Түркияға барған дұрыс па, Египетке ме? Салыстырып көрейік

Түркия мен Египет — қазақстандықтар демалуға ең көп баратын екі ел. Әрқайсының өз артықшылығы мен кемшілігі бар. Сіз дұрыс таңдау жасасын деп, қажет ақпараттың бәрін осы мақалаға жинап шықтық.

Демалыс бағасы

Қай елде арзанырақ? Екі елдегі демалыс бағасы маусымға, қонақүй санатына және жолдама мен әуе билетін қаншалық ерте алғаныңызға байланысты құбылып тұрады. 

Демалыс құнына елге қай маусымда барғаныңыз, қонақүй санаты және оны қаншалықты алдын ала брондағаныңыз және ұшақ билетін қашан алғаныңыз әсер етеді.

Түркияның бір жақсы жері cол — кез келген бюджетке лайық демалыс түрін табуға болады. Күніне 15–20 мың теңгеге асүйі бар жайлы пәтер жалдауға да, артық сән-салтанатсыз «all inclusive» қонақүйде де тұруға болады. Дегенмен кейінгі бір-екі жылда Түркияда баға біраз өсіп кеткенін жиі естіп жүрміз. Жақсы мейрамханада бір адамның кешкі асы 5 000–8 000 теңге шамасында тұрады. Көшедегі тағам арзан әрі дәмді: симит (жергілікті тоқаш) — 300 теңгеден, жүгері, балмұздақ пен жеміс-жидек — 500 теңгеден басталады. Қалалық қоғамдық көлікпен жүру — шамамен 500 теңге.

Валюта — түрік лирасы. 1 TRY ≈ 17–20 теңге.

Египет көбіне арзан демалыс орны ретінде қабылданады, бірақ ұсақ-түйек шығындар қосылғанда, әсіресе Хургада мен Шарм сияқты курорттарда біраз шығындаласыз. Кафедегі бір шыныаяқ кофе 750 теңгеден басталады, түскі ас — кемі 5 000 теңге. Тамақ бермейтін апартамент не қарапайым қонақүй бағасы тәулігіне 17 000 теңгеден басталады. Көлік жағы аса қолайлы емес — таксилерде есептегіш жоқ, алдын ала келісіп алғаныңыз жөн.

Валюта — Египет фунты. 1 EGP ≈ 25–30 теңге.

Берер кеңесіміз: екі елде де қолма-қол есептескен ыңғайлы. Түркияда банк картасын көп жерде қабылдайды, ал Египетте мұндай мүмкіндік негізінен ірі нүктелерде ғана бар. Ең дұрысы, ақшаңызды жергілікті валютаға айырбастап алыңыз: доллармен не теңгемен есептескеннен гөрі сол арзанға түседі.

Климат пен маусым

Түркияға барасыз ба, Египетке барасыз ба — ыстыққа қаншалықты шыдайтыныңызға қарай таңдаңыз. Бірінде адамға жайлы ыстық болса, екіншісінде жыл он екі ай күн шақырайып тұрады. 

Аптап ыстықты аса ұнатпайтындар Түркияға барғаны дұрыс. Мұнда жағажай маусымы мамырдан қазанға дейін созылады. Теңіз мамырдан бастап-ақ +22 °C-қа дейін жылына бастайды, ал шілде–тамызда ауа температурасы +35 °C-қа дейін жетуі мүмкін. Бірақ бұл ыстық Түркияның әр аймағында әртүрлі сезіледі:

• Эгей теңізінің жағалауында (Бодрум, Мармарис) ауа қоңыр салқын, жел жиірек соғады;
• Жерорта теңізінің жағалауында (Анталья, Аланья) ауа ылғал әрі қапырық, бірақ теңіз суы үнемі жылы болып тұрады.

Ал Египет жыл он екі ай күн жарқырап тұратын елге барғысы келетіндерге қолайлы. Қыстыгүні мұнда күндізгі ауа температурасы әдетте +22–26 °C, теңіз суы +22–24 °C шамасында болады. Сондықтан емін-еркін шомыла бересіз. Египет — қыс мезгілінде демалғысы келетіндерге таптырмас бағыт: басқа елдерде күртеше киіп, ыстық шай ішіп жүргенде, мұнда жазғы демалыс жалғасып жатады. Жазда өте ыстық — +35–40 °C, алайда құрғақ климаттың арқасында бұл ыстық тропиктердегідей жүректі қысып жібермейді. Мұнда әдетте аспан ашық, жаңбыр сирек жауады.

Жағажай мен теңіз

Түркия мен Египет жағажайлары бір-біріне мүлдем ұқсамайды. Ыңғайлы жерде шомылғыңыз келе ме, әлде су асты әлемін көргіңіз келе ме — сізге көбірек не қызық болса, соны таңдаңыз. Бір жерде жай суға түскіңіз келсе, басқа жерде таңнан кешке дейін маска тағып алып, теңіз түбіне сүңгіп жүре бергіңіз келеді.

Египетке жұрт көбіне Қызыл теңізге түсу үшін барады, ал Түркияда бір емес, төрт теңіз бар — Жерорта, Эгей, Қара және Мәрмәр теңіздері. Сондықтан мұндағы жағажайлар аймаққа қарай алуан түрлі болып келеді:

• Аланья мен Сидеде жағажайлар ұзын әрі құмды, суға түскен өте ыңғайлы.
• Кемерде жағалау тасты болғанымен, суы өте тұнық.
• Бодрумда мөлдір теңіз бен әсем көріністері бар көрікті шығанақ көп.

Египетте жағажайдың көбі құмды болып келеді. Теңіз маржандары жағалаудан-ақ басталып кетеді. Көрінісі әдемі, алайда суға арнайы аяқ киіммен түскеніңіз дұрыс. Көп қонақүйде теңізге түсетін понтон орнатылған. Пирспен жүріп барып, тастарға еш жеріңізді жаралап алмай, терең жерге сүңгуге болады. Есесіне су астында ғажап әлем бар: маржан рифтері, сан түрлі балық, тасбақа мен скат. Снорклинг пен дайвинг жасайтын әлемдегі ең әдемі жердің бірі осы — Египет. Бірақ абай болыңыз: Қызыл теңіздегі ашық түсті балықтарды ұстауға болмайды. Кейбірі улы болуы мүмкін.

Қонақүй, қызмет, тамақ

Бірде көл, бірде шөл. Қай елде не күткен (немесе күтпей-ақ қойған дұрыс) екенін оқып шығыңыз.

Түркияда қонақүй көп: қолжетімді үш жұлдыздысынан бастап, жеке жағажайы мен сәнді бөлмелері бар бес жұлдызды отельдерге дейін бар. Тамағы керемет: швед үстеліне алуан түрлі түрік тағамдары, көкөністер, жаңа піскен жемістер, пахлава мен лукум сияқты тәттілер молынан қойылады. Жақсы отельдерде қызметкерлер сыпайы, көбіне орысша, ағылшынша, кейде тіпті қазақша да сөйлейді. Әсіресе Анталья немесе Белек сияқты танымал аймақтарда сервис жағы әбден жолға қойылған. Бірақ есте ұстайтын бір жайт: шілде–тамыз сияқты туристер маусымында ең жақсы деген қонақүйлердің өзі лық толып, қызмет көрсету сапасы сіз күткендей болмай қалуы мүмкін. 

Египетте де төрт және бес жұлдызды қонақүйлер бар, арзанырақ жерлер де табылады. Сәулеті салтанатты: ғимараттар салынған аумақтар кең, бассейн, пальма, аквапарк пен понтон көп. Анимацияны, кешкі шоулар мен көңілді биді күнде көресіз. Дегенмен кейде қонақүй суретте мінсіз көрінгенімен, шын өмірде ұсақ-түйекке келгенде үнемдейтіні байқалып қалады. Қызмет көрсету сапасы да құбылып тұрады: кейбір саяхатшы қызметкерлер елгезек екен деп риза болса, енді бірі бөлмеде сүлгі болмады деп шағынады. Бәрі отель басшылығына байланысты. Египеттің тамағы қарапайым: тауық еті, күріш, макарон, көкөністер мен нан береді. Жергілікті ас мәзірінде фалафель, кебаб пен хумус бар. «All inclusive» жүйесіндегі қонақүйлер жергілікті ішімдікті ұсынып жатады, бірақ шетелдік алкогольді ішемін десеңіз, қосымша ақы төлеуіңіз керек болады.

Көрікті жерлер мен экскурсия

Жағажайда жатып демалған жалықтырып жіберсе, Түркия мен Египетте аралайтын жер аз емес. Бастысы, өзіңізге не қызық екенін анықтап алыңыз.

Түркияда жағажайда жатып та, қала аралап та үлгеруге болады. Елдің барлық өңірінде көне заманнан қалған ескерткіштер, амфитеатрлар мен Эфес сияқты ежелгі қалалар бар. Жақын маңда табиғат жауһарлары да жетерлік: Каппадокия не Памуккалені көріңіз. Мұның бәрі танымал курорттарға жақын орналасқан, сондықтан автобуспен не экскурсиялық топпен жеткен қиын емес. Мұндай турларға қонақүй арқылы не жергілікті агенттіктермен бара аласыз.

Ары‑бері, Ыстанбұл

Танымал

Султанахмет мешіті

Принцевы аралы

Айя-София мешіті

Истикляль көшесі

Султанахмет мешіті

Принцевы аралы

Айя-София мешіті

Барлық жерлерді қарап шығу

Aviasales.kz бағыттауларында

Барлық жерлерді қарап шығу

Aviasales.kz бағыттауларында

Ал Египетте тарихқа тереңірек бойлайсыз. Гиза пирамидалары, Луксор храмдары, Патшалар алқабы мен Ніл бойындағы круиздер — бәрі адамды көне дәуірге жетелейді. Бірақ бұл орындардың көбі Хургада мен Шарм-эль-Шейх жағажайларынан қашықта орналасқан. Жету үшін бір күн жол жүресіз не ішкі рейспен ұшуыңыз керек. Мұндай саяхат ежелгі өркениетпен жете танысқысы келетіндерге ұнары сөзсіз. Сонымен қатар, Шарм-эль-Шейх пен Дахаб арқылы көрші тұрған Иорданияға өтіп, ежелгі Петраға бір күнге баруға болады. Бұл турға Нувейба портына дейін апару, сосын Акабаға пароммен және Петраға дейін автобуспен жеткізу кіреді. Бір бағыттың өзіне шамамен 4 сағат уақыт кетеді. Мұндай турды қонақүйде не жергілікті агенттіктерде брондауға болады.

Балалармен демалыс

Екі елде де отбасымен демалуға болады, бірақ балалармен жайлы демалыс деңгейі жағынан бәрібір айырмашылық бар.

Түркия — үй ішімен демалғанға ең жайлы елдің бірі. Мұндағы қонақүйлерде балаларға арналған бассейндер, мини-клубтар, анимация мен аквапарктер бар. Жағажайлары баяу тереңдейді, сонысымен қауіпсіз. Мейрамханалар мен дәмханаларда балалар мәзірі бар. Курорттарда саябақтар, хайуанаттар бағы, аспалы жолдар мен басқа да көңіл көтеретін орын көп. Кейбір қонақүй мен демалыс аймақтағында ата-аналар бала күтушіні көмекке шақырып, бірер уақыт алаңсыз тыныға алады. 

Египетте де балалармен демалуға болады. Әсіресе жақсы қонақүйлерде анимация, балалар аймағы мен су сырғанақтары бар, шоулар өтіп тұрады. Алайда онда күн ыстық, ал теңіз жағасындағы маржандарға байланысты емін-еркін шомыла алмауыңыз мүмкін. Қонақүйден тыс жерлерде инфрақұрылым Түркиямен салыстырғанда нашарлау. Қала ішін бала арбасымен аралаған ыңғайсыз болуы мүмкін, кей көшелерде тротуар да жоқ.

Қауіпсіздік

Екі елде де туристерге, әсіресе танымал курорттық аймақтарда қауіпсіз жағдай жасалған. Алайда Таяу Шығыстағы геосаяси жағдайға байланысты Египетке жету Түркияға қарағанда қиынырақ болуы мүмкін.

Түркия — туристерге қауіпсіз ел, әсіресе теңіз жағалауындағы аймақтарда алаңсыз жүресіз. Курорттық жерлерде жағдай тұрақты, полиция жүреді, туристерге арналған мол ақпарат бар. Тек құнды заттарды қараусыз қалдырмай, жергілікті халықпен сыпайы болған жөн.

Египетте курорттар үнемі бақылауда: қонақүйлерде күзет тұрады, туристік аймақтар қоршалған. Бірақ курорттан тыс жерлерде сақ болған дұрыс: қараңғыда жалғыз серуендеуден аулақ болған жөн, әсіресе Каир мен Александрия сияқты ірі қалаларда қауіпсіздік деңгейі төмен болуы мүмкін.

Виза, кіру режимі мен ұшу

Қазақстан азаматтарына Түркияға баруға визаның қажеті жоқ. Алматы не Астанадан Анталья не Стамбулға ұшақпен 5–6 сағатқа жетесіз.

Тек Шарм-эль-Шейх курортында болып, 13 күн ішінде елден қайтар болсаңыз, Египетке де визаның қажеті жоқ. Алайда курорттан тыс жерге барар болсаңыз, Қазақстан азаматтарына виза алу міндетті. Ол ұшып келген кезде рәсімделеді (құны — 25 доллар) және 30 күнге жарамды болады. Көп реттік визалар қымбатырақ болады, оларды елшіліктен алдын ала алу керек. 

Египетке ұшу уақыты Түркияға қарағанда сәл ұзақ — шамамен 6–7 сағат. Астана мен Алматыдан Египеттің ірі қалаларына тікелей рейстер бар.

Тағы осы тақырыпта

Топтамалар

2024 ж. 20 жел

2025 жылы қазақстандықтар қай елдерге визасыз бара алады?

Шопинг пен сауда

Түркияда таңдау көп, сапа жақсы, Египеттің ұлттық ерекшелігі әсем, кәдесыйы мол. Екі елде шопинг әртүрлі, бірақ әйтеуір алатын нәрсе табылады.

Түркияда түрлі-түсті қатарлары бар базар көп. Онда былғары мен кілемнен бастап, дәмдеуіштер мен тәттілерге дейін бәрін қолжетімді бағада алуға болады. Жаз кезінде жиі жеңілдік жасап тұрады. Әсіресе қолдан жасалған бұйымдарға — керамика, әшекей, мата өнімдеріне сұраныс зор. Стамбул мен Анталья сияқты ірі қалаларда әлемдік брендтер мен масс-маркетке арналған заманауи сауда орталығы көп.

Түркиядан не әкелуге болады:

• Қолдан тоқылған түрік кілемі немесе кілемше
• Табиғи дәмдеуіштер (паприка, шафран, зірә)
• Түрік тәттілері (рахат-лукум, пастила)
• Керамика мен шай сервизі
• Былғары бұйымдар (сөмкелер, белдіктер)

Египеттен көбіне кәдесыйлар мен естелікке деп ұсақ-түйек заттар аласыз. Папирус, хош иісті майлар, дәмдеуіштер, жез бен ағаштан жасалған бұйымдарды оңай табуға болады, бірақ сапасы әртүрлі болуы мүмкін. Сондықтан мұқият таңдап, саудаласқан дұрыс. Елде бренд дүкендері мен ірі сауда орталықтары аз, сондықтан киім не электроника сатып алудың қажеті жоқ. Мұнда базар атмосферасын сезініп, дәстүрлі бұйымдарды тамашалаған жақсы. 

Египеттен не әкелуге болады:

• Иероглифтер мен суреттер бейнеленген папирус.
• Хош иісті майлар мен жұпарлар. 
• Қолдан жасалған жез және ағаш кәдесыйлар.
• Қара зере қосылған мазь.
• Египет мақтасынан тігілген бұйымдар (мысалы, сүлгі не халат)

Қорытынды

Қысқаша айтқанда: