Әуежайдағы бизнес-зал: онда тегін не ақша төлеп кірудің түрлі жолы

Ұшаққа қашан отырғызар екен деп тағатсыздана күткен кезіңіз болды ма? Көпшілік жиналатын күту залындағы у-шу кейде шаршатып жібере ме? Осындайда уақытты бизнес-лаунжда өткізсеңіз болады. Онда жүрек жалғап, біраз тынығып ала аласыз. Бұл мақаламызда бизнес-лауждың не екенін және онда қалай тегін кіруге болатынын айтамыз. 

Бизнес-зал деген «лакшери» сізге неге керек?

• 

  Бизнес-зал
• 

  Кәдімгі ұшып кету залы

Бизнес-зал немесе бизнес-лаунж — жолаушының рейсті күтуін барынша жайлы ету үшін жасалған аймақ. Ондағы орындар кең, жұмсақ әрі ыңғайлы. Душ кабинкалары, тегін интернет пен швед үстелі де бар. Кейбіріне массаж креслолары қойылған, балалар жүретін ойын алаңдары да табылады.

Бизнес-лаунжда адам қарасы көп болмайды. Ал қызметкерлер залға кірерде шуламаңыз деп ескертеді. Кейбір әуежай ереже бұзғандарды лаунж аймағынан шығарып жіберуі мүмкін. Сондықтан бұл аумақтар көбіне тып-тыныш болады.

Бизнес-зал туралы түрлі миф бар. «Онда костюм-шалбар кигендер ғана кіреді» деп жатады. Жоқ, ешқандай дресс-код жоқ. «Ол жерге тек бизнес-класс билетін алғандарды кіргізеді» деп ойлайтындар бар. Бірақ билет түріне қатысты ешқандай шектеу жоқ. «Бұл аймаққа кіру өте қымбат» деп ойласаңыз да қателесесіз, ондағы баға әуежай кафесінде түстенгеннен арзанырақ шығуы мүмкін.

Бизнес-залға қалай кіруге болады?

Бірінші әдіс: бизнес-класпен ұшу

Бизнес-класс немесе бірінші класс билеттерінің жарнасына бизнес-лаунжға кіру ақысы да кіреді.

Екінші әдіс: миль жинау

Мысалы, Air Astana-мен ұшқан сайын сіз еңсерген мильдер жинақталып, жолаушы ретінде мәртебеңіз артады (Nomad Club мүшесі болсаңыз) және белгілі бір деңгейде жеткенде бизнес-лаунжға тегін кіре аласыз.

Үшінші әдіс: банк картасы арқылы

Бұл — саяхатшыларға бизнес-залға кірудің ең тиімді жолы. Қазақстанның көп банкі халықаралық Priority Pass немесе LoungeKey бағдарламаларына қосылған премиум карталарды шығарады (Visa Infinite, Visa Signature, Mastercard World Elite және т.б.). Бұл қызметтер «көрінбейтін кілт» сияқты жұмыс істейді: олар бүкіл әлем бойынша жүздеген демалыс залының есігін ашады. Премиум карталарды қолданғанның ең ұтымды тұсы — бизнес-залдарға тегін кіресіз (кейде шектеусіз қолдануға болады, кейде жылына тек 2-4 рет қана тегін кіре аласыз).

Тағы осы тақырыпта

Саяхатқа шыққанда қандай банк картасын алған жөн

Төртінші әдіс: кіру құнын төлеу

Кейбір бизнес-залға бір реттік кіру құнын сол жерде не онлайн сатып аласыз.

Астанадағы Нұрсұлтан Назарбаев халықаралық әуежайында бірнеше бизнес-лаунж бар: ішкі рейстерге арналған зал, Air Astana әуе компаниясының The Shanyraq бизнес-лаунжы, сондай-ақ Халықаралық рейстерге арналған Business Lounge Turan және Sapar Lounge залдары. Бір реттік кіру құны ересек жолаушыға — 20 328 теңге, ал  4–15 жастағы балаларға — 10 164 теңге.

Ал Алматы халықаралық әуежайында Аir Astana лаунжы The Shanyraq бизнес-класс жолаушыларына, сондай-ақ Nomad Club бағдарламасының Алтын және Бриллиант деңгейіне жеткен жолаушыларына арналған. Бұл залға кіру бағасы — 35 000 теңге.

Қазақстандағы залдар бойынша гид

Алматы әуежайы (ALA): Алматы халықаралық әуежайында 2-терминалда Аir Astana лаунжы The Shanyraq (201-қақпасына қарама-қарсы тұр) және Extime Lounge (CIP залы) бар. CIP залы бар кешен екі залды қамтиды: бизнес-холл және VIP клиенттерге арналған зал. Кіру бағасын жоғарыда жазып кеттік.

Астана әуежайы (NQZ): Астана халықаралық әуежайында T2 терминалында Аir Astana лаунжы The Shanyraq орналасқан (D04 қақпасына қарама-қарсы тұр). T1 терминалында Business lounge Turan мен Sapar Lounge бар. CIP зал да тұр. Бағасы ұшып кететін жолаушыларға — 22 000 теңге, ұшып келгендерге — 13 200 теңге. 2–12 жастағы балалар 50% жеңілдікпен кіре алады. 

Шымкент әуежайы (CIT): CIP-залға кіру бағасы ұшып кететін жолаушыларға — 23 500 теңге, ұшып келгендерге — 15 000 теңге. CIP залы әуежайдың негізгі ғимаратының оң жағында және жеке және қызметтік көліктерге арналған жеке тұрағы бар. 2–12 жастағы балалар 50% жеңілдікпен кіре алады. 

Ақтау әуежайы (SCO): CIP-залға кіру бағасы ұшып кететін жолаушыларға — 16 000 теңге, ұшып келгендерге — 13 000 теңге. 2–12 жастағы балалар 50% жеңілдікпен кіре алады.

Атырау әуежайы (GUW): CIP-залға кіру бағасы кез келген жолаушыға — 30 000 теңге. 2 жасқа дейінгі балалар CIP залына тегін кіре алады. 2–12 жастағы балалар 50% жеңілдікпен кіре алады.

Қысқа-нұсқа кеңес

• Банк картаңыз ұсынатын қызметтерді тексеріп көріңіз: сіз бизнес-лаунжға тегін кіре алуыңыз мүмкін.
• Бір әуе компаниясының билетін жиі алатын болсаңыз, адалдық бағдарламасына қосылып алыңыз.
• Ұшып кетерде қандай демалыс бөлмелері бар екенін білу үшін әуежайдың веб-сайтын тексеріңіз.
• Кіру ақысын әуежай ішіндегі кафелердің бағасымен салыстырыңыз. Кейде демалыс бөлмесінің ақысы ондағы бағадан арзанырақ болуы мүмкін.

Енді демалысыңызды бұрынғыдан да жайлы, еш шаршамайтындай етіп өткізе аласыз. Сөмкелеріңізді құшақтап, рейсіңізді күтіп отыра бермей, саяхатыңызды әуежайдан-ақ нағыз демалысқа айналдырыңыз!

 Суретті салған — маша пипетка.