Ресейге бара жатқан Қазақстан азаматы не білуі керек?
Не өзгергенін қысқа да нұсқа айтып берейік.
Ресей шетелдіктерді, оның ішінде Қазақстан азаматтарын да елге кіргізу ережесін жаңартты. Шекарада күтпеген қиындыққа тап болмас үшін не өзгергенін мұқият оқып шығыңыз.
Қазақстан азаматтарына қатысты негізгі ережелер
- Визасыз режим: Қазақстандықтар Ресейге визасыз кіре алады және әрбір 180 күннің 90 күніне дейін еркін жүре алады.
- Паспорт: Құжат сапар аяқталатын уақыттан кейін кемінде тағы алты ай жарамды болуы керек.
- Сапар мақсаты: Туризм, жұмыс, оқу, емделу сияқты мақсаттар. Қажет болған жағдайда мұны арнайы құжатпен растауыңыз керек.
- Келген жеріңізге тіркелу:
- 30 күн ішінде еліңізге қайтар болсаңыз, тіркеу талап етілмейді.
- 30 күннен көп уақыт (бірақ 90 күннен аспайтын) жүретін жағдайда Ресей ІІМ-нің көші-қон есебі бойынша аумақтық органдарына тіркелуіңіз қажет.
Жаңалық: биометриялық мәліметтерді сынақ түрінде жинау және цифрлық профильдер
2025 жылғы 30 маусымнан 2026 жылғы 30 маусымға дейін Ресей сынақ жобасын іске қоспақ: енді елге визасыз кіретін шетелдіктерге алдын ала ruID қосымшасына тіркеліп, электрондық кіру өтінішін толтыру ұсынылады. Қазақстан азаматтарына бұл міндетті емес — ruID-ке тіркелмесе де, елге кіре алады.
Алайда өтініш толтырған жағдайда Қазақстан азаматы мемлекеттік қызметтерді пайдаланып, ресейлік сервистер арқылы төлем жасап, жергілікті байланысқа қосылып және басқа да мүмкіндіктерге ие болады. Қосымшаны осы сілтемелер арқылы жүктеуге болады: App Store, Google Play и AppGallery.
6 жасқа толмаған балалар, дипломаттар мен халықаралық ұйымдардың қызметкерлері бұл талаптан босатылады.
Онлайн-өтініш және RuID қосымшасында тіркелу
2025 жылғы 30 маусымнан бастап қазақстандықтар (қалауы бойынша) мыналарды жасай алады:
- Сапарға шығардан 72 сағат бұрын (шұғыл жағдайда — кемінде 4 сағат бұрын) мемлекеттік қызметтер порталы немесе RuID қосымшасы арқылы онлайн өтінім беру керек;
- Сапар мақсатын, қанша уақыт болатыңызды және тұратын мекенжайды көрсету қажет;
- Ресейде жеті күннен көп болсаңыз, RuID қосымшасында тіркелу міндетті.
Нені есте ұстаған маңызды?
- Шекарада биометриялық деректерді тапсырудан бас тартсаңыз, шекарадан өтуге рұқсат берілмей, 2 мыңнан 5 мың рубльге дейін (шамамен 12 700–31 700 теңге) айыппұл салынуы мүмкін.
- Visa мен Mastercard карталары Ресейде жұмыс істемейді. Сондықтан ресейлік «Мир» картасын (бар болса) немесе ақша аудару сервистерін пайдаланған жөн.
- Ресейде 90 күннен көп уақыт жүргелі жатсаңыз, есірткіге тәуелдік пен жұқпалы аурулар жоғын растап, саусақ іздерін тапсыру арқылы дактилоскопиялық тіркеуден өтуіңіз қажет.
- Ресейге кіру кей жағдайда әртүрлі мемлекеттік органдардың (ІІМ, ФСБ, Роспотребнадзор және т.б.) шешімімен тыйым салынуы мүмкін — кіруге рұқсат бар-жоғын алдын ала Ресей ІІМ-нің онлайн-сервисі арқылы тексеруге болады.
Ресейде біздің банк карталарымыз жұмыс істемегендіктен, қосымша тексеру кезінде ұзақ уақыт әуежайда қалып қоюыңыз мүмкін. Сондайда тіпті су сатып алуға ақша таппай қаласых. Сондықтан сапарға шықпай тұрып, үйден аз мөлшерде рубль айырбастап алыңыз. Ұсақ ақша болғаны дұрыс, себебі кей жерде ірі купюраларды қабылдамайды.
Тағы бір маңызды жайт — Шереметьево әуежайында уай-фай тек сим-карта арқылы қосылады. Байланысқа шығу үшін телефон нөмірін енгізіп, SMS арқылы код алып, содан кейін ғана интернетке кіруге болады. Сол себепті жолға шығарда телефоныңызға міндетті түрде роуминг қосып алыңыз. Әйтпесе ешкіммен хабарласа алмай қаласыз.
Өз басым көп жолаушының байланыссыз қалып қойып, бақылаудан өту кезегін ұзақ күткенін көрдім. Бұл әсіресе балалы әйелдерге қиын. Сол себепті өзіңізбен бірге ең қажет заттарды — су, ішіп-жем, балаға арналған тамақ алып жүріңіз. Құжаттарды тексеру ұзап кетсе, не сыртқа шыға алмай, не ештеңе сатып ала алмай қаласыз.
Мұндай тексеру әуежай қызметкерлерінің міндеті екенін түсініп барған дұрыс. Ұшып келгеннен кейін бірнеше сағат күту қиын екенін білемін. Үйге тезірек жетіп, демалғыңыз келеді. Бірақ сұрақтар қайталанса да, сабырмен, нақты жауап беріңіз. Төзімді болыңыз, сапарыңыз сәтті болсын!
Интернетке не болды?
2025 жылдың 6 қазанынан бастап Ресейде туристерге қатысты жаңа ереже шықты: шетелдік SIM (немесе eSIM) карталарының мобильді интернеті елге келгеннен кейін 24 сағатқа бұғатталады.
Бұл қалай жұмыс істейді?
Бір тәулік интернетсіз өтеді: Телефоныңыз жергілікті желіге қосылған сәттен бастап 24 сағаттық шектеу іске қосылады. Қоңырау шалып, SMS жіберуге болады, бірақ интернет істемейді.
Не істеу керек: Алдын ала офлайн карталарды (мысалы, 2GIS) жүктеп алыңыз және ұшар алдында барлық маңызды онлайн мәселені шешіп қойыңыз. Елдегі бірінші күні әуежай, қонақүй немесе кафедегі Wi-Fi-ға сенген дұрыс.
Жергілікті SIM карта сатып алу: Ондай мүмкіндік бар, бірақ ойлағаныңыздай оңай емес. Енді шетелдіктерге SIM алу үшін биометрия тапсырып, тіркеуден өту керек — бұған кем дегенде бір апта кетеді. Сондықтан аз уақыт сапарға бұл ыңғайсыз нұсқа.
Қорыта айтқанда
Ресей мемлекеттік қызметтер сайтындағы ақпаратқа қарағанда, елге кірудің жаңа ережелері — қауіпсіздікті арттырып, көші-қонды бақылауға бағытталған сынақтың бір бөлігі. Қазақстан азаматтары да бұл ережеден хабардар болып, алдын ала дайындалғаны маңызды. Сондықтан онлайн өтінім беріп, RuID қосымшасына тіркеліп, биометриялық деректер тапсыруға әзір болыңыз.
