Спа, пицца мен жаңа ойыншық: Астана мен Алматыда итпен қыдыратын жерлер
Сізді итіңізбен тамаша демалыс өткізсін деп, сол жағалаудағы таңғы астан бастап, Алтын шаршыдағы барға дейінгі ерекше жерлерді тізіп шықтық.
Жаз — итпен сыртта ұзақ серуендегенге ең қолайлы мезгіл. Күндіз аздап ыстық болғанымен, кешке салқын түседі. Сондықтан ит-мысыққа жайлы жерлердерде қыдырып, ойнап, дәмді ас ішіп, кешкісін барларда сусын ішіп, бір сергіп алуға болады.
Біз Астана мен Алматыда ит ұстайтын оқырманға арнап дайын маршрут жасап шықтық. Бір күннің ішінде террасада таңғы ас ішіп, әдемі көшелер бойында серуендеп, арнайы алаңда ойнап, асықпай түскі ас ішіп, итіңізді сәндеп, шамаңыз жетсе, күнді pet-friendly барда аяқтауға болатын бағыттарды ұсынамыз.
Астана
Астанада жол ұзақ, күн де жиі құбылатындықтан, қайда барарыңызды алдын ала жоспарлап алған дұрыс. Сондықтан итіңізді шаршатып алып, ақырында оны көтеріп жүрмес үшін ыңғайлы маршрут жазып шықтық. Жол бойында дәмді ас ішіп, жап-жасыл саябақтарда серуендейсіз.
«Кекстегі» таңғы ас
Күніңізді «Кекс» наубайханаларының бірінен бастаңыз. Іші жайлы әрі жарық. Таңғы асқа сағат 12:00-ге дейін кофе беріледі. Итіңіз де назардан тыс қалмайды: алдына су құйып, дәмді тіскебасар береді. Үй жануарын міндетті түрде қарғыбаумен алып жүру керек және табанын сүртіп кіргізген жөн. Егер өзіңізбен бірге көрпе не жаялық алып келсеңіз, итіңізді орындыққа не диванға отырғызуға болады.
Мекенжайы: Әл-Фараби даңғылы, 9.
Итіңізге — груминг, өзіңізге — спа
Алда адам көп жерге баратын болғандықтан, демалыс күнін өзіңізді де, итіңізді де ретке келтіруден бастауға болады. RedHotChiliPets груминг орталығында итіңізді жуындырып, жүнін тарап, қысқартып береді.
Мекенжайы: Керей, Жәнібек хандар көшесі, 50/1.
Итіңізді күтіп отырғанда өзіңіз де демалып үлгересіз. Груминг орталығының жанында Chinese Head Spa бар. Мұнда денеге арналған түрлі спа қызметтері бар, бірақ негізгі бағыты — шаш күтімі. Басыңызды жуып, бірнеше әдіспен массаж жасап, пилингімен аяқтайды.
Мекенжайы: Әлихан Бөкейхан көшесі, 11.
Серуен
Енді иттерге арналған алаңға қарай аздап жаяу жүресіз. Тәуелсіздік даңғылымен солтүстікке қарай жүріп, «Жастар» саябағына барыңыз. Отан қорғаушылар алаңының ар жағында ит серуендетуге арналған үлкен алаң бар. Мұнда итіңізді қарғыбаудан босатып, жүгіртіп, басқа иттермен ойнатып, арнайы кедергілер алаңында жаттықтыруға да болады. Жаяу барсаңыз, жолай Цирк жанындағы шағын саябақта демалып алыңыз.
Мекенжайы: Тәуелсіздік даңғылы мен Қажымұқан көшесінің қиылысы.
Сауда
Жақын жерде «Царь зверей» зоодүкені орналасқан. Онда итіңізге жаңа ойыншық не пайдалы дәм алып бере аласыз. Сондай-ақ сатушылардан кеңес алып, үй жануарына арналған ерекше заттар табуға болады. Мысалы, жаздың ыстығында салқын жатуға арналған арнайы салқындатқыш төсеніш бар.
Мекенжайы: Александр Пушкин көшесі, 7.
Түскі ас
Жақын маңдағы TokpokkiGo корей дәмханасында түскі ас ішуге болады. Бұл орын да pet-friendly. Егер k-pop жанкүйері болсаңыз, мұнда сізге тіпті қызық болады. Ас мәзірінде рамен, токпокки, кукси мен кимпаб сияқты дәстүрлі корей тағамдары бар.
Мекенжайы: Александр Пушкин көшесі, 9.
Бар
Кешке шамаңыз жетіп жатса, Бәйтерек маңындағы барларға дейін серуендеп барыңыз. Бұл маңда өте жайлы екі орын бар: әйгілі ретро-рюмочная «Ну, шоты» мен «Үйде» тапрумы (сыра қайнататын зауыт жанындағы бар). «Ну, шоты» кейде қайырымдылық мақсатындағы шағын концерттер өткізіп, жиналған қаржыны жануарлар панажайына аударады. Екі барға да итпен кіруге болады.
Мекенжайы: Дінмұхамед Қонаев көшесі, 14.
Алматы
Алматы — асықпай серуендегенге таптырмас қала. Қаланың ықшам орталығы мен ағаштардың көлеңкесі бірнеше сағат бойы емін-еркін қыдыруға мүмкіндік береді. Біз ұсынған маршрут бір орыннан екіншісіне тез-ақ жетіп алуға болатындай етіп жасалған.
Таңғы ас
Терренкурдағы Big Apple мейрамханасында таңғы ас ішіңіз. Кең терраса өзен жағасында орналасқан. Келуші көп болғанымен, орын жиі босап тұрады, өйткені адамдар серуенге асығады. Қызметкерлер иттерді жақсы көреді. Өзен жағасында Vanilla, Penka және ең жоғарғы бөлікте орналасқан жаңа Aspan мейрамханасы сияқты басқа да танымал орындар бар.
Мекенжайы: Рубинштейн көшесі, 24/1.
Серуен
Өзіңізді де, итіңізді де қатты шаршатып алмаңыз — алда ұзақ та қызық күн күтіп тұр. Кофеңізді ала шығып, суы гүрілдеп аққан Терренкур бойымен төмен қарай баяу жүріңіз. Жол бойында иттер ойнайтын арнайы алаңдар мен қоқыс пакеттеріне арналған бағандар орнатылған. Шаршасаңыз, жолдағы шағын кафелердің біріне кіріп демалуға не өзен жағасындағы жұмсақ орындықтарға отыра тұруға болады.
Екеуіңізге де жайлы демалыс
Ендігі бағытымыз — Алтын шаршы. Сондықтан өзіңіздің шашыңызды да сәндеп, итіңіздің жүнін де ретке келтіріп алыңыз. ProХвост студиясында шамамен 90 минуттың ішінде итіңізді толық жуындырып береді. Мамандар жануарлармен жақсы тіл табысады, сондықтан жуындырудан бастап қырқуға дейінгі барлық процедура тыныш өтеді.
Итіңізді күтіп отырған уақытта өзіңізге де уақыт бөліңіз. Сол ғимаратта орналасқан Dalida сұлулық салонында спа қызметтері бар. Мұнда денеңізді демалдыратын массаж жасатып, шашыңызды қысқартып, маникюр жасатып не бет пен денеге арналған күтім қызметтерін таңдауға болады. Мұнда әйелдер де, ерлер де кіре алады.
Мекенжайы: Достық даңғылы, 97.
Серуен
Екеуіңіз де дайын болдыңыздар. Енді Назарбаев пен Абай қиылысына дейін жүріп, одан кейін негізгі арық бойымен Желтоқсан көшесіне жетіңіздер. Сол жерден Бөгенбай батыр көшесіне қарай асықпай төмен түсіңіз.
Түскі ас
Бөгенбай батыр көшесіне жеткенде ит иелері мен дәмді пиццаны ұнататындардың сүйікті орны — Make Love Pizza көзге түседі. Іші кең әрі жарық, бірақ күн жақсы болса, сыртта отырған жөн. Мұндағы бұқтырылған сиыр етінен жасалған фаршы мен шие тұздығы қосылған Bombora пиццасы ұзақ серуеннен кейін тойымды ас болады.
Мекенжайы: Бөгенбай батыр көшесі, 138.
Сауда
Тамақтан кейін Желтоқсан көшесімен төмен қарай жүріңіз. Сол жақ беттен «Любимцы» зоодүкенін көресіз. Осы жерден жаңа қарғыбау не түрлі дәм сатып алуға болады.
Мекенжайы: Гоголь көшесі, 78.
Серуен мен демалыс
Кешке қарай 28 гвардияшы-панфиловшы саябағына барыңыздар. Әйтеке би көшесімен жүрсеңіз, Sinichki.store кәдесый дүкенін көресіз. Мұнда i.love.almaty.kz бренді бар. Осы брендтің стикерлерінен түскен қаржының 50%-ы «Новый шанс» жануарлар панажайына аударылады. Суреттердегі ит-мысықтар сол панажайда тұрады. Бәлкім, солардың арасынан өзіңізге тағы бір дос тауып қаларсыз.
Мекенжайы: Әйтеке би көшесі, 53.
Кешке
- «Шабдалы дәмді Майя» моктейліне шабыт берген Майя
- Тоша
- Оскар
Саябақтың төменгі жағында, Уәлиханов көшесінде орналасқан Barbolsyn бары да — pet-friendly орынның бірі. Қазір онда жазғы коктейльдер мәзірі бар. Шабдалы дәмді Майя, қауын дәмді Оскар мен көкжидек дәмді Тоша — «Новый шанс» панажайындағы үш иттің құрметіне жасалған сусындар. Арнайы коктейльдердің әрқайсысынан түскен қаражаттың 20%-ы қайырымдылыққа аударылады.
Мекенжайы: Уәлиханов көшесі, 47.
Фото: Никита Данилин.
