Көлсай көлдері: қайда орналасқан, қалай жетіп, нені тамашалаймыз
Көлсайға алғаш барушылар мен жиі келетіндерге: толық гид
Инстаграмм парақшаларға қарасаң, жұрттың бәрі Көлсай көлдеріне барып қойған сияқты. Ал сіз ше? Бармаған болсаңыз, бәрін дұрыс істеуге көмекші болар нұсқаулық жаздық. Көлсай көлдері — бұл жай ғана әсем суреттер ғана емес,алдын ала дайындықты қажет ететін шытырман оқиға.
Бәрі көп жыл бұрын болған жер сілкінісінен басталды. Сол кезде көшкін өзеннің ағысын бөгеп, Солтүстік Тянь-Шань тауларының қойнауында үш көлден тұратын ғажайып тізбек пайда болды. Біз сізге бұл табиғат ғажайыбына қалай жетуге болатынын, суықта тоңып қалмаудың жолдарын және төменгі көлдің жағасында суретке түсуден бөлек, тағы не істеуге болатынын тізбектеп, бір нақты гидке жинадық.
Көлсай көлдері қайда орналасқан
Таңғажайып Көлсай көлдері Алматы облысының Кеген ауданындағы таулы аймақта орналасқан.
Олар Алматыдан шамамен 300 шақырым қашықтықта орналасқан. Қырғыстан-Қазақстан шекарасына жақын. Бұл аумақ толықтай «Көлсай көлдері» мемлекеттік ұлттық табиғи паркіне тиесілі, сондықтан кіру ақылы және мұнда белгілі бір ережелерді сақтау қажет.
Мекен жайы: Алматы облысы, Кеген ауданы, Құрметі ауылы.
Жұмыс уақыты: 10:00-ден 22:00-ге дейін.
Билет бағасы: Экологиялық алым — ересектер үшін 926 теңге, студенттерге — 694,5 теңге, оқушыларға — 463 теңге. Жеңіл автокөлікпен кіру құны — 2 753 теңге. Бағалар өзгеруі мүмкін, сондықтан нақты ақпаратты ұлттық парктің ресми сайтынан тексерген жөн.
Қалай жетеміз
Жеке көлігіңізбен: еркіндік пен тәуелсіздік
Ең тиімді тәсіл – жеке көлікпен бару. Алматыдан Құлжын тас жолымен шығып, Саты ауылына қарай жол тартыңыз. Алматы – Шелек – Кеген – Саты – Көлсай бағыты бойынша жүріңіз. Жол сапасы жалпы жақсы, бірақ соңғы бірнеше шақырымда кедір-бұдыр, сондықтан төмен көліктерге ыңғайсыз болуы мүмкін. Саты ауылынан әрі қарай жолды табу оп-оңай. Көлсай көліне қарай жол белгі көп жерде орнатылған.
Біз Көлсайға өз көлігімізбен бардық. Алматыдан жол шамамен төрт сағаттай уақыт алды. Жалпы алғанда, бұл ең ыңғайлы жол сияқты көрінді: ешкімге тәуелді емессіз, өз ырғаңызбен жүресіз, жолай қалаған жерге соғып өтуге де болады. Жолдың жағдайы жақсы: асфальт көп бөлігінде бар, тек көлге апаратын соңғы шақырымдарда жол сәл ойлы-қырлы — әсіресе төмен көліктер үшін жайсыз болуы мүмкін. Біз кроссовермен шықтық. Еш қиындықсыз жеттік. Жол табу да қиын емес: Саты ауылына кіргеннен кейін Көлсайға апаратын бағыттаушы белгілер көп, әрі жергілікті тұрғындар да қуана көмектеседі.
Тур арқылы: уақытыңыз тапшы, бірақ көлдерді қатты көргіңіз келсе
Турларды әлеуметтік желілерден оңай табуға болады (іздеу жолағына бірнеше сұраныс жазсаңыз, алдағы бірнеше күн бойы сізге түрлі жарнамалар шыға береді). Бір күндік турлар шамамен 15 000 теңгеден басталады, әдетте оған Қайыңды мен Шарын да қосылады. Бірақ ондай сапар жылдам өтетініне дайын болыңыз. Уақытыңыз болса, екі күндік турды таңдаған дұрыс. Олардың бағасы 27 000 теңгеден басталады. Сонда түнеп, асықпай Көлсай көлдері мен Алматы маңындағы табиғатты асықпай тамашалауға тамаша мүмкіндік.
Мен Көлсайда әртүрлі турмен қатарынан екі күн болдым. Бірақ екі күннен екі түрлі әсер алдым. Бірінші күні бізде қарқынды маршрут болды: Көлсай көлдері, Қайыңды көлі, Шарын. Көлдердің өзіне бөлінген уақыт өте аз болды. Тек суретке түсіп үлгердім. Онда жай «бардық» деп айтуға бола барғандай сезіндім. Келмей жатып, кетіп қалғандай болдық.
Ал келесі күні тек Көлсайға арналған турға бардым. Мүлдем бөлек әсер! Асықпай серуендеп, қайықпен жүзіп, су жағасында тыныш отырдым. Міне, осындай формат — нағыз рақат.
Көлсайда не көруге болады
Міне, негізгі үш нүктеге арналған «жеңілден қиынға» қарай құрастырылған бағыт.
- Төменгі Көлсай. Ең қолжетімді және «игерілген» орын. Мұнда барлық инфрақұрылым бар: қонақ үйлер, дәмханалар, киіз үйлер, дәретханалар, сондай-ақ қайық пен катамаран жалға беріледі. Тыныш серуендеуге және сол атақты қою көгілдір судың аясында фотоға түсуге тамаша орын.
- Ортаңғы көл (Мыңжылқы). Жоғарырақ орналасқан, онда жету үшін жаяу шамамен 7-8 км (3-4 сағат) жүру керек немесе атпен баруға болады. Оларды жалдау құны сағатына 5 000 теңгеден басталады, бұл жолға кететін уақытты едәуір қысқартады. Соқпақ қылқан жапырақты орман арқылы өтеді. Бұл жерде туристер аз, табиғат аясы бастапқы жабайы күйінде сақталған.
- Жоғарғы көл. Мұнда тек ең табанды жандар ғана жетеді. Ортаңғы көлден тағы 12 шақырым қиын жолды бағындыру керек. Ол үш көлдің ішіндегі ең кішкентайы, бірақ жолдың қиындығы толықтай ақталады. Оның қасында сізді тыныштық пен ғажап көріністер күтеді.
Қосымша трек: Қайыңды көлі
Шамаңыз бен күшіңіз жетсе, Сатыдан 11 шақырым жердегі Қайыңды көліне соға кетіңіз. Жолы қиындау. Жақсы жүретін жол талғамайтын көлік қажет. Бірақ су астында қалған орман көрінісі, көгілдір судан қылтиып тұрған шырша діңдері — көруге тұрарлық.
Қай кезде барған жөн
Көлсай көлдері жыл бойы әдемі, бәрі сіздің не көргіңіз келетініне байланысты.
- Жаз (маусым-қыркүйек): маусымның қыза түсетін уақыты. Жылы ауа райы, жап-жасыл айнала, трекингке шығуға тамаша уақыт. Кемшілігі: адам саны өте көп.
- Күз (қыркүйек-қазан): фотографтар уақыты. Орман сарғаяды, туристер азаяды, тап-таза ауа.
- Қыс (қараша-наурыз): нағыз ертегі дерсің. Қар, тыныштық және мұз қатқан көлдің айдынында коньки тебу. Бірақ аязға және қиын жолға дайын болыңыз.
- Көктем: өліара кезеңі, жолға шығуға болады, бірақ жалғыз аяқ жолдар дымқыл болатынына және салқын ауа райына дайын болыңыз.
Желтоқсанда Көлсайда болдым. Алматыдан таңғы 4-те шықтық, барғанда айналаны қар басып қалған, аяз, көрініс — керемет. Мұз қатқан көл, бізге коньки таратып берді. Тау арасында сырғанаймыз деп мәз-мейрам болдық. Бірақ шындығына келсек, бүкіл көлдің бір кішкентай ғана бөлігі қардан тазартылып, шағын мұз айдыны жасалған. Қалғанының бәрі қардың астында, ешкім тазаламаған. Оған қоса боран соқты. Қысқасы, Көлсай қыста әдемі, бірақ тосын сыйларға дайын болыңыз.
Не ала бару керек
- Дұрыс аяқ киім. Ыңғайлы кроссовка немесе трекингке арналған бәтеңке.
- Қалың киім мен жаңбырдан қорғайтын күртеше. Тянь-Шань тауының ауа райы құбылмалы.
- Қолма-қол ақша. Тауда банкомат пен терминалдар жоқ.
- Пауэрбанк, дәрі-дәрмек қобдишасы, жәндіктерден қорғайтын құралдар.
- Қоқыс пакеттері. Қоқысты міндетті түрде өзіңізбен бірге алып кетіңіз. Ұлттық парк аумағында бұл — қатаң талап.
Қайда тұрақтауға болады
Саты ауылындағы мейманханалар. Ең қарапайым нұсқа. Қарабайыр бөлмелер, үй тағамдары мен жанға жайлы атмосфера. Бағалар: адам басына 6 000 – 12 000 теңге (тамақтану қосылған). Жаз мезгілінде өте ерте жалдап қою керек.
Киіз үйлер мен көл жағасындағы ақшатыр. Бәрін жан-тәніңмен сезіну үшін. Киіз үйлер жаз бойына тігіледі (бір түнге 20 000 теңгеден бастап). Шатырды да тігуге болады, бірақ әкімшіліктен рұқсат керек. Мұнда түндер жазда да салқын, ұйықтауға арналған жылы қап алу — міндетті.
Қонақүйлер мен глэмпингтер. Жайлылық бірінші орынға қойылса. Сатыда да, көлге жақын маңда да бар. Бағалар бір бөлмеге 35 000 теңгеден басталады. Kolsay Grand не Pana Unique Kolsay - ді қарастырыңыз.
Сапарға шықпас бұрын нені білу керек
- Байланыс — арман. Цифрлық детоксқа дайын болыңыз. Интернет пен ұялы байланыс анда-санда ғана істейді, ал Орта мен Жоғарғы көлде мүлдем жоқ. Офлайн карталарды алдын ала жүктеп алыңыз.
- Сіз табиғат аясына қонаққа келдіңіз (ұлттық паркте де). Қоқыс қалдыруға болмайды, көрінген жерге от жағуға болмайды, сондай-ақ аң аулауға, өсімдіктерді жұлуға тыйым салынған. Алтын қағида: өзіңізбен бірге не әкелсеңіз, соның бәрін қайта алып кетіңіз.
- Ауа райы — Брут. Күндіз күн қыздырса, түнде бесінші шұлықты іздеуіңіз әбден мүмкін. Қабат-қабат киініңіз: жеңсіз жейде, флис жейде, күрте. Жауыннан қорғайтын күртешені ешқашан ұмытпаңыз.
- Шатыр астында түнейсіз бе? Дайындалыңыз. Тауда тәулік бойы жұмыс істейтін дүкендер жоқ. Бар азық-түлік, жылы төсек-орын (спальник) мен суды өзіңізбен алып келіңіз.
- Аяқтарыңызға мұқият болыңыз. Жолдар мен соқпақтар — тасты. Жайлы, аяққа қонымды және табаны таймайтын аяқ киім — сіздің ең жақсы серігіңіз.
- «Дымқыл шалбар» операциясы. Қайыққа не катамаранға мінесіз бе? Қосымша киім, тым болмаса қосымша шұлық алыңыз. Су болып қалу оп-оңай.
- Масалар тыныштық бермеді. Жазда олар өте көп, қорғаныс құралдары — мастхэв.
- Жолға ерте шығу — сәтті сапар. Қаладан таң атпай шығыңыз. Осылайша сізде сұлулықты асықпай тамашалап, қараңғы түскенше қайта оралуға көбірек уақытыңыз болады.
