Нұсқаулық: шетелде төлқұжат жоғалтып алған жағдайда не істеу керек?
Уайымдамаңыз, төлқұжатсыз қалай елге оралуға болатынын түсіндіріп береміз.
Өзге елде төлқұжатсыз қыдыру, тіпті жүріп-тұрудың өзі қиын. Ал саяхаттап жүргенде құжаттарды ұрлатып не жоғалтып алу мүмкіндігі әлдеқайда артады. Сондықтан мұндай жағдайда не істеу керегін біліп жүрген дұрыс. Төлқұжатыңызды таппай қалсаңыз, қайда барып, кімге жүгінетіңізді реттеп айтып береміз.
Төлқұжат ұрланса не жоғалса не істеу керек?
Жүрген жеріңіздегі жергілікті полиция бөлімшесіне дереу барыңыз
Жоғалған төлқұжат алаяқтардың қолына түссе не жоғалған емес, ұрланған болып шықса, сіздің жеке деректеріңіз түрлі мақсатта қолданылуы мүмкін. Өзіңізде төлқұжаттың көшірмесі болса жақсы, болмаса орналасқан қонақүйден сұрап алғаныңыз жөн. Полиция бөлімшесінде төлқұжатыңыздың жоғалғаны жөнінде мәлімдеме жазып, талон немесе анықтама аласыз. Одан соң төлқұжаттың күші жойылуы мүмкін. Кейін оны тауып алсаңыз да жарамсыз болып қалатынын ескерген дұрыс.
Қазақстан елшілігіне жүгініңіз
Сіз жүрген қалада не мемлекетте елшілік болмаса, оған ең жақынына барыңыз. Елшілік сізге елге қайтып оралуға арналған куәлік береді.
Ел мен қала атауы | Мекенжайы мен телефоны |
|---|---|
Біріккен Араб Әмірліктері, Дубай | Джумейра, Умм Эль Шейф ареа, 3-ші көше, 14 вилла. |
Түркия, Ыстанбұл | Башак көшесі, 35, Бакыркөй, Йешильюрт. |
Тайланд, Бангкок | 93/1, Wireless көшесі, GPF Witthayu Towers, A ғимараты, 804А кеңсесі. |
Ресей, Мәскеу | Чистопрудный бульвар, 3а. |
Вьетнам, Ханой | Villa №51, 10 Dang Thai Mai str., Tay Ho district. |
Франция, Париж | Rue de Tilsitt көшесі, 3. |
Грузия, Тбилиси | Львов көшесі, 77. |
Ел мен қала атауы | Мекенжайы мен телефоны |
|---|---|
Біріккен Араб Әмірліктері, Дубай | Джумейра, Умм Эль Шейф ареа, 3-ші көше, 14 вилла. |
Түркия, Ыстанбұл | Башак көшесі, 35, Бакыркөй, Йешильюрт. |
Тайланд, Бангкок | 93/1, Wireless көшесі, GPF Witthayu Towers, A ғимараты, 804А кеңсесі. |
Ресей, Мәскеу | Чистопрудный бульвар, 3а. |
Вьетнам, Ханой | Villa №51, 10 Dang Thai Mai str., Tay Ho district. |
Франция, Париж | Rue de Tilsitt көшесі, 3. |
Грузия, Тбилиси | Львов көшесі, 77. |
Еліміздің басқа мемлекеттердегі елшіліктерінің толық тізімі мен ақпаратын мына жерден көре аласыз.
Елге қайтып оралуға арналған куәлік деген не?
Елге қайтып оралуға арналған куәлік — төлқұжаттың орнына жүретін уақытша анықтама. Ол жеке басыңызды куәландырады, Қазақстан аумағына бір рет кіруге мүмкіндік береді. Жарамдылығы – 3 ай. Куәлікті алу үшін төмендегі нәрселер керек:
- куәлік алуға өтініш;
- төлқұжат жоғалтқан соң полицияға жүгінгеніңіз туралы полиция бөлімшесі берген талон не анықтама;
- 3,5х4,5 см көлеміндегі екі фото;
- консулдық алымды растайтын құжаттың түпнұсқасы (әр елде консулдық алым әртүрлі, мысалы, АҚШ-та — 10 доллар)
- жеке басыңызды куәландыратын басқа құжат (қолыңызда болса), болмаса елшілікте сауалнама-өтініш толтырасыз;
- шетелде жыныс ауыстырған жағдайда жынысыңызды ауыстырған медициналық мекеменің берген тиісті құжаты.
Есіңізде болсын, Қазақстанға қайтып оралуға арналған куәлікті алған соң елге қайтатын әуекомпанияларына хабарласып, оны қолданудың шарттарын алдын ала анықтап алыңыз. Себебі әр компания елге қайтып оралуға арналған куәлік бойынша әртүрлі қызмет көрсетеді. Кей жағдайда әуекомпаниясы оны растау үшін елшілікке хабарласуы мүмкін.
Қазақстанға келген соң не істеу керек?
Елге келген соң 10 жұмыс күні ішінде елге қайтып оралуға арналған куәлікті тұратын жеріңіз бойынша полиция бөлімшесіне тапсыру керек. Ал Халыққа қызмет көрсету орталығында жаңа төлқұжат жасатуға өтініш жаза аласыз.
Жоғалған төлқұжатта виза болса қайтеміз
Дереу түрде виза берген елдің елшілігіне хабарласып, визаны қайта шығару керек. Жылдамдатып жасау мүмкіндігі бар-жоғын алдын ала сұрап алған жөн. Онсыз барам деген жеріңізге жете алмайсыз. Кей мемлекеттердің шарты бойынша виза төлқұжатпен қоса жоғалса, оны жасату процедураларын басынан бастап қайта өту керек болады.
Төлқұжатты ұрлатып не жоғалтып алудан қалай сақтанамыз
- Төлқұжат көшірмесін жасап не фотоға түсіріп ұмытпайтын жерде сақтаңыз. Әрі түпнұсқасынан бөлек жерде ұстаңыз.
- Қайда жүрсеңіз де өзіңізге ең жақын Қазақстан елшілігінің нөмері мен мекенжайын алдын ала жазып алыңыз. Телефоннан гөрі блокнот не басқа да құрылғыларда сақтап қойған жөн.
- Жеке басыңызды куәландыратын құжаттарды әртүрлі жерде сақтаңыз. Мысалы, төлқұжатты қол сөмкесіне салсаңыз, жеке куәлігіңіз жолжүкте тұрсын.
- Қазақстанға бірнеше рейспен әрі қайтып оралуға арналған куәлікпен қайту керек болса, рейстердің арасында транзиттік аймақтан шықпаған жөн. Бұл кедендік бақылауда болуы мүмкін проблемалардан сақтайды.
