 1 000-нан 6 000 теңгеге дейін тұрады.
Оқ атқанды ұнатсаңыз, бірнеше арнайы алаңы бар. Классикалық пневматикалық мылтықтарды да, арбалеттер мен спорттық садақтарды да алуға болады. Бағасы қанша рет атқаныңызға байланысты. Нысанаға дәл тигізсеңіз, олжалы қайтуыңыз мүмкін.
Fast Coaster
Билет құны: ересектерге — 7 000 теңге, балаларға — 4 000 теңге.
Бұл — парктегі ең танымал аттракциондардың бірі. Америкалық төбешіктердің баламасы деуге болады. Аттракционда таудың тік беткейімен тартылған ирелең жолмен екі орындық шанамен төмен сырғисыз. Уайымдамаңыз: жылдамдықты арнайы тежегіш тетігі арқылы өзіңіз басқарасыз. Қаласаңыз, бұрылыстарда баяулап, қаласаңыз, барынша жылдам жүре аласыз. Тек бір шанадағы жолаушылардың жалпы салмағы 160 кг-нан аспауы керек.
Арқанды парк
Билет құны: таңдалған маршрутқа байланысты 2 500-ден 6 000 теңгеге дейін жетеді.
Қимылдап, ептілігіңізді сынап көргіңіз келсе, осы аттракционды таңдаңыз. Мұнда ағаштар мен арнайы тіреулерге бекітілген арқан жолдар, аспалы көпірлер және түрлі кедергілерден тұратын бағыттар бар. Маршруттар дайындық деңгейіне қарай бөлінген. 3–8 жас аралығындағы балаларға арналған жеңіл «Сириус» бағытының бағасы — 2 500 теңге. Ал биіктіктен қорықпайтындарға арналған «Вега» мен «Альдебаран» дейтін күрделірек бағыттар бар. Олардың бағасы — 5 000 және 6 000 теңге. Қауіпсіздік белдігі мен сақтандыру құны билет бағасына кіреді.
Төңкерілген үй
Билет құны: балаларға (3–11 жас) — 3 000 теңге, ересектерге (11 жастан бастап) — 3 500 теңге.
Бұл — паркке келгендердің бәрі суретке түсетін интерактив инсталляция. Мұндағы ерекшелік — бәрі төңкеріліп орналасқан. Тіпті үйдің жанындағы көлік те төбеңізде тұрғандай көрінеді. Өзге әлемге тап болғандай әсер алғыңыз келсе, міндетті түрде осы жерге кіріп көріңіз.
Көңілді паровоз бен электрлі шағын пойыз
Билет құны: паровоз — 1 000 теңге (1–13 жас, 3 минут), электрлі шағын пойыз — бір рейске 2 000 теңге.
Бұл аймақ парктің ең кішкентай қонақтарына арналған. Әзірге жылдам аттракциондарға мінуге ерте балалар осында қауіпсіз серуендей алады. Рельспен жүретін шағын паровоз бүлдіршіндерді қысқа әрі қауіпсіз бағытпен алып өтсе, электрлі мини-пойыз ересектеу балаларды төбенің орталық аллеясы бойымен қыдыртып қайтады.
Иллюзион
Билет құны: 3 500 теңге.
Бұл — өңірдегі ең үлкен айна лабиринті. Ол оптикалық иллюзиялар мен түрлі интерактив инсталляцияларға толы 13 бөлмеден тұрады. Мұндағы басты мақсат — берілген уақыт ішінде лабиринттен шығатын жолды табу.
Скалодром
Билет құны: балаларға (11 жасқа дейін) — 2 000 теңге, ересектерге (12 жастан бастап) — 2 500 теңге, экстремал түрі — 3 000 теңге, карниз — 4 000 теңге.
Бұл аттракцион өзін альпинист ретінде сынап көргісі келетіндерге арналған. Биік өрмелеу қабырғасында әртүрлі пішіндегі арнайы тіректер орнатылған, ал бағыттар күрделілік деңгейіне қарай бөлінген. Сондықтан мұнда алғаш рет келіп тұрғандар да, тәжірибелі өрмелеушілер де өзіне лайық бағытты таңдай алады. Қауіпсіздік жағын уайымдамаңыз: нұсқаушылар сақтандыру құралдарын дұрыс тағып беріп, өрмелеп жатқаныңызда бақылап тұрады.
Тауда тағы қандай қызық бар?
Жоғарыдағы тізім аздық етсе, мынадай да қызық табылады:
- Автодром (3 минут — 2 500 теңге): бір-бірімен соқтығысып, кедергісіз көңіл көтеруге болатын бамперлі мәшинелер.
- VR-аймақтар (2 500 теңге): тау көрінісі аздық етіп, ғарышқа ұшамын десеңіз не зомбилермен «шайқасқыңыз» келсе, виртуал шындық аттракциондарын байқап көріңіз.
- XD-кинотеатр (2 000 теңге): қысқаметражды фильмдердің ішінде жүргендей боласыз. Көрсетілім кезінде орындықтар қозғалып, жел соғып, тіпті су да бүркиді.
- «Алтыбақан» (5 минут — 500 теңге): қазақтың кәдімгі алтыбақаны.
- Батуттар (2 000 теңге): балалар секіріп ойнайтын аймақ.
«Көктөбеде» тағы не істеуге болады?
Аттракциондарға қызықпасаңыз, экстремал ойындарды ұнатпасаңыз, Көктөбеде онсыз-ақ жақсылап демалуға болады. Көріп кетуге тұрарлық бірнеше орынды тізіп шықтық.
Шолу алаңы мен Алматы көрінісі
Көпшілік Көктөбеге ең алдымен Алматыны биіктен тамашалауға барады. Мұнда қаланы түгел көретін бірнеше шолу алаңы бар. Алыстан Іле Алатауының асқар шыңдары анық көрінеді. Қаланы жақынырақ тамашалағыңыз келсе, алаңдарға тиын тастағанда қосылатын дүрбілер орнатылған. Сондықтан өзіңізбен ұсақ тиын ала барған дұрыс. Күн батардан жарты сағат бұрын барған дұрыс. Осы кезде әдемі суретке түсіп үлгересіз, кейін қала шамдары біртіндеп жанып, Алматының кешкі көрінісін тамашалай аласыз.
The Beatles ескерткіші мен фотозоналар
Парктегі ең ерекше орындардың бірі — атақты The Beatles тобына арналған қола ескерткіш. Мұнда Джон Леннонның гитарасын ұстап, орындықта отырғаны бейнеленген, ал қасында бос орын бар болғандықтан, келушілер көбіне соның жанында суретке түседі. Артында Пол Маккартни, Джордж Харрисон мен Ринго Старр тұр. Ескерткіш маңында топтың әйгілі әндері үнемі ойнап тұрады. Бұдан бөлек, парк аумағында суретке түсуге арналған басқа да әдемі орындар көп. Мысалы, алып гранит алмасы түріндегі субұрқақ, шолу алаңдары, сәнді темір аркалар бар. Ал Алматы телемұнарасы әр суретте асқақтап тұрады.
Жануарды сипап көретін зообақ пен балалар алаңы
Бала-шағасымен келгендерге парктің ішкі жағындағы шағын зоопарк ұнап жатады. Онда бұғы, лама, жыландар, жыртқыш құстар мен сілеусін бар. Кіру билеті — 3 000 теңге. Ал үш жасқа дейінгі балалар тегін кіреді. Зоопарк жанында әткеншектер, сырғанақтар мен жұмсақ резеңке төсеніштері бар үлкен ойын алаңы тұр. Балалар онда тегін ойнап жатқанда, ата-анасы көлеңкедегі орындықтарда тынығып ала алады.
Алматы телемұнарасы
Бұл стратегиялық нысан болғандықтан, туристерді ішіне кіргізбейді. Соған қарамастан, ол қаланың басты сәулет нысандарының әрі символдарының бірі саналады. Бұл — теңіз деңгейінен есептегендегі биіктігі бойынша әлемдегі ең биік телемұнаралардың бірі. Мұнараның өзі 372 метр болғанымен, теңіз деңгейінен орналасу биіктігі шамамен 1 452 метрге жетеді. Сондықтан бұл көрсеткіш Бурдж-Халифа орналасқан деңгейден де жоғары.
Парктегі кафе-мейрамхана
Көктөбеде қарныңыз ашпайды. Мұнда жеңіл тіскебасардан бастап, толыққанды кешкі асқа дейін таңдау жеткілікті.
Abay мейрамханасы
Бұл мейрамхананың бір ерекшелігі — алып киіз үйге ұқсатып жасалған кең залы. Мұнда қазақтың дәстүрлі ет тағамдарын жеп, ұлттық атмосфераны сезінуге болады. Кейде мұнда той өтетіндіктен, бос орын бар-жоғын нақтылап алған жөн.
Inzhu мейрамханасы
Еуропа мен Жерорта теңізі асханасын ұнатсаңыз, осы мейрамханаға барыңыз. Панорамалық терезелері мен жардың шетіндегі ашық террасасы кешкі Алматыны тамашалап отырып, романтикалық кеш өткізгенге әдемі.
Shashu мейрамханасы
Бұл жерде ұлттық дәстүр мен заманауи стиль үйлескен. Интерьері этностильде безендірілген, ал мәзірінде қазақ және шығыс тағамдары заманауи үлгіде ұсынылады.
Koktobe Terrace
Бұл — панорамалық мейрамхана әрі түрлі іс-шаралар өтетін алаң. Мұндағы ең жақсы орындар қаланың көрінісі ашылатын терраса шетінде орналасқан. Жылы кештерде олар тез толып кетеді. Кейде мұнда жабық іс-шаралар да ұйымдастырылады.
Monteverde кафесі
Ұзақ отырмай, тез тамақтанғыңыз келсе, осы жер қолайлы. Пицца жеп, кофе ішіп алып, серуенді жалғастыра аласыз.
Жиі қойылатын сұрақтар
Көктөбені аралауға қанша уақыт керек?
Тек тауға шығып, шолу алаңында суретке түсіп қайтсаңыз, 1,5–2 сағат жеткілікті. Ал аттракциондарға мініп, балалармен серуендеп не мейрамханада отырып демаламын десеңіз, 3,5–5 сағат бөлген дұрыс.
Көктөбеге шығу қанша тұрады?
Парк аумағына кіру тегін. Тек көтерілу жолына ғана ақы төлейсіз. Аспалы жолдың бір бағыттағы билеті ересектерге — 6 000 теңге, ал екі бағытқа — 10 000 теңге. Жолаушылар шағын автобусының жолақысы бір бағытқа шамамен 2 000–3 000 теңге.
Ең жылдам қалай жетуге болады?
Ең қолайлысы — таксимен Достық даңғылындағы аспалы жолдың төменгі станциясына бару. Ол Республика сарайының жанында орналасқан. Қала орталығынан жол кептелісі болмаса, 5–10 минутта жетесіз. Одан кейін аспалы жол кабинасына отырып, шамамен 6 минутта Көктөбеге көтеріле аласыз.
Көктөбеде міндетті түрде не көру керек?
Келушілердің көбі аспалы жолмен көтеріліп, негізгі шолу алаңынан Алматыны тамашалайды. The Beatles ескерткішінің жанында суретке түспей кетпейді. Уақытыңыз болса, кешке дейін қалып, шамы жарқыраған қаланы шолу дөңгелегінен не мейрамхана террасасынан тамашалаған жөн.
Көктөбеге бара жатқандарға бірер ақпарат
- Барғанға ең қолайлы уақыт — жұмыс күндерінің таңы не түстен кейінгі уақыт. Демалыс не мереке күндері, әсіресе жазда, аспалы жолға ұзын-сонар кезек болады.
- Қалаға қарағанда Көктөбеде салқындау. Сондықтан кешке не желді күні жылы киім алған дұрыс.
- Аттракциондардың жас және бой шектеулерін алдын ала қарап шығыңыз.
- Жеңілдік жасалатын азаматтар қатарында болсаңыз, қажет құжаттарды ұмытпаңыз.
- Төрт жасқа дейінгі балаларға арналған арбаны парк ішінен сағатына 3 000 теңгеге жалға алуға болады.
Суретті салған — Дада Кирей.
