Санкт-Петербургке саяхат: тарихи қаланың көрікті жерлері
Тарихи орындар, тәтті тоқаш пен ашылмалы көпірді көргісі келетіндерге гид.
Сәлем! Менің атым — Маша. Бірнеше жылдан бері Санкт-Петербургте тұрамын. Бұл материалда Петербургке алғаш келгенде не істеуге болатынын айтып беремін.
Санкт-Петербургте қайда баруға болады?
Санкт-Петербургтің қай бұрышында да көрікті орын жетерлік. Қалаға алғаш келгенде соқпай кетпеуім керек деген тізімге қосуға тұрарлық жерлерді тізіп шығайын.
Петропавл қамалы
Кіру: музейлерге арналған бірыңғай билет — 1000 рубль (6 460 теңге), аралға кіру — тегін.
Жұмыс уақыты: күн сайын 10:00–21:00. Жекелеген музейлердің кестесін ресми сайттан көруге болады.
Петербургтің тарихы 1703 жылы дәл осы жерден басталады. Қамал Заячий аралында орналасқан. Оның аумағына Петропавл соборы, Трубецкой қамалының түрмесі және Монетный двор кіреді. Дәстүр бойынша, күн сайын түскі 12-де мұнда мылтық атылады.
«Қаланың үстінен өткен үш ғасыр» атты экскурсияны таңдасаңыз, Петропавл соборының шолу алаңына көтерілуге болады.
Ал қамал қабырғасының төбесіне шығу үшін «Нева панорамасы» атты серуен маршрутын алу керек. Оған кіру құны — 200 рубль (1 310 теңге).
Невский даңғылы
Қаланың негізгі көшесі Адмиралтейство маңынан басталып, бірнеше шақырымға созылып Александро-Невская лаврасына дейін жетеді. Невскийдің бойымен жай серуендеп жүргенде-ақ қаланың біраз көрікті жеріне куә боласыз: Қазан соборы, Екатерина бағы, «Дом Книги», түрлі музейлер мен ескерткіштер осы даңғыл бойында тұр.
Қазан соборы және «Дом Книги»
Кіру: тегін.
Жұмыс уақыты: күн сайын 9:00–19:45, жексенбі күні — 6:30–19:45.
Грибоедов каналы жағалауындағы жұмыс істеп тұрған православие храмы. Дәл қарсы бетінде үш қабатты «Дом Книги» кітап дүкені орналасқан, оның жоғарғы қабатында VK компаниясының кеңсесі бар. Мұнда әдемі кәдесыйлар да сатады.
Қазан соборының төбесіне көтерілу үшін арнайы экскурсия алуға болады. Бағасы — 250 рубль (1 638 теңге).
Бір кездері бұл ғимарат Невскийдегі ең биік нысандарының бірі саналған.
«Дом Книги» терезелерінен Невский даңғылы мен Қазан соборының әдемі көрінісін суретке түсіруге болады.
Эрмитаж
Кіру: 500 рубль (3 228 теңге).
Жұмыс уақыты: сәрсенбі, бейсенбі, жексенбі — 11:00–18:00; сейсенбі, жұма, сенбі — 11:00–20:00.
Бірнеше ғимараттан тұратын аса ауқымды музей кешені. Ең танымалы — Қысқы сарай. Эрмитажбен танысуды дәл осы жерден бастаған дұрыс. Ал музейдің арғы жағын айналып өтсеңіз, Нева жағалауына шығасыз — күн жылы кезде тап осы жерден ашылмалы көпірді көруге болады.
Исаакий соборы
Кіру: 450 рубль (2 905 теңге). Колоннадаға көтерілу — қосымша 300 рубль (1 937 теңге).
Жұмыс уақыты: күн сайын 10:00–18:00, сәрсенбі — демалыс күні.
Қаланың ең танымал шіркеулерінің бірі. Собор ғимараты зәулім әрі салтанатты: мүмкіндік болса, алдымен оның сыртын асықпай тамашалап, мүсіндерінің әр деталін мұқият көріп шыққан жақсы, одан соң ішіне кіріп танысуға болады. Шіркеуде малахит, лазулит және шунгитпен әрленген үш алтарь, флоренциялық мозаика техникасымен жасалған иконалар мен әйнек витраждар бар. Петербург алақандағыдай көрінетін колоннадаға көтерілмей кетпеңіз.
Спас на Крови
Кіру: 450 рубль (2 905 теңге).
Жұмыс уақыты: күн сайын 10:00–17:30, сәрсенбі — демалыс.
Бұл православие храмы 1881 жылы император II Александрға қастандық жасалған жерде тұрғызылған. Қаланың басқа соборларынан ерекшелігі — орыс стилінде салынған және Мәскеудегі Василий Блаженный шіркеуіне ұқсайды.
Шіркеудің ішінде императордың күймесін жарып жіберген жердің тас жолының бір бөлігі сақталған.
Ал соборды өзгеше ракурстан көргіңіз келсе, сапбордпен серуенге шығуға болады.
Жаңа Голландия аралы
Кіру: тегін.
Жұмыс уақыты: дүйсенбі–бейсенбі — 9:00–22:00, жұма–жексенбі — 9:00–23:00.
Қолдан жасалған арал. XVIII ғасырда мұнда кеме жасауға арналған ағаш қоймалары болған, кейінірек дөңгелек пішініне байланысты «бөтелке» деп аталған теңіз түрмесі салынған. Қазір сол «бөтелке» ғимаратында сәнді шоурумдар мен мейрамханалар жұмыс істейді, ал сыртында парк, балалар ойнайтын жер мен спорт алаңдары тұр.
Васильевский аралының жебесі
Васильевский аралының шығыс бөлігіндегі мүйіс. Ол Үлкен және Кіші Нева өзендерінің ортасында орналасқан. Осы шағын аумақта Биржа ғимараты, Кунсткамера және XIX ғасырда портқа кірген кемелерге бағдар болған жебе колонналар тұр. Мереке күндері онда от лаулап тұрады.
Қайда тамақтанып, кофе ішуге болады?
Дәстүрлі орыс тағамдарымен қатар, мұнда авторлық тағамдар ұсынатын Ресейдегі ең үздік мейрамханалар, нан-тоқаш пісіретін наубайханалар желісі мен жергілікті жұрт жиі баратын шауырма сататын дүңгіршектер бар.
Жергілікті тағамдар
Корюшка мен пышкиден (тәтті тоқаш) дәм татып көріңіздер. Корюшка — майда балық, оны көбіне грильде немесе қуырып дайындайды. Бұл балықтың маусымы мамыр айының басында басталады, ал оны әр кафенің мәзірінен табуға болады. Пышки — майға қуырылған қамыр, тәтті бауырсаққа ұқсайды. Дәмін көру үшін Большая Конюшенная көшесінде тұрған Петербургтегі ең көне пышкаханаға барыңыз.
Әлем тағамдары
Грузин тағамдарынан ауыз тигіңіз келсе, «Хачапури и вино» мейрамханасына барыңыз — мұнда хинкалидің бір данасы 77–92 рубль (500–600 теңге) тұрады. Дәстүрлі неаполитан пиццасын «22см» мейрамханасынан табасыз. Нағыз тай тағамдарынан дәм татқыңыз келсе, Chang кафесіндегі том ямды байқап көріңіз — өте дәмді. Ал не жегіңіз келетінін білмей жүрсеңіз, Vokzal 1853-ке барыңыз. Бұл — Варшавский вокзалының тарихи ғимаратындағы алып фуд-маркет: мұнда шамамен 90 фудспот бар: бургер, боул, құймақ, тұшпара, палау — бәрі бір жерден табылады.
Кофе
Ескі қала атмосферасын толық сезіну үшін кофе алыңыз. Спешелти-кофені Мойка өзенінің жағасындағы шағын «ТЧК» кофеханасынан, Петербургтің қақ ортасындағы Bolshecoffee-ден немесе «Петроградская» метро станциясына жақын, әдемі атмосферасымен ерекшеленетін Verlé кофеханасынан таба аласыз.
Транспорт
Әуежайдан қалаға қалай жетеміз?
Санкт-Петербургте Пулково дейтін бір ғана әуежай бар. Одан қалаға таксимен жетуге болады. Такси ақысы мен жол ұзақтығы баратын мекенжайыңызға байланысты, орташа есеппен — 1000 рубль шамасында (6 460 теңге). Таксиге Яндекс GO немесе Uber қосымшалары арқылы тапсырыс берген ыңғайлы.
Әуежай терминалынан қалаға үш бағыттағы автобус жүреді: №39 және №39Э — «Московская» метро станциясына дейін, ал №82Э — «Проспект Ветеранов» станциясына дейін барады. Билет құны — 80 рубль (524 теңге).
Қала ішіндегі транспорт
Петербургте қоғамдық көлік жақсы дамыған. Ең ыңғайлысы — метро. Қаладағы бес желі барлық ауданды қамтиды. Бір реттік жол ақысы — 86 рубль (555 теңге). Сондай-ақ трамваймен, троллейбуспен және автобуспен жүруге болады. Олардың бағасы — 80 рубль (516 теңге).
Көлікке кететін шығынды азайту үшін «Подорожник» деп аталатын жол картасын сатып алыңыз. Картаның өзі 90 рубль (581 теңге) тұрады, оны әуежай мен метро кассаларынан алуға және толтыруға болады. Осы картаны қолданып, кез келген көлік түрімен 60 рубльге (387 теңге) жүресіз. Картаны сатып алғаннан кейін 45 күн ішінде қайта тапсырып, 90 рубльді қайтарып алуға болады.
Тағы нені ескеру керек?
- 2025 жылдың 30 маусымынан бастап Ресейге визасыз кіруге болатын елдерден келетін шетел азаматтары ruID қосымшасында тіркеліп, сапары туралы алдын ала хабарлауға тиіс. Қазақстан азаматтарына бұл міндетті емес, бірақ тіркеліп қойсаңыз, кейін Ресей ішінде мемлекеттік қызметтерді пайдалануды жеңілдетеді.
- Ресейде қазақстандық банк карталары жұмыс істемейді. Сондықтан «Мир» төлем карталары керек немесе сапарға дейін қолма-қол ақшаңызды рубльге айырбастап алыңыз.
- 2025 жылдың 6 қазанынан бастап Ресейде шетелдік SIM-карталарға, соның ішінде eSIM-ге де, елге кіргеннен кейін алғашқы 24 сағатқа мобильді интернетті өшіру ережесі енгізілді. Сол себепті жолға шығар алдында офлайн-карталарды (мысалы, 2ГИС немесе Яндекс Карталар арқылы) жүктеп алыңыз және қонақүйге дейінгі бағытты алдын ала тексеріп алыңыз. 24 сағат өткен соң өз операторыңыздың роумингін пайдалана аласыз.
- Қазір жергілікті SIM-карта алу қиындады. Ол үшін МФЦ-ға (жергілікті ХҚКО) барып, жеке сақтандыру нөмірі — СНИЛС алу керек, содан кейін Госуслуги жүйесіне (Egov баламасы) тіркеліп, биометрикалық деректерді тапсыру қажет. Тек осыдан кейін байланыс орталығына барып, SIM-карта рәсімдеуге болады.
- Жергілікті байланыс қажет болса, «Т-Мобайл» операторынан SIM-картаны «Т-Банк» қосымшасы немесе сайты арқылы тапсырыс беруге болады. Компания өкілі сізге ыңғайлы уақытта картаны жеткізіп, барлық қажет құжатты рәсімдеуге көмектеседі — сонда ешқайда барудың қажеті болмайды.
Сурет салған — Олег Бородин.
