Алматыда дәмді лағманды қай жерде жеуге болады
Қаланың орталығындағы лағманның дәмдісін тауып бердік.
Лағман — маңызды дүние. Алматылықтарды лағманмен таңғалдыру оңай емес, өйткені әркім өзі қалайтындай серпімді кеспесі, қою әрі хош иісті сяй (лағман тұздығы) және жағымды атмосферасы бар жасырын орны бар. Осы мәтінді жазып отырып қатты толқыдым. Мен үшін сүйікті орындардың тізімін жасау — жауапты іс. Себебі мен лағманды шын мәнінде қатты бағалаймын.
Алматылықтар ең дәмді лағманды Барахолкада, «Достықта» және қаланың шеткі аудандарында әзірлейді дейді. Солай да шығар, бәлкім. Бірақ бәрінде бірдей көлік немесе гастрономиялық ләззат іздеп алысқа баруға уақыт бола бермейді. Ал лағман — аяқасты пайда болатын тілек. Сондықтан бұл мақалаға туристер мен қала тұрғындары оңай жете алатын орталықтағы орындар енді.
«Амир»
Мекен жайы: Әйтиев көш. 40
Жұмыс тәртібі: күнде 10:00-ден 22:00-ге дейін
«Амир» — бұл дүнген тағамдарының отбасылық дәмханасы. Екі қабатты дөңгелек ғимаратта орналасқан, балаларға арналған аймағы бар. Егер жанұяңызбен дәмді тамақтанғыңыз келсе, бұл жер таптырмас орын. Мәзірде жылы салаттардан бастап, жұсай қосылған мәнті мен тұшпараға дейін бәрі бар. Алайда біздің назарымыз тек лағманда болды.
Мұнда кез келген талғамға сай лағман табуға болады: гуйру, суйру, үй лагманы, ашлямфу, үш түрлі тұздықпен дайындалған лағман, цомян және жұсай цомян. Бағалары 2490-2700 теңге аралығында. Порциялар өте үлкен, қамыры серпімді, сяйдің дәмі жақсы үйлестірілген, ал ет мөлшері тойып жеуге жеткілікті. Маған ең қатты ұнағаны — жұсай цомян (2590 теңге). Оның дәмі аздап ащылау, хош иісті жұсай мен жұмсақ омлет ерекше үйлеседі.
Chapsan
Мекен жайы: Наурызбай батыр көш, 50
Жұмыс тәртібі: күнде 17:00-ден 05:00-ге дейін
Аталмыш дәмхана лағман әлеміндегі жаңадан ашылған орын. Бұл блогер Назим Мисановтың жобасы. Мекеме кәдімгі дәмханаларға ұқсамайды және ұйғыр стритфуды ретінде ашылған. Кіреберісте тақиялар қойылған тапшан бар, ал ішке кіргенде минимализм стилинде жасалаған. Тапсырыс кассада қабылданады, қызмет көрсету бағасына кірмейді. Бәрі жылдам, қарапайым әрі ыңғайлы.
Мәзірде тек 15 тағам түрі бар. Мұнда төрт түрлі цомян, үш түрлі лағман, ашытылған және ашытылмаған қамырдан жасалған мәнтілер (әртүрлі салмамен), қуырдақ, манпар, ранпиза (суық лағман), опкя есип (тұздықта пісірілген қой өкпесі мен шұжықтар), ет қосылған фри, қуырылған күріш бар. Мен гуйру лағманға (2190 теңге) тапсырыс бердім. Оның порциясы бір адамға жеткілікті, кеспесі серпімді, сяй дәмді, бірақ ет аздау болды. Ерекше ұнағаны – әр үстелде сірке суы тұрды. Осылайша, қажет мөлшерін қосып, тағамның дәмін бұзбайсыз.
Егер жылдам, дәмді әрі жақсы әуенмен тамақтанғыңыз келсе, Chapsan керемет таңдау, бірақ бұл отбасылық жылы кешкі асқа арналған орын емес.
«Орал»
Мекен жайы: Көк базар
Жұмыс тәртібі: 10:00-ден 18:00-ге дейін
Бұл мейрамхана да, дәмхана да емес. Бұл Көк базарда оналасқан нағыз асхана. Жүрегімнің түкпірінде жасырып жүрген орнымды сіз міндетті түрде бағалайсыз деген үмітпен бөлісіп отырмын. Маған бұл жер туралы ұйғыр құрбым айтқан еді (ал ол жақсы лағманның қандай болатынын сөзссіз біледі!).
Жету жолын жаттап алыңыз: басты кіреберістен кіріп, солға бұрылып, көшеге шығатын баспалдақпен төмен түсу керек. Түскеннен кейін тағы да солға бұрылып, «Орал» деген жазуды іздеңіз. Егер адасып кетсеңіз, сатушылардан сұрауға болады.
Мұнда дизайнерлік жөндеу де, ерекше сервис те жоқ, бірақ адамдар қайта-қайта келетін ең басты керемет дәм бар. Мекемені 25 жыл бұрын Қытайдан келген қандастар ашқан. Атауы да жайдан-жай қойылмаған. «Орал» – «қайта орал» тіркесінің қысқартылған нұсқасы. Иелері мұнда алғаш келген әр адам міндетті түрде қайта оралсын деп ниеттенген. Шынымды айтсам, бұл шынымен жұмыс істейді!
Мәзірде шамамен 35 тағам бар, оның ішінде лағманның бірнеше түрі бар: гуйру, суйру, саңырауқұлақпен, жұсаймен, жұмыртқамен, балдыркөк қосылған т.б. Бағалары 1800-2200 теңге аралығында. Міндетті түрде жұсай не балдыркөкпен дайындалған лағманды жеп көріңіз. Серпімді кеспе, дәмді ет және көкөністердің балғындығы оны ерекше дәмді етеді. Және осының бәрі базардың қақ ортасында!
«Гранат»
Мекен жайы: Абылай хан көш, 105
Жұмыс тәртібі: дүйсенбі-сенбі 10:00-ден 00:00 дейін
Егер сіз шығыстық интерьерде лағман жегіңіз келсе, онда сізге осында келу керек. Дәмхананың мәзірі сұрақтар туындатуы мүмкін. Мұнда әйгілі алат самсасынан бастап қуырылған рамен мен том-ямға дейін бар. Бірақ бұл жердің нағыз мақтанышы – лағман. Дәмханада оның 14 түрі бар! Еті көптеу қосылған, саңырауқұлақпен, тіпті тофу қосылған түрлері де бар.
Менің таңдауыма келсек, мен жұсай-руды (2 655 теңге) жақсы көремін. Оған сиыр еті, болгар бұрышы, жұсай мен жұмсақ омлет қосылады. Бұл кез келген қонақтың қарнын тойдыратын тамақ. Порциясы үлкен, ал ет пен омлеттің үйлесімі – ауыр күннен кейінгі мінсіз comfort food. Бірақ мұндағы қызмет көрсету кейде ақсап жатады, сондықтан қонақ шақыруға кеңес бермеймін.
Paradise отбасылық асханалар желісі
Мекен жайлары:
Радлов көш, 5г
Рысқұлбеков көш, 18а
Сейфуллин көш, 519/1
Достық көш, 50
Жұмыс тәртібі: күнде 11:00-ден 23:00-ге дейін
Иә-иә, сізді таңғалдыруым екі талай. Paradise-ты бәрі біледі. Мен бұл жерді желіге айналмай тұрған кезінен білемін. Ол уақытта тағамдар порциясы үлкен, бағасы қолжетімді шағын асхана болатын. Қазір Paradise – қала бойынша филиалдары бар ірі желі. Бағалары өсті, порциялар кішірейді, бірақ дәм мен тұрақтылық сол қалпы.
Бұл асхана – отбасыңызбен немесе достарыңызбен тамақтанғыңыз келсе тамаша орын. Мәзірде: гуйру лағман, суйру лағман, үй лағманы, жұмыртқа мен көкөністер қосылған вегетариандық лағман, сондай-ақ төрт түрлі цомян бар: гуйру, суйру, гямбян және дин-дин. Порциялары бір адамға ыңғайлы, қамыры әрдайым серпімді, еті жеткілікті, ал көкөністері дәмді және қытырлақ болып қалады.
Paradise-тың тағы бір үлкен артықшылығы – қызмет көрсету. Даяшылар әрдайым сыпайы, мәзір қазақ және орыс тілдерінде бар. Атмосфера бойынша таңдасақ, Достықтағы филиал ең әдемісі, бірақ ол жерде тағамдар бағасы сәл жоғары. Мысалы, онда лағман 2 545 теңге тұрса, басқа жерлерде – 2 195 теңге.
Жалғыз кемшілігі – танымалдылығы. Маусымдық кезеңде, демалыс күндері немесе ауызашар уақытында Paradise-та кезек күтіп, бір сағатқа дейін тұруыңыз мүмкін. Әсіресе алдын ала тапсырыс бермеген жағдайда қиын.
Суретті салған Ольга Цай.
