Ташкентте не көруге болады? Ең толымды гид
Сапарыңыз ұзақ уақыт естен кетпес үшін Ташкентте қайда барған, не жеген дұрыс екенін айтайық.
Ташкент — әр бұрышы көз тартатын қала. Мұнда айналаға алақ-жұлақ етпей жүре алмайсыз: бір тұсында Чорсу базарындағы мың бояулы көкөністер көз тартса, сәл жүріп, хрусталь шамдары жарқыраған метро сарайының сұлулығына тамсанып тұрасыз. Ескі қаланың қыш қабырғалары мен сықырлаған қақпалары заманауи әйнек ғимараттармен тамаша үйлесім тапқан. Сан алуан дәм мен жұпар, ескі мен жаңа тоғысқан осы бір қаланы жақсырақ тануыңыз үшін біз Ташкенттің басты көрікті орындарына арналған егжей-тегжейлі гид дайындадық. Өзбек астанасына алғаш барғанда бұл мақала таптырмас көмекшіңіз болады.
Ташкентте қайда тұруға болады?
Ташкентте қайда тұрамын деп алаңдамаңыз — кез келген талғам мен ақшаға сай қонақүй табылады.
Комфорт пен әсемдік үйлескен қонақүй қаласаңыз, Hyatt Regency не Hilton-ды таңдаңыз: екеуі де қаланың іскерлік ауданында орналасқан, негізгі көрікті жерлерге жаяу баруға болады. Қызмет көрсету сапасы мен терезедегі көріністе бір мін жоқ.
Ал ерекше атмосфера мен ұлттық колорит іздесеңіз, ескі аудандарға барыңыз — Чорсу базары мен Хаст-Имам кешенінің маңындағы шағын бутик-қонақүйлер мен қонақ үйлерде таңертең шығыс жұпары мен базар дауысынан оянасыз.
Үнемді саяхатшыларға да таңдап көп: Art Hostel, Topchan немесе Safarof’s Family Hostel сияқты хостелдер таза, жайлы әрі басқа туристермен танысуға болады.
Өзбек астанасындағы ең әсем жерлер
Бұл — Ташкентпен танысуды бастауға ең лайық орындар. Әр саяхатшы міндетті түрде көріп шығуға тиіс базалық тізім.
Хазрати Имам кешені: 7 ғасырдағы Құранды көресіз
Жұмыс уақыты: 09:00–21:00
Кіру: тегін
Атын есте сақтаңыз — Хазрати Имам. Көпшілік үшін Ташкентпен танысу дәл осы жерден басталады. Бұл жай ғана діни кешен емес, шығыс сәулетінің айнасы: өрнекті порталды медреселер, көгілдір күмбезді мешіттер мен тыныш, көлеңкелі аула — бәрі ерекше үйлесім тапқан.
Негізгі қазынасы кітапханасында сақтаулы: 7 ғасырда жазылған халифа Османның Құраны. Аңыз бойынша, оның беттерінде билеушінің қанының ізі әлі де бар деседі. Бұл жер — жергілікті халық үшін қасиетті орын, алыс-алыс елдерден жұрт осында зиярат етуге келеді.
Кешкі күннің қызғылт сәулесі қабырғаларды жып-жылы түске бояйтын шақта келіңіз — сол кез суретке түсуге ең керемет уақыт.
Ташкент метросы: жер астындағы мұражай
Жұмыс уақыты: 05:00–00:00
Бағасы: картамен — 1 700 сум (шамамен 75 теңге), жетонмен — 3 000 сум (135 теңге).
Бұл — Орталық Азиядағы алғашқы метро және әлемдегі ең көрікті кешендердің бірі десек, артық айтқаным емес. Мұнда сұп-сұр, жадағай станциялар жоқ: әр аялдама — жеке өнер туындысы. Бірі ғарыш айлағын еске түсірсе, енді бірі мақта алқабы сияқты, тағы бірі падишах сарайына ұқсайды.
«Космонавтлар» станциясын міндетті түрде көріңіз: төбесі әйнек жұлдыздармен безендірілген, ал қабырғалары ашық көктен қою көкке дейін құбылып, ғарыш кеңістігінде жүргендей боласыз. Қабырғаларда Гагарин, Терешкова мен Ұлықбек бейнеленген. Айтпақшы, 2018 жылға дейін метро ішінде суретке түсуге болмайтын — сондықтан қапы қалмаңыз!
Чорсу базары: мың түрлі дәмнен ауыз тиесіз
![Bazaar Chorsu].jpg](https://static.aviasales.com/psgr-v2/Bazaar_Chorsu_70a589e9e3.jpg?)
![Bazaar Chorsu].jpg](https://static.aviasales.com/psgr-v2/thumbnail_original_Bazaar_Chorsu_70a589e9e3.jpg){kind=small}
Жұмыс уақыты: 05:00–20:15
Кіру: тегін
Ташкентті базарсыз елестету мүмкін емес. Мұнда сізді міндетті түрде кел-кел деп шақырып, дәм ауыз тигізіп, саудаласуға тартады — әйгілі Чорсу базарының ең басты сиқыры да осында. Үлкен көгілдір күмбездің астында тіршілік қайнап жатыр: сан алуан дәмдеуіштің жұпары, құрма мен өріктің түр-түрі, түрлі-түсті кілемдер мен тақиялар — бәрі бар. Ештеңе сатып алмасаңыз да, соқпай кетпеңіз. Базар атмосферасын сезініп, сан алуан дәмнен (мысалы, құрттың ондаған түрінен) ауыз тиесіз.
Көкілташ медресесі: 16 ғасырдағы студенттер жатақханасы
Жұмыс уақыты: 09:00–18:00
Кіру ақысы: 10 000 сум (шамамен 440 теңге).
Қайнап тұрған Чорсу базарынан сәл жүрсеңіз, 16 ғасырда салынған Көкілташ медресесі тұр. «Көкілташ» сөзі «сүт бауыр» дегенді білдіреді — ғимаратты дәл осындай лақап атпен белгілі уәзір салдырған.
Нысанның ең ерекше бөлігі — биіктігі 20 метрлік көгілдір өрнекті портал. Оның ар жағында — екі қабатты құжыралары бар тыныш аула, онда кезінде шәкірттер тұрған. Көп ғасыр бойы медресе керуен-сарай, бекініс, тіпті атеизм мұражайы да болды. Қазір ол қайтадан оқу орны ретінде ашылған.
Тәуелсіздік алаңы — ел тарихының бейнесі
Елдің басты алаңына өзбектер ақшаны аямаған. Кең даңғылдар, еңселі «Эзгулик» («Мейірім») аркасы және үнемі қосулы тұратын субұрқақтар бұл жерге ерекше салтанат береді. Мұнда қаланың қалай өзгергенін анық сезесіз: кезінде Ленин ескерткіші тұрған орында қазір Тәуелсіздік монументі — ана мен баланың мүсіні бой көтерген. Осында келгенде Ташкент көне тарихымен ғана емес, заманауи жаңғырумен де мақтана алатынын түсінесіз.
Күндіз жұрт мұнда ескерткішті мұқият тамашалауға келсе, кешкісін жарыққа қосыла билеген субұрқақтар көрінісі көпшілікті баурап алады.
Ташкент телемұнарасынан қала алақандағыдай көрінеді
Жұмыс уақыты: 10:00–22:00
Кіру ақысы: 40 000 сум (шамамен 1 800 теңге).
Ташкент телемұнарасы — Орталық Азиядағы ең биік ғимарат (375 метр) әрі советтік инженерияның айбынды ескерткіші. Ол 9 балдық жер сілкінісіне төтеп бере алады. Туристер үшін ең қызығы — 100 метр биіктіктегі бақылау алаңы: мұнда бүкіл Ташкент алақандағыдай көрінеді.
Ал мұнараның түбіндегі «Коинот» атты айналмалы мейрамханада отырып, дәмді ас ішіп отырып-ақ қаланы толық көріп шығуға болады.
Қолданбалы өнер мұражайынан шыққыңыз келмей қалады
Жұмыс уақыты: 09:00–18:00
Кіру ақысы: 25 000 сум (шамамен 1 100 теңге).
Ұсақ-түйектен сұлулық көре білсеңіз, Қолданбалы өнер музейіне барыңыз. Мұнда өзбек шеберлерінің нағыз классикасы жинақталған: өрнекті керамика, зергерлік бұйымдар, алтын жіппен кестелеу және ағаш ою өнері. Алайда мұражай ғимаратының өзі де экспозициядан кем түспейді — бұл кезінде орыс дипломатының жеке резиденциясы болған, ол өзіне оюлы төбелі, әсем өрнекті қабырғалы нағыз сарай салдырған. Сол себепті мұнда келген адам қос қуанышқа кенеледі: әрі ұлттық өнер туындыларын тамашалайды, әрі көркем сарайдың ішіне енгендей әсер алады.
Мұражайға кіргенде тегін Telegram-аудиогидті қосып көріңіз — QR-кодты кіреберістегі баннерден табасыз.
Өзбекстанның мемлекеттік тарих мұражайына соқпай кетпеңіз
Жұмыс уақыты: 10:00–17:00
Кіру ақысы: 35 000 сум (шамамен 1 500 теңге).
Өзбекстан тарихы мұражайында тас дәуірінен бастап, бүгінге дейін сапарлап келесіз. Мұндағы экспонаттар жай ғана әйнек астында тұрған заттар емес, тұтас тарихты баяндайды: міне, ежелгі жартас суреттері, ал қасында — әмірлердің сән-салтанатты киімдері мен Ұлы Жібек жолы дәуірінің көне теңгелер. Ілім іздеген жандар үшін Өзбекстан тарихының нағыз қысқаша курсы деуге болады.
Қазіргі таңда (2025 жылдың қазаны бойынша) мұражай қайта жаңарту жұмыстары аясында жабық тұр, ашылатын күні әлі белгісіз. Бармас бұрын міндетті түрде алдын ала хабарласып, нақтылап алыңыз.
Ескі шаһарда жол тауып көріңіз
Мұнда нақты бір бағыт жоқ. Ең дұрысы — жіңішке көшелердің лабиринтінде адасып кетіңіз. Сол кезде аяқ астынан бір жайлы шайхананы кездестіріп, шағын шеберханада жұмыс істеп жатқан ұсталарды тамашалауға немесе жергілікті тұрғындардың баяу да бейқам тіршілігімен танысуға болады. Осылайша бір сағатта-ақ Ташкенттің екі қырын көресіз: ортағасырлық шығыстың рухы мен заманауи мегаполистің қарқыны қатар жасап тұр.
Ташкентте бәрін көріп қойсаңыз, не істеуге болады?
Қыдырыстың келесі кезеңіне өтіп, жергілікті тұрғындарша жүріп көріңіз.
Палау басуды үйреніңіз
Палауға жай ғана тапсырыс беріп қоймай, өз қолыңызбен дайындап көріңіз! Ташкенттегі аспаздық мастер-кластар — жергілікті гастрономияға толық енудің ең тамаша тәсілі. Мұнда сізге қазандағы отты баптаудан бастап, сәбізді дұрыс турау, манты жасау мен дәмдеуіштерді ажыратуға дейін үйретеді.
Ең әсерлі сәт — соңында бәрі бірге дастарқан басына жиналып, өз қолымен әзірлеген тағамнан дәм тату.
Егер палауды нағыз өзбек дәстүрімен жасағыңыз келсе, «Казан» мектебіне барыңыз. Үйдегідей жылы атмосфера мен өзбек отбасындағы кешкі асты көргім келеді десеңіз, сізге Dilnoza’s Guesthouse (Travelling Spoon) ұнары анық. Ал Tass Cooking мектебінде дәстүрлі тағамдарды заманауи тәсілмен әзірлеуді үйретеді. Орташа баға — 450 000 сумнан (шамамен 20 000 теңгеден) басталады.
Саябақтары жайнап тұр
Ташкенттегі саябақтар — жай ғана ағаш пен орындық емес, әрқайсысы өз әлемі бар ерекше кеңістіктер. Соның үшеуін айтайық:
Жапон бағы. Қаланың у-шуынан қашып, тыныштық іздесеңіз, дәл осы жерге келіңіз. Мұнда жылғалар сылдырлап ағып, тас көпірлер арқылы шағын пагодаларға өтесіз. Көлде алып, түрлі-түсті тұқы балықтар жүзіп жүр — олар тіпті қолдан жем жейді. Көктемде сакура бүршік атса, күзде ағаштар қызыл-сарыға боялып, жыл мезгілінің әр кезеңі көрініс сияқты әсер қалдырады.
Tashkent City Park. Жаңа да заманауи Ташкенттің айнасы. Бұрын бос жатқан жерде бүгінде алып саябақ бой көтерген, айналасын зәулім ғимараттар қоршаған. Кешке шамдар жанып, музыка сүйемелдейтін субұрқақтар қосылғанда, айналада ерекше атмосфера орнайды. Қаласаңыз, катамаран жалдап серуендей аласыз немесе су жиегінде отырып, қуанышқа толы өмірді қызықтаңыз.
Әмір Темір алаңы. Қаланың жүрегі мен басты нысанасы деуге болады. Егер біреу «орталықта кездесеміз» десе, ол — дәл осы жер. Ортасында ұлы қолбасшы Әмір Темірдің қола мүсіні тұр. Мұнда музейлер де, дүкендер де, метро да — бәрі жақын жерде. Ташкентпен танысуды бастау үшін таптырмас нүкте.
Суретке түсетін ғажап жерлер
Ташкенттен магнит емес, әсерлі естелік ала келгеніңіз келсе — суретке түсіңіз! Қаланың әр бұрышы — фотосүйер туриске таптырмас фон.
Халықтар достығы сарайы. Фасадының өзі — фотосуретшілерге арналған сыйлық: қатаң геометрия, ырғақты өрнектер мен әйнек витраждар заманауи шығыстық арт стилін айқын көрсетеді.
Әлішер Науаи атындағы опера және балет театры. Классиканы сүйетіндерге мінсіз нысан. Сәулетті тұғырлар, нәзік саз жапсырмалар мен кең алаң — бәрі әсерлі портреттер мен симметриялы кадрлар жасағанға ыңғайлы.
Анхор каналының жағалауы. Күн батардағы golden hour кезінде келіңіз. Әсем шамдар мен жарқыраған көпір канал суында жымыңдай ойнап, романтикаға толы атмосфера орнайды.
Рим-католик шіркеуі. Ташкенттен көремін деп көп адам күтпейтін, бірақ ерекше әдемі локациялардың бірі. Готикалық үлгідегі бұл ғимарат Еуропаға портал ашылғандай әсер қалдырады — контраст пен стильге толы кадрлар үшін таптырмас фон.
Ең маңызды сұрақ: не жейміз?
Ұлттық дәмнен бастайық.
Besh Qozon («Палау орталығы»). Бұл жай ғана дәмхана емес, Ташкентке палау жеймін деп келген адамдардың Қағбасы. Мұнда күн сайын алып қазандарда тоннамен күріш пен ет піседі. Қазандардағы қайнаған көрініс көз тартса, дәмі ауыздан кетпейді. Түскі уақытқа дейін немесе бірден кейін келіңіз, өйткені палау мұнда демде таусылады.
Minor Somsa. Кішкентай ғана орын, бірақ қаладағы ең дәмді самсаны дәл осы жерде пісіреді. Самсаны тандырдан көз алдыңызда шығарып, бірден қолыңызға ұстатады. Кішкентай әрі тез таусылғандықтан бірден екеуін алыңыз. Дәстүрлі қызанақ тұздығын ұмытпаңыз, ал бәрін ыстық көк шаймен ішкенде дәмі тіпті арта түседі.
Tandiriy. Ташкент-Ситидің қақ ортасындағы мейрамхана, мұнда дәстүрлі тағамдарға заманауи рең берілген. Интерьері жарқын, нағыз шығыс атмосферасын сезінесіз (залда тіпті дауысы әсем шымшық сайрап тұрады). Түрлі салмамен дайындалған мини-самса сетін көріңіз. Ішінде классикалық сиыр етінен бастап, шпинат пен лосоське дейін бар.
Ташкентте таңғы ас пен кофе ішетін жер
Таңертең палау емес, піскен ірімшік мен хош иісті капучино іздесеңіз, Ташкент бұл жағынан да ренжітпейді.
B&B Coffee House. Жайлы кофехана, мұнда міндетті түрде арнайы дайындалған спешелти-кофеден дәм татып көріңіз. Баристалар оны V60 не аэропресс секілді баламалы тәсілдермен дайындайды, сондықтан нағыз кофесүйер қауым мәз болып шығары анық.
«Подушечная». Таңертең жылы, жайлы атмосфераны қалайтындарға арналған орын. Аты айтып тұрғандай, мұнда дивандар, сөрелер, тіпті орындықтар да — айнала түгел жастыққа толы. Ал мәзірі ерекше сүйкімді — «жасымық ботқасы» мен «күрішпен берілетін тауық еті» секілді үй тағамдары күтіп тұр. Мейірімді әпкеңіздің үйінде отырғандай боласыз.
Nice Joy. «Подушечнаяның» жайлылығы ұнаса, бірақ сәл классикалық интерьер іздесеңіз — осы жерге барыңыз. Мұндағы негізгі ерекшелік — банан қосылған кофе. Ерекше естілер, бірақ қалада ең танымал дәмнің бірі.
Кешкі ас ішетін жерлер (палаудан басқа)
Еуропалық не азиялық дәмнен татқыңыз келсе, Ташкентте талғамыңызға сай тамаша орындар бар.
FoodMall. Үлкен фудкорт, мұнда бәрі бар: пицца мен бургерден бастап, суши мен бабл-тиге дейін табасыз. Достарыңызбен бірге барғанға таптырмас жер.
L’Opera. Космонавттар аллеясының маңындағы шағын Италия бұрышы. Мұнда тамаша паста түрлерін ұсынады: теңіз өнімдері қосылған тальятелле, рикоттамен дайындалған равиоли немесе классикалық болоньезе — бәрі тіл үйіреді.
Furusato. Тып-тыныш жапон мейрамханасы. Мұнда рамен, суши мен ролдар мінсіз дайындалады. Бағасы ортадан сәл жоғары, бірақ сапасы мен қызмет көрсету деңгейі оған толықтай сай келеді.
Ташкент маңында көретін не бар?
Қаланың ортасын түгел аралап шықсаңыз немесе аздап тыныштық пен таудың таза ауасын аңсасаңыз, көлікті оталдырыңыз. Астанадан небәрі екі сағаттық жолда сізді сөзсіз таңғалдыратын тұмса табиғат тосып тұр.
Шымған таулары мен Чарвактағы тұмса табиғат
Ташкенттен бар болғаны бір жарым сағаттық жол жүрсеңіз, мүлде басқа әлемге тап боласыз: сізді биік таулар, саф ауа мен салқын самал күтіп тұр. Жазда жұрт мұнда соқпақтар бойымен серуендеп, көрікті табиғатқа сүйсінеді, ал жолдың соңы Чарвак бөгеніне — көгілдір түсті, жартастардың арасында жарқыраған алып көлге апарады. Жергілікті тұрғындар мен туристер мұнда шомылып, қайық жалдап серуендейді немесе тауларға қарап отырып кәуап пісіріп, пикник ұйымдастырады.
Ал қыста Шымған елдің басты тау шаңғысы курортына айналады. Қар, шаңғы, сноуборд — бәрі бар.
Ферғана аңғарындағы қолөнершілер
Бұл бағыт уақыты мол, бір күнін немесе одан да көп уақытын бөліп саяхаттағысы келетіндерге арналған. Ферғана аңғары — Өзбекстан қолөнершілерінің жүрегі. Марғыланда атақты хан-атлас жібегі қолмен тоқылады, оны өз көзіңізбен көруге болады. Риштанда шеберханаларға соғып, әйгілі көгілдір керамикадан кәдесый сатып алуға болады. Ал Қоқанда салтанатты Хұдояр-хан сарайын аралап, шығыс сәулетінің бар сиқырын сезінесіз.
Бұл — елдің қолөнер әлеміне еніп, ғасырлар бойы үзілмей келе жатқан дәстүрлермен танысудың керемет тәсілі.
Алып «Күнді» көруге барыңыз
Ерекше әсер іздейтіндерге арнап тағы бір бағытты айта кетейік. Ташкентке іргесінде күн пеші орналасқан — бұл советтік ғылымнан қалған мұра әрі фантастикалық фильмнің декорациясын еске түсіретін ғажайып нысан.
Қарапайым тілмен айтқанда, ол — күн сәулесін жинап, аса жоғары температура тудыратын алып айна жүйесі. Көрінісі әрі әсерлі, әрі сәл апокалипстік сипатта. Мешіттер мен базарлардан өзгеше нәрсе көргісі келетін саяхатшыларға таптырмас бағыт.
Маңызды ұсақ-түйек
Сапарыңызды жайлы ете түсетін тағы бірер кеңес.
Қашан барған дұрыс?
Көктем (сәуір–мамыр) мен күз (қыркүйек–қазан) — Ташкентке баратын ең тамаша уақыты. Күн райы жылы, бірақ ыстық емес, көктемде айнала түгел құлпырып түрса, күзде қып-қызыл анарлар арасында жүресіз. Көшеде сағаттап серуендеуге болады.
Жаз (маусым–тамыз) — батыл саяхатшылар баратын кез. +40 °C қалыпты жағдай, бірақ мұздай қауын-қарбыз бен кондиционері бар кафелер ауыр сынақты біраз жеңілдетеді.
Қыс (желтоқсан–ақпан) — ерекше тыныш кезең. Турист аз, қонақүй мен билет бағасы төмен, ал мұражайлар мен көрікті орындар түгел дерлік сіздің иелігіңізде болады.
Ташкентте қалай жүреміз?
Такси — Ташкенттегі ең сенімді көлік. Yandex.Go, Uklon не Millenium қосымшаларын жүктеп алыңыз — бағалар өте қолжетімді: қала ортасында жүру шамамен 10 000–20 000 сум (350–700 теңге) тұрады. Метро — туриске әрі көлік, әрі көрік: әдемі, салқын, жылдам әрі кептеліссіз. Жолақысын турникетте банк картасымен немесе кәдімгі жетон сатып арқылы төлей аласыз. Самокаттар мен велосипедтер — шағын қашықтыққа таптырмас көлік. q.watt немесе YOTO сервистерін көріңіз — қала ішінде серуендеуге өте ыңғайлы.
Қаладан қандай базарлық алсам болады?
Чорсу базарында көрген нәрсеңіздің бәрін сатып алғың-ақ келеді, бірақ шабаданның сыйымдылығы шектеулі ғой. Сондықтан ең дәмдісін ғана таңдаңыз. Тағамнан кептірілген өрік, інжір, мейіз, жаңғақтар, тәтті халва мен нуга алыңыз. Міндетті түрде зира, барбарис немесе дайын палау қоспасын алыңыз — мұндай жұпар иіс супермаркеттен табылмайды.
Кәдесыйдан: ашық түсті Риштан керамикасы — тәрелке мен кесе жеп-жеңіл әрі әсерлі көрінеді. Ал шынайы ұлттық нақыш іздесеңіз, өрнекті тақия не жеңіл халат алыңыз — Ташкенттің бір сұлулығын өзіңізбен ала кеткендей боласыз.
