Қарағандыда көретін не бар өзі?
Aviasales-тің сүйікті қаласына барғанда қаланың бірігей сұлулығын көріп қайтыңыз.
Сәлем, менің есімім — Зүлфия. Екі жыл бұрын мен Астанадан Қарағандыға қоныс аудардым. Бұл қалада мен қарбалас дегенді ұмытып, әр сәттен асықпай рахат алып, шын мәнінде өмір сүре бастағандаймын. Қарағанды десе, көпшіліктің ойына әлі күнге дейін тек шахталар мен зауыттар келеді екен. Онысы рас та шығар, бірақ өнеркәсіптер жұмысы бір сәт те дамылдамайтын бұл мекенде жұрт баяу да бірсыдырғы күн кешеді. Саябақта жұрт жиі серуендейді, демалысында театрға барады. Қарағанды — тарихы терең де күрделі қала. Бұл жердің өзіне ғана тән сұлулықты тануға (және ессіз сүйіп қалуға) әзірмін десеңіз, мына гидім сізге арналады.
Қарағандыға қалай жетеміз?
Теміржол және автовокзал қаланың қақ ортасында. Ал «Сарыарқа» әуежайы 27 шақырым жерде, сондықтан трансфер мәселесін алдын ала ойластырған жөн. Қала ішінде таксимен жүрген ыңғайлы. Бағасы арзан әрі шақырғаныңда тез келеді. Әуежайдан қала орталығына дейін жетіп алған шамамен үш мың теңге тұрады. Қоғамдық көлікке мінемін десеңіз, ONAY картасы қажет болады. Автобуста жүру ақысы картамен төлесеңіз — 100 теңге, ал қолма-қол 200 теңге төлейсіз.
Қаланың ең көрікті жерлері
Қарағандыдағы қыдырысты Орталық саябақтан бастайық. Серуенге шығардан бұрын кофе ала салыңыз. Орталығында ерекше кофехана көп. Кіріп шыққанға сөз лайық бірнеше жерді тізіп берейік.
Орталық саябақ
Жұмыс уақыты: тәулік бойы.
Билет бағасы: кіру тегін, аттракциондар бағасы 350 теңгеден басталады.
Мекенжайы: Интернационалист-жауынгерлер көшесі, 29/2.
Орталық саябақ — қала тұрғындарының сүйікті жері. Ол өте үлкен әрі жап-жасыл, аумағы 150 гектардай. Ортасында жазда қайыққа мініп, катамаран тебетін көл жатыр. Айналасында аттракциондар мен тирлер бар, тәтті мақта мен құйылмалы балмұздақ сатылады. Ал қыста үлкен мұз айдыны мен сырғанақтар ашылады.
«Кеншілер даңқы»
Жұмыс уақыты: тәулік бойы.
Билет бағасы: тегін.
Мекенжайы: Бұқар жырау, 32.
Монумент қала тарихын кез келген гидтен де жақсы түсінуге көмектеседі. Қарағанды шахталардың айналасында бой көтерген, сондықтан қала тарихымен танысуды дәл осы ескерткіш маңынан бастаған жөн. Мұнда туристер суретке түседі, ал жергілікті жұрт кездесетін жер деп осы маңды таңдап жатады. Бұл — өткеннің жаңғырығы емес, қаланың тірі әрі маңызды бөлігі деп қабылданатын советтік ескерткіштің сирек үлгісі.
Кеншілер мәдениет сарайы
Жұмыс уақыты: дүйсенбі–жұма, 9:00-18:00.
Билет бағасы: бес мың теңгеден басталады.
Мекенжайы: Бұқар жырау, 32.
Саябақтан шыға берісте Қарағандының ең танымал ғимараттарының бірі — Кеншілер мәдениет сарайын көресіз. Ол кеншілер мен олардың отбасыларына арналған бас мәдени орталық ретінде салынған және бұл рөлін әлі күнге дейін сақтап келеді: мұнда қаланың ең үлкен концерттері мен фестивальдері өтеді. Спектакльге бару жоспарыңызда болмаса да, ғимарат сәулетін көрмей кетпеңіз.
«Қайда-қайда? Қарағандыда!»
Жұмыс уақыты: тәулік бойы.
Билет бағасы: тегін.
Мекенжайы: Нұркен Әбдіров, 32, «Три медведя» мейрамханасының маңында.
Бұл композиция әлемдегі қанатты сөзге қойылған алғашқы ескерткіш ретінде Гиннестің рекордтар кітабына енген. Мүсін әйгілі диалогті әзілмен суреттейді: шабадан ұстаған аң-таң турист жол сұрап тұрса, бейқам жүрген кепкалы тұрғын оған әлгі күлкілі меммен жауап береді. Композиция ортасында қала символы — суыр «Қарағандыға дейін 0 шақырым» деген бағыт нұсқағышқа сүйеніп тұр.
Қарағанды зообағы
Жұмыс уақыты: 9:00-18:00 (касса 17:00-ге дейін істейді).
Билет бағасы: ересектерге — 800 теңге, балаларға — 500 теңге, беске толмаған балалар тегін кіреді.
Мекенжайы: Ермеков, 111.
Балалармен бірге саяхаттап жүрсеңіз, еліміздегі ең көне хайуанаттар бағының біріне бас сұғыңыз. Ішінен әлі де болса совет сәулетінің сарыны сезілгенімен, саябақ ішіндегі кең аллеялар бойымен серуендеген керемет. Хайуанаттар бағы тап-таза, мұнда арыстан, жолбарыс, ягуар, сусиыр, тіпті зебра да бар. 146-автобусқа не маршруткаларға мініп жетуге болады.
Қарағандыдағы мұражайлар мен мәдени орындар
«Қарағандыға — үлгілі тәртіп пен жоғары мәдениет» деген кеңес кезінен қалған тіркесті сіз де естіген шығарсыз. Бұл тегін айтылмаған: қалада өнердің түр-түрін сүйетіндерге айналысар іс те, барар жер де жетеді.
К.С. Станиславский атындағы драма театры
Жұмыс уақыты: 11:00-18:00, сейсенбі күні — 11:00-16:00.
Билет бағасы: мың теңгеден басталады.
Мекенжайы: Нұрсұлтан Назарбаев, 19/1.
Елдегі ең көне театрлардың бірі. Бұл жерде әлі күнге дейін жұрт жиі жиналып, кеңістікте тіршілік қайнап жатыр. Мұнда Шекспирден бастап, психологиялық триллерлер мен заманауи драмаларға дейін бәрі сахналанып жатады. Шығармашылық тоқ тәжірибе жасап көргеннен тартынбайды. 1940 жылдары аңызға айналған МХАТ труппасының бір бөлігі дәл осы театрға келген болатын.
Қарағанды бейнелеу өнері мұражайы
Жұмыс уақыты: сейсенбі–жұма, 10:00–18:00, сенбі–жексенбі, 10:00–17:00.
Билет бағасы: ересектерге — 500 теңге, шетелдіктерге — 1000 теңге.
Мекенжайы: Бұқар жырау, 76.
Өнерсүйер қауым облыстық мұражайға бас сұққаны жөн. Төрт залда Әбілхан Қастеев сияқты классиктерден бастап, экслибристердің (миниатюралық графикалық жұмыстар) бірегей топтамаларға дейінгі кескіндеме, графика және мүсін жауһарлары жинақталған. Экспозициялар жиі ауысып тұрады, сондықтан мұражай сайтынан кестені тексеріп алыңыз.
«Сүйінші» мүсіні
Жұмыс уақыты: тәулік бойы.
Билет бағасы: тегін.
Мекенжайы: Оңтүстік-Шығыс шағын ауданы, этнографиялық саябақ жанында.
«Этносаябақтан» сәл ары жүрсеңіз, «Сүйінші» мүсінін көресіз. Бұл жерді жас жұбайлар ерекше жақсы көреді: дәстүр бойынша жұптар стеладағы арнайы ойықтарға қолын қойып, Мендельсон маршының сүйемелдеуімен тілек тілейді. Осы жерден этносаябаққа керемет көрінеді.
Фатималық Әулие Мәриям Бикеш кәтідралы
Жұмыс уақыты: 8:00-19:00.
Билет бағасы: тегін.
Мекенжайы: Кеншілер даңғылы, 32.
Кеңес кезеңіндегі жаппай депортациялар салдарынан қалада поляк және неміс қауымдастықтары қалыптасты. Соның арқасында бүгінде Қарағандыда католиктік ғибадатханалар өте көп. Барлық халықтың Анасы Фатималық Әулие Мәриям Бикеш кәтідралы — өңірдегі ең әсерлі сәулет нысандарының бірі. Онда орган орнатылған және шіркеуге қайырымдылық жарнасын төлеп, классикалық музыка концерттеріне баруға болады. Криптаға (шіркеудің төменгі бөлігіне) түсуге, органға көтерілуге немесе жай ғана фрескаларды тамашалап, тыныштықта дамыл тапқанға таптырмас жер.
Саяси қуғын-сүргін құрбандарын еске алу мұражайы (ҚарЛАГ)
Билет бағасы: ересектерге — 1000 теңге, экскурсия — адам басына 700 теңгеден.
Мекенжайы: Долинка ауылы, Школьная, 39.
Экскурсия уақыты: 10:00–11:30; 11:30–13:00; 14:00–15:30; 15:30–17:00.
Экскурсиясыз аралауға болатын уақыт: 10:00–17:00.
Қалада ұзағырақ аялдап, облысқа шығып қайтамын деп отырсаңыз, Долинкаға соқпай кетпеңіз. Онда «ҚарЛАГ» саяси қуғын-сүргін құрбандарын еске алу мұражайы бар. Лагерь басқармасының бұрынғы ғимаратын сотталғандардың өзі салған. Сырттай ол салтанатты көрінгенімен, ішінде мыңдаған адамның ауыр тағдыры жатыр. Экспозицияда құжаттар, жеке заттар мен қалпына келтірілген кабинеттер бар. Бұл өңірдің және бүкіл Қазақстанның тарихын шынайы түсінгісі келетіндер баруға тиіс жер.
Серуендейтін жерлер
Қарағанды — қыдырып жүргенге жайлы, кең қала. Орталық саябақта өмір қайнап жататын болса, қаланың басқа аудандары тып-тыныш тұрады. Онда серуендеп қайтатын аллеяларды, туристер біле бермейтін ерекше маршруттарды табуға болады.
Балалар теміржолы
Мекенжайы: Орталық саябақ (шет жағында).
Жұмыс уақыты: бейсенбі–жұма, 12:00–18:00, сенбі–жексенбі, 11:00–18:00.
Билет бағасы: 400 теңгеден басталады.
Орталық саябақтың маңызды бөлігі — балалар теміржолы. Қазір бұл жерді Хәрри Поттер әлемін арқау етіп, ерекше безендіріп қойған. Қарағандылықтар кеңестік мұраны сиқырлы әлемді еске түсіретін тақырыппен шебер ұштастырған екен. Соның нәтижесінде ересектер мен балалардың демалуына арналған қызық орын шыққан. Асфальттағы нұсқағыш сызықтар бойымен жүріп отырсаңыз, балалар пойызына жетесіз.
Жеңіс саябағы
Мекенжайы: Кеншілер даңғылы, 35/1.
Жұмыс уақыты: тәулік бойы.
Билет бағасы: тегін.
Оңтүстік-Шығыстағы Жеңіс саябағы — тағы бір тыныш жер. «Жаңа қала» деп саналатын бұл ауданда баламен серуендеген өте жайлы: жасыл желек мол, әдемі аллеялар мен субұрқақ бар. Жақын жерде Теннис орталығы ашылған, сондықтан серуенді спортпен ұштастыруға болады.
Қарағандының дәмінен ауыз тиіңіз
Қарағандыда алуан түрлі ас мәзірі бар. Мұнда таңғы кофенің де ең жақсысын табасыз, кешкі асты да қаланың әдемі панорамасына қарап отырып іше аласыз.
Ұлттық тағамдар
Қарағандыда ұлттық асхана мейрамханалары өте көп, талғамыңыз бен бюджетіңізге қарай таңдап алыңыз. Үлкен порциямен берілетін классикалық тағамдар іздесеңіз, Navat-қа барған жөн. Turan El-ге қазақтың кең дастарқанының атмосферасын сезіну үшін барыңыз, ал Viva La Plova — қаладағы негізгі «палау орталығы».
Өзіңізді нағыз қарағандылық сезінгіңіз келсе, елеусіз ғана тұрған Inter Food дәмханасына бас сұғыңыз. Aviasales.kz-тің «Махаббат жалыны» жобасындағы қос ғашық сүйсіне жеген қуырылған тұшпарадан міндетті түрде ауыз тиіңіз.
Грузин тағамдары
Той-думан іздеп, хачапури мен үй шарабын татып көргіңіз келсе, «Мой Тбилиси» немесе «Грузинский дворикті» таңдаңыз. Мұнда шырынды хинкали пісіреді, асында көк шөп мол және атмосферасы өте жайлы.
Қытай тағамдары
Қарапайым, тойымды әрі дәмдеуіші мол тағам іздесеңіз, орталық саябаққа қарама-қарсы тұрған «Турандот» мейрамханасына бас сұғыңыз. Мұнда жұрт үлкен порциямен берілетін уок, ет пен балық жеуге келеді. Ұзақ серуеннен немесе жолдағы қарбалас күннен кейін бір топ адаммен барғанға таптырмас жер.
Теңіз тағамдары
Кім айтты сізге, жазықтың қақ ортасында теңіз тағамын жеп отыра алмайсыз деп? Қара теңіз тағамдары мен жайлы интерьер іздесеңіз — «Мараниге», тың тәсілмен әзірленген тамақтарды жеймін десеңіз O!Mare-ге барыңыз. Сөлді стейктер мен авторлық ұсыныстардан ауыз тигіңіз келсе, Line Brew-ге бас сұғыңыз.
Кофе ішетін жерлер
Орталықтағы әр көшеде күн райы бұзылғанда кірі салатын не асықпай жұмыс істейтін жер көп. Сондықтан бәрін тізіп отырмайын. Төменге жергілікті тұрғындар ерекше жақсы көретін орындарды ғана жазып отырмын.
Hani Cakes & Coffee
Қалада бірнеше нүктесі бар сәнді желі. Мұнда баристалар кофені үнемі бабымен демдеп береді; сапалы кондитерлік өнімдер сатады. Қарағандыда бірнеше филиалы болғандықтан, «Ханиде» жұрт жиі кездеседі не ноутбукқа телміріп, жұмыс істеп отырады. Бұл орынның торттары да танымал. Оларға мерекеге орай тапсырыс беруге не үйге бір тілімін ала кетуге болады. Туған күн иелеріне 10% жеңілдік жасайды.
Aкулий Coffee Roaster’s
Кофені демдеудің қыр-сырын түсінетіндерге арналған жер. Шеберлер дәндерді өзі қуырады, сусынды воронкада және аэропресте дайындайды, сондай-ақ керемет балама сусындар (жас матча не какао) ұсынады. Назарбаев даңғылындағы жайлы интерьерді көрсеңіз, ішінен шыққыңыз келмей қалады.
BlackБери
Жайлы атмосфера мен сапалы ингредиенттерге мән беретін кофехана. Мұнда таңғы латте не авторлық шай ішкен ғажап. Визуал шу аз, бірақ сусындарға ерекше көңіл бөледі. Әр үш ай сайын мұнда маусымдық мәзір жасайды: мысалы, қазір мәзірде шырша қосылған раф, қарақатты фильтр-кофе және кардамон қосылған бөлкелер бар.
Автордың ерекше ұсыныстары
Қарағандымен шын танысамын десеңіз, негізгі көрікті жерлерді аралап шыққан жеткіліксіз. Уақытыңыз болса, нағыз қарағандылық сияқты қыдырып көріңіз.
«Сад» кафесін көріңіз
Гастрономия мен эстетика тоғысқан кеңістік. Бұл жай ғана тамақтанатын орын емес, ғимараттың ішіндегі оранжерея дерсіз! Жасыл желек арасында түскі ас ішіп, іштегі шағын бұрыштан авторлық әшекей не сыйлық ала кетіңіз.
«Наскальный кит» театрына барыңыз
Классикалық қойылымдарға балама іздегендерге осы заманауи тәуелсіз алаңды ұсынамын. Мұнда экспериментал спектакль қоятын, арнайы перформансы бар камералық труппалар жиі келіп тұрады. Жанды формат пен бейстандарт сценарийлер ұнаса, сапар алдында афишаны қарап көріңіз. Билеттер тез сатылып кетеді.
Моншаға түсіңіз
Жаныңыз бен тәніңізді қатар демалдыратын тамаша мүмкіндік. Бағдарлама бес сағатқа дейін созылады. Осы уақыт ішінде нақ шебердің жетекшілігімен денеңізді босаңсытып, күш жинауға арналған процедуралар кешенінен өтесіз. Менің жеке кеңесім — бу шебері Татьяна. Ол моншадан кейін шай құйып, печенье мен тұздалған өнімдер ұсынады.
Суретті салған Дада Кирей.
