Әуежайдағы фаст-трек деген не және бұл қызмет қанша тұрады?

Ұшар алдында металл іздегіштің алдында ұзын-сонар кезекте тұрған кейде шаршатып жібереді. Тексерістен тез өтіп, уақыт жоғалтпас үшін әуежайларда арнайы жедел өту қызметі бар. Біз бұл мақалада фаст-трек деген не екенін және оның қалай жұмыс істейтінін түсіндіреміз.

Фаст-трек қызметі деген не?

Фаст-трек — әуежайдағы негізгі тексеру кезеңдерінен кезек күтпей, жылдамырақ өтуге мүмкіндік беретін ақылы қызмет. Оны ұшып шығатын да, ұшып келетін де жолаушылар пайдалана алады. Әуежайға байланысты қызмет ішкі және халықаралық рейстерде ұсынылады. Фаст-трек атауын ағылшын тілінен «жедел өту» деп аударуға болады. Бұл қызметті пайдаланған жолаушы көппен бірге кезекте тұрмай, арнайы жолақтан өтеді. Соның арқасында қауіпсіздік тексерісі мен паспорт бақылауына кететін уақыт азаяды.

Фаст-трек қызметіне не кіреді?

Ұшып шығу кезінде (Departure)

• тіркеуден жеке немесе басымдық берілген орында өту;
• қауіпсіздік тексерісінен жедел өту;
• паспорт бақылауынан жедел өту.

Ұшып келген кезде (Arrival)

• паспорт бақылауынан жедел өту;
• әуежай қызметкерінің алып жүруі (егер қызмет пакетіне кірсе);
• багажды алуға көмектесу (барлық әуежайда бола бермейді).

Фаст-трек қызметі кімдерге қолайлы?

Фаст-трек уақытын үнемдегісі келетін және әуежайда ұзақ кезек күткісі келмейтін жолаушыларға ыңғайлы. Әсіресе мына адамдарға пайдалы болуы мүмкін:

• Балалы отбасыларға — балалармен бірге әуежайдағы тексерулерден тез әрі жайлы өтуге мүмкіндік береді.
• Егде жастағы жолаушыларға — ұзақ уақыт кезекте тұрудың қажеті болмайды.
• Мүгедектігі бар жолаушыларға — әуежай ішінде жүріп-тұруды жеңілдетіп, тексерулерден тез өтуге көмектеседі.
• Іскерлік сапардағы жолаушыларға — уақыт үнемдеуге мүмкіндік береді.
• Рейс ауыстыруға уақыты аз жолаушыларға — бақылау кезеңдерінен тезірек өтуге көмектеседі. Әсіресе бөлек брондалған рейстерде багажды қайта алып, жаңа рейске қайта тіркелу қажет болса, уақытты айтарлықтай үнемдеуге болады.
• Кезекте тұрғанды ұнатпайтындарға — әуежайдағы рәсімдерді тезірек аяқтауға мүмкіндік береді.

Кейбір халықаралық әуежайларда, мысалы, Ыстанбұл әуежайында (IST), егде жастағы жолаушылар мен мүгедектігі бар адамдарға арнайы көмек көрсетіліп, кейбір тексерулерден басымдықпен өтуге мүмкіндік беріледі. Мұндай қызмет барлық әуежайда бірдей емес, сондықтан сапар алдында шарттарын тексеріп алған дұрыс.

Осы тақырыпта басқа не бар?

Балаға ұшақ билетін қалай сатып аламыз?

Бала арбасын ұшаққа ала кіруге бола ма: ереже мен шектеу

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Фаст-трек пен Priority Pass бір ме?

Фаст-трек пен Priority Pass — екі бөлек қызмет.

• Фаст-трек қауіпсіздік тексерісі мен паспорт бақылауында кезек күтпей, жылдам өтуге мүмкіндік береді.
• Priority Pass әлемнің көптеген әуежайындағы бизнес-залдарға (лаунждарға) кіруге мүмкіндік береді.

Кейбір әуежайларда Priority Pass иелері фаст-трек қызметін де пайдалана алады. Бірақ мұндай мүмкіндік барлық жерде жоқ, сондықтан алдын ала тексерген жөн.

Осы тақырыпта басқа не бар?

Әуежайдағы бизнес-зал: онда тегін не ақша төлеп кірудің түрлі жолы

Фаст-трек қызметі қанша тұрады?

Фаст-трек бағасы әуежай мен таңдалған қызмет түріне байланысты өзгереді. Кейбір әуежайларда тек қауіпсіздік тексерісінен жедел өтуге болады. Ал кейбірінде жолаушыны алып жүру немесе багаж алуға көмектесу сияқты қосымша қызметтер де бар.

Ескерту: бағалар маусымға, әуежай тарифіне және таңдалған қызмет пакетіне қарай өзгеруі мүмкін.

Фаст-трек қызметіне қалай тапсырыс беруге болады?

Фаст-трек қызметіне бірнеше жолмен тапсырыс беруге болады:

• Әуе билетін сатып алу кезінде — кейбір әуе компаниялары фаст-трек қызметін қосымша ұсынады.
• Әуежайдың ресми сайты арқылы — көптеген халықаралық әуежайда қызметті онлайн брондауға болады.
• Әуе компаниясы арқылы — кейбір тасымалдаушылар жолаушыларына фаст-трек қызметін ұсынады.
• Премиум банк карталары арқылы — Visa Infinite, Mastercard World Elite және басқа да премиум карта иелері бұл қызметті тегін немесе жеңілдікпен пайдалана алады.

Қандай жағдайда фаст-трек қажет емес?

Фаст-трек барлық жолаушыға бірдей қажет емес. Мына жағдайларда бұл қызметке қосымша ақша төлемеуге болады:

• рейсіңіз әуежайда адам аз болатын уақытқа жоспарланса;
• тек қол жүгімен ұшсаңыз және әуежайда тіркелудің қажеті болмаса;
• шағын әуежайдан ұшсаңыз;
• әуежайда кезек болмаса;
• әуежайға ертерек келсеңіз;
• билетіңізде немесе мәртебеңізде басымдықпен қызмет көрсету қарастырылған болса.

Жиі қойылатын сұрақтар

Фаст-трек қызметін транзит кезінде пайдалануға бола ма?

Иә, бірақ мұндай мүмкіндік барлық әуежайда бола бермейді. Егер транзиттік әуежай фаст-трек қызметін ұсынса, оған алдын ала тапсырыс беруге немесе әуежайдың өзінде сатып алуға болады.

Эконом-класс билетімен фаст-трек пайдалануға бола ма?

Иә, фаст-трек билет класына байланысты емес. Эконом-класс жолаушылары да қосымша ақы төлеп, бұл қызметті пайдалана алады.

Фаст-трек қызметін билеттен бөлек сатып алуға бола ма?

Иә. Көптеген әуежайда фаст-трек қызметін әуе билетінен бөлек сатып алуға болады. Оған әуежайдың ресми сайты, әуе компаниясы немесе арнайы сервистер арқылы тапсырыс беруге болады.

Рейсіме кешігіп бара жатсам, фаст-трек көмектесе ме?

Фаст-трек кезекте кететін уақытты қысқартуға көмектеседі, бірақ рейске үлгеретініңізге кепілдік бермейді. Егер рейске тіркелу не отырғызу аяқталып қойса, фаст-трек көмектесе алмайды.

Барлық әуежайларда фаст-трек қызметі бар ма?

Жоқ, фаст-трек көбіне ірі халықаралық әуежайларда ұсынылады. Сондықтан сапар алдында ұшатын немесе қонатын әуежайыңызда мұндай қызметтің бар-жоғын тексерген дұрыс.

Фаст-трек қызметін рәсімдеген дұрыс па?

Фаст-трек — әуежайда уақыт үнемдеуге көмектесетін ыңғайлы қызмет. Ол әсіресе балалы отбасыларға, іскерлік сапармен жүрген жолаушыларға, егде жастағы адамдарға және рейс ауыстыруға уақыты аз жолаушыларға пайдалы.

Ал әуежайда адам аз болса, ертерек келсеңіз немесе билетіңізде басымдықпен қызмет көрсету қарастырылса, фаст-трек үшін қосымша ақы төлеудің қажеті болмауы мүмкін.

Ақша үнемдегіңіз келсе, әуежайға ертерек келуге, адам аз болатын уақыттағы немесе түнгі рейстерді таңдауға болады. Бұл да ұзақ кезекке тап болмауға көмектеседі.

Суретті салған — маша пипетка.