Неге Куала-Лумпур — отбасымен барғанға таптырмас қала?
Отбасылық демалысқа айналған іссапар.
Мен Азияда бұрын-соңды болмағанмын. Куала-Лумпурды көз алдыма биік ғимараттарға толы, көлік шуынан артық ештеңе естілмейтін шаһар ретінде елестететінмін. Бірақ күйеуім және екі жасар ұлымызбен сонда екі аптаға барғанымызда бұл қала ойлағанымыздан асып түсті. Қысқаша айтқанда, қалаға етіміз үйреніп кетті, енді міндетті түрде қайта барғымыз келеді.
Бұл жолы күйеуім іссапармен барды, ал біз оны шағын демалысқа айналдырдық. Ең үлкен сұрақ — алып қалада кішкентай баламен қалай бейімделеміз? Сөйтсек, алаңдаудың еш қажеті жоқ екен. Куала-Лумпур — өте ыңғайлы, түсінікті әрі отбасымен келгендерге өте жайлы қала екен.
Алғаш көргендегі әсеріміз: пальмалар, иістер және қауіпсіздік
Біз Куала-Лумпурға Алматыдан тікелей ұшатын жалғыз әуе компаниясы — AirAsia лоукостерімен бардық. Бірден айтайын: ұшақ ескілеу, телевизоры жоқ, ал баланың билеті ересектермен бір бағада. Сегіз сағаттық ұшуды планшеттегі мультфильмдер мен ұлым үшін дайындап алған жеңіл-желпі тағамдар арқасында еңсердік. Ең жақсысы — түнгі рейс болған соң, ұлымыз жол бойы дерлік ұйықтап шықты.
Келген сәтте-ақ бізді қапырық, дымқыл ауа қарсы алды. Таксиге отырып, 8 мың теңгеге сансыз пальма ағаштары жанынан зу етіп өтіп, қала орталығына жеттік. Қала жасыл-желекке оранған екен — зәулім ғимараттар джунглидің ортасында орналасқандай әсер қалдырды.
Ең алдымен көзге түскені — контраст. Мұнда 60 қабатты мұнаралардың қасында ескі бес қабатты үйлер тұрады, ол жақта негізінен еңбек мигранттары тұратын сияқты. Тағы бір ерекшелік — қаланың иісі. Әрдайым жағымды деп айта алмаймын, әсіресе дуриан сататын дүңгіршектердің қасында. Бұл жемістің дәмін татып көрмедік, жай ғана жергілікті тұрғындардың «өте тәтті» деген сөзіне сендік.
Бірақ сапардың басынан соңына дейін мені қуантқан ең басты нәрсе — қауіпсіздік сезімі. Қаланың кез келген жерінде баламен жалғыз жүрсең де, ешқандай жайсыздық байқалмайды. Осы үшін Куала-Лумпур менің тарапымнан миллион ұпай алды.
Арбаға арналған қала
Куала-Лумпурдың қозғалысы шектеулі жандарға қаншалықты ыңғайлы екенін көріп, қатты таңғалдым. Пандустар, лифтер, метро мен сауда орталықтарындағы арнайы жолдар — бәрі ұсақ-түйегіне дейін ойластырылған. Осы екі аптаның ішінде мен Алматыда өмір бойы көргеннен де көп арбадағы адамдарды көрдім. Айтпақшы, метро ішінде тек әйелдер мен балаларға арналған бөлек вагондар да бар екен.
Ауа райының ыстығы мен ылғалдығы жаяу серуендеуге онша қолайлы емес, бұл қала көлікке бейімделген. Бірақ қоғамдық көлікпен жүру — бір ғанибет. Метро да, автобустар да кестеден ауытқымайды. Біз такси ретінде жергілікті Grab қосымшасын пайдаландық — Uber мен Glovo-ның қосындысы сияқты. Бағасы қолжетімді, ал тамақты рестораннан тез жеткізеді.
Түрлі қызықтар: төбедегі саябақ, жалғызмүйіз құстар және керемет кітап дүкендері
Біздің екі аптаға жасаған жоспарымыз өте қарапайым болды: ешқайда асықпау. Алғашқы күндері жай ғана тұрып жатқан ауданымызды зерттеп, сауда орталықтарын араладық (Куала-Лумпурда өмір сол жерден басталады десе де болады), қонақүйіміздің бассейнінде демалдық. Ұлымызға таңғы ас дайындау үшін әдейі асүйі бар апартамент таңдадық. TRX Exchange ауданында тұрдық — қайда барсаң да өте ыңғайлы жер екен.
Куала-Лумпурда баламен бірге қайда баруға болады?
Әйгілі Petronas Towers
Kinokuniya Malaysia дүкенінде
Құстар бағында
EXCHANGE TRX шатырындағы парк
Сол сауда орталығындағы кітап дүкені
The EXCHANGE TRX сауда орталығының төбесіндегі саябақ. Бұл жер біз үшін нағыз құтқарушы әрі сүйікті мекенге айналды. Күндіз сол маңдағы супермаркеттен азық-түлік алатынбыз (онда healthy meal бөлімі бар, сол жерден баламызға арналған тамақтарды алдық), ал кешке төртінші қабаттағы саябаққа баратынбыз. Тамаша жер! Әсіресе, субұрқақтары бар балалар аймағы — ұлымыз сол жерде асыр салып ойнайтын. Ең бастысы — қосымша киім алуды ұмытпаңыз.
Bird Park (Құстар саябағы). Куала-Лумпурда мені ең қатты таңғалдырған жер — осы. Өмірі үш-төрт түрлі құсты ғана көрген мен бұл жерде таңданысымды жасыра алмадым. Жасыл желекке көмкерілген кең аумақта тауыстар, тукандар мен түрлі түсті, ертегідегідей құстар дәл қасыңда емін-еркін жүреді. Әр тиынына тұрарлық орын (ересекетерге кіру — шамамен 13 мың теңге, 3 жасқа дейінгі балаларға — тегін). Баруға ең қолайлы уақыт — жұмыс күндері, адам аз кезде.
Aquaria KLCC мұхитаралы әлемі. Баланы екі-үш сағатқа қызықтырып қоюдың таптырмас жолы. Түрлі-түсті балықтар, акулалар, суасты туннелі — бәрі де балаларға ұнайтын классика. Кіру бағасы — шамамен 10 мың теңге.
Кітап дүкендері. Әсіресе Suria KLCC-дегі Kinokuniya Malaysia мен The EXCHANGE TRX-тегі MPH кітап дүкендері ұнады. Таңдау өте көп, түрлі тілдерде кітаптар бар, ең кереметі — балаларға арналған ойын бұрыштары бар, сол жерде балаңыз ойнап жатқанда өзіңіз еркін кітап қарап, оқи аласыз. Айтпақшы, балаларға арналған кітаптардың бағасы өте қолжетімді.
Urban Museum Kuala Lumpur. Малайзия мәдениетін тереңірек түсінгіңіз келсе, осы жерге барыңыз. Бұл — классикалық тарихи музей емес, елдің мәдени кодын заманауи өнер арқылы жеткізетін жекеменшік коллекция орналасқан кеңістік. Баламыздың өзі де ерекше инсталляцияларға қызығып қарап жүрді.
Тағамы: насилемак пен дәмді чизтарт
Асқа келгенде өзімізді шектемедік — жергілікті тағамдарды рақаттанып жедік. Мұндағы асхана негізінен күріш пен тауық етіне негізделген. Тағамдардың көбі — халал. Жақын маңдағы елдерден келген мигранттар көп болғандықтан, дәмхана мен мейрамхана таңдауы өте кең. Орташа есеппен бір адамға түскі немесе кешкі ас — 3–5 мың теңге шамасында.
Куала-Лумпурда неден дәм тату керек?
Насилемак
- Madam Kwan’s мейрамханасындағы насилемак. Бұл жерді бізге жергілікті достарымыз көрсетті. Заманауи стильде ұсынылған нағыз Малайзия тағамдары. Олардың басты тағамы — насилемак: кокос сүтінде піскен күріш, ащы самбал пастасы, анчоус, жержаңғақ және тауық еті. Дәмі керемет, бағасы да қалтаға қонымды.
- Tandoori chicken and naan. Көшеде кездейсоқ тап болған көзге көріне бермейтін пәкістандық‑үнді кафесінде нағыз гастрономиялық ләззатқа кенелдік. Шырынды тандыр тауық пен ыстық жұқа нан — мінсіз үйлесім.
- Nando’s-тағы тауық. Иә, бұл желілік фастфуд, бірақ өте дәмді! Ащылау, шырынды гриль тауық күрішпен бірге — тез әрі тойымды түскі ас ретінде таптырмас нұсқа.
- Hokkaido Cheese Tart. Өмірімде жеген ең дәмді чизтарт осы болды. Кілегейлі салмасы мен қытырлақ қабығы — үйлесімі таңғажайып. Тек аз жегеніме ғана өкінемін.
- Auntie Anne’s-тағы претцельдер. Балаларға (және тек оларға емес) арналған керемет жеңіл тіскебасар. Сонымен қатар қамырдағы шұжықтары да өте дәмді.
Қытай тағамдары мүлдем ұнамады. Иісі тым ерекше, маған жақпады. Ал Suria KLCC сауда орталығындағы фудкортқа баруға мүлде кеңес бермеймін — дәмсіз, көңілден шықпады.
Баламен барарда нені ескеру керек?
- Баланы тамақтандыру. Әдеттегі, үйреншікті тағамдарды табу оңай болмады, бірақ бәрі мүмкін. Мейрамханалардағы паста көбіне ащы болады — тіпті «no spicy» десең де. Бізді құтқарғаны — Mercato супермаркетіндегі дайын тағамдар бөлімі. Сол жерден дәмдеуішсіз пісірілген картоп немесе көкөністер сатып алуға болатын.
- Арба міндетті түрде қажет. Балаңыз жүре алса да, мұнда арақашықтық алыс болуы мүмкін, ал ауа райының ыстығынан тез шаршап қалады.
- Жемпір ала барыңыз. Сауда орталықтарында да, метро ішінде де кондиционерлер барынша қатты жұмыс істейді — тоңып қалу оп-оңай.
- Ақшаны айырбастамай-ақ қойыңыз. Мен барлық жерде картамен төлеп жүрдім.
Қорытынды
Егер сапардың алғашқы күнінде өзіме кеңес бере алсам, ол мынадай болар еді: «Уайымдама, рақаттанып демал. Бұл қала көңіліңді қалдырмайды». Куала-Лумпур — отбасылық демалыс үшін таптырмас қала. Мұнда мегаполиске тән жайлылық пен Азияға тән экзотика тамаша үйлесім тапқан. Қаланы танып-білу үшін 5–7 күн жеткілікті, ал содан кейін аралдарға аттануға болады. Келесі жолы біз дәл солай істемекпіз.
