Сеулде босанған қазақ әйелі: қанша кетті, қалай өтті және елмен салыстыру
Тұңғышын — Қызылордада, екіншісін Сеулде босанған әйел Корея клиникасында не көргенін баяндап берді.
Менің атым — Тамаша. 26 жастамын. Екі балам бар: тұңғышымды — Қазақстанда, кенжемді Кореяның Сеул қаласында босандым. Неге бұлай шешкенімді, босануға қалай дайындалғанымды айтып берейін.
Неге Кореяны таңдадым?
Анам 2019 жылдан бері Оңтүстік Кореяда тұрады. Біз де сонда жұмыс істеуге көшкіміз келіп жүрді. Сөйтіп 2023 жылдың аяғында нақты шешім қабылдап, K-ETA арқылы рұқсат алып, құжаттарымызды реттедік.
2024 жылы 30 қаңтарда күйеуім, ұлым үшеуіміз Инчхон қаласына жұмыс бабымен көшіп бардық. Бізді анам қарсы алып, алғашқы күндерден бастап барынша қолдау көрсетті: тұрмысты үйретті, жұмыс бағыттарын таныстырды, бейімделуімізге жәрдемдесті. Бірақ анам денсаулығына байланысты жарты жылдан соң Қазақстанға оралды.
Біз әуелі екі жыл ғана жұмыс істейміз деп жоспарлап едік. Бірақ биыл бұл жақта жүргенімізге екі жыл болды. Тағы қанша тұратынымыз белгісіз. Тұңғышымды кәріс мектебіне беру үшін оқу визасына өтініш тапсырамыз деп отырмыз.
Кореяға ұшып келген күні әуежайда анама қарап «Тағы біреуін туып алуға келдім» деп қалжыңдағыным есімде. Құдай аузыма салған шығар, былтыр ақпанда қызды болдым.
Қалай дайындалдық?
Жүкті екенімді білгенде қатты қуандық. Аналарымыз әрі қуанғаннан, әрі уайымдағаннан бір жылап та алды. Біз оларға шетелде босануға болатынын, бала бұл жақта дүниеге келсе де, Қазақстан азаматтығын алатынын түсіндірдік. Содан олар тынышталып, бізді қолдап, батасын берді.
Бізде ешқандай сақтандыру болған жоқ, медицина қымбат. Соған қарамастан Кореяда босанамын деп шештік. Ол үшін тек паспорт керек болды.
Кәрістер жүктілікке байыппен дайындалып, құрсағындағы балаға зор жауапкершілікпен қарайды. Сол себепті жүкті екенін білген күннен бастап, 4-6 аптасынан-ақ клиникаға тіркеліп қояды.
Жүктілік бойынша клиникаға тіркелген соң жалпы қан талдауын алады, сосын зәр талдауын тапсырады. Дәрігердің кеңесі бойынша, босанғанға дейін темір, D3, omega-3 витаминдерін іштім.
Әуелде Инчхонда үйге ең жақын клиникада қаралып жүрдім. Үш-төрт айдан кейін Сеулдегі үлкен, көпбейінді клиникаға ауысып кеттім. Бір жағынан таныстарым сол клиниканы мақтады, екінші жағынан қызымның паспортында Сеул деп тұрғанын қаладым. Инчхон мен Сеулдің арасы 30 шақырым, сондықтан барып-келген аса қиындық тудырмады. Екеуінің бағасы да бірдей болды. Мен босанатын жер таңдағанда бағасына емес, бір-екі танысымның ұсынысына қарап, Сеулді таңдадым.
Сөйтіп Сеулдің қаржы орталығы — Ёыйдо ауданында орналасқан Yeouido St. Mary’s Hospital-да босандым. Бұл — университет деңгейіндегі толық медициналық қызмет көрсететін аурухана. Жоғары технологиялық емдеу, халықаралық пациенттерге қолдау және заманауи медициналық жүйесі аты шыққан. Мен ондағы қызметкерлердің жұмысына қатты риза болдым.
Кәріс тілін білмеймін, дәрігер-медбикелермен сөйлескен қиындау болды. Бірақ кәрістердің сыпайылығы мен шыдамдылығының арқасында google-аудармашы мен gpt-чат арқылы түсінісіп жүрдім.
Босанғанға дейін дәрігерге ай сайын барып жүрдім. Өздері бір күнді белгілеп шақырады екен. Әр акушер-гинекологтың кабинетінде УДЗ-аппараты болады. Ай сайын баланы түсіріп, қарап отырады. Ай-күнім жақындағанда апта сайын узиге түсіп жүрдім. Тіпті бір барғанымда қызымды ап-анық суретке түсіріп, рамкаға салып берген. Жалпы медқызметкерлердің көзқарасы мен жұмыс деңгейіне көңілім толды. Ай сайын дәрігерге қаралуыма 80-120 мың вон (30-40 мың теңге) арасында ақша жұмсадық.
Бір қызығы, ол жақта құрсақтағы балаға еркелетіп ат қояды екен. Басында түсінбей қалдым, кейін бөпемді Sweetie деп кеттім. Бала мен ана арасындағы қарым-қатынасты құрсақтан-ақ қалыптастырғанның маңызы зор екенін сонда ұқтым.
Бөбегімді босанған күн
Мен кесарь тілігімен босандым. Себебі тұңғышымды да Қазақстанда солай босанғанмын. Бұл жақта әйел тапқан балалар арасы қанша болса да, біріншісін отамен босансаңыз, кейінгілерін де босанарда ота жасайды екен. Соны естіп, бір жылап алғаным бар. Кесарь тілігімен жасалатын ота қаншалықты қиын екенін білетінмін. Босанғанша өзімді ойша операцияға дайындап жүрдім.
Дәрігерлер 2025 жылы 25 ақпанда кесарь тілігімен жоспарлы түрде босанатынымды айтты. Ол үшін бір күн бұрын клиникаға барып жаттым. Операцияға дайындалып, дәрумен ішіп, дәрі ектіре бастадым. Клиникада сол күннен бастап тамақ беріле бастады. Мәзірі өте құнарлы, тағамдары дәмді екен.
Сөйтіп 25 ақпанда 11:00-де мені палатамнан операцияға алып кетті. 11:20-да қызымды кесарь тілігі арқылы дүниеге әкелдім. Әрі қарай 15-20 минутта ішімді тікті. Операциядан бұрын наркоз салды, ес-түссіз жаттым. Тек операция үстелінен төсекке ауыстырып жатқанда қатты ауырсынып оянғаным есімде.
Баланы босанған соң 24 сағаттан кейін көрдім.
Дәрігерлер бірінші ананың жағдайы дұрысталуы керек дегенді айтып, бір күн орнымнан тұрғызбады. Баланы көру үшін бөлек палатаға бір реттік халат киіп кірдім. Тіпті емізуге рұқсат бермеді, қызымды үйге шыққан кезде бір-ақ еміздім. Оған шейін медбикелер баланың жағдайын жасап, астын ауыстырып, күтім жасады.
Ота жасалатын күні жолдасымды да шақырған. Мен қалыпқа келгенше ол қасымда екі күн жатты. Жолдасым жүріп-тұруыма көмектесіп жүрді.
Босанғаннан кейін ауруханадан шыққанша «капельницамен» жүрдім. Глюкоза, окситоцин, С витамині мен аминқышқылдар, электролиттер салды. Қанды көбейтуге қосымша темір мен B витаминдер комплексін алдым.
Кесарь тілігін жасаған жердегі тігістерге бірден үлкен пластырь жапсырып қойды. Клиникада үш күн жаттым. Босанғаныма үш күн болғанда ішімдегі тігісті шешіп, басқа пластырь жапсырып, үйге қайтарды. Келесі келгенімде сол пластырьді алып тастады. Кейін тігілген жер тез жазылып кетуі үшін жақпамай берді. Осылайша тез қалпыма келдім.
Қанша ақша кетті?
Кесарь тілігімен босанудың өзіне 4-5 миллион вон (1,5-2 миллион теңгеге) ақша кетті. Жеке палата алмаймыз деп шештік. Бірақ жалпы палатаның өзінде әр кереуеттің жан-жағы жабылған, ешкім ешкімді көрмейді, ыңғайлы болды. Алған капельница мен клиникада болған күндеріміздің бәрі осы сомаға кірді.
Кореяда сақтандырусыз босануға қанша кетті?
Қызметтер | Ақысы | Жиілігі | Жиыны |
|---|---|---|---|
Ай сайын дәрігерге қаралуға | 30-40 мың теңге | (босанғанша ай сайын, тоғызыншы айда апта сайын) — 12 рет | 480 мың теңге |
Кесарь тілігімен босану | 1,5-2 миллион теңге | - | 1,5-2 миллион теңге |
Барлығы | 2 500 000 теңге |
Ай сайын дәрігерге қаралуға
Ақысы
30-40 мың теңге
Жиілігі
(босанғанша ай сайын, тоғызыншы айда апта сайын) — 12 рет
Жиыны
480 мың теңге
Кесарь тілігімен босану
Ақысы
1,5-2 миллион теңге
Жиілігі
-
Жиыны
1,5-2 миллион теңге
Барлығы
Ақысы
Жиілігі
Жиыны
2 500 000 теңге
Клиникадан шыққан соң
Кесарь тілігімен босанған соң, дәрігер үш-төрт жылсыз бала көтермеу керегін айтты. Тігілген жердің қалай жазылғанын көрсетуім қажет екен айтып, бір айдан кейін тексеруге келіңіз деді. Тамаққа әлдебір шектеу қойған жоқ, қалағанымды жедім.
Босанғанға дейін де, кейін де қалқанша безімнің жұмысы нашар болды. Дәрігерлер босанғаннан кейін ай сайын мені шақырып отырды. Қан тапсырып, қалқанша безімді УДЗ-ға түсіріп, қалыпқа келгенше мені бақылап отырды. Соған қатты риза болдым. Мен өзім шақырмаса қаралуға бара қоймас едім. Себебі қалқанша безімнің ауырып жүргенін аса байқамадым да.
Қазір Кореяның босанған аналарға күтім жасайтын «Чоривон» орталықтары танымал ғой. Клиникадан шыққан соң бірден сонда жатып, шілде терін шығарып, баланы күтушіге тапсырып, өзіне демалыс ұйымдастыратын кәріс әйелдер аз емес. Бағасы 1 аптаға шамамен 1 800 000 вон (625 000 теңге) шығады. Әр «Чоривонның» прайсы ұсынатын қызметтеріне қарай әртүрлі. Мен орташа есеппен айтып жатырмын.
Бірақ мен ондай орталыққа жүгінгенім жоқ. Тұңғышым бірер күнде корей балабақшасына барғалы отырған, соған дайындалуымыз керек болды. Болашақта тағы босанып жатсам «Чоривонға» жол түсер деп үміттенемін.
Бюрократиялық жұмыстар
Клиника бөпемнің туғанын растайтын анықтама берді. Сол анықтаманы Кореяның Сыртқы істер министрлігіне апостиль жасауға пошта арқылы жібердім. Шамамен бір аптадан кейін апостилі қойылған анықтамам қолыма тиді. Айтпақшы, апостиль қойылғанда анықтама орысшаға аударылып келді. Аудармамен келмесе, анықтаманы қазақша не орысшаға аударып, нотариалды түрде растау керек.
Қазақстаннан туу туралы куәлік алу үшін мына құжаттарды жинау керек:
- корей туу туралы анықтамасы мен апостиль
- нотариалды аударма
- ата-анасының төлқұжаты
- неке куәлігі (болса)
- өтініш
Бұл құжаттарды түгендеген соң Кореядағы Қазақстан консулдығына не консульдығына тапсырасыз. Олар Сеулде не Пусанда бар. Туу туралы куәлік 2-6 апта арасында жасалады. Дайын болған кезде елшіліктен хабарлама келеді.
Қазақстан мен Кореяны салыстыра келе…
Тұңғышымды Қызылордадағы мемлекеттік перзентханада тегін босандым. Кореяда тегін перзентхана жоқ, жергілікті халық ақылы босанады. Соған қарамастан екі түрлі тәжірибемді салыстырып жүремін.
Ақылы болғандықтан ба, әйтеуір Кореяда босанған жайлы екенін түйдім. Себебі дәрігерлер бірінші орынға ананы қояды. Босанған әйелдің қалыпқа келуін қатты қадағалайды, оған барлық жағдайды да жасап қойған. Баланы бір күн бойы өздері бағады, клиникадан шыққанша қарайласады. Жолдасымның екі күн қасымда болғаны да есімді жиып, аяққа тұруыма үлкен көмек еді. Кәріс тілін білмесек те, медицина қызметкерлері бізге жайдары, байсалды, құрметпен қарады. Тіпті мұсылман екенімізді білгенде тек халал тамақтар әкелетін болды.
Кореяда босанғанымның бір ғана минусы болды: клиникадан шыққан соң жалғызсырап қалдым. Тұңғышымды екі сіңілім бағысып, тез өсіп кеткен еді. Бұл жолы олар келе алмады. Жалғыз өзіме бала қараған кейде қиын болды.
Кореяда босануды ойлап жүрген қыз-келіншекке еш уайымсыз келе берсе болады дер едім. Өз басым бұл жақта босанғаныма қуанамын, жақсы тәжірибе болды. Бар жағдайым жасалып, жылы қараған сайын мен де еркелеп жата бердім. Босанғаннан кейінгі күйзеліс пен қысымнан айналып өткендеймін. Мұның ана үшін де, бала үшін де маңызы зор.
