Ташкенттен ұшқан шынымен тиімді ме? Ірі қалаларға баратын рейстер билетін салыстырып көрдік

Алматы мен Астанадан әлемнің біраз ірі қаласына ұшуға болады. Бірақ кейде Ташкентте Қазақстан әуежайларында жетіспей жататын бір мүмкіндік бар. Ол — бағасы қолайлы тікелей рейстер. Мәселен, Ташкенттен Нью-Йорк, Токио, Рига, Тель-Авив, Исламабад, Рим, Париж бен Барселонаға тікелей ұшуға болады.

Aviasales.kz дерегіне қарағанда, былтыр Қазақстаннан халықаралық бағыттарға ұшақ билетінің орташа бағасы — 431 USD (шамамен 195 мың KZT), ал Өзбекстаннан 315 USD (шамамен 143 мың KZT) болған. Кей бағыттарда, мысалы Қытай мен БАӘ-ге ұшқанда, баға айырмасы 26–28%-ға дейін жеткен.

Сондықтан нақты бағыттарды салыстырып, қазақстандықтарға алдымен көрші елге барып, ары қарай сол жақтан ұшқан қай кезде тиімді екенін тексеріп көрдік. Оның үстіне Өзбекстанда екі-үш күн аялдап, Чорсу базарынан дәмді Бұхара палауын жеп, Ташкентті аралап, содан кейін негізгі сапарға аттануға болады.

Бағаларды 2026 жылғы қыркүйекте, қазан айында ұшатын билеттер бойынша тексердік. Ұшақ билеттерінің бағасы үнемі өзгеріп тұрады, сондықтан көрсетілген сомаларды бағыттарды салыстыруға арналған шамамен алынған баға деп түсініңіз.

Алдымен Ташкентке жетіп алу керек

Ташкенттен Нью-Йоркке баратын билетті Алматыдан Нью-Йоркке ұшатын билетпен салыстыра салуға болмайды. Өйткені халықаралық рейстің бағасына Ташкентке дейінгі жол ақысын да қосу керек.

Біз қараған күндері Алматыдан Ташкентке багажсыз билет 46 424 теңгеден басталды. 20 келі багажбен — 55 155 теңге. Ұшу уақыты шамамен 1 сағат 40 минут. Астанадан билет 45 333 теңгеден басталады, 23 келі багажбен — 51 436 теңге. Жол шамамен 2 сағат 5 минут алады.

Шымкент тұрғындарына арналған есеп басқаша. Өзбекстан шекарасына көлікпен шамамен бір жарым сағатта жетуге болады, таксидегі бір орын 5–8 мың теңге тұрады. Шекарадан Ташкент әуежайына дейін тағы жарты сағаттай жол, оған 3–5 мың теңге кетеді. Сонда бүкіл жолға ең көбі 12 мың теңге жұмсайсыз.

Тағы бір маңызды нәрсе — багаж. Әр рейстің тарифі әртүрлі: бір билетке шабадан бағасы кіріп тұрады, енді бірінде багаж үшін бөлек төлеу керек. Мысалы, Ташкент — Нью-Йорк тікелей рейсінің бағасына 23 келі багаж кіреді. Ал Ташкенттен Исламабад, Париж, Рим және Ригаға ұшқанда багаж қоссаңыз, билет қымбаттайды. Сондықтан алғашқы көрінген бағаны ғана емес, өзіңізге керек багажды қосқаннан кейінгі ақырғы соманы салыстырған дұрыс.

Ташкенттен тікелей ұшсаңыз, қай бағытта уақыт үнемдейсіз?

Кей қалаларға Ташкенттен ауысып отырмай, тікелей және әлдеқайда тез ұшуға болады. Бірақ қазіргі бағамен мұндай нұсқа Қазақстаннан ұшқаннан үнемі арзан бола бермейді.

Исламабад

Ташкенттен Исламабадқа екі сағатта тікелей ұшуға болады. Билет шамамен 109 мың теңге тұрады. Бірақ оған Ташкентке дейінгі жолды да қосу керек: Алматыдан билет шамамен 46 мың теңге, Астанадан — 45 мың теңге. Сонда Ташкент арқылы ұшу Алматыдан шамамен 155 мың теңгеге, Астанадан 154 мың теңгеге шығады.

Салыстыру үшін, Алматыдан Исламабадқа билет шамамен 149 мың теңге, Астанадан — 144 мың теңге. Яғни қазір Ташкент арқылы ұшу арзанырақ емес. Есесіне жолды екіге бөліп, Өзбекстанда бірнеше күн өткізуге болады.

Ташкентте не көруге болады? Ең толымды гид

Бала-шағамен Ташкентке барып-қайттық: екі күнде не көрдік?

Тель-Авив

Бұл бағытта Ташкенттің басты артықшылығы — уақыт. Тікелей рейс 5,5 сағатқа созылады. Бірақ біз қараған күндері билет бағасы багажсыз шамамен 700 мың теңге болды.

Ал Алматыдан шамамен 143 мың теңгеге, Астанадан 112 мың теңгеге ұшуға болады. Екі бағытта да ауысып отыру керек. Соған қарамастан, дәл қазір тек тікелей рейс үшін Ташкентке арнайы бару қаржы жағынан тиімсіз.

Қай бағыттарға Қазақстаннан ұшқан тиімді?

Егер ауысып отыру сізге қиын болмаса және билет бағасы маңыздырақ болса, мына бағыттарға Қазақстаннан ұшқан арзанырақ.

Токио

Ташкенттен Токиоға тікелей билет шамамен 307 мың теңге тұрады. Ұшу уақыты — 7 сағат 35 минут. 23 келі багажбен билет шамамен 348 мың теңге болады.

Алматыдан ұшу шамамен 223 мың теңгеге шығады. Бұл бағаға 15 келі багаж кіреді, бірақ Чунцин мен Шанхайда екі рет ауысып отырасыз. Жалпы жолға 18 сағатқа жуық уақыт кетеді.

Астанадан билет шамамен 204 мың теңге тұрады, багаж кірмейді. Үш рет ауысып отыратын рейс 19 сағатқа созылады. Тіпті Ташкентке дейінгі билет құнын қоспағанның өзінде, Жапонияға Қазақстаннан ұшу арзанырақ.

Қазақстандықтар Жапонияға визаны қалай алады?

Жапонияға барар алдында неге дайын болу керек?

Жапониядан не әкелдің дегенде, ұялмай беретін сыйлықтар тізімі

Париж бен Рим

Парижге де жағдай осыған ұқсайды. Ташкенттен тікелей билет шамамен 162 мың теңге, ал 23 келі багажбен — 194 мың теңге.

Алматыдан Прагада бір рет ауысып, шамамен 97 мың теңгеге ұшуға болады. Астанадан Анкарада ауысып отыратын билет шамамен 78 мың теңге тұрады.

Римге Ташкенттен тікелей билет шамамен 136 мың теңге, багажбен — 168 мың теңге. Алматыдан шамамен 98 мың теңгеге, Астанадан 96 мың теңгеге ұшуға болады. Екі жағдайда да екі рет ауысып отыру керек. Яғни баға жағынан Қазақстан тиімді. Ал Ташкентті тікелей рейс маңызды болғанда таңдауға болады.

Рига

Алматыдан Ригаға билет шамамен 84 мың теңге тұрады. 20 келі багажбен — 116 мың теңгедей. Прагада бір рет ауысып отырасыз, жалпы жол 12 сағат 25 минутқа созылады.

Ташкенттен тікелей билет шамамен 140 мың теңге, ал 25 келі багажбен — 156 мың теңге. Ұшу уақыты небәрі 5,5 сағат.

Бұған Ташкентке дейінгі билетті қоссақ, Алматыдан ұшу айтарлықтай арзан. Бірақ Ташкент арқылы ұшсаңыз, негізгі рейске кететін уақыт едәуір қысқарады.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Тікелей рейс үшін көбірек төлеуіңіз керек болатын бағыттар

Билеттің арзан болғаны жол да жайлы болады деген сөз емес. Кейде ауысып отыратын рейстерге бір тәуліктен көп уақыт кетеді. Ал тікелей рейс сапар уақытын бірнеше есе қысқартуы мүмкін. Сондықтан кей бағытта тек бағаны емес, ұшақ пен әуежайда қанша уақыт өткізуге дайын екеніңізді де есептеген жөн.

Нью-Йорк

Алматыдан Нью-Йоркке біз қараған күндері багажсыз билет шамамен 280 мың теңге тұрды. 20 келі шабаданмен — 388 мың теңгедей. Үш рет ауысып отыратын жол 32 сағаттан асады.

Астанадан билет шамамен 306 мың теңге, 23 келі багажбен — 349 мың теңге. Екі рет ауысып отырасыз, жалпы жол 35 сағаттан асады.

Ташкенттен Нью-Йоркке тікелей рейс шамамен 326 мың теңге тұрады. Оның бағасына 23 келі багаж кіреді. Ұшу уақыты — 13 сағат 10 минут.

Ташкентке дейінгі багажбен билет құнын да қоссақ, Алматыдан бүкіл жол шамамен 381 мың теңгеге, Астанадан 378 мың теңгеге шығады.

Яғни Алматыдан Ташкент арқылы ұшу багажды есептегенде тіпті сәл арзанырақ әрі әлдеқайда жылдам. Ал Астанадан шамамен 29 мың теңге артық төлейсіз, бірақ негізгі рейс тікелей болады.

Барселона

Астанадан Ташкент арқылы багажбен ұшу шамамен 25 мың теңгеге қымбатырақ. Бірақ Ыстанбұлда ауысып, жолға 14 сағатқа жуық уақыт жұмсаудың орнына сегіз сағаттық тікелей рейспен ұшасыз. Уақыт жағынан ұтқысы келетін адамға бұл ыңғайлы нұсқа болуы мүмкін.

Бөлек-бөлек билет алғанның кемшін тұсы 

Ташкентке дейінгі билет пен Ташкенттен шетелге ұшатын билет — екі бөлек бронь. Демек, екі рейстің арасын өзіңіз жоспарлайсыз. Мұнда ескеретін бірнеше нәрсе бар.

Келесі рейске үлгеруге өзіңіз жауаптысыз. Мысалы, Алматы — Ташкент рейсі кешігіп, Нью-Йоркке ұшатын ұшаққа үлгермей қалсаңыз, әуе компаниясы сізді келесі рейске тегін отырғызуға міндетті емес. Билетіңіз күйіп кетуі мүмкін. Сондықтан Ташкенттегі екі рейстің арасына жеткілікті уақыт қалдырған дұрыс. Тіпті мүмкін болса, қалада бір-екі күн аялдап кеткен жөн.

Транзит визасы. Біз тексерген билеттерде қосымша транзит визасы қажет болмады. Бірақ басқа бағыттарда, әсіресе Еуропа не Азия елдерінде ауысып отырғанда, талап өзгеше болуы мүмкін. Мысалы, багажды қайта тапсыру үшін транзит аймағынан шығуға тура келіп жатады. Aviasales.kz мұндай жағдай туралы билетке қызыл жазумен ескертіп отырады. Соған қарамастан, билет алар алдында транзит елінің виза талабын тағы бір рет тексерген дұрыс. Әйтпесе ең арзан билет ең тиімсіз нұсқаға айналуы мүмкін.

Тек Ташкент емес: Шымкент, Атырау мен Ақтауды да тексеріңіз

Билет іздегенде тек Ташкентпен шектелудің қажеті жоқ. Кейде Қазақстанның басқа қаласына ішкі рейспен барып, сол жерден шетелге ұшқан оңай әрі арзан болуы мүмкін.

Халықаралық бағыттар әсіресе Шымкенттен көбейіп келеді. Мысалы, SCAT осы қаладан Мюнхенге тікелей ұшады, жол 6 сағат 20 минут алады. Каирге де тікелей рейс бар. Ал қазанның соңынан бастап Шымкент — Сингапур бағыты ашылады. Ұшақ Саньяда техникалық аялдама жасайды, бірақ жолаушылар транзит аймағынан шықпайды.

Батыс Қазақстанда тұратындар Ташкентке бармас бұрын Атырау мен Ақтаудан ұшатын рейстерді де қарап шыққаны жөн. FlyArystan Атырауды батыстағы негізгі базаларының бірі ретінде дамытып жатыр және оны Қазақстанның басқа қалаларымен байланыстырады. Күзгі-қысқы кестеде Атыраудан Кутаисиге рейстер жоспарланған. Ал Ақтаудан Үрімші, Кутаиси мен Дубайға тікелей ұшуға болады.

Сонда қай қаладан ұшқан дұрыс?

Ташкент қашанда арзан деген нәрсе жоқ. Бағасы төмен, бірақ багажы жоқ әрі бірнеше рет ауысып отыратын билет, багаж кіретін қымбатырақ тікелей рейстен тиімсіз болып шығуы мүмкін.

Сондықтан бүкіл жолды бірге есептеңіз: Ташкентке дейінгі билет, багаж ақысы, ауысып отыру уақыты және қажет болса қонақүй шығыны.

Әуе компаниялары кейде билетке маусымдық жеңілдік жасайтынын да ұмытпаңыз. Бүгін қымбат болып тұрған Алматыдан тікелей рейс ертең арзандауы мүмкін. Мұндай ұсыныстарды өткізіп алмау үшін Aviasales.kz сайты немесе қолданбасындағы «Ыстық билеттер» бөлімін қарап тұрған жөн. Онда 15%-дан басталатын жеңілдігі бар билеттер жиі шығады.

Қысқаша: қай бағыт тиімді?