Бала-шағамен Ташкентке барып-қайттық: екі күнде не көрдік?
Балаларға қызық болатын жер жетерлік.
Сәлем! Менің есімім — Жазира. Екі баланың анасымын. Алматыда тұрамыз. Тұңғышым сегіз айлық кезде Әзербайжан астанасына, Грузияның бірнеше қаласына саяхат жасап қайтқанбыз. Бір жарым жасында Вьетнамға бардық. Ал екінші балам туған соң алыс жолға шығудан жүрексініп қалдық.
Бірақ саяхаттағанды жақсы көреміз. Жолы жақын, халқы таныс, тілі де түсінікті болғасын, сапарлауды Ташкенттен бастайық деп шештік. Сөйтіп жолдасым мен екі ұлымыз, енем, жолдасымның екі қарындасы, күйеу баламыз, жиен қыздар — жалпы он адам болып шықтық. Не көргенімізді, сапар қалай өткенін айтып берейін.
Жолға дайындық
Біз жолға Шымкенттен шықтық. Қабыланбек бекетіне дейін өз көлігімізбен барып (қаладан шамамен екі сағаттық жерде), көліктерді сондағы тұраққа қалдырдық. Шекара бекетінің оң жағындағы ақылы тұраққа қалдырып кеттік, тәулігіне 1000 тг алады екен.
Көлігімізді қалдырған соң, Ташкентке дейін он адам болып, өзбектің Damas дейтін мәшинесіне отырдық. Аздап ыңғайсыз болғанымен, бастысы бір көлікте бірге болдық.
Менің бір уайымдағаным, наурызда Өзбекстанға баратын адам қарасы көп қой. Неше түрлі турлар бар, біз сияқты өз жолымен баратындар бар. Негізгі ағын туристер 22 наурызда барып-қайтар деген оймен, сапарымызды 23–25-іне жоспарладық. Оған дейін шекарадағы кептелістің, Өзбекстанға қарай ағылған нөпірдің видеолары Instagram мен TikTok-та көп тарап, бізді аздап қобалжытты. Бірақ біз өтерде кептеліс болған жоқ, шекараны екі жақтан да оңай өттік.
Қонақүй жалдау
2023 жылы Бакуге түн ортасында әрең жеткен қонақүйіміз орнында жоқ болып шығып, алданып қалғанымыз бар. Бұл жолы тек өзіміз емес, көп кісі боп бара жатқандықтан, аса сақ болуға тырыстық.
Бастапқыда қонақүйлерді Booking.com қосымшасынан қарап, сапасы мен бағасы бізге келеді-ау деген біреуін брондап қойғанбыз. Қонақүй таңдағанда таза, кең және жақсы таңғы асы болуына мән бердік.
Кейін Ташкентте тұратын достарымыз ол жақта риэлторлар арқылы жақсы орындар табуға болатынын айтып, таныс риэлтордың нөмірін берді. Өзбекстанда негізінен Telegram танымал екен, риэлторлар да Telegram арқылы жұмыс істейді. Ол кісі бізге жақсы қонақүй тауып берді. Сосын достарымыз ол жаққа барып, қонақүйдің жайлы екеніне, бронь тұрғанына көз жеткізіп қайтты.
Macan Terrace Hotel қонақүйі жақсы ауданда екен. Негізгі жерлердің бәріне жақын. Он адамға үш нөмір жалдадық. Әр нөмірде бір күн бағасы 40 мың теңге екен. Біз онда екі түн түнеп шықтық. Бәрі көңілімізден шықты.
1-күн. Magic City
Біз 23 наурызда түсте қонақүйге орналастық. Содан соң түстенуге қонақүйге жақын маңдағы Plov City деген жерге жаяулатып бардық. Негізінен жергілікті халық баратын жер екен, келушілердің дені түскі асқа келген әріптестер көрінді. Палаудың бірнеше түрі бар. Алматы мен Шымкентте жеп жүрген палаулардан айырмашылығын көрмедім.
Саяхатқа шықпас бұрын өзіміз желіден көрген, таныстарымыз барыңдар деп ұсынған және әлеуметтік желіде танымал бірнеше локацияны белгілеп алдық.
Әуелі Magic City кешеніне тарттық. Magic City — Ташкенттегі ірі ойын-сауық және сауда кешендерінің бірі, үй ішімен демалғанға арналған заманауи кеңістік. Кешен аумағы бірнеше гектарды қамтиды, ішінде дүкендер, мейрамханалар, аттракциондар, океанариум мен түрлі тақырыптық аумақтар бар. Архитектурасы еуропалық қалалар стилінде жасалып, жасанды көшелер мен алаңдар арқылы ерекше атмосфера сыйлайды. Баламен келгенде Magic City-ге кірмей кетпеске болмайды.
Балаларды, заттарымызды салып жүруге Алматыдан арба ала барғанбыз. Соның рахатын көрдік. Біздің 3 және 1 жастағы екі баладан, қатты шаршағанда 8–7 жастағы қыздар да арбада отырды. Бүкіл затымызды сонда салып жүрдік. Арбамыз өзбектерге қатты ұнады. Айтпақшы, мұндай арбалар Magic City-де жалға беріледі екен.
Magic City кешеніне кіру тегін, бірақ ішіндегі ойын-сауықтар мен аттракциондарға бөлек ақы төленеді. Мысалы, океанариумға кіру бағасы шамамен 100–120 мың сум (4–5,5 мың теңге) аралығында. Түрлі-түсті, әдемі көшелермен жүріп, алдымен океанариумға кірдік. Ұзындығы шамамен 20 метрлік туннель арқылы жүріп, 3,8 метр тереңдіктегі аквариумды тамашалайсың: төбеңнен акулалар жүзіп өткен сәт ерекше әсер қалдырады.
Мұнда балықтардан бөлек скаттар, медузалар мен су мақұлықтарының жүзден астам түр кездеседі. Экспозициясы жиі жаңарып отырады, сондықтан әр барған сайын жаңа дүниелерді көруге болады. Жалпы атмосферасы адамды су асты әлеміне «сүңгітіп», балаларға да, ересектерге де есте қалатын тәжірибе сыйлайды. Балаларға қызық болды. Қосымша ақыға балықтарды тамақтандыруға болады.
Ол жерде тағы капибара мен құндыздар тұрған бөлек бөлме бар екен. Оның билеті бөлек сатылады. Жануарларға көкөніс беріп, балалар мәз болды. Капибара қазір «трендтегі» жануар болғандықтан, балалар айналып өте алмайды, ата-аналар да баласының өтінішін жерге тастай алмайды.
Океанариумнан шыққанымызда күн әдемі боп батып барады екен. Қолдан тұрғызылған муляж ғимараттар мен жасанды парк болғанымен, Magic City-де биік ағаштары да, көгалы да бар, көрікті жер екен.
Ымырт түскенде биші фонтандар іске қосылып, су бетіндегі шоуды тамашаладық. Одан соң AYA Project аталатын айналар мен шамдар кеңістігіне кірдік. Ол әрқайсының өз концепциясы мен әуені бар жеті залдан тұрады. Залдардың кейбірі өте ыстық, ауасы тар екен. Әр залдың кіреберісінде адам санын қадағалап тұратын қызметкерлер болды. Жабық әрі тар кеңістікте көп адам жиналатындықтан, мұндай ортаға сезімтал адамдарға абай болған жөн.
Балалар шаршап, Magic City-де адам көбейе бастаған соң (халық негізінен түнге қарай келеді, біз шыққанда 8–9 шамасы болатын), біз қайтып кеттік. Алайда парктің аумағы үлкен, уақыт пен энергия болса, бәрін аралауға болады.
2-күн. Палау жеп, парк араладық
Келесі күні алдымен Новруз паркіне жол тарттық. Ол ежелгі қала концепциясында салынған кеңістік. Түрлі сувенирлер, қолөнер бұйымдары, киімдер сатылады. Жергілікті дизайнерлердің бутиктері де сонда. Киімдердің сапасы жақсы, адрас пен сюзанені шебер қолданған, сәйкесінше бағасы да жоғары (АҚШ долларымен көрсетілген). Түсінуімше, Новруз паркі Анхор паркінің аумағында орналасқан. Мұнда үлкен шолу дөңгелегі және басқа да аттракциондар бар.
Одан кейін Ташкентке келген көптеген турист сияқты біз де «Беш қозон» палау орталығына бардық. Өзге жерлерде кездеспеген қазақтардың көбін сол жерден көрдік. Басқа елдерден келген туристер де көп болды. Үстел босағанын, даяшының қызметін ұзақ күттік. Жергілікті адамдар айтқандай, палауы аса ерекше әсер қалдырмады.
Беш қозоннан шыққан соң жаяулатып Жапон бағына бардық. Сакура ағаштары гүлдеп тұрған өте әдемі кезеңге тап болдық. Бұл жер фотосессия жасауға, жақындармен серуендеп, пикник өткізгенге өте қолайлы.
Жапон бағынан кейін жергілікті автобусқа мініп, Tashkent City ауданына жеттік. Бұл — биік, әйнек ғимараттар (JW Marriott, Hilton, Holiday Inn қонақүйлері осында) мен еуропалық стильде салынған үйлермен қоршалған саябағы бар аудан.
Tashkent City паркінде қоршалған, ақылы балалар ойын алаңы бар. Сонымен қатар субұрқақ, шағын көл және жарық шамдар кеңістіктің өзіндік атмосферасын қалыптастырады. Boulevard аймағында түрлі мейрамханалар мен кофеханалар орналасқан.
Tashkent City-де балаларға ойын алаңы, түрлі жануарлардың мүсіндері ұнады. Мұнда жергілікті халық көп жүреді екен. Волейбол ойнаған жастар, серуендеп жүрген отбасылар, балаларын ойын алаңына әкелгендер, кешкі асқа мейрамханаға келгендер — әйтеуір халық көп болды. Туристік жерден шаршап, жергілікті халықтың тіршілігін көргісі келгендер, осында келсе болады екен.
Саябақтың ресми парақшасына жазылып алып, сапарыңызды әлдебір шара қарсаңына орай жоспарлауға болады екен. Мәселен, мұнда жаппай әуе шарын ұшырып, дрон шоулар өткізіп тұрады.
3-күн. Базарлық алдық
Қайтар күні, 25 наурызда қонақүйді өткіздік те, заттарымызды бірден ала жүріп, әуелі Кукелдаш медресесін көруге бардық. Ары-бері жүргіміз келмеді. Кукелдаш — Ташкенттегі ең көне тарихи-діни ескерткіштердің бірі, XVI ғасырда II Абдулла хан дәуірінде салынған. Онда әлі де сабақ өтетін болғандықтан, ішін толық аралауға болмайды екен. Медресенің жанында атақты Чорсу базары орналасқан. Біз базардың негізгі қақпасынан емес, басқа жағынан кірдік.
Айтпақшы, Ташкентте тарихи орындар аз сияқты көрінді. Оның үстіне бұл сапарымыздың мақсаты көңіл көтеру болды. Сондықтан тарихи жерлер көру үшін алда Самарқанд пен Бұхараға арнайы барамыз деп шештік.
Күн ыстық, кішкентай балалар болғандықтан, көпшілік көрсететін бөліктеріне дейін жете алмадық. Жергілікті халықтың айтуынша, базар ішінде еттің жағымсыз иісі бар әрі туристік орын болғандықтан бағалары да қымбат. Біз сырт жақтағы базардан азын-аулақ базарлық алдық та (саудаласыңыз), екі таксиге міндік те, көлігімізді қалдырған Қабыланбекке тарттық.
Қанша кетті?
Сапарымызға шамамен 500 мың теңге кетті. Алғашқы күні барғанда достарымыздың үйіне түнегеніміздің арқасында біршама ақша үнем болды. Екі күн тамақ ішкенде әр отырғанымызға шамамен 20 мың теңге кетті.
Ташкентте 2GIS пен Яндекс такси жақсы жұмыс істейді. Бәріміз бірге, бірақ екі бөлек такси жалдап жүрдік. Арбамыз көлемді болғандықтан, багаж салатын орны кеңірек comfort+ санатындағы такси шақыруға тура келді. Жалпы қаладағы бағалар Алматы мен Шымкенттегі бағаларға ұқсас. Кейде қазақша, кейде орысша сөйлесіп жүрдік.
Бала-шағаны алып, он адаммен Ташкентке бару деген түк қиын емес. Бастысы бәрін жоспарлап, бағдарламаны алдын ала дайындап алған дұрыс. Еңбек демалысына дейін едел-жедел шетел көріп қайтамын десеңіз, Өзбекстан астанасы — тамаша таңдау. Үй ішімен екі-үш күнде сапарлайтын жер іздеп отырсаңыз, осы жолнұсқауды белгі деп біліңіз.
Бұрын-соңды бәріміз бірге саяхатқа шығып көрмеген соң, бірінші ретке Ташкент ең жақсы таңдау болды деп ойлаймын.
