Қызығы мен шыжығы көп үйлену тойынан кейін шудан қашып, шаршауды басып, шетелге тартып-ақ кеткің келеді. Бірақ қазақтың аста-төк тойынан кейін қалтада көп ақша қалмауы да мүмкін екенін жақсы білеміз. Жас жұбайларға ыңғайлы болсын деп, түрлі бюджетке лайықтап, артық машақатсыз демалып қайтуға болатын елдерді қысқаша топтап шықтық.
Біз бюджетті шамалап көрсетіп отырмыз. Саяхатқа қанша жұмсайтыныңыз өзіңізге (және маусымға) байланысты. Арзан билеттерді Aviasales-тен іздеңіз.
500 мың теңгеге дейін
Қырғызстан
Құжаттар: Қазақстан азаматтары Қырғызстанда 90 күнге дейін визасы жүре алады.
Тікелей рейстер: Алматы мен Астанадан Бішкекке тіке ұшуға болады.
Бішкектің өзінде де көретін жер көп, бірақ жазда саяхатты Ыстықкөлден бастаған жөн. Оңтүстік жағалаудағы Сказка шатқалында күн ғажап боп батады. Көл жағасындағы жайлы глэмпингтердің біріне тоқтап, түнде толқынның шуымен жұлдызды аспан астында сыр шертіңіздер.
Ыстықкөлден әрі қарай Қарақолға жол тартып, ондағы ыстық бұлақтарда тәніңізді де, жаныңызды да тынықтыруға болады. Ал бірер сағат жол жүруге әзір болсаңыз, өркениеттен жырақ жатқан Соң-Көлге тартып кетіңіздер. Онда ұялы байланыс ұстамайды, сондықтан тау баурайында атпен серуендеп, көгілдір көлдің жағасында таңды бірге қарсы алып, мына әлемнен бірер күнге жоғалып кетуге болады.
Өзбекстан
Құжаттар: Қазақстандықтар Өзбекстанда тіркеусіз, визасы 30 күнге дейін жүре алады.
Тікелей рейстер: Алматы, Астана, Ақтау, Түркістаннан Ташкентке. Сондай-ақ Алматыдан Самарқандқа тікелей рейстер бар.
Мына тұрған Ташкенттің өзі қазір кәнігі саяхатшыны да таңғалдыра алады, бірақ өзбек колоритін Самарқанд пен Бұхарадан табасыз. Регистан алаңындағы түнгі шамдардың жарығы мен көгілдір күмбездердің астында серуендеу сіздерді өткен ғасырларға жетелейді. Ескі қаланың тар көшелерінде ерекше фотосессия жасап, көне керуен-сарайларда көк шай ішіп қайтыңыздар.
Ерекше тарихи атмосфера іздеген жұптар саяхатты танымал қалалармен шектемегені жөн. ЮНЕСКО-ның мұралар тізіміне енген Хиуадағы Ичан-қалаға барыңыздар. Ол — 10 метрлік қорғандармен қоршалған ашық аспан астындағы музей-қала. Қаланың ішкі бөлігіне көлік кірмейтіндіктен, Хиуа хандығының 50-ден астам жәдігерін екеуіңіз жаяулап аралап қайтасыздар.
Ал жап-жасыл желектер мен тұмса табиғат керек десеңіздер, Ташкенттен небәрі бір сағаттық жердегі Шарбақ су қоймасы мен Әмірсой тау курорттарына барыңыздар. Мұнда аспанмен таласқан шыңдар арасында фуникулермен саяхаттап, кешкісін нағыз өзбек палауынан дәм татып, жергілікті базарларда саудаласып қайтуға болады.
1 млн теңгеге дейін
Грузия
Құжаттар: Қазақстандықтар бір жылға дейін визасыз жүре алады. Бірақ медициналық сақтандыру рәсімдеу — міндетті талап.
Тікелей рейстер: Алматы, Астана, Атырау, Ақтөбе, Ақтаудан — Кутаисиге; Алматы мен Астанадан — Тбилисиге; Алматы, Астана және Ақтаудан — Батумиге тіке жетуге болады.
Саяхатты көне Тбилисиден бастаған жөн. Мұнда қаланың символына айналған заманауи Бейбітшілік көпірі мен Нарикала бекінісіне баратын аспалы жолды көруге болады. Қала орталығындағы Абанотубани ауданындағы күмбезді күкірт моншалары мен «Легвтахеви» сарқырамасының жанында әдемі суретке түсесіздер.
Ел астанасынан теңіз жағалауына, яғни Батуми бағытына қарай пойызбен немесе көлікпен (шамамен 5-6 сағаттық жол) жүріп жетесіздер. Осы жағалаудағы Батуми бульвары бойымен 7 шақырым жаяу жүріп немесе велосипед айдап, әйгілі «Әли мен Нино» мүсінінің панорамасын тамашалауға болады. Бірақ қаладан тым көп күтіп қалып жүрмеңіз, көңіліңіз қалып қоймасын.
Қызық іздеген жұптар Тбилисиден үш сағаттық жердегі Казбегиге тартып кетсе болады. 2 170 метр биіктіктегі Гергети шіркеуінен Казбек шыңына қарап отырып таңғы ас ішу — естен кетпес естелік. Ал кешкісін жергілікті наубайханалардың ыстық хачапуриі мен хинкалидің дәмін татып, грузин шарабын ішіп көресіздер.
Әзербайжан
Құжат: Қазақстан азаматтары Әзербайжанда 90 күнге дейін визасы жүре алады.
Тікелей рейстер: Алматы, Астана, Ақтаудан Бакуге ұша аласыз.
Каспий жағасындағы Баку қаласында заманауи сәулет пен тарихи жәдігерлер қаз-қатар тұр. Алдымен «Кіші Венеция» арнасында гондоламен жүзіп, Жалын мұнараларының отты шоуын тамашалаңыздар.
Қала қарбаласынан кейін Бакуден 200–220 шақырым қашықтықтағы Шахдаг не Габала таулы курорттарына (шамамен 3 сағаттық жол) аттаныңыздар. Мұнда аспалы жолмен Кавказ шыңдарына көтеріліп, премиум спа-қонақүйлерде демалуға не тау бөктерінде атпен серуендеуге болады. Осы Габаладан тағы 85 шақырым (1,5 сағат) ары қарай жүріп, Шеки қаласына соғыңыздар. Шеки хандарының сарайы мен көне Керуен сарайларды аралап шықсаңыздар, елдің бүгінін де, өткенін де көріп, бір оқпен екі қоянды атасыздар.
Елдің табиғатында ғажап көрініс көп. Қала орталығынан 70 шақырым жерде Гобустанға барсаңыздар лай жанартауларын көресіздер. Ал Бакуден 25–30 км жердегі Янардаг тауында жер астынан лаулап шығып жатқан өшпейтін отты көруге болады.
Түркия
Құжаттар: Қазақстандықтар Түркияда 90 күнге дейін визасы жүре алады.
Тікелей рейстер: Алматы, Астана, Шымкент, Ақтау, Атырау мен басқа қалалардан Ыстанбұлға тіке жетуге болады.
Ыстанбұлдың Босфор бұғазында жеке катер жалдап, теңіз үстінде күннің батқанына қарап отырған ғажап сәт екеуіңізге де ұнары сөзсіз. Мұндай жеке серуеннің бір сағаты орта есеппен 60 USD (шамамен 28 мың KZT) басталады. Екеуіңіз түрік сериалдарын сүйіп көрген жұп болсаңыздар, біздің гидті пайдаланып, Ыстанбұлдағы әйгілі локацияларды аралап шығуға болады.
Ішкі рейске мініп, бір жарым сағатта Каппадокияға (Невшехир не Кайсери әуежайына) жетуге болады. Онда таң қылаң бере бастағанда жүздеген әуе шарымен бірге аспанға көтеріліп, тас жартастардың панорамасын тамашалау — өмір бойы естен кетпес сәт. Құны бір адамға — 150 USD (шамамен 71 мың KZT) басталады.
Cеруенді ұнататын жұптар Түркияның оңтүстік-батысында, Фетхиеден Антальяға дейін созылып жатқан әлемдегі ең әдемі жаяу жүру маршруттарының бірі — Ликия соқпағына барса болады. Тұтас жолдың өзі ұзақ, бірақ қанша күн жүретіндеріңізді екеуіңіз шешесіздер. Соқпақ бойындағы жағажайларда шомылуға, жергілікті шағын ауылдарға бас сұғып, түрік мәдениетімен етене танысып қайтуға болады. Бұл жолды жүріп өткен жұптар соқпақ бойындағы көріністер ғажап дейді, бірақ ара мен иттен абай болу керек деп ескертеді.
Жоқ, бізге теңіз бен жағалау керек десеңіз, Ыстанбұлдан Эгей жағалауына 10–12 сағатта автобуспен жетуге болады. Бодрум мен Фетхиенің ақ шаңқан виллалары мен көгілдір шығанақтары қымбат көрінгенімен, онда да тиімді демалудың жолдары бар. Мысалы, қымбат қонақүйлердің орнына қала орталығына жақын шағын бутик-отель не жайлы пәтер жалдасаңыз, бюджетіңізді едәуір үнемдейсіз. Егер қос қаланы да көргіңіз келсе, Бодрум мен Фетхиенің арасы көлікпен шамамен 3 сағаттық жол (230 шақырым) екенін ескеріңіз. Ал Фетхиедегі әйгілі Өлі теңіз жағажайына қала орталығынан 15–20 минуттық қоғамдық көлікпен оңай жетіп, ең қымбат ризорттардың қонақтары көретін сол мөлдір су мен табиғатты тегін тамашалауға болады.
Черногория
Құжаттар: Биыл мамыр–қазан арасында визасыз баруға болады.
Тікелей рейстер: Алматы мен Астанадан Подгорица ұшуға болады.
Адрия теңізінің жағалауы мен асқақ таулардың арасында орналасқан бұл ел кейінгі жылдары қазақстандықтар арасындағы танымал еуропалық бағыттардың біріне айналды. Қазақстандықтар мұнда мамырдан қазанға дейін визасыз барып-қайта алады.
Ел астанасы Подгорицада қаланың символына айналған заманауи Мост Миллениум мен оның дәл жанындағы тарихи Адази-паша сағатын көруге болады. Қала орталығынан небәрі 10 минуттық жерде орналасқан Ниагара сарқырамасы мен оған іргелес Циевна өзенінің каньоны табиғат сүйер жұптарға ұнары сөзсіз.
Бұл қаладан теңізге, яғни Будва бағытына қарай шамамен 65 шақырым (1-1,5 сағаттық жол) жүріп жетесіздер. Осы жағалау іргесінде Бечичи дейтін курорттық қалашық бар. Сол жерден пәтер жалдап, теңіз көрінісіне қарап таңғы ас ішу — естен кетпес романтика. Одан әрі жағалау бойымен 4 шақырымдай жаяу жүріп, Пржноның көз тартар көшелерінде серуендеп, Милочер жағажайында әйгілі Свети-Стефан аралының панорамасын көруге болады.
1,5–2 млн теңгеге дейін
Тайланд
Құжаттар: Қазақстандықтар Тайландта 60 күнге дейін визасыз жүре алады.
Тікелей рейстер: Алматы мен Астанадан Пхукетке және Бангкокке ұшады.
Ел астанасында теңіз жоқ, тек жағасында қала орналасқан Чао Прая өзені ғана бар. Есесіне Бангкок — ірі қаржы және мәдени орталық. Мұнда зәулім ғимараттарға тамсануға, «Люмпини» саябағындағы варандарды суретке түсіруге, түнгі базарларды аралап, шопинг жасауға келіңіздер. Жергілікті стритфудтан ауыз тиіңіздер: оның дәмділігі сондай — мәселен, Jay Fai деген шағын көше дәмханасы «Мишлен» жұлдызымен марапатталған.
Бангкоктан 150 шақырым жерде орналасқан Паттайя курорты — у-шуы көп түнгі өмірді ұнататындарға тамаша жер. Онда алып сауда орталықтары мен неон шамдары жарқыраған Walking Street көшесінде көңіл көтеріп, кешкісін жергілікті базарлардан ең дәмді стритфудтың дәмін татуға болады. Қала құрлықта орналасқандықтан, Ақиқат храмы мен Кхао Кхео зообағы сияқты танымал нысандарға оп-оңай жетесіз. Ал Пхукетте тамаша жағажай, қызық экскурсиялық бағдарлама мен көңілді клубтық өмір — бәрі бар. Күндіз түрлі-түсті үйлері мен жарқын муралдары бар Ескі қала көшелерін аралап, дәмханалардан жергілікті роти құймақтарынан ауыз тиюге және Пхукет тарихын білу үшін «Тай Хуа» мұражайына бас сұғуға болады.
Паттайя жақсы ма, Пхукет пе деп таласып отырмасын деп, екі жердің артық-кем тұсы туралы мақала жазып қойғанбыз.
Оңтүстік Корея
Құжаттар: Алдын ала K-ETA қағазын рәсімдеуіңіз керек.
Тікелей рейстер: Астана мен Алматыдан Сеулге рейстер бар.
Сеул — Кореяның заманауи келбеті мен көне дәстүрлерін қатар сезіндіретін ерекше қала. Гёнбокгун сарайында ұлттық ханбок киімін киіп, ханзада мен ханшайымдай фотосессия жасаңыздар. Сеулдің ең биік нүктесі Lotte World Tower мұнарасына шығып, 123-қабаттың биіктігінен мегаполис алақаныңыздағыдай көрінеді.
Одан кейін Иксон-дон ауданының гүлмен көмкерілген ескі ханок көшелерімен серуендеп, ерекше атмосферадағы жайлы кафелерде романтикалық кеш өткізуге болады. Ал Хан өзенінің қақ ортасында, Банпо көпірінің түрлі-түсті фонтан шоуы мен Сеулдің кешкі шамдары фонында жеке яхтамен күннің батқанын тамашалаған сәтті екеуіңіз ешқашан ұмытпайсыздар.
Мегаполистен жүрдек пойызға мініп, небәрі екі сағатта мұхит жағалауындағы Пусан қаласына жете аласыз. Ал көз тойдырар табиғат іздесеңіз, Сеулден ішкі рейспен бір сағаттық жердегі Чеджу аралына аттаныңыздар. Мұнда сөнген жанартаулар мен сарқырамалар арасында қыдырып, мандарин бақтарын аралаған өте әсерлі.
Вьетнам
Құжаттар: Қазақстан азаматтары 30 күнге дейін визасыз жүре алады.
Тікелей рейстер: Алматы мен Астанадан Нячангқа немесе Фукуокке. Данангқа ауысыммен немесе чартермен жеткен ыңғайлы.
Көпшілік Нячангқа бекер ағылып жатқан жоқ. Онда қалтаңыз бен қалауыңыз қарай түрлі қонақүй табылады. Сапарды ақпан мен тамыз аралығындағы құрғақ маусымға жоспарласаңыз, теңіз тұнық әрі жылы болады.
Күндіз «Вьетнам Диснейленді» атанған VinWonders саябағында көңіл көтеруге, ал кешкісін аралдың тыныш жағажайларында жұлдызды аспан астында серуендеуге болады. Егер қаланың қыз-қыз қайнаған өмірін сезінгілеріңіз келсе, Tran Phu орталық көшесіне аттаныңыздар. Ондағы түнгі базарларда сауда жасап, дәмді теңіз өнімдерінен дәм татып көруге болады.
Романтикалық естелік үшін лотос пішінді Чамхыонг мұнарасына күн батарда баруды ұсынамыз — дәл осы «алтын уақытта» мұнара шамдары жарқырап, суреттер ерекше шығады. Хон Мун аралына қайықпен барып, мөлдір су астында бірге снорклинг жасаңыздар; Нячангтан бірнеше сағаттық жердегі таулы, француз стиліндегі Далат қаласына барып, кофе плантациялары мен гүл бақтарын аралаңыздар. Саяхат соңында Хон Чонг жартастарының үстінде теңіз көрінісін тамашалап, вьетнамдық қою кофеден ауыз тиіп, саяхаттың нүктесін қоюға болады.
Египет
Құжаттар: Тек Шарм-эль-Шейхке баратын болсаңыздар, екі аптаға тегін виза беріледі. Басқа аймақтарға турмен барсаңыз, елшілікке барудың қажеті жоқ, Хургада әуежайында 30 USD (шамамен 14 мың KZT) төлеп, визаны бірден аласыз.
Тікелей рейстер: Алматы, Астана, Шымкент, Атырау, Ақтөбе, Қостанай мен басқа қалалардан Шарм-эль-Шейхке не Хургадаға рейстер бар.
Қазақстандық жұптар жақсы көретін бағыттың бірі. Бекер емес. Тек виза мәселесін демалыс түріне қарай шешіп алған абзал: тек Шарм-эль-Шейхте (Синай түбегінде) 15 күнге дейін демалатын болсаңыз, әуежайда тегін «Sinai Only» штампын қойдыра аласыз. Ал Каир пирамидаларын не Луксорды көреміз деп жоспарласаңыздар, әуежайда 25 долларға толық виза сатып алуыңыз керек.
Каирда әлемнің жеті кереметінің бірі — Гиза пирамидалары мен жұмбақ Сфинксті көруге болады. Қаланың қарбаласынан демалғыңыз келсе, Ніл өзенінің бойымен дәстүрлі фелукка қайығында серуендеп, кешкісін Хан әл-Халили базарының тарихи көшелерінде шығыс кофесінен дәм татыңыз.
Астананың тарихымен танысқан соң, ұшаққа не автобусқа мініп, Шарм-эль-Шейх бағытына бет аласыздар. Мұндағы Наама Бей немесе Шаркс Бей аймағындағы жағажайлардан пәтер немесе мейманжай жалдап, таңертең ерте теңізге түсуге болады. Осы Египет дұрыс па, Түркия ма деп таңдау жасай алмай отырсаңыздар, қиналмаңыздар: әр елдің өзіне тән артық тұсын біз бұған дейін салыстырып шыққанбыз.
