Әуе билетін алып жатқанда мәліметтерді қалай дұрыс толтыру керек?
Алғаш рет ұшқалы жатқан және әріптен қателесіп кетуден қорқатындарға арналған нұсқаулық.
Әуе билетін алғаш рет онлайн сатып алып жатқандар тегіндегі бір әріптің қате жазылуы немесе құжат нөміріндегі артық цифр билетті жарамсыз етіп тастай ма деп уайымдайды. Шын мәнінде, құжаттың қай жолына қарау керегін білсеңіз, бәрі оп-оңай. «Сатып алу» батырмасын еш саспай басуыңыз үшін паспорттағы «N» әрпінен бастап, жеке куәліктегі латын қарпін қайдан табуға болатынына дейінгі барлық маңызды деректі осы мақалаға жинақтап қойдық.
- Әуе билетін сатып аларда қандай құжаттар керек?
- Билет алар кезде құжат түрін қалай таңдаймыз?
- Паспорт нөмірін қалай дұрыс жазу керек?
- Туу туралы куәлік мәліметтерін қалай енгіземіз?
- Құжаттың қолданылу мерзімін қалай көрсету керек?
- Аты-жөніңізді қалай дұрыс жазу керек?
- Деректерді толтыру кезінде жиі кездесетін қателер
Әуе билетін сатып аларда қандай құжаттар керек?
Қазақстан азаматы болсаңыз, қай жаққа ұшатыныңызға байланысты. Ең негізгі әрі әмбебап құжат — паспорт. Ол кез келген бағытта: ел ішінде де, шетелге де жарай береді. Алыс шетелге шығатын болсаңыз, тек паспорт қолданылады.
Қазақстан ішінде, сондай-ақ Ресей мен Қырғызстанға ұшу үшін жеке куәлік те жеткілікті. Бірақ мынаны ескеріңіз: егер бұл елдерге куәлікпен барғыңыз келсе, құжаттың күйі жақсы, мерзімі өтпеген және бүлінбеген болуға тиіс.
Ал кішкентай саяхатшылар үшін ереже қатаңдатылды. Енді туу туралы куәлік Қазақстан ішіндегі рейстерге ғана жарайды. Кез келген халықаралық рейске, соның ішінде Ресей, Қырғызстан мен Арменияға да ұшу үшін балаға жеке паспорт алу керек. Бала 16 жасқа толған соң, ол да жеке куәлікпен (ел ішінде немесе Ресей, Қырғызстан, Арменияға) ұша алады.
Билет алар кезде құжат түрін қалай таңдаймыз?
Құжат түрі әр сайтта әртүрлі аталуы мүмкін. Кейде ел ішінде ұшқалы жатсаңыз да, шетелдік сатушы паспортты талап етуі мүмкін. Мұндай жағдайда паспорттың орнына жеке куәлік мәліметтерін жазбауға кеңес береміз, өйткені тексеру жүйесі мұндай форматты қабылдамай тастауы ықтимал. Ең дұрысы — не паспортыңызды тауып, соның деректерін енгізу, не Aviasales.kz сайтына қайта оралып, басқа сатушыны — отандық агенттікті таңдау. Жергілікті сервистерде жеке куәлікті таңдау мүмкіндігі бар.
Кейде формаларда әмбебап «жол жүру құжаты» (немесе travel document) деген тармақ кездеседі. Егер осы нұсқаны көрсеңіз, оған жеке куәліктің немесе баланың туу туралы куәлігінің (тек ел ішіндегі рейстер үшін) деректерін жаза аласыз. Ал егер жүйе бірден «Identity Card» (жеке куәлік) немесе «Birth Certificate» (туу туралы куәлік) деп ұсынса, тиісті тармақты таңдайсыз.
Паспорт нөмірін қалай дұрыс жазу керек?
Нөмірден қателесу — қолдау қызметіне хат жазуға мәжбүрлейтін ең жиі себептердің бірі. ҚР азаматының паспортында нөмір әрқашан ағылшынның N әрпінен басталып, одан кейін 8 цифр түрінде келеді. Егер сізде дипломатиялық паспорт болса — D және S әріптері, ал қызметтік паспорт болса — тиісті белгілер болады.
Қайдан іздеу керек: Фотосуретіңіз бар бірінші бетті ашыңыз. Оң жақ жоғарғы бұрышта, мысалы, N12345678 деген тіркесті көресіз. Дәл осы күйінде, арасын ашпай, формаға жазу қажет.
Жеке куәліктің нөмірі қай жерде тұрады?
Әдетте әуе билетін алғанда ЖСН емес, куәліктің нөмірін сұрайды. Жеке куәлікте цифр көп. Сондықтан абай болыңыз. Куәлік нөмірі тоғыз цифрдан тұрады және картаның артқы бетінде, оң жақ жоғарғы бұрышта тұрады. Тағы бір айырмашылық: ЖСН сіздің туған күніңізден басталса, куәлік нөмірі — кездейсоқ сандар жиынтығы.
Туу туралы куәлік мәліметтерін қалай енгіземіз?
Балаға билет аларда «құжат түрі» деген жерде, әдетте, «туу туралы куәлік» немесе «birth certificate» таңдалады. Егер мұндай тармақтар болмаса, «жол жүру құжатын» пайдаланыңыз. Куәлік Қазақстан ішінде ұшуға толыққанды құжат ретінде қабылданады. Туу туралы куәліктің нөмірі әдетте құжаттың екінші бетінің ең астында болады. № белгісін жазудың қажеті жоқ.
Құжаттың қолданылу мерзімін қалай көрсету керек?
Егер «қолданылу мерзімі» деген жолақты бос қалдырсаңыз, брондау жүйесі сатып алуды аяқтауға мүмкіндік бермейді. Паспорт пен жеке куәлікте бұл ақпарат берілген күнінің астында жазылып тұрады. Оны сайттағы күнтізбеге ауыстырып жазсаңыз болғаны. Бір нәрсені шатастырмаңыз: тасымалдаушылар әдетте құжаттың берілген күнін емес, жарамдылық мерзімі аяқталатын күнді сұрайды.
Туу туралы куәлікте жағдай басқаша. Ол — мерзімсіз құжат. Кейбір сайттарда «мерзімсіз құжат» деген бағанды таңдауға болады. Алайда басқалары бәрібір нақты күнді талап етеді. Мұндай жағдайларда сапар аяқталғаннан кейінгі кез келген алдағы бір күнді жаза салуға болады. Бірақ тасымалдаушыдан осы құжатқа қатысты қандай ерекшеліктер барын нақтылап алғаныңыз жөн.
Аты-жөніңізді қалай дұрыс жазу керек?
Мұнда бұлжымас ереже бар: әрқашан латын қарпімен жазамыз. Тіпті Астанадан Шымкентке ұшсаңыз да, мәліметтер ағылшын тілінде болуға тиіс. Олар паспорттағы немесе жеке куәліктегі аты-жөніңіздің транслитерациясымен дәлме-дәл сәйкес келуі керек.
Паспорттан қай жерден табуға болады: латынша аты-жөніңіз кириллицамен жазылған есіміңіздің астында тұрады. Егер паспорт бойынша толтырып жатсаңыз, әкеңіздің атын жазудың қажеті жоқ.
Жеке куәліктен қай жерден табуға болады: беткі жағында аты-жөніңіз қазақ немесе орыс тілінде жазылған. Куәлікті аударыңыз: артқы бетінің ең астында «<<<<» таңбалары бар аймақ бар. Онда тегіңіз бен атыңыз латынша жазылып тұр.
Суретті салған — Кира Кустова.
